November 09, 2020
By reception_isuarsivik

ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᐅᑉ ᑲᑎᖕᖓᔨᖏᑦ ᐸᕐᓇᓯᒪᓚᐅᔪᑦ ᑲᑎᖕᖓᓂᖃᕐᓂᒥᒃ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᓂᒻᒪᕆᒻᒥᒃ ᑮᓇᐅᔭᑎᒍᑦ ᐊᕐᕌᒍᖓᓄᑦ 2019–2020 ᐆᒃᑑᐱᕆ 14, 2020-ᒥ, ᑲᑎᑦᑕᕕᒻᒥ ᑰᑦᔪᐊᒥ. ᑭᓯᐊᓂ ᐊᒥᓱᖕᖑᐸᓪᓕᐊᓂᑯᖏᓐᓄᑦ COVID-ᒥᒃ ᖃᓂᒻᒪᓯᓖᑦ ᑯᐯᒃᒥ, ᑲᑎᖕᖓᔩᑦ ᖃᐅᔨᓴᑦᓯᐊᒪᕆᓚᐅᔪᑦ ᐊᓯᑦᔨᕙᓪᓕᐊᔪᒥᒃ ᖃᓄᐃᓕᖓᔪᒦᓐᓂᒥᒃ ᐱᕕᓕᒫᖓᓄᑦ ᐊᑦᑕᓇᕐᑐᒦᖁᔨᓚᐅᔪᖕᖏᓇᒥᒃ ᐃᓚᐅᔪᖁᑎᓕᒫᒥᓂᒃ.

ᐃᓱᒫᓗᑦᓯᐊᓱᑎᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᓇᐅᓕᒫᑦ, ᑲᑎᖕᖓᔩᑦ ᑐᑭᑖᓚᐅᔪᑦ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᖃᕆᐊᒥᒃ ᑮᓇᐅᔭᑎᒍᑦ ᐊᕐᕌᒍᖓᓄᑦ 2019–2020 ᖃᕆᑕᐅᔭᒃᑯᑦ. ᖃᕆᑕᐅᔭᑎᒎᕐᓂᖅ ᐱᔪᓐᓇᑎᑦᓯᔪᖅ ᑎᒥᐅᔪᒥᒃ ᒪᓕᓐᓂᑐᐃᓐᓇᐅᖏᑦᑐᒥᒃ ᐱᖁᔭᑎᒍᑦ ᐊᑐᕆᐊᓕᒻᒥᓂᒃ ᖄᖏᕐᓂᑯᓕᐅᕐᑎᐅᖏᑦᑑᓱᓂ ᑎᒥᐅᔫᑦᓱᓂ, ᑭᓯᐊᓂᓕ ᐃᑲᔪᕐᓯᓂᒐᓴᒻᒥᒃ ᐃᓘᓐᓇᖏᓐᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ, ᑌᒣᖏᓐᓇᓱᓂ, ᐱᒻᒪᕆᐅᓂᕐᐹᒥᒃ, ᐱᔪᓐᓇᑎᑦᓯᓱᓂ ᑐᓴᕐᑎᓯᓂᕐᒥᒃ ᐱᔭᕆᓯᒪᔭᑦᓯᐊᕌᓗᒻᒥᓂᒃ ᐊᕐᕌᒎᓚᐅᕐᑐᒥ. ᐃᓚᐅᔪᓕᒫᑦ ᓂᕈᐊᓚᐅᔪᑦ ᐊᖏᕐᓱᑎᒃ ᐃᓘᓐᓇᖏᓐᓂᒃ ᐱᖓᓱᓂᑦ ᑐᑭᑖᕈᑎᓂᒃ ᑐᑭᑖᕐᑐᓂᒃ ᐃᒫᒃ:

  • ᑭᓯᑦᓯᒍᑎᓕᒃ 20201023-1 / ᐃᓚᐅᔪᑦ ᐊᖏᕐᑐᑦ 2019-2020-ᒥ ᑮᓇᐅᔭᕐᑑᑎᕕᓂᕐᓂᒃ.
  • ᑭᓯᑦᓯᒍᑎᓕᒃ 20201023-2 / Raymond Chabot Grant Thornton ᑎᓕᔭᐅᔪᑦ ᑕᒻᒪᓯᒪᔪᕐᓯᐅᓚᖓᑎᓪᓗᒋᑦ ᑮᓇᐅᔭᑎᒍᑦ ᐊᕐᕌᒍᖓᓂᒃ 2020-2021 ᐊᒻᒪᓗ ᑲᔪᓯᑦᓯᐊᓗᑎᒃ ᑎᓕᔭᐅᒪᐅᑎᓕᒫᒥᓂᒃ $13,925.00-ᓄᑦ ᐃᓚᖃᕐᑎᓗᒋᑦ ᐊᑭᑦᑐᐸᓪᓕᐊᓂᕐᒥᒃ.
  • ᑭᓯᑦᓯᒍᑎᓕᒃ 20201023-3 / ᑲᑎᖕᖓᔩᑦ ᑎᓕᔨᕗᑦ ᐹᒪᓚ ᔅᑏᕙᓐᓴᓐᒥᒃ ᐊᒻᒪᓗ ᔩᓂ ᑳᓪᕕᓐᒥᒃ ᑲᑎᖕᖓᔨᐅᓚᖓᑎᓪᓗᒋᒃ ᑭᒃᒐᑐᕐᓗᑎᒃ ᐃᓄᓕᒫᓂᒃ ᐊᕐᕌᒍᓄᑦ ᐱᖓᓱᓄᑦ (3) ᑲᑎᖕᖓᔨᐅᓚᖓᓗᑎᒃ.

ᐊᑕᐅᓯᐅᓈᕐᑎᑐᑦ ᐴᕐᖃᓯᒪᔪᑦ ᐊᐅᓪᓚᑎᑕᐅᓚᐅᔪᑦ ᐆᒃᑑᐱᕆᒥ ᐃᓘᓐᓇᖏᓐᓄᑦ ᖁᓕᐅᖕᖏᒐᕐᑐᓄᑦ ᐃᓚᐅᔪᑦ ᐊᖓᔪᕐᖄᖏᓐᓄᑦ ᐊᒻᒪᓗ ᑐᑭᒧᐊᑦᑎᓯᔨᒻᒪᕆᖏᓐᓄᑦ. ᐃᓱᐊᕐᓯᕕᐅᑉ ᑲᑎᖕᖓᔨᖏᑦ ᓇᑯᕐᒦᕈᒪᔪᑦ ᑌᒃᑯᓂᖓ ᐱᓇᓱᐊᖃᑕᐅᓂᖏᓐᓄᑦ ᐊᒻᒪᓗ ᓴᐳᑦᔨᖏᓐᓇᓕᒫᕐᓂᖏᓐᓄᑦ, ᑌᓗᒋᑦ ᑲᑎᕕᒃ ᐃᓕᓴᕐᓂᓕᕆᓂᖅ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᒪᑭᕝᕕᒃ, ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ, ᑰᑦᔪᐊᑉ ᑲᕙᒫᐱᖓ, ᐊᕙᑕᖅ ᐱᐅᓯᑐᖃᓕᕆᕕᒃ, ᐃᓅᓕᑦᓯᕕᒃ ᐋᓐᓂᐊᕕᒃ- ᓄᓇᕕᒃ- ᑕᓯᐅᔭᕐᔪᐊᖅ, ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒃ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᖕᖓᔩᑦ.

Categories: ᓄᑖᖑᓂᕐᐹᑦ ᑐᓴᕋᑦᓭᑦ