ᑕᑯᓐᓇᑕᕗᑦ, ᐱᓇᓱᐊᕐᑕᐅᕗᑦ
ᐊᒻᒪᓗ ᐃᓪᓕᕆᔭᕗᑦ
.
1990-ᓚᐅᕐᑎᓇᒍ, ᑯᐯᒃ ᑲᕙᒪᖓ ᓄᓇᕕᒻᒥᐅᓄᑦ ᐱᑕᖃᕐᑎᓯᔪᕕᓂᖅ ᐱᒍᓐᓇᕕᖃᕐᑎᓯᑦᓱᓂ ᐅᐃᕆᒪᓂᕐᒧᑦ ᐱᒍᑦᔭᐅᒍᑎᓂᒃ ᐱᓇᓱᐊᕐᓂᒧᑦ Pavillon Foster-ᒥ ᒪᓐᑐᔨᐊᒥ.
ᐃᓄᖏᑦ 14 ᐃᓄᐃᑦ ᓄᓇᓕᖏᓐᓂ ᐊᐅᓚᒍᓐᓇᕕᖃᕐᑎᑕᐅᑦᓱᑎᒃ ᖃᖓᑦᑕᔫᒃᑯᑦ ᐊᒻᒪᓗ ᐊᓂᕐᕋᒥᓂ ᕿᒣᒪᓗᑎᒃ ᐅᓪᓗᓂ ᐊᒥᓲᓪᓗᐊᖏᑦᑐᓂ ᑕᕐᕿᓕᒫᒥᓪᓘᓃᑦ ᐃᑲᔪᕐᑕᐅᒍᑎᓂᒃ ᐊᑐᕐᓗᑎᒃ ᐱᓇᓱᐊᕐᓗᑎᒃ ᐋᖓᔮᓐᓇᑐᓂᒃ ᐊᑐᕐᓂᓗᓐᓂᒧᑦ.
ᑌᒪ 1995-ᒥ, ᐊᖏᓕᕙᓪᓕᐊᓕᕐᑎᓗᒍ ᑭᖕᖒᒪᓇᕐᓂᖓ ᓄᓇᓕᓕᒫᓂ ᐊᒻᒪᓗ ᐱᒍᒪᓕᕐᓱᑎᒃ ᐃᓗᕐᖁᓯᕐᒥᒃ ᐃᑉᐱᒋᔭᕐᓗᓂ ᐱᓇᓱᐊᕈᑎᓂᒃ, ᒪᑭᕝᕕᒃ ᐊᒻᒪᓗ ᔮᓂ ᐋᑕᒥ, ᓯᕗᓕᕐᑎᖓ ᓄᓇᓕᖓᓂ ᑰᑦᔪᐊᒥ, ᐱᓇᓱᐊᖃᑎᖃᓯᔪᕕᓂᖅ ᓄᐃᑦᓯᓂᕐᒥᒃ ᓄᓇᓕᓐᓃᑐᒥᒃ ᑎᒥᐅᔪᒥᒃ ᑰᑦᔪᐊᑐᖃᕐᒥ.
ᓇᑯᕐᒦᒃ ᖃᐅᔨᒪᓂᖓᓄᑦ ᐊᒻᒪᓗ ᑐᓂᓯᒪᓂᖓᓄᑦ ᐋᓐᓂᐊᓯᐅᕐᑎᒪᕆᒃ ᑖᒪᔅ ᑯᐊᑕ ᐳᔭᐅᓐ ᐊᒻᒪᓗ ᐱᓇᓱᖃᑎᖏᑦ Pavillon Foster-ᒥ, ᖃᓪᓗᓈᑎᑑᕐᑐᖅ ᐱᓇᓱᐊᕈᑎ ᐱᓇᓱᐊᕐᓂᖃᕐᓱᓂ ᐅᐃᕆᒪᓇᕐᑐᓂᒃ ᓄᐃᑎᑕᐅᔪᕕᓂᖅ. ᑖᓐᓇ ᐱᓇᓱᐊᕈᑎ ᐊᑐᐃᓐᓇᐅᔪᕕᓂ ᑰᑦᔪᐊᒥᐅᓄᑦ ᑭᓯᐊᓂ ᐊᒻᒪᓗ ᑖᑲᓂᒍᓐᓀᓗᑎᒃ ᑭᓯᐊᓂ ᐱᓇᓱᐊᕐᓂᐅᓱᓂ.
1995-ᒋᐊᓪᓚᒥ, ᐃᓱᐊᕐᓯᕕᒃ ᓄᓇᓕᓐᓂ ᓴᓇᖕᖑᐊᓕᐅᑎᑎᑦᓯᓂᕐᒥᒃ ᑕᕐᓴᖓᓂᒃ ᐱᒋᐊᕐᑎᓯᔪᕕᓂᖅ ᐊᑎᖓᓂᒃ ᐊᒻᒪᓗ ᑎᒥᐅᔫᓂᖓᓂᒃ ᐱᑕᓕᒻᒥᒃ ᐊᒻᒪᓗ ᑕᑯᑦᓴᐅᓂᖓᑕ ᓇᓗᓀᒃᑯᑕᖓᓂᒃ. ᓴᓇᖕᖑᐊᑕᕕᓂᖓ ᑰᑦᔪᐊᒥᐅᖅ ᐋᓕ ᑯᐊᑕᐅᑉ ᓇᓪᓕᑳᕐᑕᐅᔪᕕᓂᖅ ᑐᑭᓪᓚᕆᖓᓄᑦ ᑕᕐᓴᖓᑕ, ᑕᑯᑦᓴᐅᑎᑦᓯᔪᖅ ᐊᕚᓚᕿᐊᓂᒃ. ᐊᕚᓚᕿᐊᑦ ᓲᖑᓂᕐᐸᐅᓱᓂ ᐱᕈᕐᑐᖅ ᐅᑭᐅᕐᑕᑐᒥ ᐊᒻᒪᓗ ᐆᒪᒍᓐᓇᓱᓂ ᓂᓪᓚᓱᓐᓂᐹᒥ ᓯᓚᒥ ᓇᐹᕐᑐᓕᒻᒦᒐᓗᐊᕈᓂ ᓇᐹᕐᑐᖃᖕᖏᑐᒥᓪᓗᓃᑦ. ᓇᓗᓀᒃᑯᑕᐅᔪᖅ ᐊᓂᒍᐃᒍᓐᓇᓯᐊᕐᓂᒥᒃ. ᐊᕚᓚᕿᐊᑦ ᓄᑕᐅᓯᓕᕈᓐᓇᑐᖅ ᐃᒻᒥᓂᒃ ᐊᒻᒪᓗ ᐱᕈᒋᐊᓪᓚᕈᓐᓇᓱᓂ ᐊᕐᕌᒍᑕᒫᑦ ᓄᓇᕕᓕᒫᒥ, ᓄᐃᑕᑎᑦᓯᓚᐅᕐᒪᑦ ᑎᒥᐅᔪᖁᑎᕗᓐᓄᑦ ᐃᓚᒋᔭᐅᒋᐊᖃᕐᓂᖓᓂᒃ ᐊᓂᒍᐃᒍᓐᓇᓯᐊᕐᑐᖅ ᐱᕈᕐᑑᓱᓂ ᐃᓅᓯᖏᓐᓄᑦ ᐃᓄᐃᑦ ᓄᓇᒥ ᐃᓅᓯᕐᑖᕆᐊᓪᓚᕈᒪᔪᓄᑦ ᐅᕝᕙᓘᓐᓂᑦ ᐱᒋᐊᑦᓯᐊᓗᑎᒃ ᐃᓅᓯᕐᒥ ᐅᑎᕐᑕᓂᕐᒥᒃ ᐅᐃᕆᒪᓇᕐᑐᓄᑦ ᐊᒻᒪᓗ ᖁᐊᕐᓵᓯᒪᓂᕐᒧᓗ ᐱᑐᑦᓯᒪᔪᓂᒃ.
ᐊᕐᕌᒍᐃᑦ ᐊᓂᒍᕐᑐᑦ, ᑐᑭᓯᓇᕐᓯᓯᐊᓚᐅᕐᒪᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐊᒻᒪᓗ ᒪᑭᕝᕕᒃ ᑯᐊᐳᕇᓴᒃᑯᓄᑦ ᐃᓱᐊᕐᓯᕕᐅᑉ ᐱᒍᑦᔨᒍᑎᖏᑦ ᑭᖕᖒᒪᓇᕐᓂᖏᓐᓂᒃ ᐃᓄᓐᓄᒃ ᓄᓇᓕᓕᒫᓃᑦᑐᓄᑦ.
ᐱᒍᑦᔨᒍᑎᒋᐊᓪᓚᓂᒃ ᐱᑕᖃᕆᐊᖃᕐᓂᖓ ᓄᐃᑕᓂᖃᕐᒪᑦ ᐃᓄᓐᓄᒃ ᐅᐃᕆᒪᓇᕐᑐᓂᒃ ᐊᑐᕐᓂᓗᓐᓂᒥᒃ ᐱᓇᓱᐊᕐᑐᓄᑦ ᓄᓇᕕᒻᒥ. 1998-ᒥ, ᐃᓱᐊᕐᓯᕕᒃ ᐊᖏᕐᑐᕕᓂᖅ ᐅᒃᑯᐃᓯᓚᖓᓂᕐᒥᒃ ᑌᑲᓃᓪᓗᑎᒃ ᐱᓇᓱᐊᕈᑎᐅᓚᖓᔪᓂᒃ ᐃᓘᓐᓇᖏᓐᓄᑦ ᔦᒥᔅ ᐯ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥ ᐃᓚᐅᔫᔪᓄᑦ ᓱᕐᖃᔦᒪᔪᓄᑦ ᐅᐃᕆᒪᓇᕐᑐᓂᒃ ᐊᑐᕐᓂᓗᓐᓂᒧᑦ.
2000-ᖑᕋᑖᕐᑎᓗᒍ, ᐃᓱᐊᕐᓯᕕᒃ ᐊᒥᓱᒐᓚᓐᓂᒃ ᐱᓀᓗᑕᓕᕕᓂᖅ ᑎᒥᐅᔫᓂᕐᒥᓄᑦ ᐊᒻᒪᓗ ᑮᓇᐅᔭᖃᑦᓯᐊᖏᓐᓂᒥᓄᑦ ᐱᓀᓗᑕᓂᒃ. ᑭᓯᐊᓂ 2006-ᖑᓕᕐᑎᓗᒍ, ᓄᑖᖅ ᓯᕗᓕᕐᑎ ᐆᒻᒪᑎᑦᓯᒋᐊᓪᓚᑐᕕᓂᖅ ᐃᓱᐊᕐᓯᕕᐅᑉ ᑎᓕᔭᐅᒪᐅᑎᖏᓐᓂᒃ.
ᐊᑭᓕᕐᑐᑕᐅᒐᑎᒃ ᑲᑎᖕᖓᔨᖏᑦ ᑐᑭᑖᕐᑐᕕᓃᑦ ᐋᕐᕿᓱᐃᓂᕐᒥᒃ ᐊᑦᔨᐅᖏᑦᑐᒥᒃ ᑐᕌᕐᓂᖃᕋᓱᐊᕐᓂᒥᒃ ᐅᐃᕆᒪᓇᕐᑐᓂᒃ ᐊᑐᕐᓂᓗᓐᓂᒧᑦ ᒪᒥᓴᕐᑎᓯᓂᕐᒥᒃ. ᐋᕐᕿᓱᐃᔪᕕᓃᑦ ᐊᑑᑎᓯᒪᔪᓂᒃ ᐃᓄᓐᓂᒃ ᑐᓂᓯᒪᓂᖃᕐᓱᑎᒃ ᐱᒍᓐᓇᐅᑎᓕᓐᓂᒃ ᐊᒻᒪᓗ ᓄᓇᓕᓐᓂᒃ-ᑐᖕᖓᕕᖃᕐᑎᓗᒍ ᐊᑭᓕᕐᑐᑕᐅᖕᖏᑐᓂᒃ ᓄᓇᕕᒻᒥᐅᔭᓂᒃ ᐊᒻᒪᓗ ᐊᑕᐅᑦᓯᑰᕐᓗᑎᒃ, ᐋᕐᕿᓱᐃᔪᕕᓃᑦ ᓴᓇᓂᖃᕐᓱᑎᒃ ᒪᒥᓴᕐᓂᒧᑦ ᐱᓇᓱᐊᕈᑕᐅᔪᓂᒃ ᑐᖕᖓᕕᓕᓐᓂᒃ ᐃᓄᐃᑦ ᐃᓪᓕᕆᔭᖏᓐᓂᒃ ᐱᓇᓱᐊᕐᓂᖃᕐᑐᓂᒃ ᐃᓄᓐᓅᓕᖓᔪᓂᒃ ᖁᐊᕐᓵᓇᕐᑐᑰᕐᓯᒪᓂᕐᒧᑦ ᐊᒻᒪᓗ ᐃᓚᒋᐊᕐᓱᒋᑦ ᐱᐅᓂᕐᐹᓂᒃ ᐱᓇᓱᐊᕈᑎᓂᒃ ᐅᐃᕆᒪᓇᕐᑐᓄᑦ.
2016-ᒥ, ᐃᓱᐊᕐᓯᕕᒻᒥ ᓴᓗᐊᕐᓴᕕᒃ ᐃᓱᐊᕐᓯᕕᒃ ᓄᓇᓕᓕᒫᓂ ᒪᒥᓴᕐᕕᖑᕐᑐᕕᓂᖅ ᐊᒻᒪᓗ ᑲᑎᒪᔨᖏᑦ ᐊᑐᓕᕐᑎᓯᔪᕕᓃᑦ ᐱᕙᓪᓕᐊᑎᑦᓯᓂᕐᒧᑦ ᐸᕐᓇᓯᒪᐅᑎᓂᒃ ᑭᐅᒍᑎᒋᑦᓱᒋᑦ ᐊᖏᓕᕙᓪᓕᐊᔪᒧᑦ ᑭᖕᖒᒪᓇᕐᓂᖓᓄᑦ ᐊᒻᒪᓗ ᓯᕗᓪᓕᐅᔨᒋᐊᓕᖏᓐᓄᑦ ᓇᓗᓀᕐᑕᐅᒪᔪᓄᑦ ᐃᓄᖏᓐᓄᑦ ᓄᓇᕕᒻᒥ.
ᐸᕐᓇᓯᒪᐅᑎᒦᑦᑐᖅ ᓴᓇᓂᕐᒥᒃ ᓄᑖᒥᒃ ᐃᓪᓗᔪᐊᒥᒃ ᐊᒥᓲᓂᕐᓴᓂᒃ ᑐᖕᖓᓱᑦᑎᓯᒍᒪᓂᕐᒧᑦ ᐊᒻᒪᓗ ᐱᕕᖃᕐᑎᓯᓗᓂ ᐊᑐᕐᑕᐅᒐᔭᕐᑐᓂᒃ ᓄᑖᓂᒃ ᑖᒃᑲᓃᓪᓗᑎᒃ ᐱᓇᓱᐊᕈᑎᐅᒐᔭᕐᑐᓂᒃ ᐊᒻᒪᓗ ᐱᒍᑦᔨᒍᑎᓂᒃ, ᐱᓗᐊᕐᑐᒥ ᐃᓚᒌᓄᑦ ᐊᒻᒪᓗ ᐱᐊᕋᑦᓴᓕᓐᓄᑦ ᐊᕐᓇᓄᑦ. ᐊᑕᑦᓯᑰᕐᑎᓗᒋᑦ, ᑲᔪᒥᔪᒥᒃ ᑲᒪᒋᔭᖃᕐᓂᒧᑦ ᐱᒍᑦᔨᒍᑏᑦ ᐋᕐᕿᓱᕐᑕᐅᔪᕕᓃᑦ ᐱᑕᖃᕐᑎᓯᓂᕐᒧᑦ ᓄᓇᓕᓐᓃᑐᓂᒃ ᓴᐳᑦᔨᒍᑎᓂᒃ ᐃᓄᓐᓂᒃ ᓄᓇᓕᓕᒫᓂ.
ᓇᑯᕐᒦᒃ ᓄᓇᕕᒻᒥ ᐃᓗᓯᓕᕆᔨᒃᑯᓂᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ ᐊᒻᒪᓗ ᒪᑭᕝᕕᒃ ᑯᐊᐳᕇᓴᒥᒃ, ᐃᓱᐊᕐᓯᕕᒃ ᐱᒍᓐᓇᓯᓚᐅᕐᑐᖅ ᐃᓘᓐᓇᖏᓐᓄᑦ $43 ᒥᓕᐊᓂᒃ ᐃᓪᓗᓕᐅᕐᓂᒧᑦ ᐱᓇᓱᐊᕐᓂᒧᑦ ᑮᓇᐅᔭᖃᕐᑎᑕᐅᑦᓱᑎᒃ ᑲᕙᒪᖓᓄᑦ ᑲᓇᑕᐅᑉ – ᑕᒪᖏᓐᓂᒃ ᐱᓯᒪᔪᓂᒃ ᓴᓇᒪᔪᓕᕆᓂᕐᒧᑦ ᑲᓇᑕᒥ ᐊᒻᒪᓗ ᓄᓇᖃᕐᖄᓯᒪᔪᑦ ᐱᒍᑦᔭᐅᒍᑎᖏᓐᓂ ᑲᓇᑕᒥ – ᐊᒻᒪᓗ ᑲᕙᒪᖓᓂ ᑯᐯᒃᑯᑦ.
2019–ᒥ, ᐃᓱᐊᕐᓯᕕᒃ ᖁᕕᐊᓲᑎᖃᓚᐅᕐᑐᖅ ᐊᒥᓱᓂᒃ ᐊᑑᑎᓯᒪᔪᓂᒃ:
- ᓄᐃᑕᐅᒪᔪᖅ ᓄᑖᖅ ᐃᓪᓗᔪᐊᖅ ᐊᒻᒪᓗ ᓴᓇᔭᐅᓂᖓ ᐊᕐᖁᑎᑦᓴᖓᑕ,
- ᓴᓇᔭᐅᓂᖏᑦ ᓯᕗᓪᓕᐹᑦ ᓯᑕᒪᕕᑦᑕᕇᑦ ᐱᓇᓱᑦᑎᓄᑦ,
- ᐊᒻᒪᓗ ᐋᕐᕿᒋᐊᕆᓂᖅ ᓇᓗᓀᒃᑯᑕᖓᑕ ᐱᐅᓯᐅᒥᑎᒋᐊᕐᓱᒍ ᐊᒻᒪᓗ ᓄᑕᐅᓯᓕᕐᑎᓱᒍ ᓴᓇᖕᖑᐊᑕᐅᒋᐊᖕᖓᑐᕕᓂᖅ.
2020-ᒥ, ᓯᓚᕐᔪᐊᓕᒫᒥ ᖃᓂᒪᓐᓇᔪᐊᖅ 19 ᓱᒃᑯᐃᔪᕕᓂᖅ ᐃᓱᐊᕐᓯᕕᐅᑉ ᐱᒍᑦᔨᒍᑎᖏᓐᓂᒃ ᐊᒻᒪᓗ ᓴᓇᔭᐅᓂᑦᓴᖓᑕ ᐱᓇᓱᐊᕐᑕᐅᓂᑦᓴᖓᓂᒃ ᐅᓪᓗᖏᓐᓂᒃ ᐊᒻᒪᓗ ᑮᓇᐅᔭᖃᑎᑕᐅᒍᑎᖏᓐᓂᒃ.
ᓱᓕᒃᑲᓂᖅ, ᐃᓱᐊᕐᓯᕕᐅᑉ ᐃᓚᒌᖁᑎᖏᑦ ᓄᐃᑦᓯᔪᕕᓃᑦ ᑲᔪᓯᒍᓐᓇᓯᐊᕐᓂᒥᒃ ᐊᒻᒪᓗ ᓴᖑᒍᓐᓇᓯᐊᕐᓂᒥᒃ ᐊᓯᑦᔨᓂᕐᓄᑦ ᐊᒻᒪᓗ ᐃᓚᒋᐊᕈᑎᓂᒃ ᑮᓇᐅᔭᖃᕐᑎᑕᐅᓂᕐᒧᑦ ᐱᑖᕆᐊᓪᓚᒍᓐᓇᓯᑦᓱᑎᒃ ᐱᒋᐊᕐᑎᓯᓂᕐᒧᑦ ᓴᓇᔭᐅᓂᑦᓴᖏᓐᓂᒃ ᓄᑖᖅ ᐃᓗᔪᐊᖅ 2021-ᒥ.
2022-ᖑᕐᖃᒥᐅᑎᓪᓗᒍ, ᐃᓱᐊᕐᓯᕕᒃ ᐱᒋᐊᕐᑎᓯᔪᕕᓂᖅ ᐱᓇᓱᑦᑎᑖᕋᓱᐊᕐᓂᒥᒃ ᐊᒥᓱᓂᒃ ᓄᓇᕕᒻᒥ, ᐃᒣᓕᔪᒥᒃ ᐊᑎᓕᒻᒥᒃ ‘ᐃᓚᐅᒋᑦᓯ’.
ᑖᓐᓇ ᑲᔪᓯᑦᓯᐊᑐᕕᓂᖅ ᐱᓇᓱᑦᑎᑖᕋᓱᐊᕐᓂᖅ ᓄᐊᑦᓯᓂᖃᕐᑐᕕᓂᖅ 200-ᓂᒃ ᐱᓇᓱᒐᕐᑖᕋᓱᐊᕐᑐᓂᒃ ᐊᒻᒪᓗ 27-ᓂᒃ ᐃᓐᓄᓯᒪᖕᖏᑐᓂᒃ ᐱᓇᓱᒐᕐᓂᒃ ᐱᓇᓱᑦᑎᑖᕐᑎᓯᑦᓱᓂ ᐱᓇᓱᑦᑎᑖᕆᔭᐅᒋᐊᓕᕕᓃᑦ ᓄᑖᓂᒃ ᐱᒍᑦᔨᒍᑎᓂᒃ ᐱᑕᖃᕐᑎᓯᒋᐊᖃᕐᓂᒧᑦ ᐊᖏᓕᒋᐊᕐᑎᓯᓂᕐᒧᑦ. ᔭᓄᐊᕆ 2023-ᒥ, ᐃᓱᐊᕐᓯᕕᒃ ᓅᑦᑐᕕᓂᖅ ᓄᑖᒧᑦ ᐃᓪᓗᔪᐊᖁᑎᒥᓄᑦ ᐊᒻᒪᓗ ᐲᕈᑎᑖᕐᓱᓂ ᒪᕐᕈᒋᐊᓪᓛᓄᑦ ᓯᑕᒪᕕᑦᑕᓕᓐᓄᑦ ᐱᓇᓱᑦᑎᖁᑎᒥᖏᑦᑕ ᐃᓪᓗᓴᖏᓐᓄᑦ.
2023-ᖑᕐᖃᒥᐅᑎᓪᓗᒍ, ᐃᓱᐊᕐᓯᕕᒃ ᐃᓚᐅᓕᕐᑎᓯᔪᕕᓂᖅ 55-ᓂᒃ ᐱᓇᓱᑦᑎᓂᒃ ᐃᓚᐅᑎᑦᓯᓂᒃᑯᑦ, ᐱᔭᕇᕐᓯᒪᔪᑎᒍᑦ ᐊᒻᒪᓗ ᐱᓇᓱᐊᕆᐊᓕᒻᒪᕆᐅᑦᓱᓂ ᐱᒋᐅᕐᓴᑎᑦᓯᓂᕐᒧᑦ ᐱᓇᓱᐊᕈᑎᓂᒃ.
ᐁᕆᓕ 12-ᒥ, ᓴᓗᐊᕐᓯᕕᒃ ᑐᖕᖓᓱᑦᑎᓯᓐᓂᒥᔪᖅ ᓯᕗᓪᓕᐹᓂᒃ ᑌᑯᖕᖓᑐᓂᒃ ᓄᑖᒧᑦ ᐃᓪᓗᔪᐊᒧᑦ, ᐃᓚᐅᑎᓪᓗᒋᑦ ᐊᒥᓱᒐᓓᑦ ᐅᕕᒐᕐᑐᐃᑦ, ᐃᓚᐅᓚᖓᑦᓱᑎᒃ ᐱᓇᓱᐊᕈᓯᕐᓂ ᓯᑕᒪᐅᔪᕐᑐᓂ ᐃᓚᒌᓄᑦ ᒪᒥᓴᕐᓂᒧᑦ ᐱᓇᓱᐊᕐᓂᐅᔪᓄᑦ. ᓄᑖᖅ ᐱᓇᓱᐊᕐᑎᓯᒍᑎ ᐊᒻᒪᓗ ᒪᒥᓴᕐᑎᓯᕕᒃ ᐱᑕᖃᕐᑎᓯᔪᖅ ᐊᑦᔨᐅᖏᑦᑐᓂᒃ ᐋᕐᕿᓱᐃᒍᑎᓂᒃ ᐊᑑᑎᒍᑎᓂᒃ ᐋᕐᕿᓱᕐᑕᐅᓯᒪᔪᓂᒃ ᐃᓄᓐᓅᓕᖓᔪᓕᐊᕆᑦᓱᒋᑦ ᓄᓇᕕᒻᒥ ᐃᑲᔪᕐᓯᒍᑎᓂᒃ ᐋᕐᕿᓱᐃᓂᕐᒧᑦ ᖁᐊᕐᓴᓇᕐᑐᑰᕈᑕᐅᓯᒪᔪᓂᒃ ᑭᖑᓂᕐᒥ ᐊᒻᒪᓗ ᐊᓂᒍᐃᔪᓐᓇᓗᓂ ᐋᖓᔮᓐᓇᑐᓂᒃ ᐊᑐᕐᓂᓗᓐᓂᒧᑦ ᐱᐅᓯᕐᓲᑎᓂᒃ.
ᐃᓱᐊᕐᓯᕕᒃ ᕿᓚᓈᕐᑐᖅ ᖁᕕᐊᓲᑎᖃᓛᕐᓂᒥᓂᒃ ᐊᕐᕌᒍᓂ 30–ᓂᒃ ᐅᓪᓗᖁᑎᖃᓛᕐᓂᖓᓂᒃ 2025-ᒥ ᑖᒃᑯᓇᓂ ᓄᑖᓂ ᓲᖑᔪᓂᒃ ᑐᖕᖓᕕᓕᓐᓂᒃ ᐊᒻᒪᓗ ᑲᔪᓯᓚᖓᑦᓱᓂ ᓯᕗᓕᕐᓂᒥᒃ ᐃᑲᔪᕐᓂᒥᒃ ᒪᒥᓴᕐᓂᒧᑦ ᐃᓘᓐᓇᖓᓂ ᓄᓇᕕᓕᒫᒥ.
ᓯᕗᓂᕐᒧᑦ ᑕᑯᓐᓇᑕᕗᑦ
ᓇᓪᓕᒍᓱᑦᑐᑦ, ᓴᐱᓕᔪᐃᑦᑐᐃᑦ ᐊᒻᒪᓗ ᑲᑦᓱᙰᑦᑐᐃᑦ ᐃᓄᑐᐃᓐᓀᑦ ᐃᓅᔪᑦ ᐊᑦᑕᓇᕐᑐᒦᓐᓇᖏᑦᑐᓂ ᐊᒻᒪᓗ ᖃᓄᐃᖕᖏᓯᐊᕐᓇᑐᓂ ᓄᓇᓕᓐᓂ.
ᐱᔭᕆᒐᓱᐊᕐᑕᕗᑦ
ᐱᓇᓱᐊᕐᑐᖅ ᐃᓗᐃᑦᑐᓂᒃ ᐃᓗᕐᖁᓯᒃᑰᓱᑎᒃ ᒪᒥᓴᕐᓂᓂᒃ ᓄᓇᕕᒻᒥᐅᓄᑦ ᐃᓗᒃᑯᑦ ᓲᖑᓯᐅᒥᑎᑦᓯᓱᓂ ᐊᒻᒪᓗ ᖃᓄᐃᖕᖏᓯᐊᓕᐅᒥᑎᑦᓯᓱᓂ.
ᐃᓪᓕᕆᔭᕗᑦ
ᐃᓱᐊᕐᓯᕕᐅᑉ ᑐᑭᖓ ᐃᓄᒃᑎᑐᑦ ᒪᒥᓴᕐᕕᒃ.
ᐃᓅᖃᑎᓐᓂᒃ ᓲᓱᑦᓴᓯᐊᕐᓂᒥᒃ (ᐃᓅᖃᑎᒌᑦᓯᐊᓂᖅ)
ᓲᓱᑦᓴᓂᖅ ᐊᓯᒥᓂᒃ, ᐃᓅᖃᑎᖃᑦᓯᐊᓂᕐᒥᒃ ᐱᑕᖃᕐᑎᓯᓂᖅ ᐊᒻᒪᓗ ᑲᒪᑦᓯᐊᓂᕐᒥᒃ ᐃᓄᓐᓂᑦ
ᑐᖕᖓᓇᕐᓂᖅ
ᑲᔪᓯᑎᑦᓯᓯᐊᕐᓂᖅ ᐊᓕᐊᓇᕐᑐᓂᒃ ᐅᒃᑯᐃᖔᑦᓯᐊᓂᒃᑯᑦ, ᑐᖕᖓᓱᑦᑎᓯᓂᖅ ᐊᒻᒪᓗ ᐃᓚᐅᑎᑦᓯᓯᐊᕐᓂᖅ
ᐱᔨᑦᓯᓂᖅ
ᐱᔨᑦᓯᓂᖅ ᐊᒻᒪᓗ ᐱᑕᖃᕐᑎᓯᓂᖅ ᐃᓚᒌᓄᑦ ᐊᒻᒪᓗ/ᐅᕝᕙᓘᓐᓃᑦ ᓄᓇᓕᒻᒧᑦ
ᐋᔨᖃᑎᒌᓐᓂᖅ/
ᖃᓄᕐᑑᖃᑎᒌᓐᓂᖅ
ᑐᑭᑖᕐᓂᖅ ᐅᖄᖃᑎᒌᑦᓱᑎᒃ ᐊᒻᒪᓗ ᐊᖏᖃᑎᒌᓐᓂᑯᑦ
ᐱᔭᕆᐅᕐᓴᓂᖅ/ᐃᓕᓐᓂᐊᓂᖅ
ᐱᒍᓐᓇᓯᕙᓪᓕᐊᓂᖅ ᑕᑯᓐᓇᓂᒃᑯᑦ, ᐃᓕᓐᓂᐊᑎᑦᓯᓂᒃᑯᑦ, ᐱᒋᐅᕐᓴᓂᒃᑯᑦ ᐊᒻᒪᓗ ᐱᒐᓱᐊᕐᓂᑯᑦ
ᐃᑲᔪᕐᑎᒌᓐᓂᖅ/
ᑲᑐᑦᔨᖃᑎᒌᓐᓂᖅ
ᐱᓇᓱᐊᖃᑎᒌᓐᓂᖅ ᐱᑦᔪᑎᒋᔭᐅᔪᒧᑦ
ᖃᓄᕐᑑᓂᖅ/
ᖃᓄᕐᑑᕈᓐᓇᓂᖅ
ᓄᑖᓂᒃ ᓄᐃᑦᓯᖃᑦᑕᓗᓂ ᐊᒻᒪᓗ ᓴᓇᑐᔫᓗᓂ
ᐊᕙᑎᑦᑎᓂᒃ ᐃᑉᐱᒍᓱᑦᓯᐊᓂᖅ
ᓲᓱᑦᓴᓂᖅ ᓄᓇᒥᒃ ᑲᒪᒋᑦᓯᐊᓗᒍᓗ, ᐆᒪᔪᓂᒃ ᐊᒻᒪᓗ ᐊᕙᑎᑦᑎᓂᒃ