ᑐᓂᔭᐅᔪᑦ ᐊᒻᒪᓗ
ᐃᓕᑕᕆᔭᐅᒍᑎᕗᑦ
ᐃᓕᑕᕐᓯᔩᑦ ᐱᒍᓐᓇᓂᖏᓐᓂᒃ ᑲᓇᑕᒥ
ᐃᓕᑕᕐᓯᔩᑦ ᐱᒍᓐᓇᓂᖏᓐᓂᒃ ᑲᓇᑕᒥ ᐃᒻᒥᒎᕐᑐᖅ, ᖄᖏᕐᓂᑯᓕᐅᕐᑎᐅᖏᑦᑑᓱᓂ ᑎᒥᐅᔪᖅ ᒪᓕᑦᑕᐅᒋᐊᓕᓐᓂᒃ ᐋᕐᖀᓲᖅ ᐱᓇᓱᐊᕈᓯᑦᓯᐊᖑᓂᕐᐹᑦ ᐊᑐᕐᓱᒋᑦ ᓱᓕᒋᐊᖓᓗ ᓇᓗᓀᕐᑕᐅᓲᖑᑦᓱᓂ ᐃᓗᓯᓕᕆᔨᓄᑦ ᑎᒥᐅᔪᓄᑦ ᓄᓇᕐᔪᐊᓕᒫᒥ. ᐃᓕᑕᕐᓯᓂᖅ ᐱᒍᓐᓇᓂᖏᓐᓂᒃ ᐃᓚᖃᕐᑐᖅ ᓇᐅᑦᓯᑐᐃᓂᕐᒥᒃ ᐱᐅᓂᖓᓂᒃ ᐊᒻᒪᓗ ᐊᑦᑕᓇᕐᑐᒦᓐᓇᖏᓐᓂᖓᓂᒃ ᑎᒥᐅᔪᖁᑎᑦᑕ ᐱᓇᓱᐊᕐᓂᖏᓐᓂᒃ ᐊᒻᒪᓗ ᐱᒍᑦᔨᓂᖏᓐᓂᒃ ᐊᒻᒪᓗ ᐱᖓᔪᒋᔭᐅᔪᓂᒃ ᖃᐅᔨᓴᓲᖑᑦᓱᓂ ᓄᐃᑕᑎᑦᓯᓱᓂ ᓱᓀᑦ ᐱᓇᓱᐊᕐᑕᐅᓯᐊᕐᒪᖔᑕ ᐊᒻᒪᓗ ᓱᓀᑦ ᐱᐅᓯᒋᐊᕆᐊᖃᕐᒪᖔᑕ.
ᑐᓂᔭᕕᓂᖅ 2017-ᒥ Accreditation Primer-ᒥᒃ ᐃᓕᑕᕐᓯᒍᑎᒥᒃ, ᐃᓱᐊᕐᓯᕕᒃ ᓇᒻᒥᓂᖅ ᖃᐅᔨᓴᕐᓂᒪᕆᖃᕐᓯᒪᔪᖅ ᒪᐃ 2019-ᒥ. ᑌᒣᒻᒪᑦ, ᓯᓚᑖᓂᑦ ᐱᓯᒪᔪᑦ ᐊᐱᕐᓱᓂᒃᑯᑦ ᖃᐅᔨᓴᕐᑏᑦ ᖃᐅᔨᓴᕐᓂᖃᓚᐅᔪᑦ ᐃᓱᐊᕐᓯᕕᒻᒥ ᖃᐅᔨᓴᕐᓱᑎᒃ ᐃᓱᐊᕐᓯᕕᐅᑉ ᓯᕗᓕᕐᑎᖏᓐᓂᒃ, ᐊᐅᓚᑕᐅᓂᖓᓂᒃ, ᐃᓱᐊᕐᓭᓂᖏᓐᓂᒃ ᐊᒻᒪᓗ ᐱᒍᑦᔨᓂᕐᓂᒃ ᐃᓕᑕᕐᓯᔩᑦ ᐱᒍᓐᓇᓂᖏᓐᓂᒃ ᑲᓇᑕᒥᒃᑯᑦ ᒪᓕᑦᑕᐅᒋᐊᓕᖁᑎᖏᑦ ᑕᑯᓐᓇᓱᒋᑦ ᐱᐅᓂᖓᓄᑦ ᐊᒻᒪᓗ ᐊᑦᑕᓇᖕᖏᓂᖓᓄᑦ. ᑖᒃᑯᐊ ᒪᓕᑦᑕᐅᒋᐊᓖᑦ ᐃᓚᓖᑦ ᑲᓇᑕᓕᒫᒥ ᒪᓕᑦᑕᐅᒋᐊᓕᓐᓂᒃ ᒪᓕᑦᑕᐅᒋᐊᓖᑦ ᐅᖓᑖᓄᑦ ᐱᑦᓯᐊᓂᕐᒧᑦ, ᐊᑦᑕᓇᕐᑐᒦᑦᑌᓕᒍᑏᑦ ᒥᑭᓕᒋᐊᕋᓱᓪᓗᒍ ᓱᒃᑯᑐᐃᓐᓇᕆᐊᖃᕐᓂᖅ; ᐊᒻᒪᓗ ᐊᐱᕐᓲᑏᑦ ᖃᐅᔨᓴᕈᑏᑦ ᐱᓇᓱᕝᕕᐅᔪᒥᒃ, ᐱᒍᑦᔭᐅᔪᑦ ᐊᑦᑕᓇᕐᑐᒦᑦᑌᓕᒍᓯᖏᑦ, ᐊᐅᓚᑦᓯᓂᖅ ᐊᒻᒪᓗ ᐱᒍᑦᔭᐅᔪᑦ ᐊᑑᑎᓯᒪᔭᖏᑦ.
2019-ᒥ, ᐃᓱᐊᕐᓯᕕᒃ ᐃᓗᐃᒃᑲᖑᕐᑎᓯᓚᐅᕐᑐᖅ ᐱᔪᓐᓇᐅᑎᑖᕈᑎᒥᓂᒃ Canada-ᒥ ᐱᔭᕇᒍᑎᒋᑦᓯᐊᓱᒍ ᐊᒻᒪᓗ ᐱᓯᒪᓕᕐᓱᓂ ᐱᔪᓐᓇᐅᑎᖁᑎᖏᓐᓂᑦ ᐅᑯᐊ Qmentum International Accreditation.
ᓯᕗᓪᓕᐹᑦᓯᐊᖅ ᐊᑑᑎᓚᐅᕐᓯᒪᖕᖏᑐᖅ ᐃᓗᓯᓕᕆᓂᕐᒧᑦ ᑎᒥᐅᔪᖅ ᓄᓇᕕᒻᒥ ᐱᑖᕐᓯᒪᔪᖅ ᑖᑦᓱᒥᖓ ᐅᐱᓐᓇᑐᒥᒃ ᐊᑦᔨᐅᖏᑦᑐᒥᒃ ᓄᐃᑕᑎᑦᓯᓯᐊᕐᑐᒥᒃ ᐱᓇᓱᐊᕈᓯᑦᓯᐊᖑᓂᕐᐹᓂᒃ ᐱᐅᔫᓂᒃᑯᑦ ᐊᒻᒪᓗ ᐊᑦᑕᓇᕐᑐᒦᓐᓇᖏᓐᓂᑯᑦ ᐊᑐᕐᑕᐅᒋᐊᓖᑦ ᐅᖓᑖᓄᑦ ᐱᑦᓯᐊᓱᓂ.
Prix Inspiration Arctique 2022
ᐃᓱᐊᕐᓯᕕᒃ ᓲᓱᒋᔭᐅᒋᐊᒥᒃ ᓇᑯᕐᓴᑐᒃ ᐅᐱᒍᓱᑦᓱᓂᓗ 2021 Arctic Inspiration Prize-ᒥᒃ (AIP) ᑐᓂᔭᐅᒋᐊᒥᒃ ᐱᓇᓱᐊᕐᑕᒥᓄᑦ $1-ᒥᓕᐊᓐ ᑮᓇᐅᔭᓂᒃ ᓇᓗᓀᕐᑕᐅᒪᓂᓕᒻᒥᒃ ᐃᓚᒌᑎᒍᑦ ᐊᖕᖏᐊᖏᔭᖃᑎᒌᓐᓂᖅ ᐃᓗᕐᖁᓯᑦᑎᒍᑦ, ᐅᕝᕙᓘᓐᓃᑦ “Family at the Heart of the Healing Process” ᓚᔭᐅᔪᒥᒃ ᖃᓪᓗᓈᑎᑐᑦ. ᐱᓇᓱᐊᕐᑕᐅᓂᖓ ᒪᓂᔨᒍᑎᓕᒃ ᖃᓄᕐᑑᕈᑎᖃᕐᓂᒥᒃ ᐅᐃᕆᒪᐅᑏᑦ ᐊᑐᕐᓂᓗᑦᑕᐅᓂᖏᓐᓂᒃ ᓵᖕᖓᔭᖃᕐᓱᓂ ᐃᓄᐃᑦ ᑭᓇᐅᓂᕐᒥᓂᒃ ᐃᓕᕐᖁᓯᒥᓂᓗ ᐅᑎᕐᑎᓯᒋᐊᕈᑎᖃᕐᓂᖏᓐᓂᒃ, ᐊᒻᒪᓗ ᐱᑐᑦᓯᒪᓂᖏᓐᓂᒃ ᓄᓇᒧᑦ. ᐱᓇᓱᐊᕐᑕᐅᓂᖓ ᐱᕕᑦᓴᖃᕐᑎᓯᓛᕐᑐᑦ ᐃᓚᒌᓂᒃ ᒪᓂᓴᕈᓐᓇᕕᖃᕐᓗᑎᒃ ᐊᑕᐅᑦᓯᑯᑦ. ᐃᓄᐃᑦ ᐃᓪᓕᕆᔭᖏᑦ ᐱᕐᖁᓯᖏᓪᓗ ᑐᖕᖓᕕᒋᔭᐅᓪᓚᕆᓛᕐᑐᑦ ᐱᓇᓱᐊᕐᓂᒥ, ᐊᑐᐃᓐᓇᐅᓛᕐᓱᑎᒃ ᐃᓚᒌᓄᑦ ᐃᓱᐊᕐᓯᕕᑦᓴᒥ ᓄᑖᒥ ᐅᒃᑯᐃᓛᕐᑐᒥ 2023-ᖑᓕᕐᐸᑦ.
ᓴᐳᑦᔭᐅᓱᓂ ᓄᓇᕕᓕᒫᒧᑦ, ᐃᓚᒌᑎᒍᑦ ᐊᖕᖏᐊᖏᔭᖃᑎᒌᓐᓂᖅ ᐃᓗᕐᖁᓯᑦᑎᒍᑦ ᐱᓇᓱᐊᕐᑕᐅᓂᖓ ᑎᒃᑯᐊᑕᐅᓂᖃᓚᐅᔪᖅ ᑯᔨᔅᑏᓐ ᐹᓈᑦᒧᑦ, ᑲᒪᔨ ArcticNet-ᑯᓐᓄᑦ ᐃᑲᔪᕐᓯᔭᐅᑦᓱᓂ ᑭᒡᒐᑐᕐᑎᓄᑦ ᐊᒻᒪᓗ ᑎᒥᐅᔪᓄᑦ ᐊᑦᔨᒌᖕᖏᑐᓄᑦ.
- ᑕᓃ ᓚᒫᑦ, ᑯᐯᒃ ᑲᕙᒪᖓ
- ᐱᑕ ᐋᑕᒥ, ᒪᑭᕝᕕᒃ
- ᔨᐊᓂᕙ ᒪᓂᖅ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ
- ᒥᓂ ᑯᔩ, ᓄᓇᕕᒻᒥ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᐱᑦᔪᔨᕕᖓ
- ᓛᔨ ᒍᐊᑦ, ᐅᖓᕙᐅᑉ ᐋᓐᓂᐊᕕᖓ
- ᕉᓰᓇ ᐃᒪᖅ, ᖃᕐᔪᐃᑦ ᐅᕕᒃᑫᑦ ᑲᑎᒪᕕᖓ
- ᒥᓂ ᒫᓕ ᓯᓅᐹ, ᖃᕐᒫᐱᒃ
- ᐁᓖᓐ ᒪᑭᓇᓐ, ᓴᕿᔪᖅ
- ᓵᒥ ᖁᖏᐊᖅ, ᑰᑦᔪᐊᑉ ᓄᓇᓕᖓᑕ ᓯᕗᓕᕐᑎᖓ
ᐃᓚᒌᑎᒍᑦ ᐊᖕᖏᐊᖏᔭᖃᑎᒌᓐᓂᖅ ᐃᓗᕐᖁᓯᑦᑎᒍᑦ ᑕᓪᓕᒪᒋᔭᐅᓕᕐᑐᖅ ᓄᓇᕕᒻᒥᐅᑎᒍᑦ ᐱᓇᓱᐊᕐᑕᐅᔪᓂ Arctic Inspiration Prize-ᒥᒃ, ᐊᒻᒪᓗ ᓯᕗᓪᓕᐸᐅᑦᓱᓂ ᑐᓂᔭᐅᓂᕐᒥᒃ $1 ᒥᓕᐊᓐ ᑮᓇᐅᔭᓂᒃ.
ᐃᓕᑕᕆᔭᐅᒍᑎᑖᕐᓯᒪᔪᖅ ᑯᐯᒃ ᑲᕙᒪᖓᑕ
ᐃᓗᓯᓕᕆᓂᕐᒧᑦ ᐃᓅᓯᓕᕆᓂᕐᒧᓗ
ᐱᑦᔪᔨᕕᖓᑕ ᑐᕐᑲᑕᕐᕕᖓᓂᒃ
2021 ᓈᓕᕐᑎᓗᒍ, ᐃᓱᐊᕐᓯᕕᒃ ᓄᓇᓕᓕᒫᓂ ᒪᒥᓴᕐᕕᒃ ᐁᑦᑐᑕᐅᓚᐅᔪᕗᖅ ᐱᑦᓯᐊᓚᕆᓐᓂᒧᑦ 2020-ᒥ ᓵᓚᖃᐅᑎᑖᕐᓱᓂ, ᑐᕐᖃᑕᕐᕕᒧᑦ ᓇᓪᓕᑳᕐᑕᐅᓯᒪᑦᓱᓂ ᓄᐃᑕᓯᐊᕆᐊᖓ, ᓄᓇᓕᓐᓂ ᑎᒦᑦ ᐱᑐᑦᓯᒪᐅᑎᕕᖓᓃᑦᓱᓂ. ᐊᕐᕌᒍᑕᒫᑦ, ᑐᕐᖃᑕᕐᕕᒃ ᐃᓗᓯᓕᕆᓂᕐᒧᑦ ᐊᒻᒪᓗ ᐃᓅᓯᓕᕆᓂᕐᓄᑦ ᑯᐯᒻᒥ (MSSS) ᐃᓕᑕᕐᓯᓲᖅ ᑕᑯᑦᓴᓯᐊᓂᒃ ᑐᓂᕐᕈᓯᒍᑎᓕᓐᓂᒃ ᑎᒥᓂᒃ ᐃᓚᐅᑦᓱᑎᒃ ᐃᓗᓯᓕᕆᓂᕐᓂᒃ ᐊᒻᒪᓗ ᓄᓇᓕᓐᓂ ᐱᓇᓱᐊᕐᑐᓂᒃ ᑐᓂᔨᑦᓱᓂ ᓵᓚᖃᐅᑎᓂᒃ ᐱᑦᓯᐊᓚᕆᓐᓂᓄᑦ. ᓲᓱᒋᔭᐅᓂᕐᐸᐅᓲᖅ ᑐᕐᖃᑕᕐᕕᐅᑉ ᓇᓪᓕᑳᕐᓯᒪᔭᖏᑦ ᐱᓪᓚᕆᑦᓯᐊᑎᑦᓯᒍᑎᖃᕐᓂᓄᑦ, ᓄᓇᓕᓐᓂ ᑎᒥᓂ ᐱᑐᑦᓯᒪᐅᑎᕕᒻᒥ, ᑕᕝᕙᓂ ᐊᕐᕌᒍᒥ ᐃᓱᐊᕐᓯᕕᐅᑉ ᐁᑦᑐᑕᐅᒍᑎᒋᔭᖓᓂᒃ. ᑖᓐᓇ ᓯᕗᓪᓕᐹᒥ ᐱᔭᐅᓚᕿᓚᐅᑐᖅ ᓄᓇᕕᒻᒥ ᑎᒥᒧᑦ ᖁᕕᐊᓲᑕᐅᓚᐅᔫᖅ ᑎᓯᒻᐱᕆ 10-ᒥ ᐃᑭᑦᑐᐃᑦ ᑲᑎᒍᑎᖃᕐᑎᓗᒋᑦ ᐃᑉᐱᒋᔭᐅᑦᓯᐊᑎᓗᒋᑦ ᖃᓂᒪᓐᓇᒥᒃ ᐁᑦᑐᑑᑎᑦᑌᓕᓃᑦ. ᓄᓇᕕᒻᒥ ᓄᓇᓕᓕᒫᓂ ᐃᓗᓯᓕᕆᓂᕐᓄᑦ ᑲᑎᒪᔩᑦ (NRBHSS) ᑎᓕᔭᐅᓚᐅᔫᑦ ᐁᑦᑐᐃᖁᔭᐅᑦᓱᑎᒃ ᐃᓱᐊᕐᓯᕕᒻᒥᒃ ᑭᒡᒐᑐᕐᓗᒍ MSSS. ᓯᕗᓪᓕᐸᐅᑦᓱᓂ ᐊᑑᑎᓯᒪᔪᓂ ᐃᓗᓯᓕᕆᓂᕐᒧᑦ ᐊᒻᒪᓗ ᐃᓅᓯᓕᕆᓂᕐᒧᑦ ᐱᒍᑦᔨᒍᑎᓄᑦ ᑎᒥᐅᔪᑦ ᓄᓇᕕᒻᒥ ᐁᑦᑐᑕᐅᔪᕕᓂᖅ ᐱᐅᓂᕐᐹᒥᒃ ᐃᓕᑕᕆᔭᐅᒍᑎᖃᕐᓱᓂ ᓄᐃᑕᑎᑦᓯᓱᓂ ᐱᐅᔪᓂᒃ ᐱᓇᓱᐊᕈᑎᓂᒃ ᐱᐅᔫᓂᖏᑦ ᐱᑦᔪᑎᒋᑦᓱᒋᑦ ᐊᒻᒪᓗ ᐊᑦᑕᓇᖕᖏᑑᓂᖓᓄᑦ.
ᑯᐯᒃ ᐊᑦᑕᓇᕐᑐᒦᑦᑎᓯᑦᑌᓕᒋᐊᕐᓂᒧᑦ ᑐᕐᖃᑕᕐᕕᖓ
2019-ᒥ, ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᒃ ᑐᓂᔭᐅᔪᕕᓂᖅ ᐃᓕᑕᕆᔭᐅᒍᑎᓪᓚᕆᒻᒥᒃ ᑯᐯᒻᒥ ᑐᕐᖃᑕᕐᕕᖓᓄᑦ ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ . ᐃᓱᐊᕐᓯᕕᒃ ᐊᓪᓚᑕᐅᓯᒪᖃᑕᐅᓕᕐᑐᖅ ᐃᓚᐅᑦᓱᓂ 40-ᓄᑦ ᑎᒥᐅᔪᓄᑦ ᐃᓕᑕᕆᔭᐅᔪᓄᑦ ᑯᐯᒻᒥ ᑎᒍᔭᐅᒪᕕᓕᕆᔨᖏᓐᓄᑦ ᐊᑐᐃᓐᓇᐅᑎᑦᓯᓂᕐᒧᑦ ᐅᐃᕆᒪᐅᑎᓄᑦ ᐱᒍᑦᔨᒍᑎᓂᒃ ᐊᒻᒪᓗ ᑌᑲᓃᓪᓗᑎᒃ ᒪᒥᓴᕐᓂᓄᑦ. ᑖᓐᓇ ᐊᑯᓂ ᐅᑕᕐᕿᔭᐅᔪᖅ ᐱᔪᓐᓇᓂᕃᒍᑎ ᐊᑕᐅᓯᒋᐊᓪᓚᒃ ᐊᓪᓗᕆᐊᕐᓂᐅᓱᓂ ᐃᓂᓪᓓᓂᕐᒧᑦ ᐃᓱᐊᕐᓯᕕᒻᒥᒃ ᐃᓕᑕᕆᔭᐅᔫᓗᓂ ᐊᒻᒪᓗ ᐊᑦᔨᐅᖏᑦᑑᓱᓂ ᒪᒥᓴᕐᕕᐅᓱᓂ ᓄᓇᕕᒻᒥ. ᒫᓐᓇᒥᑦ, ᑎᒍᔭᐅᒪᔪᕕᓂᕐᓂᒃ ᑲᒪᔩᑦ ᐊᒻᒪᓗ ᑎᒍᔭᐅᒪᕖᑦ ᑯᐯᒃᓕᒫᒥ ᐃᓱᐊᕐᓯᕕᒻᒨᑎᑦᓯᒐᓱᐊᕈᓐᓇᓕᕐᑐᑦ.