ᓯᕗᓪᓕᐹᒥ ᓵᖕᖓᐅᑎᑦᓱᑎᒃ ᑲᑎᒪᓂᖏᑦ ᐃᓚᐅᔪᑦ ᐊᕐᕌᒎᒃ ᒪᕐᕉᒃ ᐊᓂᒍᕐᑎᓗᒋᒃ

ᐃᓱᐊᕐᓯᕕᒃ ᓄᓇᓕᓕᒫᓂ ᒪᒥᓴᕐᕕᒃ ᑐᖕᖓᓱᑦᑎᓯᓚᐅᔫᖅ ᐃᓚᐅᔪᖁᑎᒥᓂᒃ ᐊᒃᑑᐸ 20, 2021-ᒥ, ᑰᑦᔪᐊᑉ ᑲᑎᒪᕕᖓᓂ 2020-2021-ᒥ ᐊᕐᕌᒍᑕᒫᕐᓯᐅᑎᒥᒃ ᑲᑎᒪᓂᖃᕐᓱᑎᒃ (ᑲᑎᒪᓂᒻᒪᕆᒃ). ᑖᓐᓇ ᑲᑎᒪᓂᒻᒪᕆᒃ ᓯᕗᓪᓕᐸᐅᓚᐅᔫᖅ ᓵᖕᖓᐅᑎᓪᓚᕆᑦᓱᑎᒃ ᑲᑎᒪᓂᕆᔭᖓᓂ ᑎᒥᐅᑉ ᐊᕐᕌᒎᓐᓂ ᒪᕐᕉᓂ ᑲᑎᑦᔭᒍᓐᓀᓱᑎᒃ ᖃᓂᒪᓐᓇᖅ ᐱᑦᔪᑎᐅᑎᓗᒍ. ᐃᑉᐱᒍᓱᑦᓯᐊᒪᕆᒋᐊᖃᕐᑎᓗᒋᑦ ᐁᑦᑐᑑᑎᑦᑌᓕᒍᑎᓂᒃ ᐊᒻᒪᓗ ᖃᓂᑕᕇᑦᑌᓕᑎᑦᓱᒋᑦ, ᑐᖕᖓᓱᑦᑎᓯᓚᐅᔪᔪᒍᑦ ᐃᓚᐅᔪᖁᑎᑦᑎᓂᒃ: ᒪᑭᕝᕕᒃ ᑯᐊᐳᔦᓴᓐ, ᓄᓇᕕᒻᒥ ᐃᓗᓯᓕᕆᔨᒃᑯᑦ (NRBHSS), ᑲᑎᕕᒃ ᓄᓇᓕᓕᒫᑦ ᑲᕙᒪᖓ (ᑫᐋᔩ), ᑲᑎᕕᒃ ᐃᓕᓴᕐᓂᓕᕆᓂᖅ (ᑲᐃ), ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒃ, ᐊᒻᒪᓗ ᐃᓅᓕᑦᓯᕕᒃ ᐋᓐᓂᐊᕕᒃ (ᐃᓅᓕᑦᓯᕕᒃ).

ᑲᑎᒪᓂᒻᒪᕆᒻᒥᒃ ᐱᒋᐊᕐᕕᓕᑦᑎᓯᓚᐅᔫᖅ, ᐃᓱᐊᕐᓯᕕᐅᑉ ᑲᑎᒪᔨᖏᓐᓄᑦ ᐃᓚᐅᔪᖅ, ᐊᐃᒡᒍᓛ ᒥᑦᑐᖅ, ᑐᑦᓯᐊᓂᒃᑯᑦ ᐅᒃᑯᐃᓯᒍᑎᒃᑯᑦ ᐃᓱᐊᕐᓯᕕᒻᒥ ᑕᓯᐅᕐᓯᓯᒪᔨ, ᐃᐊᓪᓯ ᓰᒥᒑᖅ, ᖁᓪᓗᒥᒃ ᐃᑭᑦᓯᑎᓗᒍ. ᐃᓅᒃ ᑐᓴᕐᓂᔮᕐᑎᓯᔩᒃ ᓵᓐᑎ ᐊᒻᒪᓗ ᔮᓂᔅ ᑲᑕᑦᔭᑎᓗᒋᒃ ᐊᑦᓴᑕᐅᑎᒥᓪᓗ ᕿᓚᐅᑦᒥᒃ ᓂᑦᔮᑎᑦᓯᓱᑎᒃ.

ᐃᓱᐊᕐᓯᕕᐅᑉ ᐊᖓᔪᕐᖄᖓ ᑌᕝ ᕗᐊᕆᔅ ᑐᓴᕐᑎᓯᓚᐅᔫᖅ ᑲᑎᒪᓂᐅᑉ ᑌᔪᕐᑕᐅᒍᑎᖓᓂᒃ “ᐊᑕᐅᓯᐅᓕᖓᓂᕐᒥᒃ” ᐊᒻᒪᓗ ᐅᖃᐅᓯᖃᕐᓱᓂ ᓄᓇᓕᓐᓂ ᑭᓇᓕᒫᒃᑯᓄᑦ ᐱᓇᓱᐊᕐᑕᐅᕙᑦᑐᓂᒃ ᐊᒻᒪᓗ ᓄᓇᓕᓕᒫᓂ ᐱᕙᓪᓕᑎᒋᐊᕐᓱᒋᑦ ᐱᓇᓱᒉᑦ ᐃᓕᖓᔪᑦ ᓄᓇᕕᒻᒥᐅᑦ ᖃᓄᐃᖕᖏᓯᐊᕐᓂᖏᓐᓄᑦ. ᑐᑭᓯᑎᑦᓯᓱᓂᓗ ᐅᖃᐅᓯᕐᒥᒃ “ᐊᑕᐅᓯᐅᓕᖓᓂᕐᒥᒃ” ᑐᑭᖃᕆᐊᖓᓂᒃ ᐃᑲᔪᕐᑎᒌᓐᓂᐅᑉ ᐅᖓᑖᓄᐊᓘᕐᑐᒥᒃ ᑐᑭᖃᕐᒪᑦ ᓲᓱᒋᐅᑎᓂᕐᒥᒃ ᐊᒻᒪᓗ ᓯᕗᒧᐊᑦᑎᓯᓂᕐᒥᒃ ᑐᕌᕐᓱᒍ ᓯᕗᓂᕐᒥ ᑕᑯᔭᐅᒍᒪᒐᔭᕐᑐᖅ.

ᕿᑎᕋᓕᕇᒥ, ᐃᓱᐊᕐᓯᕕᒻᒦᓯᒪᔫᒃ ᕖᐱ ᐊᒻᒪᓗ ᓄᐊ ᐃᓄᑦᔪᐊᒥᐅᒃ ᑐᓴᕐᑎᓯᓚᐅᔫᒃ ᓲᔪᓂᒃ ᐊᒻᒪᓗ ᐱᔪᑦᓴᐅᔮᓚᕿᓐᓇᑐᓂᒃ ᐱᐅᓯᕆᓯᒪᔭᒥᓂᒃ ᐅᖄᒍᑎᒃᑯᑦ ᒪᒥᓐᓂᒧᓪᓗ ᑎᑭᐅᑎᒐᓱᐊᕐᓂᕆᓯᒪᔭᒥᓂᒃ. ᓲᔫᓂᒋᒃ, ᑲᒪᒋᔭᖃᓪᓚᕆᓐᓂᒋᒃ ᐊᒻᒪᓗ ᕿᑐᕐᖓᒥᓂᒃ ᓇᓪᓕᒍᓱᓐᓂᒥᓂᒃ ᐅᖃᐅᓯᖃᓚᐅᔫᒃ ᐃᓘᓐᓇᑎᒃ ᑲᑎᒪᔪᓃᑦᑐᑦ ᐆᒻᒪᑎᒃᑯᑦ ᐊᑦᑐᑕᐅᓚᕿᑎᓗᒋᑦ.

ᐅᓪᓗᑯᑦ ᑲᑎᒪᑎᓗᒋᑦ, ᑰᑦᔪᐊᒥᐅᖅ ᑕᑯᒥᓇᕐᑐᓕᐅᕐᑎ ᕼᐋᓇ ᑐᒃᑐ ᖁᖏᐊᖅ ᓴᓇᓚᐅᔫᖅ ᑐᐱᑦᓴᔭᒦᑦᑐᒥᒃ ᑕᑯᑦᓴᐅᑎᑦᓯᔪᒥᒃ ᑌᔪᕐᑕᐅᔪᒥᒃ “ᐊᑕᐅᓯᐅᓕᖓᓂᕐᒥᒃ”. ᒥᖑᐊᖕᖑᐊᑕᖓ ᑲᑎᕐᓱᐊᓄᑦ ᐃᓕᔭᐅᓚᐅᔫᖅ ᑕᑯᒥᓇᕐᑐᓕᐊᕆᓯᒪᔪᓄᑦ, ᑕᑯᑦᓴᖑᕐᑎᓱᒋᑦ ᑲᑐᑦᔮᖃᕐᓱᑎᒃ ᐱᓇᓱᐊᕐᓯᒪᔭᖏᑦ ᐃᓘᓐᓇᑎᒃ 2021-ᒥ ᐃᓱᐊᕐᓯᕕᐅᑉ ᐊᕐᕌᒍᑕᒫᕐᓯᐅᑎᖓᓄᑦ ᑲᑎᒪᓂᒻᒪᕆᖓᓄᑦ ᐃᓚᐅᔪᑦ.

ᑲᑎᒪᓂᖅ ᓂᐱᓕᐅᕐᑕᐅᓚᐅᔫᖅ ᑕᕐᕋᒥᐅᑦ ᓂᐱᖓᓄᑦ ᐊᒻᒪᓗ ᓰᐲᓰᒃᑯᓄᑦ ᐊᒻᒪᓗ ᑐᓴᕐᓴᐅᑎᑦᓯᖃᑦᑕᓱᑎᒃ ᐅᓪᓗᐃᑦ ᑭᖑᓂᖏᓐᓂ ᓄᓇᓕᓕᒫᓂ ᓈᓚᐅᑎᑎᒍᑦ.

ᑐᖓᓕᐊ 2021-2022-ᒥ ᐊᕐᕌᒍᑕᒫᕐᓯᐅᑎᒃ ᑲᑎᒪᓂᒻᒪᕆᒃ ᑰᑦᔪᐊᒦᓛᓕᕐᒥᔪᖅ ᓯᑉᑎᒻᐱᕆ 21, 2022-ᒥ.