-
ᕿᑦᑌᖓᔮᕈᑎᓕᒻᒪᕆᐅᕗᒍᑦ ᐅᖃᐅᓯᖃᕆᐊᒥᒃ ᑖᓕ ᒥᐊᓱ, ᐳᕕᕐᓂᑐᒥ ᓄᓇᓕᒻᒥ ᐅᐃᕆᓯᒪᓂᕐᒧᐊᖓᔪᓄᑦ ᐃᓱᐊᕐᓭᔨᒋᓲᕗᑦ, ᐃᓱᐊᕐᓯᕕᐅᑉ ᑲᒪᒋᔭᐅᓂᐅᑉ-ᑭᖑᓂᖓᓂ ᐱᒍᑦᔨᐅᑎᒋᐊᓪᓚᐅᑎᓪᓗᒍ ᐃᓚᐅᑎᑦᓯᖃᑦᑕᓂᐊᓕᕐᒪᑦ ᐳᕕᕐᓂᑐᒥ ᐊᐅᔭᒃᑯᑦ ᒪᙯᑦᑎᓯᕕᖓᓂ ᐱᓇᓱᒍᑎᑦᓴᖏᓐᓄᑦ, ᑖᓐᓇ ᐊᕐᕌᒍᓂ 25-ᓂ ᖄᖏᕐᑐᓂ ᓄᓇᓕᒻᒥ ᐱᓇᓱᐊᕐᑕᐅᓕᕐᑐᖅ ᐊᐅᓚᑕᐅᑦᓱᓂ ᓄᓇᓕᒻᒥ ᐃᓄᖏᓐᓄᑦ.
ᐳᕕᕐᓂᑐᒥᐅᑦ ᐅᕕᒐᕐᑐᖏᓐᓂᒃ ᐃᓄᒻᒪᕆᖕᖑᐸᓪᓕᐊᓕᕐᑐᖏᓐᓂᓗ ᐃᑲᔪᕐᓯᒍᑎᐅᑦᓱᓂ ᐅᑎᕐᑎᓯᓕᐅᒥᒍᑎᓄᑦ ᐃᓗᕐᕈᓯᒥᓄᑦ ᐊᒻᒪᓗ ᓄᓇᒥ ᖃᐅᔨᒪᐅᓯᕐᒥᓄᑦ, ᐊᖑᓇᓱᒋᐊᒥᒃ ᐃᓕᓐᓂᐊᓂᕐᒧᑦ ᑲᔪᖏᕐᓭᓂᕐᒥᓗ ᓂᕿᒥᒃ ᓄᓇᓕᒻᒥ ᐊᒥᕐᖄᖃᑎᒌᓐᓂᒥᒃ, ᑖᓐᓇ ᐊᐅᔭᒃᑯᑦ ᒪᙯᑦᑎᓯᕕᓕᐊᕆᔭᐅᓯᒪᔪᖅ ᐊᐅᓚᑕᐅᕙᓪᓗᓱᓂ ᑳᕈᓪ ᐴᓐᒧᑦ ᐊᒻᒪᓗ ᐃᓅᓯᕐᒥᓂ ᐁᑉᐸᕆᑦᓱᒍ ᐱᓇᓱᐊᖃᑎᖓᓄᑦ, ᐸᐅᓗᓯ ᓄᕙᓕᖕᖓᒧᑦ. ᐃᒥᐊᓗᒻᒥᒃ-ᐊᑐᕆᐊᖃᖕᖏᒪᕆᑦᑎᓯᓂᖓ ᑌᑲᓃᓐᓂᒥᓂ ᐊᒻᒪᓗ ᐃᓄᑐᐃᓐᓇᑎᒍᑦ ᐱᐅᓯᕐᒥᓄᑦ ᐱᐅᓯᑐᖃᕐᑎᒍᓪᓗ ᖃᐅᔨᒪᐅᓯᕐᒥᓄᑦ ᐅᑎᕈᓐᓇᓯᓂᕐᒥᒃ ᓵᖕᖓᔭᑐᐊᖃᕐᓂᒥᒍᑦ, ᐱᓇᓱᐊᕐᑕᐅᓂᖓ ᑕᒪᑦᓱᒪ ᐃᓱᐊᕐᓯᕕᐅᑉ ᐃᓪᓕᕆᔭᖏᑦᑕ ᐊᒻᒪᓗ ᐱᓇᓱᒍᓯᖏᑦᑕ ᑐᑭᓪᓗᐊᖏᓐᓅᓯᒪᑦᓯᐊᑐᖅ.
ᒪᙯᑦᑎᑕᐅᓕᕋᒥᒃ, ᑐᐱᕐᒥᐅᖑᓲᑦ ᑖᒃᑯᐊ ᑲᒪᔨᒥᑕ ᓇᖕᒥᓂᖅ ᑐᐱᓕᐊᕕᓂᖏᓐᓂᑦ. ᐊᓐᓂᑐᕐᑕᓕᒫᖏᑦ ᐊᒥᕐᖄᕈᑎᐅᓲᑦ ᐃᓚᐅᔪᓕᒫᓄᑦ ᐊᒻᒪᓗ ᐳᕕᕐᓂᑐᒥᐅᓕᒫᓄᑦ ᒪᙯᑦᑎᓯᔪᕕᓃᑦ ᓄᓇᓕᒻᒨᑐᐊᕐᒪᑕ. ᓄᓇᓕᒻᒥ ᐃᓘᓐᓇᖏᓐᓂ ᐱᓇᓱᐊᕐᑕᐅᔪᖅ ᓇᑯᕆᔭᐅᑦᓯᐊᑐᖅ, ᐃᓄᑐᙯᑦ ᐃᓄᐃᓪᓗ ᓄᓇᓕᒻᒥ ᑎᑭᑦᑐᕕᓂᐅᓕᕐᒪᑕ ᑐᓴᕋᒥᒃ ᖁᕕᐊᓱᒍᑎᓕᒻᒪᕆᐊᓘᓲᑦ. ᓂᐅᕝᕕᐅᕆᐊᕐᓯᒪᓲᑦ ᑎᑭᑦᑎᓗᒋᑦ ᓂᖏᖃᑎᐅᒋᐊᒥᓪᓗ ᑎᑭᐅᑦᔨᔭᖏᓐᓂᒃ ᖁᕕᐊᓱᒍᑎᖃᕐᐸᓱᑎᒃ.
ᑕᒡᒐᓂ ᒪᙯᑦᑎᑕᐅᓂᖏᓐᓂ, ᐊᕐᓇᓂᒃ ᐃᓕᓭᓚᐅᔪᕗᑦ ᕿᓯᓕᕆᒋᐊᒥᒃ ᓴᓗᒻᒪᓴᑦᓯᐊᓗᒋᑦ ᐊᓐᓂᑐᕐᑕᐅᔪᓂᓪᓗ ᓂᕿᓕᕆᒋᐊᒥᒃ. ᐊᖑᑏᑦ ᐃᓕᓴᕐᑕᐅᓲᑦ ᐊᖑᓇᓱᒋᐊᒥᒃ, ᐱᖁᑎᒥᓂᒃ ᓯᖁᒥᓯᒪᔪᕐᓂᐊᕆᐊᒥᒃ, ᓄᓇᒥ ᐃᓂᕐᕋᒋᐊᒥᒃ ᐅᓂᒃᑲᐅᑎᔭᐅᓲᖑᑦᓱᑎᓗ ᓄᓇᐅᑉ ᐊᖑᓇᓱᕝᕕᒋᔭᒥᑕ ᐱᐅᓯᕆᓯᒪᔭᖓᓂᒃ. ᐊᑭᓂᓯ ᓯᕗᐊᕌᐱᒃ, ᓄᓇᓕᒻᒥ ᑲᑕᑦᔭᑎ, ᐃᓚᐅᖃᑦᑕᓚᖓᒻᒥᔪᖅ ᕿᓚᐅᑦᔭᓂᕐᒥᒃ ᑲᑕᑦᔭᓂᕐᒥᓗ ᐃᓕᓭᓗᓂ ᐃᓚᐅᔪᓂᒃ. ᒪᙯᖃᑎᐅᔪᑦ ᐃᓕᑦᓯᔭᒥᓂᒃ ᑕᑯᑦᓴᐅᑎᑦᓯᒍᓐᓇᓯᓛᕐᑐᑦ ᒪᙯᑦᑎᑕᐅᓂᖓᑕ ᐃᓱᓕᕝᕕᖓᓂ ᑕᑯᓐᓇᐅᔮᕐᑎᓯᓂᐅᓛᕐᑐᒥ. ᑖᓕ ᐃᓚᐅᕕᖃᕐᐸᓚᖓᓯᒻᒥᔪᖅ ᒪᙯᑦᑎᓯᕕᒻᒥ ᐱᓇᓱᒍᑎᑦᓴᓕᐅᕐᓂᑯᑦ ᐸᕐᓀᒍᑎᖏᓐᓂ ᓯᕗᓕᖃᑦᑕᓗᓂ ᐃᓚᐅᔪᓂᒃ ᐃᓱᐊᕐᓯᕕᒻᒨᓕᖓᓪᓗᑐᕐᑐᓂᒃ ᓱᓇᓱᐊᕐᑎᓯᒍᑎᓂᒃ ᐊᑐᕐᓗᓂ.
ᑕᒡᒐᓂ ᐊᕐᕌᒍᒥ ᐳᕕᕐᓂᑐᒥ ᐊᐅᔭᒃᑯᑦ ᒪᙯᑦᑎᓯᓂᕐᒥ ᐊᑑᑎᓯᔪᒥ, ᒪᙯᖃᑎᐅᔪᑦ ᐊᐅᓪᓚᓛᕐᑐᖅ ᔪᓓ 16 ᐱᓇᓱᐊᕈᓯᖓᓂ ᐊᐅᓪᓛᓯᒪᓂᐊᕐᓱᑎᓗ ᐱᓇᓱᐊᕈᓯᓂᒃ ᐱᖓᓱᓂᒃ. ᖁᕕᐊᓱᓪᓚᕆᑉᐳᒍᑦ ᐃᓱᐊᕐᓯᕕᒻᒥ ᐱᒍᑦᔨᔭᕗᓐᓂᒃ ᐃᓚᐅᑎᑦᓯᒍᓐᓇᓚᖓᒐᑦᑕ ᓇᖕᒥᓂᖅ ᒪᒥᓴᕐᓂᖏᓐᓂᒃ ᐃᑲᔪᕐᓯᒪᒍᑎᒋᑦᓱᒋᑦ. ᑕᒪᓐᓇᑕᒐ ᑕᑯᔭᐅᑎᑦᓯᒍᑎᑦᓴᓯᐊᖅ ᐃᓱᐊᕐᓯᕕᐅᑉ ᓄᓇᓕᒻᒥ ᐃᓱᐊᕐᓭᔨᖏᑦᑕ ᐊᒻᒪᓗ ᓄᓇᓕᒻᒧᑦ-ᓯᕗᓕᕐᑕᐅᓱᑎᒃ ᐱᓇᓱᐊᕐᑕᐅᔪᑦ ᐱᕙᓪᓖᒍᓐᓇᓂᖏᓐᓂᒃ. ᕿᓚᓈᕈᑎᖃᕐᐳᒍᑦ ᓄᓇᓕᒻᒥ ᐱᓇᓱᐊᖃᑎᒌᕝᕕᓂᒃ ᐱᕙᓪᓕᐊᑎᑦᓯᒋᐊᓪᓚᓂᕐᒥᒃ ᓄᓇᓕᒻᒥᓗ ᐃᓄᖏᓐᓂᒃ ᐱᓇᓱᒍᑎᑦᓴᒋᐊᓪᓚᓂᒃ ᐊᑐᐃᓐᓇᖃᕐᑎᓯᓂᕐᒥᒃ ᑲᔪᖏᕐᓭᒍᑎᓂᒃ ᖃᓄᐃᖕᖕᓯᐊᕐᑐᒥᒃ ᐃᓅᓯᖃᕐᓂᒥᒃ ᐊᒻᒪᓗ ᐅᐃᕆᓯᒪᓇᕐᑐᓄᑦ ᐱᓗᑲᓐᓂᐅᑉ ᓱᕐᕃᓂᖏᓐᓂᒃ ᐃᑯᓪᓚᑎᑦᓯᓂᕐᒥᒃ ᓄᓇᓕᓕᒫᓂᑦ.
-
ᐱᖓᔪᐊᓐᓂᒥ, ᕕᕗᐊᕆ 17-ᒥ, ᒪᒥᓴᕐᓂᒥ ᐱᓇᓱᐊᕐᓃᑦ ᓯᕗᓪᓕᖏᓐᓂᒃ ᐱᖓᓲᔪᕐᑐᓂᒃ ᐱᓇᓱᐊᕈᓯᓂᒃ ᐱᒋᐊᓛᕐᑐᑦ, ᐊᕐᓇᓄᑦ ᖁᓕᐅᖕᖏᒐᕐᑐᓄᑦ ᓴᐳᒻᒥᔭᐅᒍᑎᑦᓴᒥᓂᒃ ᐅᑕᕐᕿᔪᓄᑦ ᒪᒥᓴᕐᓂᑯᑦ ᐃᓂᕐᕋᓂᕆᓯᔭᖏᓐᓂᒃ ᐱᒋᐊᕐᑎᓯᓗᑎᒃ. ᐊᕐᕌᒍᓕᒫᒌᔭᑲᓴᒃ ᐱᒍᑦᔨᓂᕗᑦ ᐅᒃᑯᐊᓯᒪᓚᐅᔪᑎᓪᓗᒋᑦ, ᐃᓱᐊᕐᓯᕕᒃ ᒪᒥᓴᕐᕕᒃ ᓇᑯᕐᓴᑐᖅ 2021ᒧᑦ ᒪᒥᓴᕐᓂᐅᑉ ᐅᓪᓗᖁᑎᖏᓐᓂᒃ ᓄᐃᑦᓯᒋᐊᒥᒃ. ᑕᒡᒐᓂ ᐊᕐᕌᒍᒥ, ᑕᓪᓕᒪᕕᓪᓗᓂ ᒪᒥᓴᕐᓂᖃᕐᑎᓯᓛᕐᑐᖅ, ᐱᖓᓱᑦ ᐊᕐᓇᓄᑦ ᐊᒻᒪᓗ ᒪᕐᕉᒃ ᐊᖑᑎᓄᑦ, ᑲᑎᓪᓗᑎᒃ ᐃᑲᔪᕐᑕᐅᒋᐊᕐᑐᑐᕕᓃᑦ ᑌᑲᓂ ᐅᓄᕐᓂᖏᑦ 45-ᓃᒍᒫᕐᑎᓗᒋᑦ ᑖᓐᓇ ᐊᕐᕌᒍ ᐃᓱᓕᑦᑎᓗᒍ.
ᐊᕐᕌᒍᓕᒫᒥ ᐱᒍᑦᔨᒍᑎᑦᑕ ᐅᒃᑯᐊᓯᒪᓂᕆᓚᐅᕐᑕᖏᑦ ᐊᑯᓂᓗ ᐊᒥᓱᓃᑦᑌᓕᒋᐊᖃᕐᓱᓂ ᐊᕐᓱᕈᐊᓚᓇᕐᑐᐃᓗ ᐅᑕᕐᕿᔪᓄᑦ ᐊᕐᓱᕈᕐᓇᑎᑦᓯᓚᐅᔪᕗᑦ. ᓱᓕᔪᖅ, ᒪᒥᓴᕐᓂᒥ ᐱᒍᑦᔨᐅᑏᑦ ᓄᓇᓕᓕᒫᓂᑦ ᐃᓄᓐᓄᑦ ᑭᖕᖒᒪᓇᓕᕐᐸᓕᐊᑐᐃᓐᓇᑐᑦ ᑌᒃᑯᓄᖓᑐᐃᓐᓇᐅᖏᑦᑐᖅ ᐱᖃᑦᑕᕈᒣᕐᑐᓄᑦ, ᑭᓯᐊᓂᓗ ᐱᖃᑦᑕᓂᕐᒥᓂᒃ ᐃᑯᓪᓚᑎᒋᐊᕈᒪᔪᓄᑦ ᐃᒥᖃᑦᑕᓂᕐᒥᓂᓗ ᐊᑯᑦᑐᓯᒋᐊᕐᑎᓯᒍᒪᔪᓄᑦ.
ᐱᒍᑦᔨᐅᑎᕗᓐᓂᒃ ᐅᓇᒻᒥᒋᔭᖃᑦᓴᓂᕈᕕᑦ ᐅᕝᕙᓘᓐᓃᑦ ᖃᐅᔨᒪᒍᕕᑦ ᑭᓇᑐᐃᓐᓇᒥᒃ ᐅᓇᒻᒥᓱᒐᔭᕐᑐᒥᒃ, ᐃᓚᐅᒍᒪᒍᑎᓕᐅᕆᑦ ᐊᒡᓚᓴᐅᑎᒋᒋᒍᓐᓇᕕᓕᒫᕐᓄᑦ ᐅᕙᓂ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᕗᓐᓂ https://isuarsivik.ca/application-form/. ᐃᓚᐅᒍᒪᓂᕋᕐᓯᒪᔪᓕᒫᑦ ᐊᑎᖏᑦ ᐅᑕᕐᕿᔪᓄᑦ ᐃᓕᔭᐅᓛᕐᑐᑦ ᐃᓚᐅᒍᒪᓂᕋᒍᑎᖓᑕᓗ ᐅᓪᓗᖓ ᐃᑉᐱᒋᔭᐅᓛᕐᓱᓂ ᐃᓚᐅᓚᖓᔪᓂᒃ ᐱᓇᓱᐊᓕᕐᐸᑕ. ᐃᓚᐅᒍᓐᓇᓂᖏᑦ ᐊᖏᕐᑕᐅᒍᑎᒃ, ᖃᕆᑕᐅᔭᒃᑯᑦ ᐊᒡᓚᑖᕐᑎᑕᐅᓛᕐᑐᑦ ᐃᓚᐅᓛᕐᓂᖓᓂᒃ ᓱᓕᓂᕃᒍᑎᓂᒃ, ᒪᒥᓴᕐᓂᐅᓛᓕᕐᒥᔫᓪᓗ ᐱᒋᐊᕐᕕᓴᖓᑕ ᐅᓪᓗᖓ ᑕᕐᕿᓕᒫᒧᑦ ᓯᕗᓕᐅᕐᓯᒪᓗᒍ ᐅᕙᑦᑎᓂᑦ ᑐᓴᕐᕕᖃᕋᔭᕐᓱᑎᒃ.
ᐃᓱᐊᕐᓯᕕᐅᑉ ᑲᒪᔨᖏᑦ ᓯᑉᑎᒻᐱᕆ 2020ᒥᓂᑦ ᐊᑐᐃᓐᓇᕈᕐᑎᖃᑦᑕᒪᑕ ᐱᒍᑦᔨᓂᕐᒥᑕ ᐱᒋᐊᓕᕐᕿᓂᑦᓴᖏᓐᓄᑦ ᐱᓇᓱᐊᖃᑎᖃᕐᓱᑎᒃ ᓄᓇᕕᒻᒥ ᐃᓗᓯᓕᕆᔨᒃᑯᓂᒃ. ᐊᓪᓛ, ᑖᒃᑯᐊ ᐱᓇᓱᖃᑎᒌᑦ ᐅᒃᑯᐃᒋᐊᓪᓚᓂᖓᓄᑦ ᐸᕐᓀᒍᑎᒥᒃ ᐃᓚᐅᑎᑦᓯᓕᕐᑐᒥᒃ ᒪᓕᑦᑕᐅᓲᓂᒃ ᐋᕐᕿᒋᐊᕐᓯᒪᓕᕐᑐᓂᒃ ᐊᒻᒪᓗ ᖃᓂᒻᒪᓯᐅᑉ ᐃᕐᐸᑎᑕᐅᑦᑌᓕᓂᖓᓄᑦ ᐊᐅᓚᑦᓯᓂᕐᒧᓗ ᐸᕐᓀᒍᑎᒥᒃ ᑲᔪᓯᑎᑦᓯᓚᐅᔪᕗᑦ. ᐊᒡᓚᓯᒪᔪᖁᑎᓕᒫᖏᑦ ᓄᓇᕕᒻᒥ ᐃᓗᓯᓕᕆᔨᒃᑯᓂ ᐊᖓᔪᕐᖄᓄᑦ ᐊᖏᕐᑕᐅᓚᐅᔪᕗᑦ, ᓱᓕᓂᕃᑦᓱᑎᒃ ᐃᓱᐊᕐᓯᕕᒻᒥᒃ ᐱᐅᓂᕐᐹᓂᒃ ᓴᐳᒻᒥᓯᒍᑎᓂᒃ ᒪᓕᒐᓕᐅᕈᑎᓂᒃ ᐊᑐᕐᑕᐅᑎᑦᓯᓂᕋᕐᓱᒍ ᐊᑦᑕᓇᕐᑐᖃᕐᑎᓇᒍ ᐅᒃᑯᐃᓯᒋᐊᓪᓚᓂᑦᓴᒥᓄᑦ ᐱᒍᑦᔨᐅᑎᒥᓂᒃ ᐃᓘᓐᓇᖏᓐᓄᑦ 14ᓄᑦ ᓄᓇᓕᓐᓄᑦ ᓄᓇᕕᒻᒥ, ᐱᓇᓱᑦᑎᒥᓂᒃ ᐊᒻᒪᓗ ᐃᑲᔪᕐᑕᐅᒋᐊᕐᑐᓯᒪᔪᓂᒃ ᓴᐳᒻᒥᓯᔪᓂᒃ.
ᑌᒪᖕᖓᓕᒫᖅ, ᐃᓚᐅᒍᒪᒍᑎᓕᐅᕐᓯᒪᔪᑦ ᖃᓄᐃᓕᒋᐊᕐᕕᖃᕈᓐᓇᑐᑦ ᐊᒡᓚᓗᑎᒃ ᐅᕗᖓ intake@isuarsivik.ca ᐃᓚᐅᒍᒪᒍᑎᖏᑦ ᐱᓇᓱᑦᑕᐅᓂᖏᑦ ᖃᓄᐃᓕᖓᓕᕐᒪᖔᑕ ᖃᐅᔨᒋᐊᕐᓗᑎᒃ ᐊᒡᓚᒋᐊᓕᓐᓂᒃ ᐃᑲᔪᕐᑕᐅᒍᒪᓗᑎᓘᓐᓃᑦ.
-
ᖃᓂᒻᒪᓯᖅ-19ᒧᑦ ᖃᓂᒻᒪᒌᒃᑯᑎᑕᓕᒻᒧᑦ ᑲᐱᔭᐅᓂᕐᒥᒃ ᐱᓇᓱᐊᕐᓂᖅ ᓄᓇᕕᓕᒫᒥ ᑲᔪᓯᔭᐅᓕᕐᑐᖅ. ᐃᓱᐊᕐᓯᕕᒃ ᐃᑲᔪᕐᑕᐅᕕᒃ ᑌᒣᑦᓱᓂ ᕿᓄᐃᓵᕐᓱᓂ ᕿᓚᓈᕐᓱᓂᓗ ᓄᓇᓕᓕᒫᓄᐊᖓᔪᓂᒃ ᓄᓇᓕᓐᓄᐊᖓᔪᓂᓪᓗ ᑐᑭᑖᕐᑕᐅᒋᐊᓕᓐᓂᒃ ᓴᓇᓂᐅᑉ ᑰᒃᔪᐊᒥ ᐅᒃᑯᐃᑕᐅᒋᐊᓪᓚᓂᑦᓴᖓᓂᒃ ᒫᓐᓇ ᐅᐱᕐᖔᖑᓚᖓᔪᒥ ᐅᑕᕐᕿᔪᖅ. ᓴᓇᔩᑦ Les Constructions Pépin et Fortin Inc.-ᑯᑦ, ᐁᕆᓕ 2020-ᐅᑎᓪᓗᒍ ᓴᓇᓂᕐᒧᑦ ᐊᖏᖃᑎᒌᒍᑎᑖᕐᑎᑕᐅᓚᐅᔪᒐᒥᒃ ᐃᒡᓗᔪᐊᓪᓚᕆᑦᑕᖓᓂᒃ ᓴᓇᓛᕐᓗᑎᒃ, ᐃᓚᖏᓐᓂᒃ ᓴᓇᒐᑦᓴᓂᒃ ᐱᐅᒃᑯᑎᓂᓪᓗ ᐅᐱᕐᖔᖑᓚᐅᔪᔪᖅ ᑎᑭᑎᑦᓯᒍᓐᓇᓚᐅᔪᒻᒪᑕ. ᐃᒣᓕᖓᔪᑦ ᑕᒐ, ᐱᓇᓱᐊᕐᑐᓴᖁᑎᓕᒫᕗᑦ ᐊᑐᐃᓐᓇᐅᓕᕐᑐᑦ ᕿᓚᓈᕈᑎᖃᕐᓱᑎᓗ ᐱᒋᐊᕈᓐᓇᓴᕋᑕᓛᓕᕐᓂᒥᓂᒃ ᐅᕐᖂᓯᒋᐊᕐᐸᓕᐊᓯᑦᓴᑐᐊᕐᐸᑦ. ᓄᑖᑉ ᐃᒡᓗᔪᐊᑉ ᓴᓇᔭᐅᓂᖓᑕ ᐱᒋᐊᕐᓂᖓ 2021ᒥ ᐱᓇᓱᐊᕐᕕᒥᒃ ᓄᑖᒧᑦ ᓄᑦᑎᕈᓐᓇᓯᑎᑦᓯᓛᕐᑐᖅ 2022-ᒥ ᐅᑭᐊᖓᒥ ᓯᕗᓪᓕᐹᓂᓪᓗ ᐃᑲᔪᕐᑕᐅᒋᐊᕐᑐᑐᓂᒃ ᑐᖕᖓᓱᑦᑎᓯᒋᐊᖕᖓᓗᓂ 2023-ᖑᓕᕐᐸᑦ.
ᓄᑖᑉ ᐃᑲᔪᕐᑕᐅᕕᐅᑉ ᑰᒃᔪᐊᒥ ᓴᓇᔭᐅᓂᖓ ᐃᓘᓐᓇᖓ ᑮᓇᐅᔭᖃᕐᑎᑕᐅᑦᓱᓂ $40.6M-ᓂᒃ ᐱᓇᓱᐊᕐᑕᐅᔪᖅ. ᑖᑦᓱᒥᖓ ᐱᓇᓱᐊᕐᕕᒥᒃ ᐱᒍᓐᓇᓯᑎᑦᓯᓚᖓᔪᖅ ᐃᑲᔪᕐᑕᐅᔪᑦ ᐅᓄᕐᓂᖏᓐᓂᒃ ᐱᖓᓱᕕᓪᓗᐊᓗᒋᑦ ᐅᓄᕐᓯᒋᐊᕆᒍᓐᓇᑎᓗᒍ ᐊᒻᒪᓗ ᓄᑖᓂᒃ ᑭᖕᖒᒪᒋᔭᐅᓪᓚᕆᑦᑐᓂᓪᓗ ᐱᒍᑦᔨᐅᑎᓂᒃ ᐱᑕᖃᕈᓐᓇᓯᓕᕐᑎᓯᓗᓂ, ᐆᒃᑐᕋᐅᑎᒋᓗᒋᑦ ᐃᓚᒌᓄᑦ ᒪᒥᓴᕈᑎᓂᒃ ᐱᓇᓱᐊᕐᓂᖅ ᐊᕐᓇᓄᓪᓗ ᓯᙰᔪᓄᑦ (ᐱᐊᕋᑦᓴᓕᓐᓄᑦ) ᐱᒍᑦᔨᐅᑎᓂᒃ.
ᐃᒡᓗᔪᐊᓪᓚᕆᑦᑕᖓᑕ ᓴᓇᔭᐅᓂᖓ ᐱᒋᐊᕐᑕᐅᒋᐊᖃᓚᐅᔪᒐᓗᐊᕐᑎᓗᒍ 2020 ᐅᐱᕐᖔᖓᓂ, ᑭᓯᐊᓂ ᑰᒃᔪᐊᒥ ᑲᕙᒫᐱᒃᑯᑦ ᓴᓇᓂᒻᒪᕆᓕᒫᑦ ᐱᓇᓱᐊᕐᑕᐅᓂᖏᓐᓂᒃ ᑭᖑᕙᕆᐊᕐᑎᓯᑦᓱᑎᒃ ᑐᑭᑖᓚᐅᔪᒻᒪᑕ ᖃᓂᒻᒪᓯᖅ ᐱᑦᔪᑎᒋᑦᓱᒍ. ᐃᓱᐊᕐᓯᕕᐅᑉ ᐱᓇᓱᐊᕐᑕᐅᓂᖓᑕ ᑭᖑᕙᕆᐊᕐᑕᐅᓂᖓ ᐃᒡᓗᔪᐊᓪᓚᕆᑦᑕᖓᑕ ᓯᑕᒪᐅᔪᕐᑐᓂᓪᓗ ᐱᓇᓱᑦᑏᑦ ᐊᓂᕐᕋᓴᖏᑦᑕ ᓴᓇᔭᐅᓂᖏᑦᑕ ᐊᑭᖏᓐᓂᒃ ᓱᕐᕃᓚᐅᔪᕗᖅ.
ᖃᖕᒥᓂᑕᐅᓂᕐᐹᑦ ᒥᑦᓴᐅᓵᕆᒍᑏᑦ ᑭᖑᕙᕆᐊᕐᑕᐅᓂᖓᓄᑦ ᐊᒻᒪᓗ ᓴᓗᒻᒪᓴᕆᐊᖃᕐᓂᒧᑦ ᒪᓕᒐᖃᕐᓂᓴᐅᓕᕐᓂᒧᑦ ᐊᑭᑦᑐᕆᐊᓪᓚᒍᑎᓂᒃ ᓯᕗᓪᓕᒥ ᓴᓇᓂᕐᒧᑦ ᑮᓇᐅᔭᓄᑦ ᑐᕌᒐᓕᐊᕕᓂᕐᓂᒃ $1.6M-ᓄᑦ ᖄᖏᐅᑎᔪᑦ. ᑖᒃᑯᐊ ᑮᓇᐅᔦᑦ ᐊᕝᕙᓗᐊᖏᓐᓂᒃ ᐃᓱᐊᕐᓯᕕᒃ ᐱᒍᓐᓇᓯᓯᒪᓕᕐᑐᖅ ᓇᑯᕐᒪᑕ ᓄᓇᓕᓕᒫᓅᓕᖓᔪᓂᑦ ᑲᓇᑕᒨᓕᖓᔪᓂᓪᓗ ᐱᓇᓱᐊᖃᑎᐅᔪᑦ ᑮᓇᐅᔭᕐᑕᓰᒋᐊᓪᓚᓂᖏᑦ. ᑖᒃᑯᓄᖓ ᐃᓚᐅᑦᓱᑎᒃ, ᑲᓇᑕᒥ ᓄᓇᖃᕐᖄᓯᒪᔪᓄᑦ ᐱᒍᑦᔨᐅᑎᓕᕆᔩᑦ $500,000-ᓂᒃ ᑐᓂᔨᒋᐊᓪᓚᓂᕐᒥᓂᒃ ᓱᓕᓂᕃᓚᐅᕐᒥᔪᑦ ᐃᓓᒋᐊᕐᓱᑎᒃ $6M-ᓂᒃ ᐊᒡᒍᒌᕐᓯᒪᔭᒥᓂᒃ ᑖᑦᓱᒧᖓ ᐱᓇᓱᐊᕐᑕᒧᑦ.
ᑯᐯᒃ ᑲᕙᒪᖓᓄᑦ ᒪᑭᕝᕕᒃ ᑯᐊᐳᕇᓴᒧᓪᓗ ᑭᐅᔭᐅᑦᓯᖏᓐᓇᑐᒍᑦ ᐱᓇᓱᐊᕈᓯᓂᑦ ᙯᔪᓂᑦ ᑮᓇᐅᔦᓕᕿᒋᐊᓪᓚᒍᑎᓂᒃ ᑐᑦᓴᕋᐅᑎᒋᓯᒪᔭᕗᓐᓄᑦ.
ᖃᐅᔨᑦᓯᐊᓗᒋᑦ ᓱᕐᖁᐃᓯᑦᓴᐅᑎᒋᓛᕐᑐᓴᐅᓕᕐᑐᒍᑦ ᓴᓇᔭᐅᓂᖓᑕ ᐊᕐᕌᒍᓕᒫᒧᑦ ᑭᖑᕙᕐᓯᒪᓂᖓᑕ ᐊᑭᑦᑐᕈᑎᖏᑦᑕ ᖃᑦᓯᕌᓪᓗᑐᕐᓂᖏᓐᓂᒃ.
-
ᐊᕐᕌᒍᑕᒫᖅ ᕕᕗᐊᕆᒥ, ᓄᓇᕕᒻᒥ ᓇᑭᑐᐃᓐᓇᓕᒫᖅ ᐃᓚᐅᔪᖃᓲᖅ ᑖᒃᑯᐊ ᓇᖕᒥᓂᖅ ᐆᒃᑐᕋᕈᑎᖓᓂᒃ ᐃᒥᐊᓗᒻᒥᒃ ᐱᑦᑌᓕᑦᓱᑎᒃ 28-ᓂᒃ ᐅᓪᓗᓂᒃ. ᐃᓱᐊᕐᓯᕕᒃ ᐃᑲᔪᕐᑕᐅᕕᒃ ᓂᕆᐅᑦᑐᖅ ᐊᓯᑦᔨᓂᕐᒥᒃ ᐊᐅᓚᑦᔦᒐᔭᕐᓂᒥᒃ ᑖᒃᑯᓂᖓ ᐃᓚᐅᔪᓂᒃ ᑕᑯᑎᑦᓯᓂᒃᑯᑦ ᖃᓄᐃᖕᖏᓯᐊᕐᓇᓂᕐᓴᒥᒃ ᐃᓅᓯᖃᕐᓱᓂ ᐱᕙᓪᓕᓇᕐᓂᖓᓂᒃ, ᐃᒻᒥᓂᓪᓗ ᐃᑲᔪᕐᓯᒪᖏᓐᓇᓱᓂ ᓄᓇᕕᒻᒥᐅᑦ ᓇᖕᒥᓂᖅ ᓄᑭᖃᕈᑎᖏᓐᓂᒃ ᖃᓄᐃᖕᖏᓯᐊᕐᓂᖏᓐᓂᓗ ᐱᐅᓯᒋᐊᕆᑦᓱᓂ ᐃᓘᓐᓇᓯᐊᖏᓐᓂᒃ ᓱᓇᒥᑦᓯᔪᒃᑯᑦ ᐃᓗᕐᕈᓯᒥᓪᓗ ᐃᑉᐱᒋᔭᖃᑦᓯᐊᑐᒃᑯᑦ ᒪᒥᓴᕐᓂᒥ ᐱᓇᓱᐊᕐᓂᑯᑦ.
ᐱᒋᐊᕐᑎᑕᐅᔪᕕᓂᐅᑦᓱᓂ ᐊᕐᕌᒍᑦ ᓯᑕᒪᑦ ᖄᖏᓕᕐᑐᓂᑦ, ᑖᑦᓱᒪ ᑕᕐᕿᓕᒫᒥ ᐃᒻᒥᓂᒃ ᐆᒃᑐᕋᕐᓂᐅᑉ ᑎᑭᐅᑎᓯᒪᓕᕐᓂᖓ ᐊᒥᓱᓄᑦ ᐊᒥᓱᕕᒋᐊᓪᓚᓱᒍ ᐊᖏᓕᒋᐊᓪᓚᓯᒪᔪᖅ, ᐅᓪᓗᒥ ᑲᑦᓱᙰᑦᑐᒪᕆᐅᒍᑕᐅᓕᕐᓂᖓᓄᑦ ᑕᑯᓐᓇᑕᕗᓐᓄᑦ ᑎᑭᐅᑎᑦᓱᓂ. ᑕᒡᒐᓂ ᐊᕐᕌᒍᒥ ᐊᑑᑎᔭᐅᓂᖓ ᓂᕆᐅᒋᔭᐅᓐᓂᖏᑦᓱᓂ ᑌᒫᓪᓗᐊᖅ 265-ᓄᑦ ᐃᓚᐅᕕᐅᓕᕐᑐᖅ, 56%-ᓗᑐᐊᓗᒻᒧᑦ ᐊᕐᕌᓂᒥᑦ ᐅᓄᕐᓯᒋᐊᕐᑐᕕᓃᑦ! ᐃᓕᒌᑦᑎᓱᑎᒃ ᐃᓚᐅᔪᑦ ᐱᓇᓱᐊᕐᕕᓂᑦ ᐅᑯᓇᖕᖓᑦ EVOQ Architecture, NERGICA, ᐊᒻᒪᓗ ᔮᓂᒻᒪᕆᒃ ᐃᓕᓐᓂᐊᕕᒻᒥᑦ ᐆᒃᑐᕋᕐᑐᓄᑦ ᐃᓚᐅᒋᐅᕐᒥᔪᑦ, ᐱᓇᓱᐊᖃᑎᒌᑦᓱᑎᒃ ᐃᑦᔭᕋᑦᓴᐅᓂᒃᑯᑦ ᓯᕗᓕᕐᓂᒥᒃ ᐊᒻᒪᓗ ᐅᐃᕆᒪᓇᕐᑐᓂᒃ ᐊᑐᓗᑲᓐᓂᒥᒃ ᐅᐃᕆᓯᒪᓂᕐᒥᓗ ᐃᑉᐱᒋᔭᐅᑎᑦᓯᒋᐊᕐᓂᒥᒃ.
ᐃᓱᐊᕐᓯᕕᒃ ᑎᑭᐅᑎᒍᒪᔪᖅ $50,000-ᓄᑦ ᐃᑲᔪᕐᓯᒪᓂᕐᒥᓄᑦ ᑐᓂᔭᕐᓄᑦ, ᑎᒥᐅᔪᑦ ᑐᓂᔭᖏᓐᓄᑦ, ᐊᒻᒪᓗ ᐃᒻᒥᒎᕐᑐᓄᑦ ᑮᓇᐅᔭᓂᒃ ᐱᕈᕐᓭᒍᑎᖃᕋᓱᑦᑐᓄᑦ ᓄᐃᑕᐅᔪᓄᑦ. ᑮᓇᐅᔭᓕᒫᑦ ᐃᓱᐊᕐᓯᕕᒻᒨᑕᐅᓛᕐᑐᑦ ᐃᑲᔪᕐᓯᒍᑎᓕᐊᕆᔭᐅᓗᑎᒃ ᐱᒍᑦᔨᐅᑎᖏᓐᓂᒃ ᐊᑐᐃᓐᓇᐅᓂᕐᓴᐅᑎᑦᓯᒍᑎᐅᓗᑎᒃ 14-ᓄᑦ ᓄᓇᓕᓐᓄᑦ ᓄᓇᕕᒻᒥ ᓄᑖᒥᓪᓗ ᐃᑲᔪᕐᑕᐅᕕᒻᒥ ᐱᐅᒃᑯᑎᑖᕆᔭᐅᒋᐊᓕᓐᓂᒃ ᐱᓇᓱᒍᑎᑖᕆᔭᐅᒋᐊᓕᓂᓪᓗ ᐱᑖᕐᑎᓯᒍᑎᐅᓗᑎᒃ ᐃᓗᕐᕈᓯᖓᓄᐊᖓᔪᒥᒃ ᑐᕌᒐᖓᓂᒃ ᓴᐳᒻᒥᓯᒍᑎᐅᓗᑎᒃ.
ᑮᓇᐅᔭᓂᒃ ᑐᓂᔨᒍᒪᒍᕕᑦ ᐱᖕᖑᐹ ᐃᒥᐊᓗᑦᑌᓕᒪᓂᖅ ᐱᑦᔪᑎᒋᓗᒍ, ᖃᕆᑕᐅᔦᑦ ᐱᑐᑦᓯᒪᕕᖓᒍᑦ ᐅᕗᖕᖓᓗᑎᑦ Isuarsivik.ca/donate/!
-
ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᒃ ᓇᑯᕐᓴᖁᖅ ᓄᐃᑦᓯᒋᐊᒥᒃ ᕿᒥᕐᕈᑕᐅᓯᒪᔪᒥᒃ ᐱᐅᓯᒋᐊᕐᑕᐅᓱᓂᓗ ᐃᓱᐊᕐᓯᕕᓕᐊᕋᓱᓐᓂᒥᒃ ᒪᒥᓴᕐᓂᒥᒃ ᐱᒍᑦᔨᓂᕐᒥᓄᑦ. ᑖᓐᓇ ᐱᒐᓱᐊᕐᓂᖅ ᐃᓚᓕᒃ ᓄᑖᓐᓂᒃ ᐃᓱᐊᕐᓯᕕᓕᐊᕋᓱᐊᕈᑎᒥᒃ ᐊᒻᒪᓗ ᐃᓗᓯᕐᒥᒃ ᓇᐅᑦᓯᑐᐃᒍᑎᒥᒃ ᑕᑕᕐᓴᒑᓐᓂᒃ ᐊᒻᒪᓗ ᖃᕆᑕᐅᔭᒃᑯᑦ ᐃᓱᐊᕐᓯᕕᓕᐊᕋᓱᐊᕈᑎᒥᒃ ᑕᑕᕐᓭᒍᑎᒥᒃ. ᐅᓇᒻᒥᓱᑦᑐᑦ ᐃᓱᐊᕐᓯᕕᓕᐊᕋᓱᓐᓂᒥᒃ ᑕᑕᕐᓭᒍᓐᓇᓕᕐᑐᑦ ᑐᕃᓐᓇᑐᒥᒃ ᖃᕆᑕᐅᔭᒃᑯᑦ, ᐅᕝᕙᓘᓐᓃᑦ ᖃᕆᑕᐅᔭᒃᑯᑦ ᑕᑕᕐᓴᒐᕐᒥᒃ ᐱᑖᑐᐃᓐᓇᓗᑎᒃ ᐅᕝᕙᓘᓐᓃᑦ ᐊᒥᓱᓕᕐᑎᓗᒋᒃ ᐃᓱᐊᕐᓯᕕᐅᑉ ᖃᕆᑕᐅᔭᒃᑯᑦ ᓄᐃᑕᕕᖓᓂᑦ ᐊᒻᒪᓗ ᐊᐅᓪᓚᑎᓗᒋᒃ ᖃᕆᑕᐅᔭᒃᑯᑦ ᐊᓪᓚᑖᕐᕕᑯᑦ ᓱᑲᑦᑐᑰᕈᑎᒃᑯᓘᓐᓃᑦ. ᓯᑯᑦᓴᔦᑦ ᐊᑦᔨᖏᑦ ᐊᑐᐃᓐᓇᐅᖏᓐᓇᖃᑦᑕᓚᖓᔪᑦ ᐃᓱᐊᕐᓯᕕᒻᒥ ᓇᐅᑐᐃᓐᓇᓄᑦ ᐊᒻᒪᓗ ᐃᓘᓐᓇᖏᓐᓂ 14-ᓂ ᐋᓐᓂᐊᕕᓐᓂ ᓄᓇᕕᒻᒥ ᐊᒻᒪᓗ ᐃᓚᖏᓐᓂ ᐃᓂᐅᔪᓂ ᓇᓗᓀᕐᑕᐅᒪᔪᓂ. ᐊᓪᓚᓯᒪᔪᑦ ᓯᑯᑦᓴᔭᓂᒃ ᑕᑕᕐᓴᒐᕐᓂᒃ ᓄᑖᓂᒃ ᐊᒻᒪᓗ ᖃᐅᔨᔭᐅᑎᑦᓯᒐᓱᐊᕈᑎᓂᒃ ᐊᑐᐊᒑᐱᓐᓂᒃ ᐃᓗᓕᖃᕐᓱᑎᒃ ᐊᐅᓪᓚᑎᑕᐅᕐᖃᒥᓚᐅᔪᑦ 50-ᓄᑦ ᐊᑦᔨᒌᖕᖏᑐᓄᑦ ᐊᓪᓚᕕᓐᓄᑦ ᐊᒻᒪᓗ ᐱᓇᓱᑦᑎᓄᑦ ᐱᔪᓐᓇᐅᑎᓕᓐᓄᑦ ᐃᑲᔪᓲᓄᑦ ᓄᓇᕕᒻᒥᐅᓂᒃ ᑭᖕᖒᒪᑦᓯᔪᓂᒃ ᒪᒥᓴᕐᓂᒥᒃ.
ᑭᖕᖒᒪᓇᓪᓇᕆᑦᑐᖅ ᐊᓪᓗᕆᐊᕐᓂᖅ ᐊᑑᑎᓪᓚᕆᒋᐊᖃᓚᐅᔪᖅ ᐱᐅᓯᒋᐊᕆᓂᕐᒧᑦ ᐃᓱᐊᕐᓯᕕᒻᒦᑐᑦ ᐊᑑᑎᔭᖓᓂᒃ. ᓱᓕᑦᓱᓂᓗ, ᐃᓱᐊᕐᓯᕕᓕᐊᕋᓱᑦᑐᑦ ᐊᑐᕈᓐᓇᓕᕐᑐᑦ ᐱᔭᕆᐊᑭᓐᓂᓴᒥᒃ, ᓇᓗᓇᖕᖏᓂᕐᓴᒥᒃ, ᐊᑑᑎᖃᑦᓯᐊᓂᕐᓴᐅᓱᓂ ᐱᒐᓱᐊᕐᓂᒥᒃ ᑲᔪᓯᑦᓯᐊᓂᕐᓴᐅᑎᑦᓯᓚᕆᓚᖓᔪᒥᒃ ᐃᓱᐊᕐᓯᕕᓕᐊᕋᓱᓐᓂᒥᒃ. ᑕᑕᕐᓴᒐᐅᖃᑦᑕᓯᒪᔪᑦ ᑌᒣᖃᑦᑕᓯᒪᑎᓐᓇᒋᑦ, ᓄᑖᑦ ᑕᑕᕐᓴᒉᑦ ᐊᑐᐃᓐᓇᐅᓕᕐᑐᑦ ᐃᓘᓐᓇᖏᓐᓂ ᐱᖓᓱᓂ ᐅᖃᐅᓯᕐᓂ (ᖃᓪᓗᓈᑎᑐᑦ, ᐃᓄᑦᑎᑐᑦ, ᐅᐃᒍᐃᑎᑐᓪᓗ) ᐊᒻᒪᓗ ᐊᐱᕐᓲᑎᖏᑦ ᐊᓪᓚᑕᐅᒪᑦᓱᑎᒃ ᒪᒥᓴᕐᑐᓂᒃ ᑲᒪᓂᕐᒥᒃ ᑐᖕᖓᕕᖃᕐᓱᑎᒃ ᐃᓱᐊᕐᓯᕕᓕᐊᕐᑎᓯᔪᓂᖔᖑᖕᖏᑐᖅ.
ᑖᓐᓇ ᖃᐅᔨᔭᐅᑎᑦᓯᓂᖅ ᓄᐃᔪᖅ ᐸᕐᓇᕋᑦᑕ ᐅᒃᑯᐃᓯᒋᐊᓪᓚᓂᕐᒥᒃ ᐱᒍᑦᔨᓂᑦᑎᓂᒃ 2021 ᐊᕐᕌᒎᑉ ᐱᒋᐊᕐᓂᖓᓂ. ᑭᓇᑐᐃᓐᓇᖅ ᐃᓚᐅᒍᒪᔪᖅ ᐱᒍᑦᔨᓂᑦᑎᓄᑦ ᑫᓪᓗᑐᕐᑕᐅᔪᖅ ᐃᓱᐊᕐᓯᕕᓕᐊᕋᓱᒍᑎᒥᒃ ᑕᑕᕐᓭᖁᔭᐅᑦᓱᓂ ᐱᒍᓐᓇᓯᑦᓴᑐᐊᕈᓂ, ᐃᒻᒥᓂᒃ ᐅᕝᕙᓘᓐᓃᑦ ᐃᑲᔪᕐᑕᐅᓗᓂ ᐃᓱᐊᕐᓯᕕᓕᐊᕐᑎᓯᔪᑦ ᐱᓇᓱᑦᑎᖓᓄᑦ. ᒪᒥᓴᑐᐃᓐᓇᕆᐊᓖᑦ ᐃᓕᔭᐅᓚᖓᔪᑦ ᐅᑕᕐᕿᔪᑦ ᐊᓪᓚᑕᐅᓯᒪᕕᖓᓄᑦ ᐊᒻᒪᓗ ᐃᓱᐊᕐᓯᕕᓕᐊᕋᓱᒍᑎᒥᒃ ᑕᑕᕐᓭᕕᕕᓂᖓ ᐅᓪᓗᖅ ᐃᓱᒪᒋᔭᐅᓚᖓᑦᓱᓂ ᑎᒃᑯᐊᓯᓂᕐᒥ. ᐊᖏᕐᑕᐅᒍᑎᒃ, ᑎᑭᑕᐅᓛᕐᑐᑦ ᓇᓗᓀᕐᓯᒍᑎᒥᒃ ᖃᕆᑕᐅᔭᒃᑯᑦ ᐊᓪᓚᑖᕈᑎᒃᑯᑦ ᐊᒻᒪᓗ ᐃᓱᐊᕐᓯᕕᒻᒥᑦ ᑐᓴᕆᐊᖃᓛᕐᓱᑎᒃ ᑕᕐᕿᓕᒫᒥᒃ ᒪᒥᓴᕐᓂᐅᓛᓕᕐᒥᔪᖅ ᐱᒋᐊᖕᖏᓂᖓᓂ.
ᐊᐱᕐᓲᑎᑦᓴᖃᕈᕕᑦ ᑕᑕᕐᓭᓂᕐᓂ ᑖᑦᓱᒥᖓ ᑕᑕᕐᓴᒐᕐᒥᒃ, ᐅᖄᓚᑦᑌᓕᖕᖏᓚᑎᑦ ᐅᕙᑦᑎᓄᑦ ᐅᕗᖓ 1-866-964-9994 ᐊᒻᒪᓗ ᐅᖄᒍᒪᓗᑎᑦ ᐃᓱᐊᕐᓯᕕᓕᐊᕋᓱᑦᑐᓂᒃ ᐃᑎᕐᑐᓂᓪᓗ ᑲᒪᔨᒧᑦ.
-
ᐃᑭᓐᓂᓴᓂᒃ ᑕᕐᕿᓂᒃ ᐱᖓᓱᓂᒃ ᐱᓇᓱᐊᕐᓂᐅᑉ ᑭᖑᓂᖓᒍᑦ, ᐊᕐᖁᑎᐅᑉ ᓴᓇᔭᐅᓂᖓ ᐱᔭᕇᕐᓯᒪᓕᕐᑐᖅ. ᓴᓇᔩᑦ GÉLY Construction-ᑯᑦ ᓈᒻᒪᓈᓚᐅᕐᑐᑦ ᒪᓂᔭᐅᒪᔪᒥᒃ ᐃᑲᐅᕐᓂᕆᔭᐅᖁᔭᐅᒪᔪᒥᒃ ᐊᒻᒪᓗ ᐱᓇᓱᑦᑏᑦ ᐅᒃᑯᐊᑎᕆᓚᖓᓕᕐᑐᑦ ᓴᓇᕕᐅᔪᒥᒃ ᐅᓪᓗᓂ ᙯᔪᓂ. ᑖᓐᓇ ᐊᕐᖁᑎ ᓇᐅᑐᐃᓐᓇᓄᑦ ᐊᑐᕐᑕᐅᒋᐊᖃᖕᖏᑐᖅ ᐊᑐᐃᓐᓇᐅᓚᖓᖕᖏᑐᖅ ᐃᓄᓐᓄᑦ ᓄᑖᒥᒃ ᐃᓱᐊᕐᓯᕕᑦᓴᒥᒃ ᓴᓇᓂᖅ ᐱᒋᐊᖕᖏᓂᖓᓂ. ᑖᒃᑯᓇᓂ ᐅᓪᓗᓂ, ᐅᔭᕋᓱᑦᔪᐃᑦ ᐃᓕᔭᐅᒪᓚᖓᔪᑦ ᓄᑖᑉ ᐊᕐᖁᑎᐅᑉ ᐱᒋᐊᕐᓂᖓᓂ ᔪᓓ 2020 ᑎᑭᓪᓗᒍ. ᑰᑦᔪᐊᒥᐅᓕᒫᑦ ᓈᓚᑦᓯᐊᖁᔭᐅᓚᖓᔪᑦ ᑖᕙᓃᖃᑦᑕᕆᐊᖃᖕᖏᓂᕐᒥᒃ ᓴᓇᕕᐅᔪᑦᓴᐅᖏᓐᓇᒪᑦ.
ᐊᒥᓱᒐᓓᑦ ᐊᓪᓗᕆᐊᕐᓃᑦ ᐊᑑᑎᔭᐅᒋᐊᖃᓚᐅᔪᑦ ᑖᓐᓇ ᐊᕐᖁᑎ ᓄᑖᖅ ᓴᓇᔭᐅᖁᓗᒍ ᐃᓚᒋᔭᐅᑎᓪᓗᒋᑦ ᑕᕐᓰᓂᖅ ᒪᓃᑦᑐᒥᒃ ᕿᕐᓱᑎᑎᒐᕐᒥᒃ, ᐅᔭᕋᕐᓂᒃ ᓯᖁᑦᑎᕆᓂᖅ ᓴᒡᒐᓂᕐᒧᑦ ᐊᕐᖁᑎᒥ, ᑰᕝᕕᓂᒃ ᐃᓕᓯᓂᖅ ᐊᒻᒪᓗ ᐃᒣᔭᕐᕕᓕᐅᕐᓂᖅ ᓴᒡᒐᓱᒋᑦ. 60-ᒐᓓᑦ ᖄᕐᑎᓯᓃᑦ ᐊᑐᑎᔭᐅᓚᐅᕐᑐᑦ ᐊᐅᓚᑕᐅᑦᓯᐊᑐᒥ ᐃᓂᒥ. ᐱᓂᕐᓗᓂᕐᓂᒃ ᑐᓴᕐᑎᑕᐅᓚᐅᕋᑕᖕᖏᑐᒍᑦ.
ᐊᒻᒪᓗᑦᑕᐅᖅ, ᑕᕐᕿᐅᓚᐅᕐᑐᑦ ᐅᐸᓘᖓᓇᕐᑐᒪᕆᐅᓚᐅᕐᑐᑦ ᓴᓇᕕᐅᔪᒥ ᐊᕐᖁᑎᓕᐅᕐᓂᑐᐃᓐᓇᒨᖕᖏᑐᖅ ᑭᓯᐊᓂ ᓄᓇᑰᔫᓄᑦ ᕿᑲᕐᕕᓴᓕᐅᕐᓂᒧᓪᓗ ᓄᑖᒧᑦ ᐃᓱᐊᕐᓯᕕᑦᓴᒧᑦ ᐊᒻᒪᓗ ᐊᑐᐃᓐᓇᕈᕐᑎᓂᕐᒧᑦ ᒪᕐᕉᒃ ᐃᓪᓗᔪᐊᒃ ᑐᖕᖓᕕᑦᓴᖏᓐᓂᒃ ᐊᕐᕌᒍ ᓴᓇᔭᐅᓚᕐᑑᓄᑦ ᐱᓇᓱᑦᑏᑦ ᐃᓪᓗᓴᖏᓐᓄᑦ.
ᐃᓱᐊᕐᓯᕕᒻᒥ ᐱᓇᓱᑦᑎᕗᑦ ᓇᑯᕐᓴᑐᑦ ᑭᖑᕙᕆᐊᕐᑐᖃᓚᐅᖕᖏᒪᑦ ᑕᒃᑲᓂ ᐱᒋᐊᕐᓂᖓᓂ ᐊᖏᔪᒻᒪᕆᐅᑉ $40.5 ᒥᓕᐊᓐ ᑖᓚᕌᕐᑑᑉ ᐱᓇᓱᐊᕐᓂᐅᑉ ᐊᒻᒪᓗ ᑐᓂᒪᔪᓪᓚᕆᐅᖏᓐᓇᓱᑎᒃ ᑲᔪᓯᑦᓯᐊᑎᑦᓯᒐᓱᑦᓱᑎᒃ ᐳᕐᑐᓂᓕᒫᖏᓐᓂ ᐱᑦᔪᑎᒋᓗᒋᑦ ᐃᓗᕐᖁᓯᖅ, ᓄᓇ, ᐱᕈᕐᑐᐃᑦ ᐊᒻᒪᓗ ᐆᒪᔪᐃᑦ. ᐅᓪᓗᒥᒧᑦ, ᓄᓇᐅᑉ ᐱᐅᔫᓂᖓᓂᒃ ᓱᕐᕃᓂᖓ ᐊᕐᖁᑎᐅᑉ ᐊᑦᔨᒋᖕᖏᑕᖓ ᓂᕆᐅᒋᓚᐅᔭᑦᑕ ᐊᒻᒪᓗ ᐱᓇᓱᑦᑏᑦ ᐱᓇᓱᐊᖃᑦᑕᑐᑦ ᓯᕗᓂᕐᒧᑦ ᐅᐸᓗᙰᕐᓯᒪᑦᓱᑎᒃ ᑕᒪᓐᓇ ᐱᑦᔪᑎᒋᑦᓱᒍ. ᐊᑦᔨᒌᖕᖏᑐᑦ ᐱᓇᓱᐊᕈᑏᑦ ᕿᒥᕐᕈᔭᐅᓯᒪᔪᑦ ᒥᑭᓕᒋᐊᕆᒐᓱᓐᓂᒧᑦ ᓱᕐᕋᑕᐅᓂᖓᓂᒃ ᐊᒻᒪᓗ ᑫᓪᓗᑐᐃᓗᓂ ᐱᕈᕆᐊᓪᓚᐸᓪᓕᐊᓂᖏᓐᓂᒃ ᐱᕈᕐᑐᐃᑦ ᓴᓇᕕᐅᔪᒥ.
-
ᔭᓄᐊᕆ 2020 ᐱᒻᒪᕆᐅᖏᓐᓇᓚᖓᔪᖅ ᑕᕐᕿᖅ ᐃᓱᐊᕐᓯᕕᒻᒧᑦ, ᐱᓗᐊᕐᑐᒥᒃ ᐱᓇᓱᑦᑎᖏᓐᓄᑦ. ᑕᕐᕿᐅᓚᐅᕐᑐᒥ, ᓯᑕᒪᑦ ᐱᓇᓱᑦᑏᑦ ᐲᕈᑎᑖᓚᐅᕐᑐᑦ ᐊᓂᕐᕋᑖᒥᓄᑦ ᓄᑖᒧᑦ ᐃᑎᕈᓐᓇᓯᑦᓱᑎᒃ ᐃᓗᐃᑦᑐᓂᒃ ᐱᖁᑎᑕᖃᕇᕐᑐᒧᑦ ᑎᒥᐅᔪᒧᑦ ᑌᒣᑦᑎᑕᐅᑦᓱᓂ. ᒪᕐᕉᒃ ᒪᕐᕉᓂᒃ ᖃᕆᐊᓕᒻᒥᒃ ᐃᓪᓗᑖᕐᑑᒃ ᐊᒻᒪᓗ ᒪᕐᕈᒋᐊᓪᓛᒃ ᐊᑕᐅᓯᕐᒥᒃ ᖃᕆᐊᓕᒻᒥᒃ ᐃᓪᓗᑖᕐᑎᓗᒋᒃ. ᐃᓪᓗᓕᒫᑦ ᐃᓪᓗᕈᓗᓖᑦ ᐃᓪᓘᑉ ᓴᓂᐊᓂ ᒪᕐᕉᒃ ᓴᓇᔭᕕᓃᒃ ᓄᓇᓕᒻᒥ ᐃᓪᓗᓕᐅᕆᐅᕐᓴᑐᓄᑦ ᓴᓇᔩᑦ ᐱᓇᓱᐊᕐᓂᖓᓂᑦ ᐱᓯᒪᔪᓄᑦ.
ᐱᓇᓱᐊᕐᑐᒪᕇᑦ ᓄᐃᑕᓪᓗᑐᖕᖏᑲᓗᐊᕐᓱᑎᒃ ᓄᓇᓕᒻᒥ ᑎᒥᐅᔪᒧᑦ ᐋᕐᖀᓯᒪᑦᓱᑎᒃ ᑭᖕᖒᒪᒋᔭᐅᔪᓂᒃ ᐱᓇᓱᑦᑏᑦ ᐃᓪᓗᖏᓐᓂᒃ ᐊᒻᒪᓗ ᐱᔭᕇᕐᓱᒋᑦ. ᑭᓯᐊᓂ ᐱᓇᓱᐊᕐᓂᖅ ᐱᔭᕇᕋᑕᖕᖏᑐᖅ ᒪᕐᕈᒋᐊᓪᓛᒃ ᐃᑦᓯᒥᑦᑕᑕᕇᒃ ᓇᓗᓀᕐᑕᐅᒪᒻᒥᒪᑎᒃ ᑮᓇᐅᔭᖃᕐᑎᓯᓂᕐᒧᑦ ᐊᖏᖃᑎᒌᒍᑎᒥ ᓄᑖᒧᑦ ᐃᓱᐊᕐᓯᕕᒻᒧᑦ. ᐃᓱᐊᕐᓯᕕᒃ ᐱᒋᐊᕐᑎᓯᓛᕐᑐᖅ ᐊᑭᑭᓐᓂᐸᐅᓕᐅᑎᓂᕐᒥᒃ ᓯᑕᒪᐅᔪᕐᑐᒋᐊᓪᓚᓄᑦ ᐃᓪᓗᓄᑦ ᕕᕈᐊᕆ ᓈᓚᐅᕐᑎᓇᒍ.
ᑖᓐᓇ ᐱᔭᖃᕐᓯᒪᓂᖅ ᐱᒍᓐᓇᑎᑕᐅᓚᐅᕐᑐᖅ ᐊᑭᓕᕐᑐᑕᐅᒐᑎᒃ ᑲᑎᖕᖓᔨᑦᑎᓄᑦ, ᑲᐅᑕᖅ ᐃᓪᓗᓕᐅᕐᑎᑯᓐᓄᑦ, EVOQ ᐃᓪᓗᐃᑦ ᓴᓇᒻᒪᖏᓐᓂᒃ ᐊᓪᓚᖑᐊᕐᑎᓄᑦ, Bouthillette Parizeau-ᒧᑦ, NCK ᐊᒻᒪᓗ SNC-Lavalinᑯᓐᓄᑦ ᐱᓇᓱᐊᖃᑎᑦᓯᐊᒪᕆᐅᖃᑦᑕᑐᓄᑦ ᐱᒋᐊᕐᓂᖓᓂᓂᑦ ᑕᒪᑦᓱᒪ ᐱᓇᓱᐊᕐᓂᐅᑉ.
-
ᐊᕐᖁᑎ ᐱᔭᕇᕐᓯᒪᓕᕐᒪᑦ, ᐃᓱᐊᕐᓯᕕᒃ ᑲᑦᓱᙰᑦᑑᒍᑎᖃᕐᖁᖅ ᐊᓪᓗᕆᐊᕐᓂᐅᓚᖓᓕᕐᒥᔪᓂᒃ ᓄᓇᒥᒃ ᐊᐅᓚᑦᔦᓂᕐᒧᑦ ᓄᑖᒧᑦ ᐃᓱᐊᕐᓯᕕᑦᓴᒧᑦ. ᔭᓄᐊᕆ 10, 2020-ᒥ, ᐱᓇᓱᑦᑏᑦ ᐱᒋᐊᕐᑎᓯᓚᐅᔪᑦ ᓇᐅᓕᒫᓂᒃ ᐊᑭᑭᓐᓂᐸᐅᓕᐅᑎᑎᑦᓯᓂᕐᒥᒃ SEAO-ᒥ ᐊᒥᓱᓄᑦ ᐅᐸᓘᒪᓇᓚᖓᔪᓄᑦ ᐱᓇᓱᐊᕈᓯᕐᓄᑦ ᐱᔭᕇᕋᓱᐊᕐᓂᒧᑦ ᐃᓪᓗᓕᐅᕐᓂᐅᑉ ᐊᓪᓚᖁᑎᖏᓐᓂᒃ.
ᐃᓱᐊᕐᓯᕕᒃ ᓇᑯᕐᓴᒪᕆᑉᐳᖅ ᐱᓇᓱᐊᖃᑎᒌᓐᓂᓯᐊᕌᓗᖏᓐᓄᑦ EVOQ ᐃᓪᓗᐃᑦ ᓴᓇᒻᒪᖏᓐᓂᒃ ᐊᓪᓚᖑᐊᕐᑏᑦ, NCK, BPA ᐊᒻᒪᓗ SNC-Lavalin ᒪᓕᑦᓯᐊᓂᖏᓐᓄᑦ ᐃᓱᓕᑦᑕᕕᐅᒋᐊᓕᓐᓂᒃ ᐅᓪᓗᓂᒃ ᐃᓚᐅᑎᑦᓯᓯᐊᕋᓱᑦᓱᑎᓪᓗ ᐋᕐᕿᒋᐊᕈᑎᐅᒋᐊᖃᓯᐊᕿᖃᑦᑕᑐᓂᒃ.
ᐊᑭᑭᓐᓂᐸᐅᓕᐅᑎᒍᑏᑦ ᐊᒻᒪᑕᐅᓛᕐᑐᑦ ᐱᓇᓱᐊᕈᓯᖓᓂ ᕕᕈᐊᕆ 17, 2020. ᑲᔪᓯᑦᓯᐊᐸᑦ, ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑎ ᐁᑦᑑᑎᐅᒐᔭᕐᑐᖅ ᐅᐱᕐᖓᓴᖅ, ᓈᒻᒪᓈᑦᓯᐊᓗᓂ ᐱᒋᐊᕐᓂᒧᑦ ᐃᓪᓗᓕᐅᕐᓇᒥᒃ ᐱᒋᐊᕐᓗᓂ ᔪᓓᖑᓛᕐᑐᒥ ᐅᒥᐊᕐᔪᐊᖅ ᓯᕗᓪᓕᐹᖅ ᑎᑭᑉᐸᑦ.
-
ᓯᑉᑎᒻᐱᕆ ᑲᓇᑕᒥ ᒪᒥᓴᕐᓂᐅᑉ ᑕᕐᕿᖓ. 2020-ᒥ, ᐃᓱᐊᕐᓯᕕᒃ ᖃᐅᔨᔭᐅᑎᑦᓯᒐᓱᐊᕈᒪᓚᐅᔪᖅ ᑖᑦᓱᒥᖓ ᐱᒻᒪᕆᒻᒥᒃ ᐱᓇᓱᐊᕐᓂᒥᒃ ᓄᐃᑕᑎᑦᓯᓂᒃᑯᑦ ᓴᐳᑦᔨᓂᕐᒥᓂᒃ ᒪᒥᓴᕐᓂᒦᑦᑐᓕᒫᓂᒃ. ᒪᒥᓴᕐᓂᖅ ᐱᕈᕐᐸᓕᐊᓂᐅᒻᒪᑦ, ᐃᓱᐊᕐᓯᕕᒃ ᓂᐅᕕᐊᑦᓴᖃᖃᑦᑕᓚᐅᔪᖅ ᐱᕈᕐᓯᐊᓂᒃ.
ᓯᑉᑎᒻᐱᕆ 1-ᒥᑦ 15-ᒧᑦ, ᐃᓄᐃᑦ ᑰᑦᔪᐊᒥᐅᑦ ᐊᒻᒪᓗ ᐳᕕᕐᓂᑐᒥᐅᑦ ᐱᕕᑦᓴᖃᓚᐅᔪᑦ ᑎᑭᓭᑦᓴᐅᑎᒋᓂᕐᒥᒃ ᐱᕈᕐᓯᐊᒥᒃ 3”-ᓂᒃ ᑕᑭᓂᓕᒻᒥᒃ $40.00-ᑐᐃᓐᓇᓄᑦ ᐃᑲᔪᕐᓯᒍᑎᑦᓴᓂᒃ ᐱᕈᕐᐸᓕᐊᓂᖓᓂᒃ ᒪᒥᓴᕐᓂᐅᑉ ᐊᒻᒪᓗ ᐃᑲᔪᕐᓯᓗᑎᒃ ᐃᓱᐊᕐᓯᕕᐅᑉ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᐊᕐᑕᖏᓐᓂᒃ. ᓂᐅᕕᕐᑕᓂᑦ ᐊᑐᓂᑦ, $25.00 ᑐᕃᓐᓇᑐᒥᒃ ᑐᓂᕐᕈᑎᖃᕐᓂᐅᑎᑕᐅᓚᐅᕐᑐᑦ ᐃᓱᐊᕐᓯᕕᒻᒧᑦ. ᑲᑎᑦᓱᑎᒃ $1,725 ᑮᓇᐅᔭᓕᐊᖑᓚᐅᕐᑐᑦ ᐊᒻᒪᓗ ᐊᒥᓲᓂᕐᓭᑦ 80-ᓂᒃ ᐃᓄᐃᑦ ᐊᓕᐊᓱᑦᓱᑎᒃ ᐃᓚᒋᐊᕈᑎᑖᓚᐅᕐᑐᑦ ᐊᓂᕐᕋᒥᓄᑦ. ᑌᒃᑯᓇᖕᖓᑦ, 10 ᐃᓱᐊᕐᓯᕕᒻᒦᓯᒪᔫᓚᐅᕐᑐᑦᒃ. ᓂᕆᐅᖕᖏᓛᕐᖁᔭᐅᓚᐅᕐᑐᑦ ᐱᕈᕐᓯᐊᒧᑦ ᓄᐃᑕᑎᑦᓯᒍᑎᐅᑎᓪᓗᒍ ᓴᐳᑦᔨᓂᕐᒥᒃ ᒪᒥᓴᕐᓂᖏᓐᓂ, ᑐᓂᔨᒍᑎ 10-ᓂᑦ ᐃᓄᓐᓂᑦ ᐁᑦᑑᑎᑦᓴᐅᑎᓪᓗᒋᑦ ᓂᐅᕕᕐᓱᑎᒃ ᐱᕈᕐᓯᐊᒥᒃ ᐁᑦᑑᑎᐅᓚᖓᑎᓪᓗᒋᑦ ᐃᓱᐊᕐᓯᕕᒻᒦᓯᒪᔪᑦ ᐃᓚᖓᓐᓄᑦ.
ᑕᑕᒥᒃᑯᒍᑦ ᓴᐳᑦᔭᐅᓂᕐᒥᒃ ᐃᑉᐱᒋᓚᐅᕐᑕᑎᓐᓂᒃ ᓄᓇᕕᓕᒫᒥᑦ ᑌᒃᑯᓄᖓ ᒪᒥᓴᕐᓂᒦᑦᑐᓕᒫᓄᑦ. ᓇᑯᕐᒦᕈᒪᕗᒍᑦ ᓴᕿᔪᒃᑯᓂᒃ ᖃᐅᔨᔭᐅᑎᑦᓯᒐᓱᐊᓚᐅᕐᒪᑕ ᑖᑦᓱᒥᖓ ᓄᑖᒥᒃ ᐱᓇᓱᐊᕆᐊᖕᖓᓂᕐᒥᒃ ᐊᒻᒪᓗ ᐸᔪᖃᑦᑕᓱᑎᒃ ᐱᕈᕐᓯᐊᓂᒃ ᐳᕕᕐᓂᑐᒥ. ᓇᑯᕐᒦᒃ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᖕᖓᔩᑦ ᐊᒻᒪᓗ ᑰᑦᔪᐊᑉ ᑲᕙᒫᐱᖓ ᓂᐅᕕᓚᐅᕐᒪᑎᒃ 20-ᓂᒃ ᐊᒻᒪᓗ 10-ᓂᒃ ᐱᕈᕐᓯᐊᓂᒃ ᐁᑦᑐᑐᐃᓚᖓᑦᓱᑎᒃ ᑎᒥᐅᔪᖁᑎᒻᒥ ᐃᓗᐊᓂ ᐊᒻᒪᓗ ᓄᓇᓕᒻᒧᑦ ᖃᐅᔨᒪᔭᐅᑎᑦᓯᒐᓱᐊᕐᓱᑎᒃ.
ᑖᓐᓇᑕᒐ ᑌᓲᕗᑦ ᐱᔭᕆᐊᑭᑦᑐᖅ ᐱᓇᓱᐊᕐᓂᖅ ᐊᖏᔪᒥᒃ ᓱᕐᕃᓂᖃᕐᓱᓂ.
-
ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᐅᑉ ᑲᑎᖕᖓᔨᖏᑦ ᐸᕐᓇᓯᒪᓚᐅᔪᑦ ᑲᑎᖕᖓᓂᖃᕐᓂᒥᒃ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᓂᒻᒪᕆᒻᒥᒃ ᑮᓇᐅᔭᑎᒍᑦ ᐊᕐᕌᒍᖓᓄᑦ 2019–2020 ᐆᒃᑑᐱᕆ 14, 2020-ᒥ, ᑲᑎᑦᑕᕕᒻᒥ ᑰᑦᔪᐊᒥ. ᑭᓯᐊᓂ ᐊᒥᓱᖕᖑᐸᓪᓕᐊᓂᑯᖏᓐᓄᑦ COVID-ᒥᒃ ᖃᓂᒻᒪᓯᓖᑦ ᑯᐯᒃᒥ, ᑲᑎᖕᖓᔩᑦ ᖃᐅᔨᓴᑦᓯᐊᒪᕆᓚᐅᔪᑦ ᐊᓯᑦᔨᕙᓪᓕᐊᔪᒥᒃ ᖃᓄᐃᓕᖓᔪᒦᓐᓂᒥᒃ ᐱᕕᓕᒫᖓᓄᑦ ᐊᑦᑕᓇᕐᑐᒦᖁᔨᓚᐅᔪᖕᖏᓇᒥᒃ ᐃᓚᐅᔪᖁᑎᓕᒫᒥᓂᒃ.
ᐃᓱᒫᓗᑦᓯᐊᓱᑎᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᓇᐅᓕᒫᑦ, ᑲᑎᖕᖓᔩᑦ ᑐᑭᑖᓚᐅᔪᑦ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᖃᕆᐊᒥᒃ ᑮᓇᐅᔭᑎᒍᑦ ᐊᕐᕌᒍᖓᓄᑦ 2019–2020 ᖃᕆᑕᐅᔭᒃᑯᑦ. ᖃᕆᑕᐅᔭᑎᒎᕐᓂᖅ ᐱᔪᓐᓇᑎᑦᓯᔪᖅ ᑎᒥᐅᔪᒥᒃ ᒪᓕᓐᓂᑐᐃᓐᓇᐅᖏᑦᑐᒥᒃ ᐱᖁᔭᑎᒍᑦ ᐊᑐᕆᐊᓕᒻᒥᓂᒃ ᖄᖏᕐᓂᑯᓕᐅᕐᑎᐅᖏᑦᑑᓱᓂ ᑎᒥᐅᔫᑦᓱᓂ, ᑭᓯᐊᓂᓕ ᐃᑲᔪᕐᓯᓂᒐᓴᒻᒥᒃ ᐃᓘᓐᓇᖏᓐᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ, ᑌᒣᖏᓐᓇᓱᓂ, ᐱᒻᒪᕆᐅᓂᕐᐹᒥᒃ, ᐱᔪᓐᓇᑎᑦᓯᓱᓂ ᑐᓴᕐᑎᓯᓂᕐᒥᒃ ᐱᔭᕆᓯᒪᔭᑦᓯᐊᕌᓗᒻᒥᓂᒃ ᐊᕐᕌᒎᓚᐅᕐᑐᒥ. ᐃᓚᐅᔪᓕᒫᑦ ᓂᕈᐊᓚᐅᔪᑦ ᐊᖏᕐᓱᑎᒃ ᐃᓘᓐᓇᖏᓐᓂᒃ ᐱᖓᓱᓂᑦ ᑐᑭᑖᕈᑎᓂᒃ ᑐᑭᑖᕐᑐᓂᒃ ᐃᒫᒃ:
- ᑭᓯᑦᓯᒍᑎᓕᒃ 20201023-1 / ᐃᓚᐅᔪᑦ ᐊᖏᕐᑐᑦ 2019-2020-ᒥ ᑮᓇᐅᔭᕐᑑᑎᕕᓂᕐᓂᒃ.
- ᑭᓯᑦᓯᒍᑎᓕᒃ 20201023-2 / Raymond Chabot Grant Thornton ᑎᓕᔭᐅᔪᑦ ᑕᒻᒪᓯᒪᔪᕐᓯᐅᓚᖓᑎᓪᓗᒋᑦ ᑮᓇᐅᔭᑎᒍᑦ ᐊᕐᕌᒍᖓᓂᒃ 2020-2021 ᐊᒻᒪᓗ ᑲᔪᓯᑦᓯᐊᓗᑎᒃ ᑎᓕᔭᐅᒪᐅᑎᓕᒫᒥᓂᒃ $13,925.00-ᓄᑦ ᐃᓚᖃᕐᑎᓗᒋᑦ ᐊᑭᑦᑐᐸᓪᓕᐊᓂᕐᒥᒃ.
- ᑭᓯᑦᓯᒍᑎᓕᒃ 20201023-3 / ᑲᑎᖕᖓᔩᑦ ᑎᓕᔨᕗᑦ ᐹᒪᓚ ᔅᑏᕙᓐᓴᓐᒥᒃ ᐊᒻᒪᓗ ᔩᓂ ᑳᓪᕕᓐᒥᒃ ᑲᑎᖕᖓᔨᐅᓚᖓᑎᓪᓗᒋᒃ ᑭᒃᒐᑐᕐᓗᑎᒃ ᐃᓄᓕᒫᓂᒃ ᐊᕐᕌᒍᓄᑦ ᐱᖓᓱᓄᑦ (3) ᑲᑎᖕᖓᔨᐅᓚᖓᓗᑎᒃ.
ᐊᑕᐅᓯᐅᓈᕐᑎᑐᑦ ᐴᕐᖃᓯᒪᔪᑦ ᐊᐅᓪᓚᑎᑕᐅᓚᐅᔪᑦ ᐆᒃᑑᐱᕆᒥ ᐃᓘᓐᓇᖏᓐᓄᑦ ᖁᓕᐅᖕᖏᒐᕐᑐᓄᑦ ᐃᓚᐅᔪᑦ ᐊᖓᔪᕐᖄᖏᓐᓄᑦ ᐊᒻᒪᓗ ᑐᑭᒧᐊᑦᑎᓯᔨᒻᒪᕆᖏᓐᓄᑦ. ᐃᓱᐊᕐᓯᕕᐅᑉ ᑲᑎᖕᖓᔨᖏᑦ ᓇᑯᕐᒦᕈᒪᔪᑦ ᑌᒃᑯᓂᖓ ᐱᓇᓱᐊᖃᑕᐅᓂᖏᓐᓄᑦ ᐊᒻᒪᓗ ᓴᐳᑦᔨᖏᓐᓇᓕᒫᕐᓂᖏᓐᓄᑦ, ᑌᓗᒋᑦ ᑲᑎᕕᒃ ᐃᓕᓴᕐᓂᓕᕆᓂᖅ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᒪᑭᕝᕕᒃ, ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ, ᑰᑦᔪᐊᑉ ᑲᕙᒫᐱᖓ, ᐊᕙᑕᖅ ᐱᐅᓯᑐᖃᓕᕆᕕᒃ, ᐃᓅᓕᑦᓯᕕᒃ ᐋᓐᓂᐊᕕᒃ- ᓄᓇᕕᒃ- ᑕᓯᐅᔭᕐᔪᐊᖅ, ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒃ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᐃᓄᓕᕆᓂᕐᒧᓗ ᑲᑎᖕᖓᔩᑦ.