ᐃᓪᓗᒪᕆᓕᐅᕐᓂᐅᑉ ᐊᑭᒋᒐᔭᕐᑕᖓ ᐃᓱᒪᒋᔭᐅᕗᖅ $40.5 ᒥᓕᐊᓐᕌᒐᔭᕐᑎᓗᒍ ᑲᑐᑦᔨᖃᑎᒌᑦᑐᑦ ᑯᐯᒃᒥ ᐃᓪᓗᒪᕆᓕᕆᔨᒃᑯᖏᓐᓄᑦ

ᒣ 14ᒥ, ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᖓ ᐊᖏᖃᑎᒌᒍᑎᖃᕐᓂᖁᑦ ᑲᑐᑦᔨᖃᑎᒌᓐᓂᖓᓗ ᐅᑭᐅᕐᑕᑐᒧᓕᖓᔪᓂᑦ ᐸᕐᓀᑎᖏᓪᓗ ᑮᓇᐅᔭᕐᑑᑎᑦᓴᒋᒐᔭᕐᑕᖏᓐᓂᑦ ᐃᓪᓗᓕᐅᕐᓂᐅᒐᔭᕐᑐᒧᑦ ᓄᐃᑦᓯᓗᑎᓗ ᐊᐅᓚᑦᓯᒍᓯᐅᒐᔭᕐᑐᒥᒃ ᐃᓪᓗᓕᐅᕐᓂᒥᒃ. ᑯᐯᒃ ᑲᕙᒪᖓ ᓯᕗᓕᕆᐊᕐᓯᒪᑦᓯᐊᖁᑦ ᑐᓂᒪᑦᓯᐊᓱᑎᓗ ᐱᓇᓱᑦᑕᕗᓐᓂᑦ ᑕᕐᕿᐅᓚᐅᕐᑐᓂᑦ ᐊᓕᐊᓱᑦᓱᑕᓗ ᑐᓴᕐᑎᓯᒋᐊᒥᒃ ᓱᕐᖁᐃᑐᒥᒃ ᐃᓪᓗᓕᐅᕐᓂᐅᑉ ᐊᑭᒋᒐᔭᕐᑕᖓᓂᒃ ᐃᓱᒪᒋᔭᐅᔪᒥᒃ $40.5 ᒥᓕᐊᓐ ᑖᓚᕌᒐᔭᕐᑎᓗᒍ. ᐅᓪᓗᒥᒧᑦ, ᓄᐊᑕᐅᒪᔪᑦ $19.5 ᒥᓕᐊᓐ ᓄᓇᖃᕐᖄᓯᒪᔪᓂᑦ ᐱᒍᑦᔨᕕᖏᓐᓂ ᑲᓇᑕᒥ, ᑯᐯᒃ ᑲᕙᒪᖓᓂ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᒪᑭᕝᕕᒃ ᑯᐊᐳᕆᓴᓐᑯᓂ ᐊᒻᒪᓗ ᐱᒋᐊᕈᑎᑦᓴᓂᑦ ᑮᓇᐅᔭᕐᓂᑦ ᐃᓱᐊᕐᓯᕕᒻᒥ.

ᔫᓂ 4ᖑᑎᓪᓗᒍ, ᑯᐯᒃ ᑲᕙᒪᖓ ᑐᑦᓯᕋᕐᓂᖁᑦ $21 ᒥᓕᐊᓐ ᑖᓚᓂᑦ ᐃᓪᓗᓕᕆᓂᕐᒥᒃ ᑲᓇᑕᒥ ᓄᓇᓕᐊᕈᕐᓄᓕᖓᔪᓂᑦ ᐅᑭᐅᕐᑕᑐᒥᓗ ᓄᓇᓕᖏᓐᓄᓕᖓᔪᓂᑦ ᐱᓇᓱᑦᑕᐅᔪᓂᑦ ᐃᓪᓗᖁᑎᓄᓕᖓᔪᓂᑦ ᑮᓇᐅᔭᖁᑎᑦᓴᖏᓐᓂᑦ ᐃᓗᐃᑦᑐᕈᕐᑎᓯᒍᑎᑦᓴᖏᓐᓂᑦ. 10ᓂᑦ ᐱᓇᓱᐊᕈᓯᕐᓂᑦ ᕿᒥᕐᕈᕕᑦᓴᖃᕆᐊᖃᕐᖁᑦ ᑐᑦᓯᕋᐅᑎᒥᒃ ᐃᓪᓗᓕᕆᔨᒃᑯᖏᑦ ᑲᓇᑕᒥ. ᓂᕆᐅᒃᑯᑦ ᑐᓴᕋᑦᓴᓯᐊᒥᒃ ᑐᓴᕐᑎᑕᐅᓛᕆᐊᒥᒃ ᐊᐅᒡᒍᓯ 29ᖑᓚᐅᕐᑎᓇᒍ, ᐅᓪᓗᖓ ᐱᒻᒪᕆᐅᔪᖅ ᐃᓱᐊᕐᓯᕕᒻᒧᑦ ᑎᒥᐅᔪᖅ ᐱᒋᐊᕐᑎᓯᓛᕐᒪᑦ ᓴᓇᔭᐅᓂᑦᓴᖓᓂ ᓄᑖᖅ ᒪᒥᓴᕐᕕᐅᓛᕐᑐᖅ.