17Octoberᐊᐅᒡᒍᓯ 29, 2019-ᒥ, ᑲᓇᑕᐅᑉ ᑲᕙᒪᖓ ᐊᒻᒪᓗ ᑯᐯᒃ ᑲᕙᒪᖓ ᐅᖃᕈᑎᖃᓚᐅᔫᒃ ᑲᑐᑦᔨᓱᑎᒃ ᑮᓇᐅᔭᕐᑕᓰᓂᕐᒥᓂᒃ ᐱᔭᕇᕐᑎᓯᒍᑎᓂᒃ ᑮᓇᐅᔭᖃᕐᑎᑕᐅᓂᑦᓴᖓᓂᒃ ᐃᓱᐊᕐᓯᕕᐅᑉ ᓄᓇᕕᒻᒥ ᒪᒥᓴᕐᕕᐅᑉ ᐊᑯᓂ ᐅᑕᕐᕿᔭᐅᔪᒧᑦ ᒪᒥᓴᕐᕕᒧᑦ. ᑕᒪᓐᓇ ᓇᓗᓀᕐᓯᓂᖓ ᓈᒻᒪᓈᑦᓯᐊᓚᐅᔪᖅ ᑐᑭᒧᐊᑦᑎᓯᓚᖓᓂᕐᒧᑦ ᐊᓪᓗᕆᐊᕐᓂᐅᓚᖓᔪᓂᒃ ᐱᒋᐊᕐᑎᓯᓚᖓᒍᑎᒃ ᐃᓪᓗᓕᐅᕐᓂᒥᒃ ᓄᑖᒥᒃ ᐃᓱᐊᕐᓯᕕᑦᓴᒥᒃ 2020 ᐅᐱᕐᖔᖓᓂ.
ᓯᕗᓪᓕᐹᖅ ᑮᓇᐅᔭᑎᒍᑦ ᐃᑲᔪᕐᓯᒍᑎ ᐅᖃᕐᑕᐅᓚᐅᕐᓯᒪᔪᖅ ᐅᑭᐊᖓᓂ 2017 ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᒻᒪᓗ ᒪᑭᕝᕕᒃ ᐊᑐᓂᑦ ᐅᖃᕐᑎᓗᒋᒃ $1 ᒥᓕᐊᓐ ᑖᓚᓂᒃ ᑮᓇᐅᔭᖃᕐᑎᓯᓚᖓᓂᕐᒥᓂᒃ ᐱᒋᐊᕐᑎᓯᒍᑎᑦᓴᓂᒃ ᑖᑦᓱᒥᖓ ᐱᓇᓱᐊᕐᓂᒥᒃ.
ᐊᓱᐃᓛ, ᐱᓇᓱᐊᕐᓂᖅ ᐊᖏᔪᒥᒃ ᓴᐳᑦᔭᐅᓯᓚᐅᕐᓯᒪᒻᒥᔪᖅ ᐆᒃᑑᐱᕆ 2018 ᓈᑲᓵᓕᕐᑎᓗᒍ ᓄᓇᖃᕐᖄᓯᒪᔪᓕᕆᔨᖏᓐᓂᑦ ᑲᓇᑕᐅᑉ $6 ᒥᓕᐊᓐ ᑖᓚᓂᒃ ᑮᓇᐅᔭᑎᒍᑦ ᐃᑲᔪᕐᓯᔭᐅᑦᓱᓂ. ᓇᑯᕐᓴᒪᕆᑦᓱᓂ ᑖᑦᓱᒥᖓ ᐅᖃᕐᑕᐅᓂᖓᓂᒃ ᐊᒻᒪᓗ ᓴᐳᑦᔭᐅᓂᕐᒥᓂᒃ ᒪᑭᕝᕕᑯᓐᓄᑦ, ᐃᓱᐊᕐᓯᕕᒃ ᐱᒋᐊᕈᓐᓇᓯᓚᐅᔪᖅ ᐊᕐᖁᑎᐅᑉ ᓄᑖᒧᑦ ᐃᓱᐊᕐᓯᕕᑦᓴᒧᑦ ᓴᓇᔭᐅᓂᖓᓂᒃ ᓇᓗᓀᕐᑕᐅᓚᐅᕐᑎᓇᒍ ᑮᓇᐅᔭᖃᕐᑎᑕᐅᓂᑦᓴᖓ ᐃᓘᓐᓇᖓᓂᒃ.
ᒥᑦᓴᐅᓵᕐᑕᐅᒪᔪᖅ $40.5 ᒥᓕᐊᓐ ᑖᓚᕌᕋᔭᕐᓱᓂ, ᐃᓪᓗᓕᐅᕐᓂᖅ ᓄᑖᒥᒃ ᐃᓱᐊᕐᓯᕕᒻᒥᒃ ᐃᓚᓕᒃ ᓄᑖᒥᒃ ᐊᕐᖁᓯᐅᕐᓂᒥᒃ, ᓄᓇᒃᑰᔫᑦ ᕿᑲᕐᕕᓴᖓᓂᒃ ᐊᒻᒪᓗ ᐱᖓᓱᓂᒃ ᓯᑕᒪᐅᓕᖓᔪᓂᒃ ᐃᓪᓗᓂᒃ ᐱᓇᓱᑦᑏᑦ ᐃᓪᓗᓴᖏᓐᓂᒃ. ᑮᓇᐅᔭᖃᕐᑎᑕᐅᓂᖓ ᑌᒣᑦᑑᑉ ᐱᓇᓱᐊᕐᓂᐅᑉ ᐱᒍᓐᓇᑎᑕᐅᔪᖅ ᑕᓪᓕᒣᑎᒍᑦ ᐱᓇᓱᐊᖃᑎᒌᑦᑐᓯᐊᕌᓗᑦᑎᒍᑦ:
- 21 ᒥᓕᐊᓐ ᑲᓇᑕᐅᑉ ᑲᕙᒪᖓᓂᑦ, ᐱᖁᑎᒻᒪᕆᓕᕆᔨᒃᑯᓂᑦ ᑲᓇᑕᒥ;
- 5 ᒥᓕᐊᓐ ᑯᐯᒃ ᑲᕙᒪᖓᓂᑦ;
- 6 ᒥᓕᐊᓐ ᑲᓇᑕᐅᑉ ᑲᕙᒪᖓᓂᑦ, ᓄᓇᖃᕐᖄᓯᒪᔪᓕᕆᔨᒃᑯᓂᑦ ᑲᓇᑕᒥ;
- 75 ᒥᓕᐊᓐ ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᒥᑦ;
- 2 ᒥᓕᐊᓐ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᑦ
- 1 ᒥᓕᐊᓐ ᒪᑭᕝᕕᑯᓐᓂᑦ.
ᐃᓚᒋᐊᕈᑎᐅᑦᓱᓂ, ᑯᐯᒃ ᑕᕐᕋᖓᑕ ᐸᕐᓇᑕᐅᓂᖓᓄᑦ ᑲᑎᒪᔩᑦ ᓴᐳᑦᔨᓯᒪᔪᑦ ᐱᓇᓱᐊᕐᓂᒥᒃ ᑮᓇᐅᔭᖃᕐᑎᓯᓂᒃᑯᑦ ᐱᓪᓗᑯᒋᐊᓕᓕᕆᓂᕐᒥᒃ ᐊᒻᒪᓗ ᑮᓇᐅᔭᓂᒃ ᖃᐅᔨᓴᕐᓂᓂᒃ ᑭᖕᖒᒪᒋᔭᐅᔪᓂᒃ ᓴᓇᒻᒪᓕᐅᕐᑕᐅᓂᖓᓄᑦ ᐊᒻᒪᓗ ᓴᓇᔭᐅᓂᖓᓄᑦ ᐃᓪᓗᔪᐊᑉ ᐊᒻᒪᓗ ᐃᑲᔪᕐᓯᒥᑦᓱᑎᒃ ᐊᑕᐅᑦᓯᑰᕐᑎᑕᐅᓂᖓᓂᒃ ᐱᓇᓱᐊᕐᓂᐅᑉ, ᐊᑦᔨᐅᖏᑦᑐᒥᒃ ᐊᖏᓂᕐᐸᐅᑎᓪᓗᒍ ᐊᑭᒋᒍᓐᓇᑕᖓᓂᒃ $1.5 ᒥᓕᐊᓐ ᑖᓚᓂᒃ.
ᓄᑖᖅ ᐃᓪᓗᔪᐊᖅ ᐃᓪᓕᖃᓛᕐᑐᖅ 32-ᓂᒃ ᐃᓄᑑᓈᕐᑎᑐᑦ ᐊᒻᒪᓗ ᐃᓚᒌᑦ ᒪᒥᓴᕐᓂᖏᓐᓂ ᐃᓚᐅᔪᓄᑦ, ᐊᒥᓱᑦ ᐊᓪᓚᕖᑦ, ᐯᕆᑦᓯᕕᒃ ᐊᒻᒪᓗ ᐃᓕᓐᓂᐊᕕᒃ ᒪᒥᓴᕐᑐᑦ ᐱᐊᕋᖏᓐᓄᑦ. ᐅᒃᑯᐃᑕᐅᓂᖓ ᓄᑖᑉ ᐃᓱᐊᕐᓯᕕᐅᑉ ᐸᕐᓇᑕᐅᒪᔪᖅ 2021 ᐊᕐᕌᒍᖓ ᓈᓚᐅᕐᑎᓇᒍᒧᑦ.
-
05August
ᓴᓇᔭᐅᓂᑦᓴᖓ ᐃᓪᓗᑕᕆᓛᕐᑕᖓ ᐅᐱᕐᖔᖑᓛᕐᑐᒥ ᐱᒋᐊᓛᕐᖁᖅ. ᒫᓐᓇᐅᑎᓪᓗᒍᓕ, ᐊᕐᖁᓯᐅᕆᐊᖃᕐᖁᒍᑦ, ᐃᓂᕐᕋᐅᑎᖃᐅᑎᑦᓴᒥᒃ ᓄᓇᐅᓗ ᐃᑭᐊᓂ ᐃᑯᒪᐅᑉ ᐱᑐᒍᑎᖏᓐᓂᑦ ᐊᑐᐃᓐᓇᐅᒐᓱᓪᓗᑕ 2020ᒧᑦ. Gely Construction ᐱᓇᓱᑦᑎᑖᕆᔭᐅᓚᐅᕐᑐᓂᕐᖁᑦ ᐊᐅᓚᑦᓯᓂᐊᕐᑎᓗᒋᑦ ᐱᓇᓱᑦᑕᐅᒋᐊᓕᓐᓂᑦ ᐊᕐᖁᓯᐅᓯᓛᕐᓱᑎᓗ ᔪᓓ ᓈᓂᖓᓂ. ᓴᓇᔭᐅᓂᖓ ᐱᔭᕆᕐᓯᒪᒋᐊᓕᒃ ᐅᑦᑐᐱᕆ ᐱᒋᐊᕐᓂᖓᓂ.
ᐃᑦᓯᒥᑦᑎᑕᕇᑦ ᓯᑕᒪᑕᓖᑦ ᐃᓪᓗᒋᔭᐅᓛᕐᑐᑦ ᐱᓇᓱᑦᑎᓄᑦ ᓴᓇᔭᐅᒋᐊᖕᖓᓛᕐᑐᖅ ᓄᓇᓕᒻᒥ ᓄᑖᓂᑦ ᐃᓪᓗᓕᐅᕐᕕᐅᖃᑦᑕᑐᒥ ᑰᑦᔪᐊᒥ. ᑐᖕᖓᕕᑦᓴᖓ ᐱᔭᕆᕐᑕᐅᓂᕐᖁᖅ ᐱᓇᓱᐊᕈᓯᖓᓂ ᑭᖑᓪᓕᐹᖓᓂ ᔫᓂᒥ ᑲᕙᒫᐱᖓᓄᑦ ᑰᑦᔪᐊᑉ. ᑲᐅᑕᒃ ᐃᓪᓗᓕᐅᕐᑎᖏᑦ ᓴᓇᓯᓛᕐᖁᑦ ᐅᒥᐊᕐᔪᐊᖅ ᓯᕗᓪᓕᖓ ᓄᓇᓕᒻᒧᐸᑦ. ᐃᑦᓯᒥᑦᑎᑕᕆᒃ ᓯᑕᒪᑕᓕᒃ ᐃᓪᓗ ᐊᑐᐃᓐᓇᐅᓛᕐᑐᖅ ᐃᓱᐊᕐᓯᕕᐅᑉ ᐱᓇᓱᑦᑎᖏᓐᓄᑦ ᔭᓄᐊᕆᒥ ᕕᕈᐊᕆᒥᓗᓐᓃᑦ 2020ᒥ.
ᐊᓯᒋᒃ ᒪᕐᕈᒋᐊᓪᓛᒃ ᐃᑦᓯᒥᑦᑎᑕᕇᒃ ᓯᑕᒪᑕᓖᑦ ᐃᓪᓗᐃᑦ, ᓄᓇᓕᐅᑉ ᑲᑎᖕᖓᔨᖏᓐᓄᑦ ᐊᖏᕐᑕᐅᓂᕐᖁᑦ ᑐᑦᓯᕋᐅᑎᖏᑦ -ᔫᓂ 26ᒥ ᓄᓇᐅᑉ ᐊᕕᑦᑐᓯᒪᓂᖏᓐᓂᑦ ᒪᓕᒐᖏᑎᒍᑦ ᐃᓪᓗᓕᐅᕐᕕᐅᖁᔭᐅᑦᓱᓂ ᐊᕐᖁᑎᖓᑕ ᓴᓂᐊᓂ. ᓇᔪᒻᒥᕕᒃ ᓄᓇᒥᒃ ᑎᒍᒥᐊᕐᑏᑦ ᑰᑦᔪᐊᒥ ᓴᓇᔭᐅᖁᔨᒍᑎᒧᑦ ᑐᑦᓯᕋᐅᑎᒥᒃ ᑐᓂᔨᓯᒪᓕᕐᖁᑦ ᐊᒻᒪᓗ ᓄᓇᖓᓂᒃ ᖃᐅᔨᓴᕐᓂᐅᔪᑦ ᐱᔭᕇᓯᒪᓛᕐᖁᑦ ᐅᐱᕐᖔᖓᓂ ᖃᐅᔨᓴᕐᓗᑎᑦ ᖃᓄᐃᓗᕐᓗᑎᑦ ᓴᓇᒍᓯᐅᔪᑦ ᐱᐅᓂᕐᐸᐅᒐᔭᕐᓂᖏᓐᓂᑦ ᑕᒪᒋᓐᓄᒃ ᑐᖕᖓᕖᓐᓄᒃ. ᐃᓪᓗᓕᐅᕐᑕᐅᒐᔭᒋᐊᖓ ᐸᕐᓀᑕᐅᒪᔪᖅ ᐱᒋᐊᕋᔭᕐᑎᓗᒋᑦ ᐅᐱᕐᖔᖓᓂ 2020 ᐱᔭᕆᕐᓯᒪᓗᑎᓗ ᔭᓄᐊᕆ 2021ᒥ.
ᐃᓚᒋᔭᐅᑦᓱᑎᑦ Gely Construction-ᑯᓄᑦ ᓇᑯᕐᓴᕆᕗᒍᑦ ᓴᓇᖃᑎᐅᔪᓂᑦ ᐱᓇᓱᖃᑎᒌᑦᓱᑎᑦ SNC-Lavalin ᐃᓐᔨᓂᐊᓕᕆᔭᐅᒍᑎᖏᓐᓄᑦ, EVOQ ᐊᓪᓚᖑᐊᕐᑎᐅᓂᕐᓄᑦ, NCK ᐃᓪᓘᑉ ᑐᖕᖓᕕᖏᓐᓄᑦ ᖃᐅᔨᒪᔪᒻᒪᕆᐅᓂᕐᒧᑦ ᐊᒻᒪᓗ BPA ᐃᑯᒪᓕᕆᓂᕐᒧᑦ ᓱᒃᑯᓯᒪᔪᕐᓂᐊᓂᕐᒧᑦ ᖃᐅᔨᒪᔨᒋᔭᐅᑦᔪᑎᑦ.
-
05August
ᒣ 14ᒥ, ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᖓ ᐊᖏᖃᑎᒌᒍᑎᖃᕐᓂᖁᑦ ᑲᑐᑦᔨᖃᑎᒌᓐᓂᖓᓗ ᐅᑭᐅᕐᑕᑐᒧᓕᖓᔪᓂᑦ ᐸᕐᓀᑎᖏᓪᓗ ᑮᓇᐅᔭᕐᑑᑎᑦᓴᒋᒐᔭᕐᑕᖏᓐᓂᑦ ᐃᓪᓗᓕᐅᕐᓂᐅᒐᔭᕐᑐᒧᑦ ᓄᐃᑦᓯᓗᑎᓗ ᐊᐅᓚᑦᓯᒍᓯᐅᒐᔭᕐᑐᒥᒃ ᐃᓪᓗᓕᐅᕐᓂᒥᒃ. ᑯᐯᒃ ᑲᕙᒪᖓ ᓯᕗᓕᕆᐊᕐᓯᒪᑦᓯᐊᖁᑦ ᑐᓂᒪᑦᓯᐊᓱᑎᓗ ᐱᓇᓱᑦᑕᕗᓐᓂᑦ ᑕᕐᕿᐅᓚᐅᕐᑐᓂᑦ ᐊᓕᐊᓱᑦᓱᑕᓗ ᑐᓴᕐᑎᓯᒋᐊᒥᒃ ᓱᕐᖁᐃᑐᒥᒃ ᐃᓪᓗᓕᐅᕐᓂᐅᑉ ᐊᑭᒋᒐᔭᕐᑕᖓᓂᒃ ᐃᓱᒪᒋᔭᐅᔪᒥᒃ $40.5 ᒥᓕᐊᓐ ᑖᓚᕌᒐᔭᕐᑎᓗᒍ. ᐅᓪᓗᒥᒧᑦ, ᓄᐊᑕᐅᒪᔪᑦ $19.5 ᒥᓕᐊᓐ ᓄᓇᖃᕐᖄᓯᒪᔪᓂᑦ ᐱᒍᑦᔨᕕᖏᓐᓂ ᑲᓇᑕᒥ, ᑯᐯᒃ ᑲᕙᒪᖓᓂ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᒪᑭᕝᕕᒃ ᑯᐊᐳᕆᓴᓐᑯᓂ ᐊᒻᒪᓗ ᐱᒋᐊᕈᑎᑦᓴᓂᑦ ᑮᓇᐅᔭᕐᓂᑦ ᐃᓱᐊᕐᓯᕕᒻᒥ.
ᔫᓂ 4ᖑᑎᓪᓗᒍ, ᑯᐯᒃ ᑲᕙᒪᖓ ᑐᑦᓯᕋᕐᓂᖁᑦ $21 ᒥᓕᐊᓐ ᑖᓚᓂᑦ ᐃᓪᓗᓕᕆᓂᕐᒥᒃ ᑲᓇᑕᒥ ᓄᓇᓕᐊᕈᕐᓄᓕᖓᔪᓂᑦ ᐅᑭᐅᕐᑕᑐᒥᓗ ᓄᓇᓕᖏᓐᓄᓕᖓᔪᓂᑦ ᐱᓇᓱᑦᑕᐅᔪᓂᑦ ᐃᓪᓗᖁᑎᓄᓕᖓᔪᓂᑦ ᑮᓇᐅᔭᖁᑎᑦᓴᖏᓐᓂᑦ ᐃᓗᐃᑦᑐᕈᕐᑎᓯᒍᑎᑦᓴᖏᓐᓂᑦ. 10ᓂᑦ ᐱᓇᓱᐊᕈᓯᕐᓂᑦ ᕿᒥᕐᕈᕕᑦᓴᖃᕆᐊᖃᕐᖁᑦ ᑐᑦᓯᕋᐅᑎᒥᒃ ᐃᓪᓗᓕᕆᔨᒃᑯᖏᑦ ᑲᓇᑕᒥ. ᓂᕆᐅᒃᑯᑦ ᑐᓴᕋᑦᓴᓯᐊᒥᒃ ᑐᓴᕐᑎᑕᐅᓛᕆᐊᒥᒃ ᐊᐅᒡᒍᓯ 29ᖑᓚᐅᕐᑎᓇᒍ, ᐅᓪᓗᖓ ᐱᒻᒪᕆᐅᔪᖅ ᐃᓱᐊᕐᓯᕕᒻᒧᑦ ᑎᒥᐅᔪᖅ ᐱᒋᐊᕐᑎᓯᓛᕐᒪᑦ ᓴᓇᔭᐅᓂᑦᓴᖓᓂ ᓄᑖᖅ ᒪᒥᓴᕐᕕᐅᓛᕐᑐᖅ.
