ᐱᓇᓱᑦᑎᓄᐊᖓᔪᓕᕆᔨ
ᖃᓄᐃᓕᖓᐅᑎᖏᑦ
ᐃᓕᒪᓪᓚᕆᓚᖓᔪᖅ / ᐃᓗᐃᒃᑲᑎᒎᕐᓗᓂ
ᐱᓇᓱᕝᕕᖓ
ᐱᓇᓱᑦᑎᓕᕆᕕᒃ
ᑮᓇᐅᔭᓵᑦ ᐳᕐᑐᓕᕇᕝᕕᖏᑦ
ᐱᓇᓱᑦᑎᓂᓕᕆᕕᒻᒥᒃ ᐊᐅᓚᑦᓯᔨ
ᔪᕐᑕᖓ
ᑰᑦᔪᐊᖅ, ᑯᐯᒃ
ᓂᕕᖓᓂᖓᑕ ᐃᓱᓕᕕᑦᓴᖓ
ᓈᔪᐃᑦᑐᒃ
ᐱᓇᓱᑦᑎᓄᐊᖓᔪᓕᕆᔨ ᐱᓇᓱᐊᕐᓗᒋᑦ ᑭᓯᐊᓂᐅᔪᓂᒃ ᐃᒣᑦᑐᓂᒃ ᑲᒪᒋᐊᖃᕐᐳᖅ:
- ᐃᑲᔪᕐᐸᓗᓂ ᐊᐅᓚᑕᐅᓂᖏᓐᓂᒃ ᐅᓪᓗᑕᒫᕐᓯᐅᑏᑦ ᐊᐅᓚᑕᐅᒋᐊᓖᑦ ᐱᓇᓱᑦᑎᓕᕆᓂᕐᓄᑦ ᐊᓪᓚᕕᒻᒥ, ᐊᒻᒪᓗ ᐊᐅᓚᑕᐅᓂᖏᓐᓄᑦ ᐱᓇᓱᑦᑎᓄᑦ ᒪᓕᒉᑦ, ᑲᔪᓯᑦᓯᐊᑎᑦᓯᐅᑏᑦ, ᐊᒻᒪᓗ ᐱᑦᔪᑎᑐᐊᓖᑦ ᐱᓇᓱᒉᑦ.
- ᐱᓇᓱᐊᖃᑎᖃᕐᓗᓂ ᐊᓯᖏᓐᓂᒃ ᐱᓇᓱᕝᕕᓂᒃ ᐃᓕᒃᑰᑎᕐᑐᓂᒃ ᑎᒥᐅᑉ ᐃᓗᐊᓂ ᐊᒻᒪᓗ ᐃᓘᓐᓇᑎᒃ ᑭᒡᒐᑐᕈᑏᑦ ᐊᒻᒪᓗ ᐱᓇᓱᐊᕋᑦᓭᑦ ᒪᓂᔭᐅᓯᒪᔪᑦ ᐱᓇᓱᑦᑎᓕᕆᕕᒻᒥ ᐃᓗᒡᒍᓯᒥᒃ ᒪᓕᑦᓯᐊᒪᖔᑕ ᐊᒻᒪᓗ ᐊᑦᑕᓀᑦᑐᓯᐊᒍᒻᒪᖔᑕ.
ᐱᑦᔪᑎᖓ ᐱᓇᓱᒐᐅᑉ
ᐊᖓᔪᕐᖄᖃᕐᓗᓂ ᐱᓇᓱᑦᑎᓕᕆᕕᐅᑉ ᐊᐅᓚᑦᓯᔨᖓᓂᒃ, ᐱᓇᓱᑦᑎᓄᐊᖓᔪᓕᕆᔨ ᐃᑲᔪᕐᑎᐅᓚᖓᔪᖅ ᐅᓪᓗᑕᒫᑦ ᐊᐅᓚᑦᓯᓂᕐᓄᑦ ᐃᖏᕐᕋᑎᑕᐅᒋᐊᖃᕐᓂᖓᓂᒃ ᐱᓇᓱᑦᑎᓕᕆᕕᐅᑉ ᐃᓚᐅᑎᓗᒋᑦ ᐱᓇᓱᑦᑎᓴᕐᓯᐅᓃᑦ, ᐃᓕᓐᓂᐊᑎᑦᓯᓃᑦ ᐊᒻᒪᓗ ᐱᕙᓪᓕᐊᑎᑦᓯᓃᑦ, ᐊᒻᒪᓗ ᐊᑐᕐᑕᐅᑎᑦᓯᔨᐅᓗᓂ ᐱᓇᓱᕝᕕᐅᑉ ᒪᓕᒐᖏᓐᓂᒃ ᐊᒻᒪᓗ ᑲᔪᓯᑦᓯᐊᑎᑦᓯᐅᑎᖏᓐᓂᒃ.
ᐊᑐᓪᓗᑐᕆᐊᓖᑦ ᐱᔭᑦᓴᐃᑦ ᐊᒻᒪᓗ ᑲᒪᒋᒋᐊᓕᖏᑦ
- ᐃᑲᔪᕐᑎᐅᓗᓂ ᐱᓇᓱᑦᑎᓴᕐᓯᐅᓂᕐᓂ ᐱᒋᐊᕐᕕᖏᓐᓄᑦ ᐃᓱᐊᓄᑦ ᐊᒻᒪᓗ ᐃᓱᕐᕆᑎᑦᓯᔨᐅᓗᓂ ᐱᓇᓱᑦᑎᑖᕋᓱᐊᕐᓂᓂᒃ.
- ᓄᐃᑦᓯᓗᓂ ᐊᒻᒪᓗ ᓇᔪᕐᑎᙯᓐᓇᓯᓗᓂ ᐱᓇᓱᑦᑎᓕᒫᑦ ᐊᓪᓚᖁᑎᖏᓐᓂᒃ ᓯᑯᑦᓴᔭᕐᓃᑐᓂᒃ ᐊᒻᒪᓗ ᖃᕆᑕᐅᔭᒦᓪᓗᑎᒃ
- ᐃᑲᔪᓲᖅ ᐊᐅᓚᑕᐅᓂᖏᓐᓂᒃ ᐊᑭᓖᒍᑎᓄᑦ ᐊᒻᒪᓗ ᐱᕙᓪᓕᖁᑎᑦᓴᓄᑦ ᐸᕐᓀᒍᑏᑦ.
- ᕿᒥᕐᕈᓲᖅ, ᓇᓃᓐᓂᖏᓐᓂᒃ ᖃᐅᔨᒣᓐᓇᓲᖅ, ᐊᒻᒪᓗ ᓇᓗᓀᕐᑐᐃᕙᑦᓱᓂ ᒪᓕᑦᑕᐅᓂᖏᓐᓂᒃ ᐃᓕᓐᓂᐊᑎᑦᓯᓂᐅᒋᐊᓖᑦ ᐊᒻᒪᓗ ᐃᓕᓐᓂᐊᑎᑦᓯᓃᑦ, ᑲᔪᓯᔪᓂᒃ ᐃᓕᓴᕐᓃᑦ, ᑖᒃᑯᓄᖓ ᐃᓚᐅᒍᓐᓇᑐᖅ ᐊᑦᑕᓀᑦᑐᒦᓐᓂᒥᒃ ᐃᓕᓐᓂᐊᑎᑦᓯᓂᖅ, ᐸᕝᕕᑎᑦᓯᑌᓕᓂᕐᓄᐊᖓᔪᓂᒃ ᐃᓕᓐᓂᐊᑎᑦᓯᓂᖅ, ᐱᓇᓱᑦᑎᒪᕇᑦ ᐱᔪᓐᓇᐅᑎᖏᓐᓂᒃ, ᐊᒻᒪᓗ ᓱᕐᖁᐃᑕᐅᓯᒪᐅᑎᖏᓐᓂᒃ, ᐊᓯᖏᓐᓂᓗ.
- ᐱᓇᓱᐊᖃᑎᖃᓲᖅ ᐱᓇᓱᕝᕖᑦ ᐃᓕᒃᑰᑎᕐᑐᑦ ᑲᒪᔨᒻᒪᕆᖏᓐᓂᒃ ᑐᑭᓯᕕᒋᒋᐊᕐᐸᓱᒋᑦ ᐱᔪᓐᓇᓯᐊᕈᑎᓂᒃ ᐊᒻᒪᓗ ᐱᔪᓐᓇᓂᐅᒋᐊᖃᕐᓱᑎᒃ ᐱᓇᓱᒐᑦᓴᓂ ᐅᒃᑯᐃᑕᐅᔪᓃᓪᓗᑎᒃ.
- ᓱᕐᖁᐃᓯᓯᒪᓲᖅ ᒪᓕᑦᑕᐅᓯᐊᕐᓂᖏᓐᓂᒃ ᐱᓇᓱᐊᕐᑐᑦ ᒪᓕᒐᖏᑦᑕ.
ᐊᓯᖏᑦ ᐱᓇᓱᐊᕆᐊᓖᑦ ᐊᒻᒪᓗ ᑲᒪᒋᔭᑦᓭᑦ
ᑐᑭᒧᐊᑦᑎᑕᐅᓗᓂ ᐱᓇᓱᑦᑎᓕᕆᕕᐅᑉ ᑲᒪᔨᒻᒪᕆᖓᓄᑦ, ᐱᓇᓱᑦᑎᓕᕆᕕᐅᑉ ᐱᓇᓱᑦᑎᓄᐊᖓᔪᓕᕆᔨ ᐊᓯᖏᓐᓂᒃ ᐱᓇᓱᐊᕋᑦᓴᓅᓕᖓᔪᓂᒃ ᐱᓇᓱᐊᓲᖅ ᑎᓕᐅᕐᑕᐅᒍᑎᒥᓂᒃ.
ᐱᔪᓐᓇᕆᐊᓕᖏᑦ
ᐃᓕᓴᕐᓯᒪᓂᖅ
- ᐱᔭᕇᕈᑎᑖᕐᓯᒪᔪᖅ ᐳᕐᑐᓂᕐᓴᓂᒃ ᐃᓕᓴᕐᓂᒥᒃ.
- BA ᐱᔪᓐᓇᓚᕆᐅᑎᑖᕐᓯᒪᒍᓂ ᐱᓇᓱᑦᑎᓕᕆᓂᕐᒥ ᐃᓕᓴᕐᓱᓂ ᐅᕝᕙᓘᓐᓃᑦ ᐃᓕᒃᑰᑐᒥ ᐱᓇᓱᑦᑎᓕᕆᓂᕐᒥ ᐃᓕᓐᓂᐊᓯᒪᒍᓂ ᐱᓪᓗᖁᑎᖃᕆᐊᖓ ᐃᓱᒪᒋᔭᐅᓚᖓᔪᖅ.
ᐱᓇᓱᐊᕐᓯᒪᓂᖓ
- ᐃᑭᓐᓂᐸᐅᑎᓗᒍ 1-ᒥ ᐊᕐᕌᒍᒥ ᐱᓇᓱᑦᑎᓕᕆᕕᒻᒥ ᐱᓇᓱᐊᕐᓯᒪᒋᐊᓕᒃ ᐅᕝᕙᓘᓐᓃᑦ ᐊᑦᔨᒐᓛᖓᓂᒃ.
ᖃᐅᔨᒪᓂᖏᑦ ᐊᒻᒪᓗ ᐱᔪᓐᓇᑕᖏᑦ
- ᐅᖃᕐᓯᑎᒻᒪᕆᐅᓗᓂ ᐊᒻᒪᓗ ᐊᓪᓚᓯᑎᒻᒪᕆᐅᓗᓂ.
- ᐃᓅᖃᑎᖃᑦᓯᐊᕈᓐᓇᒪᕆᓪᓗᓂ ᐊᒻᒪᓗ ᓈᒻᒪᒋᐅᑎᖕᖏᓂᕐᓂᒃ ᐋᕐᕿᓱᐃᓯᑎᒻᒪᕆᐅᓗᓂ.
- ᐃᓕᓐᓇᖓᑎᑦᓯᓯᑎᒻᒪᕆᐅᓗᓂ ᑎᒥᒥᒃ ᐱᒍᑦᔨᓯᑎᐅᓗᓂ ᐊᒻᒪᓗ ᐃᑉᐱᒍᓱᑦᓯᐊᓯᑎᐅᓗᓂ ᑲᒪᒋᔭᐅᒋᐊᓕᓐᓂᒃ ᓱᓇᑐᐃᓐᓇᐅᒐᓗᐊᕐᐸᑕ.
- ᐱᕕᑦᓴᓂᒃ ᐊᐅᓚᑦᓯᓯᑎᒻᒪᕆᐅᓗᓂ ᐱᔭᐅᓯᒪᒋᐊᓕᓐᓂᒃ ᐅᐸᓗᕐᑎᓯᑦᑌᓕᓯᑎᐅᓗᓂ.
- ᓲᔫᒍᑎᖃᕐᓗᓂ ᕿᒥᕐᕈᓯᐊᕈᓐᓇᓂᕐᒥᒃ ᐊᒻᒪᓗ ᐱᓀᓗᑕᓂᒃ ᐋᕐᕿᓱᐃᒍᓐᓇᓂᕐᓂᒃ.
- ᐱᓇᓱᐊᕆᐊᓖᑦ ᐃᑉᐱᒋᓗᒋᑦ ᐅᐃᒪᓇᕐᓂᖏᑦ ᑲᔪᓯᑎᑦᓯᓯᑎᐅᓗᓂ ᐊᒻᒪᓗ ᒋᐊᖃᓕᕈᓂ ᑎᓕᐅᕆᒍᓐᓇᓗᓂ ᐃᑲᔪᕐᑕᐅᒋᐊᖃᓕᕈᓂ.
- ᐱᒐᓱᐊᕐᓯᑎᐅᓗᓂ, ᐱᓇᓱᑦᑎᒪᕆᐅᓂᕐᒥᑎᒍᑦ, ᐊᒻᒪᓗ ᓇᐅᓕᒫᓄᑦ ᑐᓴᕐᑕᐅᒋᐊᖃᖕᖏᑐᓂᒃ ᑐᓴᕐᑎᓯᑦᑌᓕᑦᓯᐊᕈᓐᓇᓗᓂ.
- ᐱᓇᓱᐊᕈᑎᖃᕈᓐᓇᓗᓂ ᖃᕆᑕᐅᔭᒥᒃ Microsoft Office ᐅᕝᕙᓘᓐᓃᑦ ᖃᕆᑕᐅᔦᑦ ᐱᓇᓱᐊᕈᑎᑦᓴᔭᖏᓐᓂᒃ ᑌᒣᑦᑐᐃᑦ ᐊᑦᔨᖏᓐᓂᒃ
- ᐃᓕᑦᓯᒍᐊᕐᑑᓗᓂ ᑎᒥᐅᑉ ᐱᓇᓱᑦᑎᓕᕆᕕᖓᑕ ᐊᐅᓚᑕᐅᒍᓯᖏᓐᓂᒃ.
- ᓇᒻᒥᓂᖅ ᐊᒻᒪᓗ ᐱᓇᓱᑦᑎᒪᕆᐅᓂᕐᒥᓄᑦ ᐊᑑᑎᓕᓂᐅᓗᓂ ᐃᓗᒡᒍᓯᖏᑦ ᐊᑦᔨᒌᖕᖏᑐ ᐱᓇᓱᐊᖃᑎᒌᓐᓂᖏᓐᓂᒃ.
- ᓲᔫᒍᑎᖃᕐᓗᓂ ᐃᒻᒥᓂᕐᓱᓗᓂ ᐱᓇᓱᐊᑦᓯᐊᕈᓐᓇᓂᕐᒥᓂᒃ ᐊᒻᒪᓗ/ᐅᕝᕙᓘᓐᓃᑦ ᐊᓯᒥᓂᒃ ᐱᓇᓱᐊᖃᑎᖃᕐᓗᓂ.
- ᐃᓕᒐᓱᐊᕐᑐᖅ ᐱᖁᔭᕐᓂᒃ ᓯᖁᒥᑦᓯᓂᑰᓂᕐᒥᓄᑦ ᓇᓗᓀᕐᑕᐅᓯᒪᐅᑎᖃᕆᐊᖓ ᖃᐅᔨᓴᕐᑕᐅᒐᓗᐊᕈᓂ ᖃᓄᐃᑦᓴᕆᐊᖃᖕᖏᑐᖅ.
ᐅᖃᐅᓯᖅ
- ᐃᓄᑦᑎᑐᑦ ᐊᒻᒪᓗ ᖃᓪᓗᓈᕐᑎᑐᑦ ᐊᑐᐊᕐᓯᒍᓐᓇᕆᐊᓕᒃ, ᐊᓪᓚᒍᓐᓇᕆᐊᓕᒃ ᐊᒻᒪᓗ ᐅᖃᕈᓐᓇᕆᐊᓕᒃ.
- ᐊᑐᐊᕐᓯᒍᓐᓇᕈᓂ, ᐊᓪᓚᒍᓐᓇᕈᓂ ᐊᒻᒪᓗ ᐅᖃᕈᓐᓇᕈᓂ ᐅᐃᒍᐃᑎᑐᑦ ᐱᓪᓗᖁᑎᖃᕋᔭᕐᑐᖅ.
ᐱᓇᓱᕝᕕᐅᑉ ᑐᕌᒐᒋᕙᐅᒃ ᐃᓕᔨᖔᕋᓱᐊᕐᐸᓂᖅ ᐊᒻᒪᓗ ᐱᕙᓪᓕᐊᑎᓗᒋᑦ ᐱᓇᓱᒐᕐᑖᐸᓪᓕᐊᓂᖏᑦ ᐃᓚᐅᔪᑦ ᐃᓚᖓᓐᓄᑦ ᐃᓄᐃᑦ ᓄᓇᖃᕐᓂᒧᑦ ᐊᖏᖃᑎᒌᒍᑎᖏᓐᓄᑦ. ᑌᒣᒻᒪᑦ, ᐃᓱᒪᒥᐅᑎᖃᕐᐳᑦ ᑲᑎᒪᔩᑦ ᐃᓕᑕᕐᓯᖔᕈᒪᒍᑎᒃ ᓇᓪᓕᑐᐃᓐᓇᖏᓐᓂᒃ ᖁᓛᓂ ᐅᖃᕐᑕᐅᔪᓂᒃ ᐱᒍᓐᓇᐅᑎᐅᒋᐊᓕᓐᓂᒃ ᐊᓯᑦᔩᒍᓐᓇᓱᑎᒃ ᐊᒻᒪᓗ ᐃᖏᕐᕋᓯᑎᑦᓯᓗᑎᒃ ᐃᓕᓐᓂᐊᑎᑦᓯᓂᕐᒥᒃ ᐅᕝᕙᓘᓐᓃᑦ ᓯᓚᑦᑐᓭᓂᕐᒧᑦ ᐸᕐᓀᒍᑎᒥᒃ ᒋᐊᖃᕐᐸᑦ.
ᐱᓇᓱᕝᕕᐅᑉ ᐊᕙᑎᖓ
- ᐃᓱᐊᕐᓯᕕᒃ ᐱᒐᓱᐊᒻᒪᕆᐅᑎᖃᖃᑦᑕᑐᖅ ᓄᑦᑎᑎᕐᓂᒥᒃ ᐊᓯᑦᔨᑐᕈᑎᖃᕐᓱᓂᓗ ᖃᓄᓕᒫᖅ ᑌᒪ ᓴᖑᒍᐊᕐᑑᒋᐊᖃᕐᓇᖃᑦᑕᑐᖅ, ᐃᓱᒪᑦᓴᓯᐅᕐᓯᑎᐅᓗᓂᓗ ᐊᒻᒪᓗ ᓱᖏᐅᑎᒍᐊᕐᑑᓗᓂ.
- ᐱᓇᓱᒐᕐᑖᓚᖓᔪᖅ ᓈᒻᒪᖁᐊᕇᒃᑫᒍᓐᓇᓯᐊᕆᐊᖃᓚᖓᔪᖅ ᐊᒥᓱᐃᓂᒃ ᕿᓄᒍᑕᐅᔪᓂᒃ ᐊᒻᒪᓗ ᐅᐃᒪᓇᕐᑎᓗᒋᑦ ᕿᓄᒍᑕᐅᔪᓂᒃ ᙯᖁᔭᐅᓯᒪᔪᓄᑦ, ᐱᓇᓱᑦᑎᓄᑦ ᐊᒻᒪᓗ ᐱᓇᓱᐊᕐᓂᓂᒃ ᑲᑐᑦᔨᖃᑕᐅᔪᓄᑦ.
- ᐱᓇᓱᒐᕐᑖᓚᖓᔪᖅ ᐊᑐᐃᓐᓇᐅᕕᖃᕆᐊᖃᕐᒥᔪᖅ ᖃᐅᔨᖃᑦᑕᓚᖓᓂᕐᒥᓂᒃ ᓇᒻᒥᓂᖅ ᐊᒻᒪᓗ ᐱᓇᓱᑦᑎᐅᓂᕐᒥᑎᒍᑦ ᐱᒐᓱᐊᒻᒪᕆᓐᓇᑐᓂᒃ ᐃᓕᖓᑦᓱᑎᒃ ᑕᕐᕋᒥ ᐃᓅᕕᖃᕐᓂᒧᑦ, ᓄᓇᓕᓐᓂ ᐅᖓᓯᑦᑐᒦᓪᓗᓂ ᑭᖕᖒᒪᓇᕐᑐᓗ ᐃᓘᓐᓇᓕᒫᑎᒃ ᐱᑕᖃᓲᒍᖕᖏᓂᖏᓐᓂᒃ ᖃᓄᐃᑦᓴᕈᓐᓀᓗᓂ.
ᑮᓇᐅᑦᔭᓵᑦ/ᐱᕙᓪᓕᖁᑎᑦᓭᑦ
- ᐱᓇᓱᐊᕐᓗᓂ ᐃᓱᕐᕆᐅᑏᑦ ᑐᖕᖓᕕᓖᑦ ᓄᓇᕕᒻᒥ ᐃᓗᓯᓕᕆᓂᕐᓄᑦ ᐊᒻᒪᓗ ᐃᓅᓯᓕᕆᓂᕐᓄᑦ ᑭᒡᒐᑐᕐᓂᓄᑦ ᐋᕐᕿᓱᕐᑕᐅᓯᒪᔪᓂᒃ.
- ᑮᓇᐅᑦᔭᓵᖏᑦ ᐋᕐᕿᑕᐅᓛᕐᑐᑦ ᐃᑉᐱᒋᓗᒋᑦ ᐱᔪᓐᓇᑕᖏᑦ ᐊᒻᒪᓗ ᐊᑑᑎᓕᓂᖏᑦ.
- ᐱᔪᓐᓇᓯᐊᓚᖓᒻᒪᖔᑦ ᐃᑉᐱᒋᔭᐅᕕᒃ.
- ᓯᓚᑦᑐᓴᕐᑕᐅᓂᖅ ᐅᕝᕙᓘᓐᓃᑦ ᐃᓕᓐᓂᐊᑎᑦᓯᓂᕐᒧᑦ ᐱᓇᓱᒐᖅ ᐊᑐᐃᓐᓇᐅᕗᖅ (ᐱᔪᓐᓇᕆᐊᓕᖏᑦᑕ ᐃᓚᖏᑦ ᓄᐃᑕᖕᖏᐸᑕ).