ᓯᕗᓂᕐᒧᑦ ᑕᑯᓐᓇᑕᕗᑦ

ᓇᓪᓕᒍᓱᑦᑐᑦ, ᓴᐱᓕᔪᐃᑦᑐᐃᑦ ᐊᒻᒪᓗ ᑲᑦᓱᙰᑦᑐᐃᑦ ᐃᓄᑐᐃᓐᓀᑦ ᐃᓅᔪᑦ ᐊᑦᑕᓇᕐᑐᒦᓐᓇᖏᑦᑐᓂ ᐊᒻᒪᓗ ᖃᓄᐃᖕᖏᓯᐊᕐᓇᑐᓂ ᓄᓇᓕᓐᓂ.

ᐱᔭᕆᒐᓱᐊᕐᑕᕗᑦ

ᐱᓇᓱᐊᕐᑐᖅ ᐃᓗᐃᑦᑐᓂᒃ ᐃᓗᕐᖁᓯᒃᑰᓱᑎᒃ ᒪᒥᓴᕐᓂᓂᒃ ᓄᓇᕕᒻᒥᐅᓄᑦ ᐃᓗᒃᑯᑦ ᓲᖑᓯᐅᒥᑎᑦᓯᓱᓂ ᐊᒻᒪᓗ ᖃᓄᐃᖕᖏᓯᐊᓕᐅᒥᑎᑦᓯᓱᓂ.

ᑲᒪᒋᔭᖃᕐᓂᕗᑦ

ᐅᑉᐱᕆᔭᖃᕐᖁᒍᑦ ᐃᓗᐃᑦᑐᒥᒃ ᒪᒥᓴᕐᑎᓯᓂᕐᒥᒃ ᓄᐃᑕᑎᑦᓯᓯᐊᕐᑐᒥᒃ ᑲᑎᑎᓯᒪᔪᓂᒃ ᐃᓄᐃᑦ ᐱᐅᓯᑐᖃᕐᑎᒍᑦ ᐃᓪᓕᕆᔭᖏᓐᓂᒃ ᐊᒻᒪᓗ ᐱᐅᓂᕐᐹᓂᒃ ᓄᑖᓂᒃ ᐱᓇᓱᒍᑎᓂᒃ ᐅᐃᕆᒪᔪᓕᕆᓂᕐᒥ ᐊᒻᒪᓗ ᖁᐊᕐᓵᓇᕐᑐᑰᕐᓯᒪᔪᓕᕆᓂᕐᒥ. ᐊᑐᐃᓐᓇᖃᕐᖁᒍᑦ ᐱᒍᑦᔨᔭᑦᑎᓄᑦ ᐊᑦᑕᓇᖕᖏᑐᒥᒃ, ᐃᕐᖃᑐᐃᖕᖏᑐᒥᒃ ᐊᒻᒪᓗ ᓴᐳᑦᔨᓯᐊᕐᑐᒥᒃ ᐊᕙᑎᒥᒃ ᐱᕈᕐᐸᓕᐊᖁᓗᒋᑦ ᑲᒪᑦᓯᐊᓗᑎᓪᓗ ᑖᕗᖓᓕᒫᖅ ᐱᐅᔪᒧᑦ ᐊᓯᑦᔨᕙᓪᓕᐊᓂᕐᒥᓂᒃ ᐃᓅᓯᕐᒥᓂ.

ᐅᖃᐅᓯᕗᑦ

ᒪᒥᓴᕐᓂᖅ ᐃᓗᕐᖁᓯᒃᑰᓗᓂ

 ᐃᓪᓕᕆᔭᕗᑦ

  • ᐃᓅᖃᑎᓐᓂᒃ ᓲᓱᑦᓴᓂᖅ     (ᐃᓅᖃᑎᒌᑦᓯᐊᓂᖅ)
    ᓲᓱᑦᓴᓂᖅ ᐊᓯᒥᓂᒃ, ᐃᓅᖃᑎᖃᑦᓯᐊᓂᖅ ᐊᒻᒪᓗ ᑲᒪᑦᓯᐊᓂᖅ ᐃᓄᓐᓂᒃ
  • ᑐᖕᖓᓇᕐᓂᖅ
    ᑫᓪᓗᑐᐃᓂᖅ ᐱᑦᓯᐊᓂᕐᒥᒃ ᐅᒃᑯᐃᖔᑦᓯᐊᓂᒃᑯᑦ, ᑐᖕᖓᓇᕐᓂᑯᑦ ᐊᒻᒪᓗ ᐃᓚᐅᑎᑦᓯᓯᐊᕐᓂᑯᑦ
  • ᐱᔨᑦᓯᓂᖅ
    ᐱᒍᑦᔨᓂᖅ ᐊᒻᒪᓗ ᐱᖃᕐᑎᓯᓂᖅ ᐃᓚᒥᓂᒃ ᐊᒻᒪᓗ/ᐅᕝᕙᓘᓐᓃᑦ ᓄᓇᓕᒻᒥᓂᒃ
  • ᐋᔩᖃᑎᒌᓐᓂᖅ/ᖃᓄᕐᑑᖃᑎᒌᓐᓂᖅ
    ᑐᑭᑖᖃᑦᑕᓂᖅ ᐅᖄᖃᑎᒌᒍᑎᖃᕐᓂᑯᑦ ᐊᒻᒪᓗ ᐊᖏᖃᑎᒌᓐᓂᑯᑦ
  •  ᐱᔭᕆᐅᕐᓴᓂᖅ/ᐃᓕᓐᓂᐊᓂᖅ
    ᐱᒍᓐᓇᓯᕙᓪᓕᐊᓂᖅ ᑕᑯᓐᓇᓂᒃᑯᑦ, ᐃᒫᙰᕐᓂᑯᑦ, ᐱᒋᐅᕐᓴᓂᒃᑯᑦ, ᐊᒻᒪᓗ ᐊᔪᐃᓐᓇᓂᒃᑯᑦ
  • ᐃᑲᔪᕐᑎᒌᓐᓂᖅ/ᑲᑐᑦᔨᖃᑎᒌᓐᓂᖅ
    ᐱᓇᓱᖃᑎᒌᓐᓂᖅ ᑖᑦᓱᒥᖓᑦᓭᓇᖅ ᐱᑦᔪᑎᖃᕐᓗᓂ
  • ᖃᓄᕐᑑᓂᖅ/ᖃᓄᕐᑑᕈᓐᓇᓂᖅ
    ᓄᑖᓂᒃ ᐃᓱᒪᒐᓱᐊᕈᓐᓇᓂᖅ ᐊᒻᒪᓗ ᐱᔭᕆᐊᑐᔪᓂᒃ ᐊᓂᒎᑎᒍᓐᓇᓂᖅ
  • ᐊᕙᑎᑦᑎᓂᒃ ᐃᑉᐱᒍᓱᑦᓯᐊᓂᖅ
    ᓲᓱᑦᓴᓂᖅ ᐊᒻᒪᓗ ᑲᒪᑦᓯᐊᓂᖅ ᓄᓇᒥᒃ, ᐆᒪᔪᓂᒃ ᐊᒻᒪᓗ ᐊᕙᑎᑦᑎᓂᒃ

ᓇᓗᓀᒃᑯᑕᕗᑦ

ᑌᑦᓱᒪᓂ 1995-ᒥ, ᐃᓱᐊᕐᓯᕕᒃ ᓄᓇᕕᒻᒥ ᐅᐃᕆᒪᔪᑦ ᐃᑲᔪᕐᑕᐅᕕᖓ ᓄᓇᓕᒻᒥ ᑕᕐᓴᓴᕐᒥᒃ ᐱᓕᐅᑎᒍᑎᖃᕐᑎᓯᓚᐅᕐᓯᒪᔪᖅ ᓇᓗᓀᕐᓯᒍᑎᑦᓴᒥᒃ ᑌᔭᐅᒍᓯᖓᓂᒃ ᑎᒥᐅᔪᖁᑎᑦᑕ ᐊᒻᒪᓗ ᑕᑯᑦᓴᑯᑦ ᐃᓕᑕᕆᔭᐅᒍᑎᑦᓴᖓᓂᒃ. ᐊᓪᓚᖑᐊᕐᑕᕕᓂᖓ ᑰᑦᔪᐊᒥᐅᑉ ᐋᓕᒃ ᑯᐊᑕᐅᑉ ᑎᒍᔭᐅᓚᐅᕐᓯᒪᔪᖅ ᐱᑦᔪᑎᒋᑦᓱᒍ ᑐᑭᓪᓚᕆᖓ ᑕᕐᓴᖓᑕ ᓄᐃᑕᑎᑦᓯᓯᐊᕐᓱᓂ ᐊᕚᓚᕿᐊᓂᒃ. ᐊᕚᓚᕿᐊᖅ ᓲᖑᓂᕐᐸᐅᖃᑕᐅᔪᖅ ᐱᕈᕐᑑᓱᓂ ᐅᑭᐅᕐᑕᑐᒥ ᐊᓐᓇᐅᒪᒍᓐᓇᓱᓂ ᐊᓐᓇᐅᒪᕕᑦᓴᐅᖏᑦᑐᒥ ᓯᓚᒥ ᓇᐹᕐᑐᓕᐅᑉ ᓯᓈᓃᒐᓗᐊᕋᒥ ᓇᐹᕐᑐᖃᖕᖏᑐᒥᓘᓐᓃᑦ. ᓄᐃᑕᑎᑦᓯᔪᖅ ᐊᑦᓱᕈᕐᓇᑐᒃᑰᑐᕕᓂᐅᑦᓱᓂ ᐋᕐᕿᒍᓐᓇᓂᕐᒥᒃ. ᑖᓐᓇ ᐱᕈᕐᑐᖅ ᐃᒻᒥᓂᒃ ᓄᑕᐅᓯᓕᓲᖑᒐᒥ ᐊᒻᒪᓗ ᐱᕈᕆᐊᓪᓚᓱᓂ ᐊᕐᕌᒍᑕᒫᑦ ᓄᓇᕕᓕᒫᒥ, ᖃᐅᔨᒪᓇᕐᓯᓚᐅᕐᓯᒪᔪᖅ ᑎᒥᐅᔪᖁᑎᑦᑎᓄᑦ ᐱᑐᑦᓯᒪᒋᐊᖃᕆᐊᖓ ᐊᕚᓚᕿᐊᓄᑦ ᐃᓄᐃᑦ ᐃᓅᓯᖏᓐᓄᓗ ᓄᓇᒥᐅᑦ ᒪᑭᒋᐊᓪᓚᕈᒪᔪᑦ ᐅᕝᕙᓘᓐᓃᑦ ᓄᑖᒥᒃ ᐱᒋᐊᕐᓗᑎᒃ ᐱᐅᖕᖏᑐᒥᑦ ᐅᑎᕐᑕᑐᐃᓐᓇᑐᒥᑦ ᐱᑐᑦᓯᒪᔪᒥᑦ ᐅᐃᕆᒪᓂᕐᒧᑦ.

‘ᐃᓱᐊᕐᓯᕕᐅᑉ ᑕᕐᓴᖓᑕ ᐱᐅᓯᒋᐊᕐᑕᐅᓂᖓ ᐱᑦᓯᐊᓯᒪᔪᒻᒪᕆᒃ ᐊᒻᒪᓗ ᓄᐃᑕᑎᑦᓯᓯᐊᕐᓱᓂ ᑎᒥᐅᔫᑉ ᐊᓯᑦᔨᕙᓪᓕᐊᓂᖓᓂᒃ ᐊᕐᕌᒍᐃᑦ ᒪᓕᑦᓱᒋᑦ. ᓇᑯᕐᓴᒪᕆᒃᑯᖓ ᑕᑯᒋᐊᒥᒃ ᐊᕚᓚᕿᐊᓂᒃ ᓄᑕᐅᓯᓕᕐᓯᒪᔪᒃᑯᑦ ᑭᓯᐊᓂ ᑖᑦᓱᒥᖓᑦᓭᓇᖅ ᐃᓗᕐᖁᓯᕐᒥᒃ ᑐᖕᖓᕕᖃᖏᓐᓇᓱᓂ. ᓄᑖᖅ ᑕᕐᓴᖅ ᑕᑯᑦᓱᒍ ᐱᐅᔪᖅ ᐊᒻᒪᓗ ᑖᑦᓱᒥᖓᑦᓭᓇᖅ ᑐᑭᖃᕐᓱᓂ ᑐᑭᒋᒋᐊᖕᖓᓯᒪᔭᒥᓂᒃ ᓄᑕᐅᓯᓕᕐᓂᒥᒃ ᐃᓅᑉ ᐃᓅᓯᖓᓂ ᐅᕝᕙᓘᓐᓃᑦ ᐊᓯᑦᔨᓂᕐᒥᒃ ᖃᓄᐃᖕᖏᓯᐊᕐᓂᒧᑦ. ᐊᕚᓚᕿᐊᖅ ᓄᑕᐅᓯᓕᓲᖑᒻᒪᑦ ᐊᕐᕌᒍᑕᒫᑦ ᐊᒻᒪᓗ ᑌᒫᓪᓗᑐᖅ ᐊᓯᑦᔨᓂᒃᑰᓲᖑᑦᓱᓂ, ᐃᓱᐊᕐᓯᕕᒃ ᑌᒣᒻᒥᔪᖅ ᐃᑲᔪᕐᓂᑯᑦ ᐃᓄᓐᓂᒃ ᐃᒥᐊᓗᓗᐊᖃᑦᑕᓂᕐᒧᑦ ᐃᑲᔪᕐᑕᐅᓂᒃᑯᑦ ᐊᒻᒪᓗ ᐊᓯᑦᔨᓱᑎᒃ ᖃᓄᐃᖕᖏᓯᐊᓕᕐᓱᑎᒃ, ᑲᑦᓱᙰᑦᑑᓕᕐᓱᑎᒃ ᐃᓅᑦᓱᑎᒃ.’ – ᐋᓕᒃ ᑯᐊᑕ, ᐊᓪᓚᖑᐊᕐᑐᕕᓂᖅ ᑕᕐᓴᑖᕆᒋᐊᖕᖓᑕᕕᓂᖓᓂᒃ, 1995

2019-ᒥ, ᑎᒥᐅᔪᖅ ᐱᐅᓯᒋᐊᕆᒍᒪᓚᐅᔪᖅ ᐊᓪᓚᖑᐊᕐᑕᐅᒋᐊᖕᖓᑐᕕᓂᕐᒥᒃ ᐃᓱᒪᒋᔭᖃᕐᓱᓂ ᓴᓇᒻᒪᓕᐅᕆᐊᒥᒃ ᐃᑉᐱᓂᐊᓂᕐᓂᒃ ᐅᓪᓗᑕᒫᕐᓯᐅᑎᓂᒃ ᑭᓯᐊᓂ ᐃᓚᒻᒥᑎᓪᓗᒍ ᑎᒥᐅᔫᑉ ᐊᓯᑦᔨᓯᒪᓪᓚᕆᓐᓂᖓ ᓄᐃᑕᑎᑕᐅᔪᖅ 20-ᓄᑦ ᐊᕐᕌᒍᓄᑦ ᐱᕙᓪᓕᐊᓂᕐᒧᑦ ᐸᕐᓇᓯᒪᐅᑎᖓᓂ. ᑕᕐᓴᒥᒃ ᐱᐅᓯᒋᐊᕆᓂᖅ ᓄᐃᑕᑎᑦᓯᔪᖅ ᐱᕙᓪᓕᐊᓂᖓᓂᒃ ᐃᓱᐊᕐᓯᕕᐅᑉ 25 ᐊᕐᕌᒍᐃᑦ ᐊᓂᒍᕐᑎᓗᒋᑦ ᐊᒻᒪᓗ ᐋᕐᖀᓱᓂ ᐱᐅᓯᕆᓚᖓᓕᕐᑕᖓᓂᒃ ᑎᒥᐅᔫᑉ ᐊᕐᕌᒍᓂ ᙯᔪᓂ ᑐᓴᐅᒪᑎᑦᓯᓂᑦᑎᓂ ᑐᓴᕋᑦᓴᓯᐊᒻᒪᕆᒻᒥᒃ ᖃᐅᔨᔭᐅᑎᑦᓯᒐᓱᓪᓗᑕᓗ ᐱᒍᑦᔨᓂᑦᑎᓂᒃ ᓄᓇᕕᓕᒫᒥ.

Our services are suspended until further notice - Read more
Nos services sont suspendus jusqu’à nouvel ordre - Tous les détails
ᐃᓱᐊᕐᓯᕕᒃ ᓄᕐᖃᑎᑦᓯᑫᓐᓇᑐᖅ ᐱᒍᑦᔨᓂᕐᒥᓂᒃ ᖃᐅᔨᑎᑦᓯᒍᑎᐅᒋᐊᓪᓚᖏᓐᓂᖓᓂ COVID-19 ᐱᑦᔪᑎᒋᑦᓱᒍ - ᐊᓪᓚᓂᐊᕆᐊᓪᓚᕆ
+