ᐃᓱᐊᕐᓯᕕᒃ ᐱᒋᐊᕐᑎᓯᓂᐅᔭᓕᕐᑐᖅ ᓴᓇᔭᐅᓂᖓᓂᒃ ᓄᑖᑉ ᒪᒥᓴᕐᕕᓴᐅᑉ

ᒫᑦᓯ 3-ᒥ  ᑲᑎᒪᑦᓯᓱᑎᒃ ᑰᑦᔪᐊᑉ ᓄᓇᓕᓐᓂ ᑲᕙᒫᐱᒃᑯᖏᓐᓂᒃ, ᑌᕕᑦ ᕗᐊᕆᔅ, ᐃᓱᐊᕐᓯᕕᐅᑉ ᐊᖓᔪᕐᖄᖓ ᐊᒻᒪᓗ ᒥᐊᔨ ᐁᑦᓯᓴᓐ, ᐊᖓᔪᕐᖄᑉ ᑐᖓᓕᐊ, ᓱᕐᖁᐃᓯᑎᑕᐅᓪᓚᕆᓚᐅᕐᑑᒃ ᓄᓇᓖᑦ ᑲᔪᓯᑎᑦᓯᒍᓐᓇᓕᕐᓂᖓᓂᒃ ᓴᓇᒻᒪᕆᓐᓂᒥᒃ 2021-ᒥ.

“ᕿᓚᓈᒻᒪᕆᓕᕐᓱᓂ ᐃᓱᐊᕐᓯᕕᒃ ᑐᓴᕐᑎᓯᓚᐅᕐᑐᖅ ᓴᓇᔪᑦᓴᓂᒃ ᓴᓇᓂᕐᒧᑦ ᐱᓇᓱᒐᕗᑦ ᑲᔪᓯᒍᓐᓇᓕᕐᒪᑦ ᑕᕝᕙᓂ ᐊᕐᕌᒍᒥ. ᐱᓇᓱᒐᕐᒧᑦ ᐱᓇᓱᑦᑎᖁᑎᕗᑦ ᐅᓪᓗᒥ ᐱᔭᕇᒐᓱᐊᓕᕐᑐᑦ ᐸᕐᓀᓂᓂᕐᒥᒃ ᓴᓇᓂᐅᓚᖓᔪᒥᒃ ᐊᐅᔭᖅ. ᐱᒋᐊᕐᑎᓯᒍᓐᓇᓚᖓᓕᕐᑐᒍᑦ ᐊᑐᐃᓐᓇᕈᕐᑎᓂᕐᒥᒃ ᑐᖕᖓᕕᑦᓴᖓᓂᒃ ᓄᑖᑉ ᐃᓪᓘᑉ ᐊᐳᑎᒃ ᐊᐅᕌᐱᑐᐊᕐᐸᑦ.” ᓚᓚᐅᕐᑐᖅ ᑌᕕᑦ. ᓴᓇᓂᖅ ᓯᕗᓂᓕᐅᕐᑕᐅᓯᒪᔪᖅ ᐃᓱᓕᒍᒫᕐᓂᐊᑎᓗᒍ 2022 ᐅᑭᐊᖓᓂ.

2019-ᒥᓂᑦ, ᐃᓱᐊᕐᓯᕕᒃ ᐱᓯᒪᓕᕐᑐᖅ $40,6 ᒥᓕᐊᓂᒃ ᑲᕙᒪᒃᑯᑦ ᐱᓇᓱᕝᕕᖏᓐᓂᑦ ᐃᓕᒃᑰᑎᕐᑐᓂᑦ ᐊᒻᒪᓗ ᓄᓇᓕᓕᒫᓂ ᑎᒥᓂᑦ ᓴᓇᔭᐅᒍᑎᑦᓴᖏᓐᓂᒃ 22ᓂᒃ ᓯᓂᕝᕕᓕᐅᑉ ᐃᓱᐊᕐᕈᑎᐅᑉ ᐊᒻᒪᓗ 12 ᐃᓪᓗᓴᖏᑦᑕ ᐱᓇᓱᑦᑏᑦ. ᓴᓇᓂᖅ ᓄᑖᒥᒃ ᐃᓱᐊᕐᕈᑎᒥᒃ ᐱᒋᐊᕈᒫᕐᓂᐊᓯᒪᔪᖅ 2020 ᐊᐅᔭᖓᓂ ᐊᒻᒪᓗ ᑭᖑᕙᕆᐊᕐᑕᐅᓯᒪᓚᐅᔪᑦᓱᓂ 2021-ᒧᑦ ᓄᓇᓖᑦ ᐃᓱᒫᓘᑎᖃᕐᓂᖓᓄᑦ ᖃᓂᒪᓐᓇᐅᑉ ᓯᐊᒻᒪᓯᒪᓂᖓᓂᒃ. ᓴᓇᒐᑦᓭᑦ ᐱᓇᓱᐊᕈᑏᓪᓗ 2020-ᒥ ᑯᑦᔪᐊᒧᑦ ᑐᕌᕐᑎᑕᐅᒋᐊᕐᓯᒪᓕᕐᑐᑦ 2021 ᐱᒋᐊᕐᖃᒥᐅᓂᖓᓂ ᓴᓇᓂᖅ ᐱᒋᐊᑲᐱᖁᓪᓗᒍ.

“ᓄᓪᓚᓇᑦᓯᐊᓕᕐᑐᖅ ᖃᐅᔨᒪᓕᕆᐊᒥᒃ ᐱᓇᓱᒐᐅᑉ ᓄᕐᖃᖓᑎᑕᐅᒋᐊᓪᓚᓚᖓᖕᖏᓂᖓᓂᒃ ᖃᐅᔨᒪᒐᑦᑕ ᐊᒥᓱᑦ ᐅᑕᕐᕿᐊᑐᕐᖃᔭᕈᓐᓀᓂᖏᓐᓂᒃ ᐃᓚᒌᑦ ᑭᒡᒐᑐᕐᑕᐅᒍᑎᒋᒋᐊᓕᖏᓐᓂᒃ ᒪᓂᔭᐅᖃᑦᑕᓚᖓᔪᓂᒃ ᓄᑖᒥ ᐃᑲᔪᕐᓯᔭᐅᕕᒻᒥ. ᐱᒋᐊᕐᑎᑕᐅᒋᐊᓕᕐᕿᓂᖓ ᓴᓇᓂᐅᑉ ᑐᓴᕆᐊᒥᒃ ᓄᓇᓕᓕᒫᓂ ᓯᕗᓂᕐᒥ ᓂᕆᐅᑦᓯᐊᓇᓕᕐᑐᖅ” ᓚᓚᐅᕐᑐᖅ ᒥᐊᔨ ᐁᓯᓴᓐ.

ᑌᕕᑦ ᕗᐊᕆᔅ ᐊᓯᐊᒎᕐᑎᓯᒍᒪᓚᖓᖕᖏᑐᖅ ᑲᒪᑦᓯᐊᕆᐊᖃᓚᖓᓂᖏᓐᓂᒃ ᑕᒪᖏᑦᑕ ᐃᓱᐊᕐᓯᕕᐅᑉ ᐊᒻᒪᓗ ᓴᓇᔩᑦ Les Constructions Pépin-Fortin ᑲᔪᓯᑎᑦᓯᓯᐊᒻᒪᕆᒐᓱᐊᕐᓗᑎᒃ ᐃᓄᐃᑦ ᐃᓗᓯᓕᕆᔭᐅᓂᖏᑦᑕ ᐊᖓᔪᕐᖄᑦ ᒪᓕᒐᓕᐊᕆᓯᒪᔭᖏᓐᓂᒃ ᓄᓇᓖᑦ ᐊᑦᑕᓀᑦᑐᒦᒍᑎᖏᓐᓂᒃ ᐊᒻᒪᓗ ᐱᓇᓱᑦᑏ.  ᐃᓱᐊᕐᓯᕕᒃ ᑐᓴᕐᑎᓯᑲᐱᓚᖓᓕᕐᑐᖅ ᓄᓇᓖᑦ ᓴᓂᓪᓕᖏᑦᑕ ᐃᓄᖏᓐᓂᒃ ᓴᓇᓂᐅᓚᖓᔪᒥᒃ  ᐊᒻᒪᓗ ᓯᕗᒧᐊᒍᑎᖏᑦᑕ ᓈᒻᒪᓯᑦᑕᕈᑎᑦᓴᖏᓐᓂᒃ.

ᖃᓂᒪᓐᓇᐅᑉ ᓯᐊᒻᒪᓯᒪᓂᖓᓄᑦ ᐃᓱᐊᕐᓯᕕᒃ ᐅᒃᑯᐊᓯᒪᑎᑦᓯᒋᐊᖃᓚᐅᔪᒻᒥᔪᖅ ᑭᒡᒐᑐᕐᑕᐅᓂᖏᓐᓂᒃ ᐃᓱᐊᕐᓯᕕᒻᒦᑐᑦ ᐊᕐᕌᒍᓕᒫᑲᓵᒥ. ᓯᕗᓪᓕᐅᓚᐅᔫᑦ ᐱᒋᐊᕐᕕᓕᐅᑕᐅᑦᓱᑎᒃ ᒪᓂᔨᓃᑦ ᐊᕐᓇᓄᑦ 2021 ᐱᒋᐊᕐᖃᒥᐅᑎᓗᒍ ᐊᒻᒪᓗ ᓄᑖᒍᓕᕐᒥᓗᓂ ᐱᒋᐊᕐᕕᒋᔭᑦᓴᕆᓕᕐᒥᔭᖓ ᐊᖑᑏᑦ ᐁᐸᔭᓕ 21-ᒍᓕᕐᐸᑦ. ᓄᓇᓕᓕᒫᓂ ᖃᓂᒪᓐᓇ ᐱᒋᐊᓕᕐᕿᖏᑉᐸᑦ, ᐃᓱᐊᕐᓯᕕᒃ ᓂᕆᐅᒋᔭᐅᕗᖅ ᑲᔪᓯᑎᑦᓯᓚᖓᒋᐊᖓ ᐸᕐᓀᒍᑎᓂᒃ ᒪᓂᔭᐅᒍᓐᓇᓯᓚᖓᑎᓗᒋᑦ ᓄᓇᕕᒻᒥᐅᑦ ᐃᓄᐃᑦ ᑲᑎᓂᖃᕈᓐᓇᓚᖓᒻᒪᑕ ᐱᒋᐊᓕᕐᕿᑕᕐᓗᑎᒃ ᐃᓕᒃᑰᑎᕐᑐᑦ 5 ᒪᒥᓴᕐᕕᓕᐊᕐᕕᐅᒍᓐᓇᓚᖓᑎᓪᓗᒋᑦ 2021-ᓕᒫᒥ. ᒪᒥᓴᕐᓂᐅᑉ ᐱᒋᐊᕐᕕᖏᑦᑕ ᐅᓪᓗᖁᑎᖏᑦ ᐅᕙᓂ ᖃᕆᑕᐅᔭᒃᑯᑦ ᑕᑯᔭᐅᒍᓐᓇᑐᑦ: https://isuarsivik.ca/healing-schedule/

ᖃᖓᑐᐃᓐᓇᖅ ᐃᓱᐊᕐᓯᕕᓕᐊᕈᒪᐅᑏᑦ ᑐᔫᑕᐅᒍᓐᓇᑐᑦ ᓇᓪᓕᑐᐃᓐᓇᖓ ᐊᑐᕐᓗᒍ ᐱᑕᑦᓯᑐᐃᕕᒃ ᐅᕙᓂ www.isuarsivik.ca/application-form. ᐃᓘᓐᓇᑎᒃ ᐃᑎᕈᒪᐅᑏᑦ ᐱᔭᐅᔪᑦ ᐃᓕᔭᐅᒍᓐᓇᑐᑦ ᐅᑕᕐᕿᔪᑦ ᓇᓗᓀᕐᑕᐅᓯᒪᐅᑎᖏᓐᓄᑦ ᐊᒻᒪᓗ ᐃᓱᒪᑦᓴᓯᐅᕈᑕᐅᓚᖓᓗᑎᒃ ᓯᕗᓂᕐᒥ ᐱᒋᐊᕐᕕᓕᕕᐅᓕᕐᒥᐸᑦ ᐱᒋᐊᕈᒫᕐᓂᐊᑎᓗᒋᑦ. ᐊᐱᕐᓲᑎᑦᓴᓖᑦ ᖃᓄᑐᐃᓐᓇᖅ ᐱᑕᑦᓯᑐᒐᕐᓄᑦ, ᖃᐅᔨᑎᑦᓯᒍᓐᓇᑐᑦ ᐃᑎᕈᓐᓇᑐᓕᕆᔩᑦ ᐱᓇᓱᕝᕕᖓᓂᒃ ᐊᑐᕐᓗᒍ ᖃᕆᑕᐅᔭᒃᑯᑦ ᓯᓚᑎᖓ ᐅᓇ: intake@isuarsivik.ca.