Category : ᓄᑖᖑᓂᕐᐹᑦ ᑐᓴᕋᑦᓭᑦ

ᒫᑦᔨ 2020-ᒥ, ᐃᓱᐊᕐᓯᕕᐅᑉ ᑲᔪᓯᔪᒥᒃ ᑲᒪᓂᕐᒧᑦ ᐱᒍᑦᔨᓂᓕᕆᕕᖓ ᓱᒋᐊᑦᓴᐅᑎᒋᓚᐅᔪᖅ ᒫᓐᓇ ᖃᓂᒻᒪᓯᐊᓗᒻᒧᑦ ᐱᕙᓪᓕᐊᑎᑦᓯᓱᓂ ᖃᕆᑕᐅᔭᒃᑯᑦ ᑭᖑᓂᖓᒍᑦ ᑲᒪᓂᕐᒥᒃ ᐱᓇᓱᐊᕐᓂᒥᒃ ᐱᕕᑦᓴᖃᕐᑎᓯᒐᔭᕐᑐᒥᒃ ᐃᓱᐊᕐᓯᕕᒻᒦᓯᒪᔪᓂᒃ ᐱᔭᕇᕐᓱᑎᒃ 42-ᓂᒃ ᐅᓪᓗᓂᒃ ᒪᒥᓴᕐᓂᒥᒃ ᖃᓂᖕᖏᑐᒥ ᒪᒥᓴᕐᓂᐅᑉ ᑭᖑᓂᖓᒍᑦ ᖃᓄᐃᒻᒪᖔᑦᑕ ᖃᐅᔨᓴᕐᑕᐅᖃᑦᑕᓂᕐᒥᒃ ᐊᒻᒪᓗ ᓴᐳᑦᔭᐅᓂᕐᒥᒃ.

ᑖᓐᓇ ᐱᓇᓱᐊᕐᓂᖅ ᑐᕌᒐᓕᒃ ᐱᔪᓐᓇᑎᑦᓯᓂᕐᒥᒃ ᑎᒥᐅᔪᒥᒃ ᐳᕐᑐᓯᒋᐊᕆᓂᕐᒥᒃ ᓄᓇᕕᒻᒥ ᓱᕐᕃᓂᕐᒥᓂᒃ ᐊᒻᒪᓗ ᐱᕙᓪᓕᐊᑎᑦᓯᓗᓂ ᐃᓘᓐᓈᒍᑦ ᑲᔪᓯᔪᒥᒃ ᑲᒪᓂᕐᒥᒃ ᐃᓱᐊᕐᓯᕕᒻᒦᓯᒪᔪᓂᒃ. ᑐᕌᒐᖓ, ᑕᒪᓐᓇ ᐱᓇᓱᐊᕐᓂᖅ ᐱᐅᓯᒋᐊᕆᓚᖓᔪᖅ ᑲᒪᒋᔭᖃᕐᓂᒥᒃ ᐃᓱᐊᕐᓯᕕᐅᑉ ᐊᔪᐃᓐᓇᕈᑎᒋᓲᖓᓂᒃ ᐊᑐᐃᓐᓇᐅᑎᒐᓱᑦᓱᒍ ᐊᒥᓱᑦ ᐳᕐᑐᓃᑦ ᑕᑯᓐᓇᓱᒋᑦ. ᓂᕆᐅᒋᔭᐅᔪᖅ ᐃᓱᐊᕐᓯᕕᓕᐊᓚᐅᕐᑎᓇᒍ ᑲᒪᒋᔭᖃᕐᓂᖅ ᐊᒻᒪᓗ ᑭᖑᓂᖓᒍᑦ ᑲᒪᒋᔭᖃᕐᓂᖅ ᐱᐅᓯᒋᐊᕆᓚᖓᒋᐊᖏᒃ ᒪᒥᓴᕐᓂᐅᑉ ᐳᕐᑐᓂᖏᓐᓂᒃ, ᐊᒻᒪᓗ ᓄᐃᑦᓯᓗᓂ ᐱᐅᓂᕐᓴᒥᒃ ᐱᒍᑦᔭᐅᔪᑦ ᐊᑑᑎᔭᖓᓂᒃ.

ᐅᐱᕐᖔᖅ, ᐱᓇᓱᑦᑏᑦ ᑲᒪᒋᔭᖃᓗᐊᖕᖑᐊᓚᐅᔪᑦ ᖃᐅᔨᓴᕐᓂᒥᒃ ᖃᕆᑕᐅᔭᒃᑯᑦ ᐱᓇᓱᐊᕈᑎᑦᓯᐊᖑᓂᕐᐹᓂᒃ ᓄᓇᕕᒻᒥ ᖃᕆᑕᐅᔭᒃᑰᕈᑏᑦ ᐱᑕᖃᑦᓯᐊᖏᒃᑲᓗᐊᕐᑎᓗᒋᑦ ᐊᑐᑦᓯᐊᕋᑎᓪᓗ ᐊᒻᒪᓗ ᐱᓇᓱᐊᕈᓯᑦᓯᐊᖑᓂᕐᐹᓂᒃ ᒪᓕᒐᕐᓂᓗ ᐊᑦᑕᓇᕐᑐᒦᑦᑎᓯᑦᑌᓕᓂᕐᒨᓕᖓᔪᓂᒃ ᐊᒻᒪᓗ ᐊᑐᕐᑕᐅᒋᐊᓕᓐᓂᒃ ᐊᑦᓇᕐᑐᒦᑦᑌᓕᓂᕐᒥ. ᐊᒻᒪᓗ ᖃᐅᔨᒪᔭᒥᓂᒃ ᑐᓴᕐᑕᐅᑎᑦᓯᓚᐅᔪᒻᒥᔪᑦ Wanaki Center, Walgwan, Innulicare, On the Wagon, Hasu ᐃᓱᐊᕐᓭᓂᖅ ᐊᒻᒪᓗ ᐅᑭᐅᕐᑕᑐᒥ ᐃᓱᐊᕐᓭᓂᕐᒧᑦ ᐊᒻᒪᓗ ᒪᒥᓴᕐᑎᓯᓂᕐᒧᒃ ᐱᒍᑦᔨᔨᓄᑦ ᑐᑭᓯᒋᐊᑦᓯᐊᕈᒪᑦᓱᑎᒃ ᖃᕆᑕᐅᔭᒃᑯᑦ ᐱᓇᓱᐊᕐᓂᖏᓐᓂᒃ, ᐊᑐᕈᒪᓂᕐᓴᖏᓐᓂᒃ, ᐊᑦᓱᕉᑎᒋᖃᑦᑕᑕᖏᓐᓂᒃ, ᑲᒪᒍᓯᖏᓐᓂᒃ ᐊᒻᒪᓗ ᑭᐅᑦᔪᑎᖏᓐᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ ᐊᒻᒪᓗ ᓇᐅᑐᐃᓐᓇᓄᑦ ᖃᐅᔨᔭᐅᑎᑦᓯᒋᐊᖃᖕᖏᓂᕐᒧᑦ.

ᓱᕐᖁᐃᓯᒐᓱᑦᓱᑎᒃ ᐃᓱᐊᕐᓯᕕᐅᑉ ᖃᐅᔨᔭᖏᓐᓂᒃ ᐊᒻᒪᓗ ᖃᐅᔨᓴᕐᓗᑎᒃ ᐃᓱᐊᕐᓯᕕᒻᒦᓯᒪᔪᑦ ᐊᑦᓱᕉᑎᒋᓯᒪᔭᖏᓐᓂᒃ ᐊᒻᒪᓗ ᑭᖕᖒᒪᒋᓯᒪᔭᖏᓐᓂᒃ ᐃᓱᐊᕐᓯᕕᒻᒦᓂᕐᒥᓂᒃ ᐱᔭᕇᕐᑐᕕᓂᐅᑦᓱᑎᒃ, ᐱᓇᓱᑦᑏᑦ ᐊᐱᕐᓱᓂᒃᑯᑦ ᖃᐅᔨᓴᕐᓂᖃᓚᐅᔪᑦ ᐃᓱᐊᕐᓯᕕᒻᒦᓯᒪᔪᓂᒃ. 10%-ᒥᑦᓵᓃᑦᑐᑦ 2017-ᒥᑦ 2020-ᒧᑦ ᐃᓱᐊᕐᓯᕕᒻᒦᓯᒪᔪᑦ ᐃᓚᐅᓚᐅᔪᑦ ᐊᐱᕐᓱᓂᒃᑯᑦ ᖃᐅᔨᓴᕐᓂᒧᑦ ᐅᖄᓚᐅᑎᒃᑯᑦ. ᓄᐃᑕᖏᑦ ᑐᑭᓯᒋᐊᑦᓯᐊᓇᕐᑐᒪᕇᑦ!

ᑐᑭᓯᓚᐅᕐᑐᒍᑦ ᐊᒥᓱᓂᑦ ᑐᑭᓯᒐᓗᐊᕐᓱᑕ ᐊᑦᓱᕈᕈᑎᐅᓂᕐᐸᐅᓯᒪᔪᑦ ᐃᓱᐊᕐᓯᕕᒻᒦᓯᒪᔪᓄᑦ ᐱᔭᕇᕐᑐᕕᓂᐅᑦᓱᑎᒃ ᒪᒥᓴᕐᓂᒥᓂᒃ ᖃᓂᑕᖃᕐᓂᖅ ᐃᓚᒥᓂᒃ ᐱᖃᑎᒥᓂᓪᓘᓃᑦ ᐃᒥᐊᓗᓲᓂᒃ, ᐊᒻᒪᓗ ᐃᒥᐊᓗᒍᒪᓂᕐᒥᓂᒃ. ᑭᓯᐊᓂ, ᐃᓘᓐᓇᑲᓴᖏᑦ ᐃᓱᐊᕐᓯᕕᒻᒦᓯᒪᔪᑦ ᐅᖃᕐᑐᕕᓃᑦ ᐱᑦᑌᓕᒍᓐᓇᓂᕐᓴᐅᓕᕐᓂᒥᓂᒃ ᐋᖓᔮᓐᓇᑐᓂᒃ ᐃᓱᐊᕐᓯᕕᒻᒥ ᒪᒥᓴᕐᑐᕕᓂᐅᑦᓱᑎᒃ. ᐱᖓᓱᑦ ᐃᓱᐊᕐᓯᕕᒻᒦᓯᒪᔪᑦ ᓯᑕᒪᓂᑦ ᐅᑉᐱᕈᓱᑦᑐᑦ ᒪᒥᓴᕐᓂᖓ ᑲᔪᓯᑦᓯᐊᕋᔭᕐᑐᕕᓂᐅᒋᐊᖓ ᑲᔪᓯᔪᒥᒃ ᑲᒪᒋᔭᐅᓂᕐᒥᒃ ᐊᑐᐃᓐᓇᖃᕐᑎᓯᔪᕕᓂᐅᑉᐸᑦ ᐃᓱᐊᕐᓯᕕᒃ, ᐊᒻᒪᓗ ᐃᓘᓐᓇᑲᓴᖏᑦ ᐃᓱᐊᕐᓯᕕᒻᒦᓯᒪᔪᑦ ᐅᖃᕐᑐᕕᓃᑦ ᐅᓇᒻᒥᓱᒐᔭᕆᐊᒥᒃ ᖃᕆᑕᐅᔭᒃᑯᑦ ᑲᒪᒋᔭᐅᓂᕐᒥᒃ ᐱᒍᑦᔨᓂᕐᓂᒃ ᐊᑐᕆᐊᒥᒃ ᓄᓇᓕᒻᒥᓃᓪᓗᑎᒃ ᑖᒃᑯᐊ ᐱᒍᑦᔨᓃᑦ ᐊᑐᐃᓐᓇᕈᕐᑐᕕᓂᐅᑉᐸᑕ. ᐊᒥᓲᓂᕐᓭᑦ ᑭᐅᔪᑦ ᐅᖃᕐᓂᒥᔪᑦ ᐃᓱᕐᕆᓂᕐᓴᐅᒐᔭᕆᐊᒥᒃ ᐅᖄᒋᐊᒥᒃ ᐅᖄᓚᐅᑎᒃᑯᑦ ᐃᓱᐊᕐᓭᔨᒧᑦ ᖃᕆᑕᐅᔭᒃᑯᑦ ᑕᑯᓐᓇᕈᑎᒃᑯᖔᖑᖕᖏᑐᖅ ᐅᕝᕙᓘᓐᓃᑦ ᐊᓪᓚᖃᑦᑕᐅᑎᒍᑎᒃᑯᖔᖑᖕᖏᑐᖅ. ᓇᑯᕐᒦᖁᒍᑦ ᐃᓱᐊᕐᓯᕕᒻᒦᑎᐊᕆᓯᒪᔭᑦᑎᓂᒃ ᖃᐅᔨᑎᑦᓯᓚᐅᕐᒪᑕ ᐊᑑᑎᓯᒪᔭᒥᓂᒃ ᐃᓱᐊᕐᓯᕕᒻᒦᑐᕕᓂᐅᓂᕐᒥ ᑭᖑᓂᖓᒍᑦ.

ᑌᒃᑯᐊ ᓄᐃᑕᕕᓂᖏᑦ ᖃᐅᔨᓴᕐᓂᐅᑉ ᑕᓯᐅᕐᓯᓚᖓᔪᑦ ᑲᔪᓯᔪᒥᒃ ᑲᒪᒋᔭᖃᕐᓂᒥᒃ ᐱᒍᑦᔨᓂᓕᕆᕕᒻᒥᒃ ᐱᓇᓱᐊᕐᓂᕆᓚᖓᔭᖏᓐᓂ ᖃᕆᑕᐅᔭᒃᑯᑦ ᑭᖑᓂᖓᒍᑦ ᑲᒪᒋᔭᖃᕐᓂᒥᒃ ᐱᓇᓱᐊᕐᓂᒥ 2021-ᒥ ᐊᒻᒪᓗ 2022-ᒥ, ᐱᕙᓪᓕᐊᑎᑕᖏᑦ ᖃᕆᑕᐅᔭᒃᑯᑦ ᐱᒍᑦᔨᓃᑦ, ᐊᒻᒪᓗ ᐱᒋᐊᕐᑎᓯᓂᖅ ᐊᒻᒪᓗ ᖃᐅᔨᓴᕐᓂᖅ.

ᑲᒪᑦᓯᐊᕋᓱᒧᑦ ᐃᓚᑦᔪᒍᓱᒧᓪᓗ ᐃᓱᐊᕐᓯᕕᒃ ᓄᕐᖃᑎᑦᓯᑫᓐᓇᑐᖅ ᐱᒍᑦᔨᓂᕐᒥᓂᒃ ᐅᐃᕆᒪᔪᓕᕆᓂᕐᒨᓕᖓᔪᓂᒃ ᓄᓇᕕᒻᒥ. ᐃᓱᐊᕐᓯᕕᐅᑉ ᐱᒍᑦᔨᓂᖏᑦ ᐱᑕᖃᓪᓚᕆᒋᐊᖃᖏᓐᓇᑐᑦ ᐊᒻᒪᓗ ᓯᕗᓪᓕᐅᔭᐅᒋᐊᖃᕐᓱᑎᒃ ᓄᓇᕕᒻᒥ, ᑭᓯᐊᓂ ᐱᑦᓯᐊᓂᖏᑦ ᐱᒍᑦᔨᓂᑦᑕ ᐊᒻᒪᓗ ᖃᓄᐃᖕᖏᓯᐊᕆᐊᖃᕐᓂᖏᑦ ᐱᓇᓱᑦᑎᑕ ᐊᒻᒪᓗ ᐱᒍᑦᔨᔭᑦᑕ ᐱᒻᒪᕆᐅᓂᕐᐹᑦ. ᐱᑕᖃᖕᖏᐸᑕ, ᐱᔭᕆᒐᓱᑦᑕᑎᓐᓂᒃ ᐱᔭᖃᕐᖃᔭᖕᖏᑐᒍᑦ.

“ᖃᐅᔨᒪᕗᒍᑦ ᓱᕐᕃᓂᖓᓂᒃ ᖃᓂᑦᑕᕇᒋᐊᖃᖕᖏᓂᐅᑉ ᐊᓂᑦᑌᓕᓂᐅᓪᓗ, ᐊᒻᒪᓗ ᐃᑭᓪᓕᒋᐊᕐᑕᐅᒪᓂᖏᑦᑕ ᐃᒥᐊᓗᐃᑦ ᓂᐅᕕᕐᑕᐅᒍᓐᓇᑐᑦ, ᐃᓚᒋᐊᕈᑎᐅᒋᐊᖏᑦ ᐃᓱᒫᓘᑎᖏᓐᓄᑦ ᐃᓄᖁᑎᑦᑕ ᐱᓀᓗᑕᓖᑦ ᐃᒥᐊᓗᖃᑦᑕᓂᕐᒥᒃ ᐋᖓᔮᓐᓇᑐᕐᑐᖃᑦᑕᓂᕐᒥᓘᓐᓃᑦ. ᑕᒪᓐᓇ ᖃᓄᐃᓕᖓᔪᒦᓐᓂᐅᔪᖅ ᐃᓱᒫᓗᒋᐊᓪᓚᑎᑦᓯᓲᖅ, ᑭᑦᓴᓕᐅᒥᑎᑦᓯᓱᓂ, ᖁᐊᕐᓵᖓᑎᑦᓯᒋᐊᓪᓚᓱᓂ, ᓂᖕᖓᐅᒪᑎᑦᓯᒋᐊᓪᓚᓱᓂ, ᐅᕝᕙᓘᓐᓃᑦ ᐃᕿᐊᓇᕐᑎᓯᒋᐊᓪᓚᓱᓂ. ᑐᓴᐅᒪᖃᑎᒌᖏᓐᓇᓕᒫᕋᓱᐊᕐᖁᒍᑦ ᐊᓯᖏᓪᓗ ᑎᒥᐅᔪᐃᑦ ᐊᒻᒪᓗ ᒪᓕᒉᑦ ᐊᑐᕈᓐᓀᑎᑕᐅᑉᐸᑕ, ᐊᑐᐃᓐᓇᐅᓛᕐᑐᒍᑦ ᐅᓪᓗᓕᐅᕆᒋᐊᓪᓚᕆᐊᒥᒃ ᒪᒥᓴᕐᓂᐅᓛᕐᑐᓂᒃ ᐊᒻᒪᓗ ᐸᕐᓇᓗᑕ ᑐᖕᖓᓱᑦᑎᓯᓂᑦᓴᑎᓐᓂᒃ ᐃᓱᐊᕐᓯᕕᒻᒦᑐᑦᓴᓂᒃ,” ᓇᓗᓀᕐᓯᓚᐅᕐᑐᖅ ᐊᓖᓯᐊ ᐊᔭᒍᑕᖅ, ᑐᑭᒧᐊᑦᑎᓯᔨᒻᒪᕆᒃ.

ᒫᑦᔨ 16, 2020-ᓂᑦ, ᐃᓱᐊᕐᓯᕕᒃ ᓴᐳᑦᔨᓯᒪᔪᖅ ᑐᑭᑖᖏᓐᓂᒃ ᐃᓗᓯᓕᕆᓂᕐᒥ ᐊᐅᓚᑦᓯᔩᑦ ᐊᒻᒪᓗ ᒪᓕᑦᓯᐊᓱᓂ ᐃᒫᙰᕈᑎᓕᒫᖏᓐᓂᒃ ᐊᐅᓚᑦᓯᓂᕐᒧᑦ ᖃᓂᒻᒪᓯᕐᒥᒃ ᓄᓇᑦᑎᓂ. ᐱᖕᖑᐊᖑᖕᖏᓂᖓᓄᑦ ᑖᑦᓱᒪ ᖃᓄᐃᑦᑐᒦᓐᓂᐅᔫᑉ, ᐃᓱᐊᕐᓯᕕᒃ ᑐᑭᑖᓚᐅᕐᑐᖅ ᐅᒃᑯᐊᓯᓂᕐᒥᒃ ᐱᓇᓱᕝᕕᒥᓂᒃ ᐊᒻᒪᓗ ᒫᓐᓇᓯᐅᑎᐅᑎᓪᓗᒍ ᐊᑐᐃᓐᓇᖃᕐᓂᒥᒃ ᐃᓱᐊᕐᓯᕕᒻᒥᒃ ᐃᓗᓯᓕᕆᔨᒃᑯᓄᑦ ᐅᐃᒪᓇᕐᑐᒥᒃ ᑭᖕᖒᒪᑦᓯᒐᔭᕐᐸᑕ ᓄᓇᕕᒻᒥ.

ᐊᕐᓀᑦ ᒪᒥᓴᕐᓂᓴᖓ ᐊᑑᑎᒋᐊᖃᓚᐅᔪᖅ ᔫᓂᒥ ᔪᓓᒥᓗ ᑭᖑᕙᕆᐊᕐᑕᐅᔪᖅ ᓄᓇᕕᒃ ᑲᔪᓯᖁᔭᐅᖕᖏᓂᖓᓂ ᐊᑦᑕᓇᖕᖏᑐᒥᒃ ᐃᖏᕐᕋᑎᑦᓯᓂᕐᒥᒃ ᐃᓱᐊᕐᓯᕕᒻᒦᓗᑎᒃ ᒪᒥᓴᕐᓂᒥᒃ. ᐊᓯᖏᓐᓄᓕ ᒪᒥᓴᕐᓂᓄᑦ ᐊᑑᑎᒋᐊᓕᓐᓄᑦ ᐅᑭᐊᖅ, ᐅᓪᓗᖏᑦ ᐋᕐᕿᒋᐊᕐᑕᐅᓛᕐᑐᑦ ᐅᒃᑯᐃᕆᐊᓪᓚᓂᑦᓴᖓ ᐃᓱᐊᕐᓯᕕᐅᑉ ᓱᕐᖁᐃᑕᐅᒪᓕᕐᐸᑦ. ᐊᑐᐃᓐᓇᕈᕐᑎᓗᑕ ᒪᒥᓴᕐᓂᐅᓛᓕᕐᒥᔪᒧᑦ, ᐸᕐᓇᓯᒪᔪᒍᑦ ᓴᓗᒻᒪᓭᒋᐊᒥᒃ ᐃᓱᐊᕐᓯᕕᒻᒥᒃ, ᐊᑐᓕᕐᐸᓕᐊᓂᕐᒥᒃ ᓄᑖᓂᒃ ᐊᑦᑕᓇᕐᑐᒦᒌᒃᑯᑎᓂᒃ ᐊᒻᒪᓗ ᖃᓄᐃᖕᖏᓯᐊᕈᑎᓂᒃ ᑕᒪᖏᓐᓄᑦ ᐱᓇᓱᑦᑎᓄᑦ ᐱᒍᑦᔨᔭᑦᑎᓄᓪᓗ, ᐊᒻᒪᓗ ᐱᐅᔫᑎᒐᓱᓪᓗᒍ ᐊᑦᑕᓇᕈᓐᓀᓗᓂ ᐃᓘᓐᓇᖏᓐᓄᑦ.

ᐱᓇᓱᐊᓚᕿᒍᑎᖃᕐᓱᓂ ᖃᓂᒻᒪᓯᕐᒥᒃ COVID-19-ᒥᒃ, ᐃᓱᐊᕐᓯᕕᒃ ᐊᑐᐃᓐᓇᕈᕐᑎᓯᒪᑦᓯᐊᖃᑦᑕᑐᖅ ᐱᒋᐊᕐᑎᓯᓂᒃᑯᑦ ᓯᕗᓪᓕᐹᒥᒃ ᐱᓇᓱᐊᕐᑕᒥᓂᒃ ᑲᔪᓯᔪᒥᒃ ᑲᒪᒋᔭᖃᕐᓂᓕᕆᕕᒃᑯᑦ. ᐃᓱᐊᕐᓯᕕᓕᐊᖃᑦᑕᓯᒪᔪᑦ ᐃᓚᐅᒍᓐᓇᓕᕐᑐᑦ ᖃᕆᑕᐅᔭᒃᑯᑦ ᓴᐳᑦᔨᖃᑎᒌᕝᕕᒧᑦ ᑌᔭᐅᔪᒧᑦ ᐃᓱᐊᕐᓯᕕᐅᑉ ᒪᒥᓴᕐᓂᐅᑉ ᑭᖑᓂᖓᒍᑦ ᑲᒪᓂᖓ ᐱᑐᒍᑎᒋᑦᓱᒍ ᐊᒻᒪᓗ ᐊᕕᖃᑎᖃᕈᑎᒋᑦᓱᒍ ᐊᑐᕐᑕᐅᒍᓐᓇᑐᓂᒃ ᒪᒥᓴᕐᓯᒪᔪᑎᒍᑦ. ᐊᒻᒪᓗ, ᐃᓱᐊᕐᓯᕕᒃ ᐱᒋᐊᕐᑎᓯᓐᓂᒥᔪᖅ ᐃᓅᖃᑎᒌᓐᓂᑯᑦ ᐱᓇᓱᐊᕐᓂᒥᒃ Facebook-ᒥ ᓴᐳᑦᔨᒍᑎᒋᑦᓱᒍ ᐊᓂᕐᕋᒥᓂ ᐊᓂᑦᑌᓕᒪᔪᓂᒃ ᐊᒻᒪᓗ ᖁᐊᕐᓵᓇᕐᑐᑰᕐᓯᒪᑦᓱᑎᒃ. ᐃᓚᒋᔭᐅᑎᓪᓗᒍ ᐱᓇᓱᐊᕐᓂᖓᓄᑦ, ᑲᑎᕐᓱᐃᓯᒪᔪᒍᑦ ᐅᖃᐅᓯᑦᓴᐅᔪᓂᒃ ᐃᓄᑐᐃᓐᓀᑦ ᓯᕗᓪᓕᕕᓂᖏᑦᑕ ᐃᓪᓕᕆᔭᖏᓐᓂᑦ ᐱᓯᒪᔪᓂᒃ ᐃᓚᑦᔪᒍᓱᓐᓂᒥᒃ ᖃᐅᔨᑎᑦᓯᒍᑎᒋᑦᓱᒋᑦ ᐊᒻᒪᓗ ᐅᑉᐱᓂᖃᑦᓯᐊᖁᓗᒋᑦ ᐊᑦᓱᕈᕐᓇᑐᓂ ᐱᓇᓱᐊᕈᓯᕐᓂ ᙯᔪᓂ.

ᐃᓱᐊᕐᓯᕕᐅᑉ ᐱᓇᓱᑦᑎᖏᑦ ᐱᑐᑦᓯᒪᖏᓐᓇᑐᑦ ᐊᒻᒪᓗ ᐊᓪᓚᕕᐅᒍᓐᓇᓱᑎᒃ ᖃᕆᑕᐅᔭᒃᑯᑦ ᐊᐱᕐᓲᑎᑦᓴᖃᕐᑐᖃᕐᐸᑦ ᐅᕝᕙᓘᓐᓃᑦ ᐱᓇᓱᐊᕐᓃᑦ ᖃᔪᓯᔪᑦ ᖃᓄᐃᓕᖓᓕᕐᒪᖔᑕ ᖃᐅᔨᒋᐊᕐᑐᖃᕈᒪᑉᐸᑦ.

ᐅᑭᐊᖑᓚᐅᔪᖅ, ᐃᓱᐊᕐᓯᕕᒃ ᐅᖃᕆᐊᖕᖓᓚᐅᔪᖅ ᑮᓇᐅᔭᕐᑖᓯᒪᓂᕐᒥᓂᒃ $40.5 ᒥᓕᐊᓐ ᑖᓚᓂᒃ ᐃᓪᓗᓕᐅᕐᓂᒧᑦ ᓄᑖᒥᒃ ᐱᓇᓱᕝᕕᓚᕆᑦᑕᖓᓂᒃ ᐊᒻᒪᓗ 12-ᓂᒃ ᐃᓪᓗᓂᒃ ᐱᓇᓱᑦᑏᑦ ᐃᓪᓗᓴᖏᓐᓂᒃ. ᐸᕐᓇᑕᐅᓯᒪᒻᒪᑦ, ᐊᑭᑭᓐᓂᐹᕐᓯᐅᓂᖅ ᐃᓪᓗᓕᐅᕐᓂᒧᑦ ᐱᓇᓱᕝᕕᓚᕆᑦᑕᖓᓂᒃ ᐱᒋᐊᕐᑎᑕᐅᓚᐅᔪᖅ ᔭᓄᐊᕆᐅᑉ ᐱᒋᐊᕐᓂᖓᓂ 2020-ᒥ. ᕕᕈᐊᕆ 17-ᒥ, ᑲᑎᖕᖓᔩᑦ ᒪᑐᐃᕐᓯᓚᐅᔪᑦ ᐊᒻᒪᓗ ᕿᒥᕐᕈᓱᑎᒃ ᐊᑭᑭᓐᓂᐸᐅᓕᐅᑎᒍᑎᓂᒃ, ᐊᒻᒪᓗ ᐊᓱᐃᓛ ᓇᓗᓀᕐᓯᓱᑎᒃ ᐊᑭᑭᓐᓂᐹᒥᒃ ᒪᓕᒐᕐᓂᒃ ᒪᓕᑦᓯᐊᑐᒥᒃ ᐊᑭᑭᓐᓂᐸᐅᓕᐅᑎᔪᒥᒃ Les Constructions Pépin et Fortin Inc.-ᖑᑎᓪᓗᒋᑦ, ᐃᓪᓗᓕᐅᕐᑏᑦ ᐱᓇᓱᐊᕐᓯᒪᓪᓚᕆᑦᑐᑦ ᓄᓇᕕᒻᒥ.

ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑎ ᐁᑦᑑᑎᐅᒋᐊᖃᓚᐅᔪᖅ ᐱᓇᓱᐊᕈᓯᕐᓂ ᖄᖏᕐᑐᓂ, ᑭᓯᐊᓂ COVID-19 ᖃᓂᒻᒪᓯᐅᑉ ᐃᕐᐸᓂᖓ ᐱᑦᔪᑎᒋᑦᓱᒍ ᑭᖑᕙᕆᐊᕆᐊᖃᒪᓚᐅᔭᕗᑦ ᐊᑎᓕᐅᕈᑎᖃᕐᓂᖅ ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑎᒥᒃ. ᖃᐅᔨᓴᑦᓯᐊᒪᕆᒋᐊᖃᓚᐅᔪᒍᑦ ᐊᑦᑕᓇᕐᑑᒪᖔᑦ ᐃᓪᓗᓕᐅᕐᓂᖅ ᕿᑲᕐᑎᑕᐅᑎᓪᓗᒍ ᐱᓇᓱᐊᕈᓯᕐᓂᒃ ᐊᒥᓱᓂᒃ. ᐃᓱᐊᕐᓯᕕᒃ ᑐᑭᓯᒪᑦᓯᐊᖁᒧᑦ ᑖᑦᓱᒥᖓ ᓇᓗᓇᕐᑐᒥᒃ ᖃᓄᐃᑦᑐᒦᓐᓂᐅᔪᒥᒃ, ᑐᓴᐅᒪᖃᑦᑕᐅᑎᖃᑎᖃᑦᓯᐊᖃᑦᑕᑐᒍᑦ ᐱᓇᓱᐊᕐᑐᓂᒃ ᐃᓪᓗᓕᐅᕐᓂᒥ, ᐱᖁᔭᑎᒍᑦ ᐃᒫᙰᕐᑎᓂᒃ, ᓄᓇᕕᒻᒥ ᑎᒥᐅᔪᓂᒃ ᑫᓪᓗᑐᐃᔪᓂᒃ ᐃᓪᓗᓕᐅᕐᓂᓂᒃ, ᐊᒻᒪᓗ ᐱᓇᓱᐊᖃᑎᑦᑎᓂᒃ ᐳᕐᑐᓂᓕᒫᖏᓐᓂ ᑲᕙᒪᒃᑯᑦ.

ᐃᓚᐅᑎᑦᓯᓱᑕ ᐃᓱᒪᒋᔭᖏᓐᓂᒃ ᐃᓚᐅᔪᓕᒫᑦ, ᐁᑦᑑᑎᖃᑦᓴᕋᑕᓚᐅᔪᒍᑦ ᐃᓪᓗᓕᐅᕐᓂᒧᑦ ᐱᒍᑦᔨᓂᕐᒧᑦ ᐊᖏᖃᑎᒌᒍᑎᒥᒃ Les Constructions Pépin et Fortin Inc.-ᑯᓐᓄᑦ ᐁᕆᓕ 16, 2020-ᒥ. ᑖᓐᓇ ᐅᓪᓗᖅ ᐱᒻᒪᕆᕈᓚᐅᔪᖅ ᐃᓱᐊᕐᓯᕕᐅᑉ ᐱᕙᓪᓕᐊᓯᒪᓂᖓᓂ ᓲᕐᓗ ᓯᓐᓇᑑᒪᒋᑦᓱᒍ ᐱᒍᒪᓯᒪᔭᑐᖃᖓ ᐊᑑᑎᓪᓚᕆᓯᑦᓴᕋᑕᕐᒪᑦ.

ᐱᓇᓱᐊᕐᓂᒥ ᐱᓇᓱᑦᑎᕗᑦ ᐊᒻᒪᓗ ᐃᓪᓗᓕᐅᕐᑏᑦ ᐱᓇᓱᐊᒻᒪᕆᑦᑐᑦ ᓱᓇᓕᒫᑦ ᐃᓂᓪᓚᖓᑦᓯᐊᑎᒐᓱᑦᓱᒋᑦ ᐱᒋᐊᕐᓂᒧᑦ ᐃᓪᓗᓕᐅᕐᓂᒥᒃ ᑕᒃᑲᓂ ᐅᐱᕐᖔᒥ, ᒪᓕᑦᓯᐊᖏᓐᓇᓱᑎᒃ ᐊᑦᑕᓇᕐᑐᒦᑦᑌᓕᒍᑎᓂᒃ ᐊᒥᓱᖕᖑᕆᐊᕐᓯᒪᔪᓂᒃ ᐋᕐᕿᑕᐅᒪᔪᓂᒃ ᓴᐳᑦᔨᒍᑎᐅᑦᓱᑎᒃ ᐱᓇᓱᑦᑎᓂᒃ ᐊᒻᒪᓗ ᓄᓇᕕᒻᒥᐅᓂᒃ. ᑌᒣᒐᓗᐊᕐᑎᓗᒍ, ᐃᓱᒪᒋᑦᓱᒋᑦ ᓇᓗᓇᕐᓂᖏᑦ ᐱᑦᔪᑎᒋᑦᓱᒍ ᐅᒃᑯᐃᕆᐊᓪᓚᓂᑦᓴᖓ ᓄᓇᕕᐅᑉ ᐃᓪᓗᓕᐅᕐᑎᓄᑦ, ᐃᓱᐊᕐᓯᕕᒃ ᐱᓇᓱᐊᖃᑎᒥᓂᒃ ᐱᓇᓱᐊᖃᑎᓕᒃ ᐸᕐᓇᓯᒪᐅᑎᒥᒃ ᐊᑑᑎᑐᐃᓐᓇᕆᐊᓕᓐᓄᑦ ᖏᑐᐃᓐᓇᕆᐊᖃᕐᓱᑎᓪᓗ ᑲᔪᓯᑦᓯᐊᖁᔨᑦᓱᑎᒃ ᐱᓇᓱᐊᕐᓂᒥᒃ ᒫᓐᓇ ᐱᔭᕆᐊᑐᔪᒃᑰᕋᓗᐊᕐᑎᓗᑕ.

ᐃᓱᐊᕐᓯᕕᒃ ᖃᐅᔨᕐᕙᓚᒍᒪᔪᖅ ᐃᑲᔪᕐᓯᒪᕆᑦᓯᒪᓂᖏᓐᓂᒃ ᐃᓚᖏᑦ ᐃᓄᑑᓈᕐᑎᑐᑦ ᐃᓚᐅᓪᓚᕆᑦᓯᒪᔪᑦ ᐱᓇᓱᒍᑦᔨᓂᕐᒧᑦ ᐊᖏᖃᑎᒌᒍᑎᑖᕐᑎᓯᒐᓱᐊᕐᓂᒧᑦ, ᐱᓗᐊᕐᑐᒥᒃ:

• ᑲᑎᖕᖓᔨᖏᑦ; ᑏᕕ ᕗᐊᕋᔅ, ᒥᐊᔨ ᐁᑦᓯᓴᓐ, ᒫᑕ ᑯᔩᒃ, ᓲᓕ ᐅᐁᑦ ᑐᐳᐃ, ᓯᑏᕙᓐ ᑭᐊᓕ, ᓵᓐ ᒥᒃᑖᓄᓪ, ᓵᕐᓚᑦ ᐱᕆᑦ, ᒥᓂ ᒫᓕ ᓯᓅᐹ, ᐊᒻᒪᓗ ᓗᐃᓴ ᑯᐊᓐᓇᓈᖅ
• ᑐᑭᒧᐊᑦᑎᓯᔨᒻᒪᕆᒻᒥᓂᒃ, ᐊᓖᓯᐊ ᐊᔭᒍᑕᖅ
• ᐱᕙᓪᓕᐊᑎᑦᓯᓂᕐᒧᑦ ᐸᕐᓇᓯᒪᐅᑎᒥᓂᒃ ᐊᑕᐅᑦᓯᑰᕐᑎᓯᔨᒥᓂᒃ, Philippe-Alexandre Bourgouin
• ᐃᓪᓗᓕᐅᕐᓂᒧᑦ ᑲᒪᔨᒻᒪᕆᒥᓂᒃ, ᒪᒃᓯᒻ ᐃᕉ
• ᐱᓇᓱᐊᕐᓂᒥᒃ ᐱᓇᓱᐊᖃᑎᒌᓐᓂᒧᑦ ᑲᑎᖕᖓᔨᒥᓂᒃ, ᐋᑕᒥ ᑎᓖᓪ ᐊᓚᑯ, ᓭᓚᓯ ᒍᐊᑦ, ᒣᑯ ᑯᐊᑕ, Patrick Beauchesne, Yannick Larouche-Tremblay, ᑏᕕ ᕗᐊᕋᔅ, ᐊᒻᒪᓗ ᒥᐊᔨ ᐁᑦᓯᓴᓐ
• ᐱᖁᔭᑎᒍᑦ ᐃᒫᙰᕐᑎᒥᓂᒃ, ᔮᓐ-ᕙᕌᓐᓱᐊ ᐊᕐᑑ

ᖃᕆᑕᐅᔭᒃᑯᑦ ᐃᓅᖃᑎᒌᑎᒍᑦ ᑐᓴᐅᒪᖃᑦᑕᐅᑎᒍᑎᑎᒍᑦ ᐱᓇᓱᐊᕐᓂᖅ ᓴᐳᑦᔨᔪᖅ ᐃᓘᓐᓇᖏᓐᓂᒃ ᓄᓇᕕᒻᒦᑐᓂᒃ ᐊᓂᑦᑌᓕᒪᔪᓂᒃ ᐊᓂᕐᕋᒥᓂᑦ ᑭᖑᕚᕇᑎᒍᑦ ᖁᐊᕐᓵᓇᕐᑐᑰᕐᓯᒪᑦᓱᑎᒃ.

 ᓴᐳᑎᓯᒪᓗᑕ ᐃᒻᒥᓂᒃ ᓇᓪᓕᒋᔭᑦᑎᓂᓪᓗ, ᐳᓚᕋᕐᑌᓕᒋᐊᖃᕐᖁᒍᑦ ᐃᓄᓐᓄᑦ ᐅᕝᕙᓘᓐᓃᑦ ᐅᕙᑦᑎᓄᑦ ᐳᓛᕆᐊᕐᑎᑌᓕᓗᒋᑦ ᐱᒍᓐᓇᕕᓕᒫᑦᑎᓄᑦ. ᐱᒻᒪᕆᐅᕗᖅ ᓲᓱᑦᓴᓂᖅ ᐃᓗᓯᓕᕆᔨᒃᑯᑦ ᒪᓕᒐᖏᓐᓂᒃ ᐊᒻᒪᓗ ᐃᒫᙰᕈᑎᖏᓐᓂᒃ. ᖃᓄᖅ ᐅᕙᑦᑎᓂᒃ ᓴᐳᑦᔨᒋᐊᒥᒃ ᖃᐅᔨᒪᑦᓯᐊᓂᕐᐸᐅᒪᑕ ᖃᓂᒪᓐᓇᖅ ᐃᕐᐸᐸᓪᓕᐊᑎᓪᓗᒍ.

ᐅᓪᓗᒥ, ᐊᓂᕐᕋᖃᕐᓂᖅ ᐃᓄᒋᐊᓗᐊᕐᑐᒥ ᐊᓂᕐᕋᒥ ᖃᓂᖕᖏᑐᒥᐅᖑᒌᕐᓱᑕ, ᐃᓱᒫᓗᓐᓇᕈᓐᓇᒪᑦ ᐅᐃᒻᒪᖓᓕᕐᓇᓱᓂᓗ. ᐱᒻᒪᕆᐅᕗᖅ ᑲᒪᑦᓯᐊᕆᐊᒥᒃ ᑎᒥᒃᑯᑦ ᐃᓱᒪᒃᑯᓗ ᐃᓗᓯᑦᑎᓂᒃ ᒫᓐᓇ ᐊᑦᓱᕈᕐᓇᑐᒃᑰᑎᓪᓗᑕ.

ᐃᓱᐊᕐᓯᕕᒻᒥ, ᐱᓇᓱᑦᑎᕗᑦ ᐱᒍᓐᓇᑐᑦ ᐊᒻᒪᓗ ᐃᓕᓐᓂᐊᓯᒪᑦᓱᑎᒃ. ᐃᓕᑦᓯᓂᒃ ᐃᑲᔪᕈᓐᓇᖁᒍᑦ ᑲᒪᒋᔭᖃᕐᓂᒥᒃ ᒫᓐᓇ ᒥᑭᓂᕐᐹᒥᒃ ᑭᖑᓂᖃᕐᑎᓗᒎᑦᓴᓚᐅᕐᐸᑦ. ᖃᐅᔨᒪᒐᑦᑕ ᓄᓇᕕᒻᒥᐅᑦ ᐊᓂᕐᕋᓯᒪᒋᐊᖏᑦ ᐊᒻᒪᓗ ᐱᑐᑦᓯᒪᑦᓱᑎᒃ ᖃᕆᑕᐅᔭᒃᑯᑦ ᐃᓅᖃᑎᒌᓐᓂᑯᑦ ᑐᓴᐅᒪᖃᑦᑕᐅᑎᒍᑎᑎᒍᑦ, ᑐᑭᑖᕐᓯᒪᕗᒍᑦ ᐊᑐᕆᐊᒥᒃ ᐃᓚᖃᕐᓂᑎᓐᓂᒃ ᐱᖃᑎᑖᕐᖃᒥᑦᑎᓂᒃ, ᐃᓄᑦᓯᐊᒥᒃ. ᑲᑎᕐᓱᐃᓯᒪᕗᒍᑦ ᐅᖃᐅᓯᑦᓴᓂᒃ ᑐᕌᒐᓕᓐᓂᒃ ᑐᓴᐅᒪᑎᑦᓯᓂᕐᒥᒃ ᓇᓪᓕᒍᓱᓐᓂᒥᒃ ᐊᒻᒪᓗ ᐱᐅᔪᒥᒃ ᐅᑉᐱᓂᖃᕐᓂᒥᒃ ᐱᕈᕐᐸᓕᐊᑎᑦᓯᔪᓂᒃ ᐊᑦᓱᕈᕐᓇᑐᓂ ᐱᓇᓱᐊᕈᓯᕐᓂ ᙯᔪᓂ.

“ᐃᓄᑐᐃᓐᓀᑦ ᓯᕗᓪᓕᕕᓂᖏᑦ ᐊᕐᖁᓯᐅᕐᓯᒪᔪᑦ ᒪᑭᒋᐊᑦᓯᐊᕈᓐᓇᓂᒃᑯᑦ; ᐋᕐᖀᖃᑦᑕᓱᑎᒃ ᐃᓱᒪᒥᓂᒃ ᑕᕐᓂᒥᓂᓪᓗ ᓈᒻᒪᓈᕐᑐᒧᑦ ᐊᓂᒎᑎᓚᖓᑦᓱᑎᒃ ᖁᓚᕐᓇᑐᓂᒃ ᐅᓪᓗᓂᒃ, ᐱᓇᓱᐊᕈᓯᕐᓂᒃ ᐊᒻᒪᓗ ᐃᓚᖓᓂ ᑕᕐᕿᓂᒃ. ᐃᓕᑦᓯᓯᒪᓯᒪᔪᑦ ᓇᒻᒥᓂᖅ ᑐᖕᖓᕕᖃᕆᐊᒥᒃ ᐃᓪᓕᕆᔭᒥᓂᒃ ᐊᒻᒪᓗ ᐱᐅᓯᑐᖃᕐᒥᓂᒃ ᐊᓐᓇᒍᑎᒋᑦᓱᒋᑦ ᐱᔭᕆᐊᑐᓂᕐᐹᓂᑦ, ᐊᒻᒪᓗ ᐱᒻᒪᕆᐅᓘᕗᖅ ᐱᑐᑦᓯᒪᒋᐊᒥᒃ ᑌᒃᑯᓄᖓ ᓲᖑᔫᒍᑎᒋᓗᒋᑦ ᐊᒻᒪᓗ ᐊᑑᑎᒍᓐᓇᓯᓗᑕ ᐊᑦᓱᕈᕐᓇᑐᓂᒃ”, ᐅᖃᕐᑐᖅ ᐹᓪ ᕌᐳᑦᓴᓐ, ᐃᓱᐊᕐᓯᕕᒻᒥ ᐱᓇᓱᐊᕐᓃᑦ ᑲᒪᔨᒻᒪᕆᖓ.

ᐅᖃᐅᓯᑦᓴᓕᒫᑦ ᐊᓪᓚᓯᒪᔪᑦ ᐊᓪᓚᑕᐅᖃᑦᑕᑐᑦ ᓴᐳᑦᔭᐅᓚᕆᑦᓱᑎᒃ ᒪᒥᓴᕐᓂᒥ ᐱᓇᓱᑦᑎᓕᒫᑦᑎᓄᑦ ᐅᑯᓄᖓ ᐹᓪ ᕌᐳᑦᓴᓐ, ᐃᐊᓚᓯ ᓯᒥᒐᖅ, ᒪᕇᐊ ᕌᐳᑦᓴᓐ, ᓵᓐ ᒧᕃᓐ, ᐊᒻᒪᓗ ᕇᐱᑲ ᖃᓴᓪᓗᐊᖅ.

ᐅᖃᐅᓯᑦᓴᓂᒃ ᐊᓪᓚᓯᒪᔪᓕᒫᓂᒃ ᑕᑯᒍᒪᒍᕕᑦ >>>

ᕕᕈᐊᕆ 4-ᒥ, ᑐᑭᒧᐊᑦᑎᓯᔨᒻᒪᕆᕗᑦ, ᐊᓖᓯᐊ ᐊᔭᒍᑕᖅ ᐃᓕᑕᕆᔭᐅᒍᑎᑖᓚᐅᔪᖅ Indspire ᐃᓕᑕᕆᔭᐅᒍᑎᖓᓂᒃ – ᐃᓄᑐᐃᓐᓇᓄᑦ ᐅᕕᒃᑲᓅᓕᖓᔪᒥᒃ (2020) ᐱᓇᓱᐊᕐᓯᑎᐅᓂᕐᒥᓄᑦ, ᐃᓅᓯᕐᒥ ᐊᑑᑎᓯᒪᔭᒥᓄᑦ ᐊᒻᒪᓗ ᓄᓇᓕᒻᒥ ᐃᓚᐅᓂᕐᒥᓄᑦ. ᑖᑦᓱᒥᖓ ᓵᓚᖃᕐᓂᒥᓄᑦ ᐃᓕᑕᕆᔭᐅᒍᑎᒥᒃ, ᓯᕗᓪᓕᐹᕈᓚᐅᔪᖅ ᐃᓄᑐᐃᓐᓇᐅᓱᓂ ᓄᓇᕕᒻᒥᐅᖑᑦᓱᓂ ᓵᓚᖃᕐᓂᒥᒃ ᐃᓄᓐᓄᑦ ᐅᕕᒃᑲᓅᓕᖓᔪᒥᒃ.

ᐅᒥᐅᔭᕐᒥᐅᓴᔭᖅ ᐊᒻᒪᓗ ᒫᓐᓇ ᑰᑦᔪᐊᒥᐅᖑᓕᕐᓱᓂ, ᐊᓖᓯᐊ ᐱᓇᓱᐊᕐᓯᒪᔪᖅ ᐅᑭᐅᑭᑦᑑᓕᕐᓂᕋᒥᓂᑦ ᐱᐅᓂᕐᓴᒥᒃ ᓯᕗᓂᑦᓴᒥᒃ ᐱᓇᓱᐊᕈᑎᖃᕐᓱᓂ ᐃᓄᑐᐃᓐᓇᐅᖃᑎᒥᓂᒃ ᐱᒍᑦᔨᓱᓂ. ᑐᓂᒪᑦᓯᐊᓱᓂ ᓴᐳᑦᔨᔪᖅ ᐃᓄᐃᑦ ᑭᓇᐅᓂᖏᓐᓂᒃ ᐊᒻᒪᓗ ᐱᐅᓯᑐᖃᖏᓐᓂᒃ. ᐱᕕᑦᓴᑖᑦᓴᑐᐊᕋᒥ ᓴᐳᑦᔨᓂᕐᒥᓂᒃ ᓄᐃᑕᑎᑦᓯᓲᖅ ᐊᒻᒪᓗ ᐅᖄᒍᑦᔨᓱᓂ ᐃᓄᑐᐃᓐᓇᐅᖃᑎᒥᓂᒃ ᓲᓱᑦᓴᑐᒻᒪᕆᐅᑦᓱᓂ ᐃᓄᑐᖃᕐᓂᒃ ᐊᒻᒪᓗ ᑐᑭᓯᐊᑦᓯᐊᖏᓐᓇᓱᓂ ᐅᕕᒃᑲᐅᓂᕐᓭᑦ ᐃᓱᒫᓗᒋᔭᖏᓐᓂᒃ.

ᐃᓱᐊᕐᓯᕕᒃ ᓯᕗᓕᕐᑎᖃᕈᓐᓇᓗᑯᒃᑯᒃ ᐃᑦᔭᕋᑦᓴᓯᐊᒥᒃ ᑕᓯᐅᕐᓯᔪᒥᒃ ᐊᐅᓚᑦᓯᔩᑦ ᓱᖏᐅᑎᕙᓪᓕᐊᓂᖏᓐᓂᒃ, ᐱᓇᓱᐊᖃᑎᖃᑦᓯᐊᓂᖏᓐᓂᒃ ᑲᑎᖕᖓᔨᓂᒃ ᐊᒻᒪᓗ ᑲᔪᖏᕐᓭᓂᒃᑯᑦ ᐊᒻᒪᓗ ᐱᒍᓐᓇᓯᑎᑦᓯᓂᒃᑯᑦ ᐱᓇᓱᑦᑎᓂᒃ.

ᐅᐱᒍᓲᑦᔨᕗᒍᑦ ᐊᓖᓯᐊ!

2018–2019-ᒥ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᖓᓂ ᐃᓱᐊᕐᓯᕕᐅᑉ ᓄᓇᕕᒻᒥ ᒪᒥᓴᕐᕕᐅᑉ ᐃᓚᐳᔪᖁᑎᖏᑦ, ᑲᑎᖕᖓᔨᖏᑦ ᓇᐅᓕᒪᓄᑦ ᑐᓵᔭᐅᓗᑎᒃ ᓇᑯᕐᒦᕈᒪᓚᐅᔪᑦ ᐃᑲᔪᕐᓯᓯᒪᒻᒪᕆᓐᓂᖏᓐᓂᒃ ᑕᓪᓕᒪᑦ ᑰᑦᔪᐊᒥᐅᑦ ᐃᑲᔪᕐᓯᓚᕆᑦᓯᒪᔪᑦ ᐱᓇᓱᕝᕕᐅᔫᑉ ᐱᕈᕐᐸᓕᐊᓂᖓᓄᑦ ᐊᕐᕌᒍᓂ ᖁᓕᓂ ᖄᖏᕐᑐᓂ.

ᐃᓱᐊᕐᓯᕕᐅᑉ ᐊᖓᔪᕐᖄᖓ, ᑏᕕ ᕗᐊᕋᒡ, ᐃᓚᖃᕐᓱᓂ ᐊᖓᔪᕐᖄᑉ ᑐᖓᓕᖓᓂᒃ, ᒥᐊᔨ ᐁᑦᓯᓴᓐᒥᒃ, ᐊᒻᒪᓗ ᑲᑎᖕᖓᔩᓐᓂᒃ, ᒫᑕ ᑯᔩᒃ ᐊᒻᒪᓗ ᓲᓕ ᐅᐁᑦ ᑐᐳᐃ, ᐅᖄᓚᐅᔪᑦ ᓇᑯᕐᒦᓱᑎᒃ ᐃᑲᔪᕐᓯᓯᒪᓂᖏᓐᓂᒃ ᐊᒻᒪᓗ ᓴᐳᑦᔨᓱᑎᒃ ᐃᓘᓐᓇᖏᓐᓂᒃ ᓴᐳᑦᔨᔪᓂᒃ ᐃᓱᐊᕐᓯᕕᐅᑉ ᐱᓇᓱᐊᕐᑕᖏᓐᓂᒃ ᐊᑦᔨᒌᖕᖏᑐᓂᒃ ᐊᒻᒪᓗ ᐃᖏᕐᕋᑎᑦᓯᓂᖏᓐᓂᒃ.

ᑌᒣᒻᒪᑦ ᐅᐱᒍᓱᑦᓱᑎᒃ ᓴᒫᓐᑕ ᑌᕕᑦ, ᓵᒥ ᑕᖕᑲᓐ, ᐋᓕᒃ ᑯᐊᑕ, ᓵᒥ ᖁᖏᐊᖅ, ᐊᒻᒪᓗ ᑐᓄ ᓇᐹᕐᑐᖅ ᐅᐱᒋᔭᐅᒍᑎᓂᒃ ᐱᔪᕕᓃᑦ. ᐊᑎᕐᑕᓖᑦ ᐊᑦᔨᖑᐊᖃᐅᑏᑦ ᓯᓚᑎᖓᓂᒃ ᓄᑖᑉ ᐃᓱᐊᕐᓯᕕᑦᓴᐅᑉ ᐊᑦᔨᖑᐊᕐᑕᓕᓐᓂᒃ ᐱᑖᓚᐅᔪᑦ ᐅᐱᒋᔭᐅᒍᑎᓂᒃ.

ᐅᐱᒍᓱᒻᒪᕆᑦᓱᓂ ᐊᒻᒪᓗ ᑲᑦᓱᙰᑦᑐᒪᕆᐅᑦᓱᓂ ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᒃ ᑐᓂᔭᐅᓯᒪᕗᖅ ᐃᓕᑕᕆᔭᐅᒍᑎᓪᓚᕆᒻᒥᒃ ᑯᐯᒃᒥ ᑐᕐᖃᑕᕐᕕᒧᑦ ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ. ᐃᓱᐊᕐᓯᕕᒃ ᐊᓪᓚᓯᒪᔪᓃᖃᑕᐅᓕᕐᑐᖅ ᐃᓚᐅᑦᓱᓂ 40-ᓄᑦ ᐱᓇᓱᕝᕕᐅᔪᓄᑦ ᐃᓕᑕᕆᔭᐅᔪᓄᑦ ᑯᐯᒃ ᑎᒍᔭᐅᒪᕕᓕᕆᔨᖏᓐᓄᑦ ᐊᑐᐃᓐᓇᖃᕐᑑᓱᑎᒃ ᐅᐃᕆᒪᔪᓄᑦ ᐱᒍᑦᔨᓂᕐᓂᒃ ᐊᒻᒪᓗ ᒪᒥᓴᕐᓂᓂᒃ.

ᑖᓐᓇ ᐊᑯᓂ ᐅᑕᕐᕿᔭᐅᔪᖅ ᐱᔪᓐᓇᓂᕃᒍᑎ ᐊᑕᐅᓯᒋᐊᓪᓚᒃ ᐊᓪᓗᕆᐊᕐᓂᐅᓱᓂ ᐃᓂᓪᓓᓂᕐᒧᑦ ᐃᓱᐊᕐᓯᕕᒻᒥᒃ ᐃᓕᑕᕆᔭᐅᔫᓗᓂ ᐊᒻᒪᓗ ᐊᑦᔨᐅᖏᑦᑑᓱᓂ ᒪᒥᓴᕐᕕᐅᓱᓂ ᓄᓇᕕᒻᒥ. ᒫᓐᓇᒥᑦ, ᑎᒍᔭᐅᒪᔪᕕᓂᕐᓂᒃ ᑲᒪᔩᑦ ᐊᒻᒪᓗ ᑎᒍᔭᐅᒪᕖᑦ ᑯᐯᒃᓕᒫᒥ ᐃᓱᐊᕐᓯᕕᒻᒨᑎᑦᓯᒐᓱᐊᕈᓐᓇᓕᕐᑐᑦ.

ᓯᑉᑎᒻᐱᕆ 23-ᒥ ᐊᒻᒪᓗ 24-ᒥ, 2019-ᒥ, ᐊᕐᕌᒍᑕᒫᕐᓯᐅᑎ ᑲᑎᖕᖓᓂᒻᒪᕆᖓ ᐃᓚᐅᔪᑦ ᐃᓱᐊᕐᓯᕕᒻᒧᑦ ᓄᓇᕕᒻᒥ ᒪᒥᓴᕐᕕᒧᑦ ᐊᑑᑎᓚᐅᔪᖅ ᑰᑦᔪᐊᒥ ᑐᖕᖓᕕᖃᕐᓱᓂ “ᐱᒋᐅᕐᓴᕆᑦ ᓇᒻᒥᓂᖅ ᑲᒪᒋᑦᓯᐊᓂᕐᒥᒃ.” ᐃᓚᐅᔪᓕᒫᑦ ᐱᓇᓱᕝᕕᐅᔪᒧᑦ ᑭᒡᒐᑐᕐᑎᖃᓚᐅᔪᑦ ᖃᕐᔪᐃᑦ ᐅᕕᒃᑫᑦ ᑲᑎᖕᖓᔨᖏᑦ ᖏᑦᑐᑑᑎᓪᓗᒋᑦ, ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᓂᒻᒪᕆᖃᓚᐅᔪᒻᒥᒐᒥᒃ ᖁᐊᕐᑕᒥ.  ᑲᑎᖕᖓᓂᖅ ᓂᐱᓕᐅᕐᑕᐅᓚᐅᔪᖅ ᐊᒻᒪᓗ ᑐᓴᕐᓴᐅᑎᑕᐅᑦᓱᓂ ᑌᑲᓂᑦᓭᓇᖅ ᐅᓪᓗᒥ ᑕᕐᕋᒥᐅᒃᑯᓄᑦ, ᓄᓇᕕᒻᒥ ᓈᓚᐅᑎᖁᑎᓖᑦ.

ᐃᓚᐅᑎᓪᓗᒋᑦ ᐃᓱᐊᕐᓯᕕᐅᑉ ᐊᐅᓚᑦᓯᔨᖏᑦ, ᑲᑎᖕᖓᔨᖏᑦ ᓇᑯᕐᓴᓚᐅᔪᑦ ᑐᖕᖓᓱᑦᑎᓯᒋᐊᒥᒃ ᑲᒪᔨᒻᒪᕆᖓᓂᒃ ᐅᖓᕙᒥ ᑐᓚᑦᑕᕕᐅᑉ ᐋᓐᓂᐊᕕᖓᑕ, ᓛᕆ ᒍᐊᑦᒥᒃ, ᑐᑭᒧᐊᑦᑎᓯᔨᖓᓂᒃ ᐱᒍᑦᔨᒋᐊᓪᓛᕕᒃ ᐊᒻᒪᓗ ᓴᑐᕐᓇᑐᓕᓐᓂᒃ ᐃᓕᓐᓂᐊᕕᖃᕐᓂᒧᑦ ᐱᒍᑦᔨᒍᑏᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ, ᑐᓄ ᓇᐹᕐᑐᒥᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑲᑎᖕᖓᔨᖏᑦᑕ ᐊᖓᔪᕐᖄᖓᓂᒃ, ᔨᐊᓂᕗ ᒪᓂᕐᒥᒃ, ᒪᑭᕝᕕᐅᑉ ᐊᖓᔪᕐᖄᖓᑕ ᑐᖓᓕᖓᓂᒃ, ᐋᑕᒥ ᑎᓕᓪ-ᐊᓚᑯᒥᒃ, ᑐᑭᒧᐊᑦᑎᓯᔨᖓᓂᒃ, ᖃᐅᔨᓴᕐᓂᒧᑦ, ᐊᓪᓚᖁᑎᑐᖃᓕᕆᓂᕐᒧᑦ, ᐊᒻᒪᓗ ᐊᓪᓚᓯᒪᔪᓕᐅᕐᓂᒧᑦ ᐊᕙᑕᒃᑯᓂ, ᓯᓪᕕ ᑰᑌ ᑦᓲᒥᒃ, ᑲᒪᔨᒻᒪᕆᖓᓂᒃ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᖕᖓᔩᑦ, ᒥᓂ ᑯᔩᒥᒃ, ᑰᑦᔪᐊᑉ ᓯᕗᓕᕐᑎᖓᓂᒃ ᓵᒥ ᖁᖏᐊᕐᒥᒃ, ᐊᒻᒪᓗ ᑐᑭᒧᐊᑦᑎᓯᔨᐅᑉ ᐃᑲᔪᕐᑎᖓᓂᒃ ᐃᓄᓕᕆᓂᕐᒧᑦ ᐃᓅᓕᑦᓯᕕᐅᑉ ᐋᓐᓂᐊᕕᖓᓂ, Lisa Sanschagrin-ᒥᒃ.

ᐊᕐᕌᒍᑕᒫᕐᓯᐅᑎᐅᑉ ᑲᑎᖕᖓᓂᒻᒪᕆᐅᑉ ᑐᖕᖓᕕᖓ ᐱᒻᒪᕆᐅᓚᐅᔪᖅ ᑲᑎᖕᖓᔨᓄᑦ, ᖃᐅᔨᒪᔪᓄᑦ ᐱᓇᓱᐊᕋᑦᓴᖃᒻᒪᕆᒋᐊᖏᑦ ᐃᓱᐊᕐᓯᕕᐅᑉ ᐱᓇᓱᑦᑎᓕᒫᖏᑦ. ᓇᓗᓀᒃᑯᓯᕐᑕᐅᒪᔪᖅ ᐱᕈᕐᐸᓕᐊᓂᖓ ᐱᓇᓱᕝᕕᐅᔫᑉ ᐃᓱᒫᓗᓐᓇᕆᐊᓪᓚᖃᑦᑕᑐᖅ ᐱᓇᓱᑦᑎᓄᑦ ᐊᒻᒪᓗ ᐱᕕᑦᓴᒥᒃ ᐊᑐᕈᒪᓚᐅᔪᑦᓱᑎᒃ ᑖᑦᓱᒥᖓ ᑲᑎᓂᕐᒥᒃ ᐅᖄᖃᑎᒌᖃᑎᖃᕐᓗᑎᒃ ᐃᓚᐅᔪᖁᑎᒥᓂᒃ. ᐃᓱᐊᕐᓯᕕᐅᑉ ᑲᑎᖕᖓᔨᖏᑦᑕ ᐊᖓᔪᕐᖄᖓᑕ ᑐᖓᓕᖓ, ᒥᐊᔨ ᐁᑦᓯᓴᓐ, ᐊᒻᒪᓗ ᑲᑎᖕᖓᔨ, ᒫᑕ ᑯᔩᒃ, ᑐᑭᓯᓇᕐᑎᓯᓚᐅᔫᒃ ᐃᓚᐅᔪᓕᒫᓄᑦ ᑌᑲᓃᑦᑐᓄᑦ ᑐᖕᖓᕕᐅᔪᒥᒃ ᐊᒻᒪᓗ ᐱᐅᔪᑦ ᐃᓱᒪᒋᔭᐅᔪᑦ ᐅᖃᕐᑕᐅᖃᑦᑕᓚᐅᔪᑦ ᓈᓚᑦᓯᐊᓂᕐᓴᐅᖃᑦᑕᖁᔭᐅᑦᓱᑕ ᐃᑉᐱᒋᔭᑦᑎᓂᒃ ᐊᒻᒪᓗ ᕿᑲᑫᓐᓇᖃᑦᑕᓗᑕ ᖃᓄᐃᖕᖏᓯᐊᕐᓂᒧᑦ. ᑲᑎᖕᖓᔩᑦ ᐱᔭᕇᕈᑎᖃᓚᐅᔪᑦ ᑕᒪᑦᓱᒥᖓ ᐅᖃᐅᓯᖃᕐᓱᑎᒃ ᐃᓘᓐᓇᖏᓐᓄᑦ ᑲᑦᓱᙰᓕᓭᒍᑎᓂᒃ, ᐊᓪᓚᓯᒪᔪᓂᒃ ᐊᓪᓚᑖᕐᕕᑯᑦ ᐊᐅᓪᓚᑎᑕᐅᓲᒥ ᓯᑯᑦᓴᔭᒥ, ᐃᓚᖃᕐᓱᓂ ᖃᓂᕐᒧᑦ ᐸᓂᕇᒃᑯᑎᒥᒃ ᐊᒻᒪᓗ ᐊᒡᒐᒧᑦ ᓴᓇᔭᕕᓂᕐᒥᒃ ᐃᓘᓐᓇᓂᐅᕈᑎᒥᒃ ᕿᓱᐸᐅᑎᒥᒃ.

2018–2019-ᒥ ᐊᕐᕌᒍᑕᒫᕐᓯᐅᑎᒥ ᑲᑎᖕᖓᓂᒻᒪᕆᒻᒥ, ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᐅᑉ ᐃᓚᐅᔪᖁᑎᖏᑦ ᐅᖃᓚᐅᔪᑦ ᑎᒃᑯᐊᑕᐅᔪᕕᓂᕐᓂᒃ ᐱᖓᓱᓂᒃ ᑲᑎᖕᖓᔨᓂᒃ ᐱᒍᑦᔨᓚᖓᑦᓱᑎᒃ ᓄᓇᓕᒻᒥᒃ. ᓇᐅᓕᒫᓂᒃ ᐱᒍᒪᔪᓂᒃ ᑲᑎᖕᖓᔨᕈᕋᓱᐊᖁᔨᓂᐅᑉ 14-ᓂ ᓄᓇᕕᒻᒥ ᓄᓇᓕᓐᓂ ᑭᖑᓂᖓᒍᑦ, ᐊᒥᓱᑦ ᐅᓇᒻᒥᓱᑦᑐᑦ ᖃᐅᔨᔭᐅᓚᐅᔪᑦ ᑲᑎᖕᖓᔨᓄᑦ.  ᑲᑎᖕᖓᔩᑦ ᓈᒻᒪᓴᓚᐅᔪᑦ ᐱᐅᔫᓂᖏᓐᓂᒃ ᐱᒐᓱᐊᕈᑏᑦ ᐊᒻᒪᓗ ᓄᓇᕕᐅᑉ ᐃᓄᖏᑦᑕ ᐅᓇᒻᒥᓱᓐᓂᖏᓐᓂᒃ ᐱᓇᓱᐊᕐᑕᑎᓐᓂᒃ.

ᐊᐱᕐᓱᓃᑦ ᑌᒣᒻᒪᑦ ᐊᑑᑎᔭᐅᓚᐅᔪᑦ ᓯᑉᑎᒻᐱᕆ 16-ᒥ ᐊᒻᒪᓗ ᐊᐅᓚᑦᓯᓂᓕᕆᓂᕐᒥ ᐊᑐᕐᑕᐅᒋᐊᓖᑦ ᑭᖑᓂᖓᒍᑦ, ᐱᖓᓱᑦ ᓄᑖᑦ ᑲᑎᖕᖓᔩᑦ ᐅᖃᕐᑕᐅᓚᐅᔪᑦ. ᓵᓐ ᒥᒃᑖᓄᓪ (ᑰᑦᔪᐊᖅ), ᓗᐃᓴ ᑯᐊᓐᓇᓈᖅ (ᐳᕕᕐᓂᑐᖅ) ᐊᒻᒪᓗ ᒪᓂ ᒫᓕ ᓯᓅᐹ (ᑲᖏᕐᓱᐊᓗᑦᔪᐊᖅ) ᒫᓐᓇ ᑲᑎᖕᖓᔨᐅᖃᑎᖃᓕᕐᑐᑦ ᐱᖓᓲᔪᕐᑐᓂᒃ ᑲᑎᖕᖓᔨᐅᒌᕐᑐᓂᒃ.

Newfoundland-ᒥᐅᑦᓴᔭᐅᑦᓱᓂ ᑰᑦᔪᐊᒥᐅᑐᖃᖅ ᐱᐊᕋᐅᓕᕐᓂᕋᒥᓂᑦ, ᒪᒃᑖᓄᓪ ᑲᒪᔨᒻᒪᕆᐅᓯᒪᓕᕐᑐᖅ ᑰᑦᔪᐊᒥ ᓯᓚᓐᓂᐊᕕᒻᒥ 23 ᐊᕐᕌᒍᐃᑦ ᐅᖓᑖᓄᑦ. ᐊᑦᔨᒌᖕᖏᑐᓂᒃ ᐱᓇᓱᒐᖃᕐᓯᒪᒻᒥᔪᖅ ᓄᓇᒃᑰᔫᓕᐅᕐᑎᐅᓱᓂ, ᐃᓕᓐᓂᐊᑎᑦᓯᔨᐅᑦᓱᓂ, ᐃᖃᓗᓐᓂᐊᑎᐅᑦᓱᓂ ᐊᒻᒪᓗ ᑲᒪᔨᒻᒪᕆᐅᑦᓱᓂ. ᑲᑦᓱᙰᑦᑑᑎᑕᖅ ᐃᓱᐊᕐᓯᕕᐅᑉ ᐱᓇᓱᐊᕐᑕᖓᓄᑦ ᐱᑦᔪᑎᒋᑦᓱᒍ “ᐊᒥᓱᓪᓗᑐᐊᓗᓐᓂᒃ ᓯᖁᑦᑎᓯᒪᔪᖃᓚᐅᕐᓯᒪᖕᖏᒪᑦ ᐃᓚᒌᓂᒃ ᖁᐊᕐᓵᓇᕐᑐᑰᕐᓯᒪᓂᕐᒥᓄᑦ ᐊᒻᒪᓗ ᐋᖓᔮᓐᓇᑐᕐᑐᓗᐊᖃᑦᑕᓂᕐᒧᑦ ᓄᓇᕕᒻᒥ ᐱᐊᕃᑦ ᐃᒻᒥᓂᐊᖃᑦᑕᓕᕋᑕᕐᑎᓗᒋᑦ ᐅᕝᕙᓘᓐᓃᑦ ᐃᓄᓕᕆᔨᒃᑯᓄᑦ ᓅᑕᐅᖃᑦᑕᓕᕋᑕᕐᑎᓗᒋᑦ. ᑕᒪᓐᓇ ᓄᕐᖃᓚᖓᖕᖏᑐᖅ ᒪᒥᖕᖏᓂᑦᑎᓂ,” ᐅᖃᕐᑐᕕᓂᖅ.

ᑯᐊᓐᓇᓈᖅ ᐃᓱᐊᕐᓯᕕᒻᒥ ᐃᓄᑑᓈᕐᑎᑐᑦ ᒪᒥᓴᕐᓂᖓᓂ ᐱᔭᕇᕐᑐᕕᓂᖅ 2011-ᒥ. ᐃᕐᖃᑐᐃᔨᐊᐱᓐᓂᒃ ᑐᑭᒧᐊᑦᑎᓯᔨᐅᑦᓱᓂ ᐳᕕᕐᓂᑐᒥ, ᖃᓄᐃᖕᖏᓯᐊᕐᓇᓂᕐᓴᒥᒃ ᐃᓅᓯᖃᕐᓯᒪᓕᕐᑐᖅ ᐃᓱᐊᕐᓯᕕᒻᒦᓚᐅᕐᓯᒪᒐᒥᓂᑦ. ᐊᑦᑐᑕᐅᓐᓇᑐᖅ ᐅᓐᓂᓯᐅᕈᑎᖓ ᐃᓱᐊᕐᓯᕕᐅᑉ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᒻᒪᕆᖓᓂ 2017–2018-ᒥ ᐱᒍᒪᓕᕐᑎᓯᓯᒪᔪᖅ ᐊᒥᓱᓂᒃ. ᐃᑦᔭᕋᑦᓴᓯᐊᒻᒪᕆᒃ ᐊᔪᐃᓐᓇᓂᕐᒧᑦ ᓄᓇᕕᒻᒧᑦ ᐊᒻᒪᓗ ᐱᓗᐊᕐᑐᒥᒃ ᐱᐊᕋᕐᒥᓄᑦ.  ᑲᑎᖕᖓᔨᐅᓂᕐᒥᒍᑦ ᐃᓱᐊᕐᓯᕕᒻᒥ, ᐅᑎᕐᑎᓯᒍᒪᔪᖅ ᐱᓯᒪᔭᒥᓂᒃ ᑭᖕᖒᒪᑦᓯᔪᓄᑦ ᓄᐃᑕᑎᑦᓯᒐᒥ ᐊᔪᐃᓐᓇᓂᕐᒥᒃ, ᓴᐱᕐᑌᑑᓂᕐᒥᒃ ᐊᒻᒪᓗ ᐅᑉᐱᓂᖃᕐᓂᒥᒃ ᖁᐊᕐᓵᓇᕐᑐᑰᕐᓯᒪᒐᓗᐊᕋᒥ ᐊᑦᓱᕈᕐᓇᑐᒃᑯᓗ.

ᓯᓅᐹ ᐅᐱᒍᓱᑦᓱᓂ ᑭᒡᒐᑐᕐᑐᖅ ᐃᓄᑐᐃᓐᓇᓂᒃ ᓄᑲᕐᓯᓂᒃ ᑭᖑᕚᓂᒃ ᐃᓱᐊᕐᓯᕕᐅᑉ ᑲᑎᖕᖓᔨᖏᓐᓂ. ᑐᑭᒧᐊᑦᑎᓯᔨ ᖃᕐᒫᐱᒻᒥ ᓄᓇᓕᒻᒥᓂ. ᐳᕐᑐᓂᕐᓴᒥ ᐃᓕᓐᓂᐊᕇᕐᓯᒪᔪᖅ ᐅᓪᓗᕆᐊᖅ ᐃᓕᓐᓂᐊᕕᒻᒥ ᑲᖏᕐᓱᐊᓗᑦᔪᐊᒥ, ᓴᐳᑦᔨᓚᕆᑦᑐᖅ ᐱᓇᓱᐊᕐᑕᐅᓂᖏᓐᓂᒃ ᐊᑦᔨᒌᖕᖏᑐᑦ ᐅᑭᐅᕐᑕᑐᒥ ᐱᓀᓗᑌᑦ ᐊᒻᒪᓗ ᐱᒍᑦᔨᓯᒪᑦᓱᓂ ᓄᓇᕕᒻᒥᒃ ᐊᒥᓱᓂ ᑲᑎᖕᖓᓂᕐᓂ ᐊᒻᒪᓗ ᐱᓂᐊᕐᓂᓂ. Students on Ice-ᒧᑦ ᐃᓚᐅᓯᒪᑦᓱᓂ, United Nations Rio +20 ᑲᑎᖕᖓᓂᕐᒧᑦ ᐃᓚᐅᓯᒪᔪᖅ ᐱᑦᓴᖑᕆᐊᓪᓚᕈᓐᓇᑐᓂᒃ ᐱᕙᓪᓕᐊᑎᑦᓯᓂᖅ ᐱᑦᔪᑎᒋᑦᓱᒍ 2012-ᒥ ᐊᒻᒪᓗ ᑲᑎᓯᓯᒪᑦᓱᓂ ᑌᑦᓱᒪᓂ ᑯᐯᒃ ᐊᖓᔪᕐᖄᕆᓚᐅᕐᓯᒪᔭᖓᓂᒃ ᐅᖄᖃᑎᒋᑦᓱᒍ ᐃᓱᒪᒋᔭᒥᓂᒃ ᐅᑭᐅᕐᑕᑑᑉ ᐸᕐᓇᑕᐅᓂᖓᑕ ᒥᑦᓵᓄᑦ. ᐅᐱᒍᓱᑦᑐᖅ ᑲᑎᖕᖓᔨᕈᕆᐊᒥᒃ ᐃᓱᐊᕐᓯᕕᒻᒥ ᐅᑉᐱᕋᒥ ᓈᒻᒪᓯᓐᓇᕆᐊᖓ ᐊᒻᒪᓗ ᐱᔪᓐᓇᓂᕐᑖᓇᕆᐊᖓ ᐃᓚᐅᒋᐊᒥᒃ ᐊᑦᔨᒌᖕᖏᑐᓂ ᐱᓇᓱᐊᕐᓂᓂ ᑌᒫᑦᓭᓇᖅ ᐊᓯᒥᓂᒃ ᐃᑲᔪᕐᓂᑎᑐᑦ ᑭᖕᖒᒪᑦᓯᔪᓂᒃ. ᐃᓚᐅᓂᕐᒥᒍᑦ ᓄᓇᓕᒻᒥᓂ ᓄᓇᕕᒻᒥᓗ, ᑕᑯᑎᑦᓯᒍᒪᒻᒥᔪᖅ ᐃᑦᔭᕋᑦᓴᓯᐊᖑᓗᓂ ᐱᐊᕋᕐᒥᓄᑦ ᑲᑐᑦᔨᓗᑕ ᐃᑲᔪᕐᓯᒍᓐᓇᕋᑦᑕ.