ᑕᑯᒋᐊᒃᑲᓂᕐᓱᒍ ᑕᒡᒐᓂ ᐊᕐᕌᒍᒥ ᐱᖕᖑᐹ ᐊᑑᑎᓂᕆᓚᐅᕐᑕᖓ
ᑕᒡᒐᓂ ᐊᕐᕌᒍᒥ ᐱᖕᖑᐹ ᐊᑑᑎᓂᕆᓚᐅᕐᑕᖓ ᓴᕐᕿᑎᑦᓯᓚᐅᕐᑐᖅ ᓄᓇᕐᖃᑎᒌᓐᓂᐅᑉ ᑐᑭᓪᓚᕆᖓᓂᒃ. ᑲᑦᓱᙰᑦᑑᓂᖃᒻᒪᕆᓚᐅᕐᑐᑦ Facebook-ᑯᑦ ᑲᓱᕐᑎᓯᕕᖓᓂ, ᐃᓚᐅᖃᑕᐅᔪᑦ ᐊᒥᕐᖄᖃᑎᒌᖃᑦᑕᓚᐅᕐᑐᑦ ᐊᒻᒪᓗ ᐃᑲᔪᕐᓯᖃᑎᒌᑉᐸᓱᑎᒃ ᑕᕐᕿᓕᒫᒥ. ᕿᓄᒍᑎᓕᒫᑦ ᑭᐅᔭᐅᑦᓯᐊᖃᑦᑕᓱᑎᒃ ᐃᓚᐅᖃᑕᐅᔪᐃᑦ ᐃᑲᔪᕐᑐᓂᖏᓐᓄᑦ, ᐃᓘᓐᓇᖏᑦ ᑐᕌᕈᒪᓂᓖᓐᓇᐅᓱᑎᒃ ᐃᓅᓯᑦᓯᐊᖃᕈᒪᓂᕐᒥᒃ, ᓄᐊᑦᓯᓂᕐᒧᑦ ᐃᓱᐊᕐᓯᕕᐅᑉ ᑎᑭᐅᑎᒍᒪᔭᖓᓂᒃ ᐊᒻᒪᓗ ᖃᐅᔨᓵᕆᒍᑎᖓᓂᒃ ᐅᐃᕆᒪᓂᕐᒧᑦ ᐊᑐᕐᓂᓗᓐᓂᒥᒃ ᓄᓇᕕᒻᒥ.
ᑕᒡᒐᓂ ᐊᕐᕌᒍᒥ ᑐᕌᒐᖃᓚᐅᔪᖅ ᓄᐊᑦᓯᒍᒪᓂᕐᒥᒃ 50 000$-ᓂᒃ ᐃᑲᔪᕐᓯᐅᑎᐅᓂᐊᕐᑐᓂᒃ ᐃᓱᐊᕐᓯᕕᐅᑉ ᐱᑦᔪᔨᒍᑎᖓᑕ ᐊᑐᐃᓐᓇᐅᑎᑕᐅᓂᕐᓴᐅᒍᑎᑦᓴᖓᓂᒃ ᓄᓇᕕᒻᒥ ᓄᓇᓕᓐᓂ 14-ᓂ ᐊᒻᒪᑕᐅᖅ ᐃᓱᐊᕐᓯᕕᑦᓴᖅ ᓄᑖᑉ ᐃᓕᕐᖁᓯᕐᓅᓕᖓᔪᑦᓴᓕᐊᖏᑦᑕ ᐱᓇᓲᑎᑦᓴᖏᓐᓅᓕᖓᔪᓄᑦ. ᓄᐊᑦᓯᓂᖅ ᑎᑭᐅᑎᓚᐅᔪᖅ $49 028-ᓄᑦ ᑐᓂᓯᔪᓂᑦ ᐱᑦᓱᑎᒃ ᓄᓇᕕᒻᒥ ᓄᓇᓕᓐᓂ ᐱᓯᒪᔪᓂᑦ ᐊᑐᓂᑦ ᐊᒻᒪᑕᐅᖅ ᑎᒥᐅᔪᓂᑦ ᐱᑦᓱᑎᒃ ᒪᑭᕝᕕᑯᓂᑦ, ᑲᑎᕕᒃ ᐃᓕᓴᕐᓂᓕᕆᓂᕐᒥᑦ, Glencore-ᑯᓂᑦ ᐊᒻᒪᓗ ᐊᓯᒋᐊᓪᓚᖏᓐᓂᑦ.
ᐅᖁᒣᑦᑑᖃᑦᑕᓚᐅᕋᓗᐊᕐᑎᓗᒍ ᖃᓂᒪᓐᓇᖅ, ᓄᓇᕕᒻᒥᐅᑦ ᑲᑐᑦᔨᓱᑎᒃ ᐊᒻᒪᓗ ᐃᓚᐅᑦᓯᐊᒪᕆᓚᐅᕐᑐᑦ ᐱᖕᖑᐹᒧᑦ ᑕᒡᒐᓂ ᐊᕐᕌᒍᒥ. ᑎᑭᐅᑎᔭᐅᓚᐅᕐᓯᒪᖕᖏᑐᒧᑦ ᐃᓚᐅᕕᐅᓚᐅᕐᑐᖅ 267-ᓄᑦ, ᐃᑲᔪᕐᑐᑕᐅᑦᓱᑎᒃ 635-ᓄᑦ ᑐᓂᓯᕕᐅᑦᓱᑎᒃ ᐱᖕᖑᐹᒧᑦ ᐊᓪᓚᑕᐅᒪᖃᑕᐅᔪᑦ ᐊᒻᒪᓗ ᐃᒥᕐᑌᓕᓚᐅᕐᓱᑎᒃ ᕕᕗᐊᕆᓕᒫᒥ. ᐅᐱᒍᓱᑦᓯᐊᑐᒍᑦ ᑕᒡᒐᓂ ᐊᕐᕌᒍᒥ ᐊᑑᑎᓂᕆᓚᐅᕐᑕᖓᓂᒃ ᑎᑭᐅᑎᒐᓱᐊᕐᑕᕗᓐᓄᑦ ᑎᑭᖕᖏᓗᐊᕌᐱᒐᓗᐊᕐᑎᓗᒍ 1-ᑕᐅᓭ ᐅᖓᑖᓄᐊᐱᒃ. ᐱᖕᖑᐹ ᐊᑑᑎᔭᐅᒃᑲᓂᑦᓯᐊᓚᐅᕐᑐᖅ ᓄᓇᕐᖃᑎᒌᓄᑦ ᐊᒻᒪᓗ ᓴᕐᕿᑎᑦᓯᓱᓂ ᐊᑕᐅᑦᓯᑯᑦ ᑲᑐᑦᔨᒍᓐᓇᓯᐊᕐᓂᖏᓐᓂᒃ ᓵᖕᖓᓯᓂᕐᒥ ᐅᐃᕆᒪᓇᕐᑐᒥᒃ. ᓂᕆᐅᓐᓂᖃᑦᓯᐊᐳᒍᑦ ᐱᖕᖑᐹ ᐱᒋᐊᖕᖓᑎᑦᓯᖃᑦᓴᓚᖓᒋᐊᖓᓂᒃ ᐊᓯᑦᔨᒋᐊᕐᓂᓂᒃ ᐊᒻᒪᓗ ᐅᓄᕐᓯᐅᒥᒋᐊᕐᓗᑎᒃ ᓱᕐᕋᑕᐅᕗᑦ 14-ᓂ ᓄᓇᓕᓐᓂ ᐅᓄᕐᓯᐅᒥᕙᓪᓕᐊᑐᐃᓐᓇᖃᑦᑕᒪᑦ ᐊᕐᕌᒍᑕᒫᑦ.
