ᐱᖓᓱᑦ ᓄᑖᑦ ᑎᒃᑯᐊᑕᐅᕐᖃᒦᑦ ᑲᑎᖕᖓᔩᑦ ᐃᓱᐊᕐᓯᕕᐅᑉ ᑲᑎᖕᖓᔨᖏᓐᓄᑦ

2018–2019-ᒥ ᐊᕐᕌᒍᑕᒫᕐᓯᐅᑎᒥ ᑲᑎᖕᖓᓂᒻᒪᕆᒻᒥ, ᐃᓱᐊᕐᓯᕕᒃ ᓄᓇᕕᒻᒥ ᒪᒥᓴᕐᕕᐅᑉ ᐃᓚᐅᔪᖁᑎᖏᑦ ᐅᖃᓚᐅᔪᑦ ᑎᒃᑯᐊᑕᐅᔪᕕᓂᕐᓂᒃ ᐱᖓᓱᓂᒃ ᑲᑎᖕᖓᔨᓂᒃ ᐱᒍᑦᔨᓚᖓᑦᓱᑎᒃ ᓄᓇᓕᒻᒥᒃ. ᓇᐅᓕᒫᓂᒃ ᐱᒍᒪᔪᓂᒃ ᑲᑎᖕᖓᔨᕈᕋᓱᐊᖁᔨᓂᐅᑉ 14-ᓂ ᓄᓇᕕᒻᒥ ᓄᓇᓕᓐᓂ ᑭᖑᓂᖓᒍᑦ, ᐊᒥᓱᑦ ᐅᓇᒻᒥᓱᑦᑐᑦ ᖃᐅᔨᔭᐅᓚᐅᔪᑦ ᑲᑎᖕᖓᔨᓄᑦ.  ᑲᑎᖕᖓᔩᑦ ᓈᒻᒪᓴᓚᐅᔪᑦ ᐱᐅᔫᓂᖏᓐᓂᒃ ᐱᒐᓱᐊᕈᑏᑦ ᐊᒻᒪᓗ ᓄᓇᕕᐅᑉ ᐃᓄᖏᑦᑕ ᐅᓇᒻᒥᓱᓐᓂᖏᓐᓂᒃ ᐱᓇᓱᐊᕐᑕᑎᓐᓂᒃ.

ᐊᐱᕐᓱᓃᑦ ᑌᒣᒻᒪᑦ ᐊᑑᑎᔭᐅᓚᐅᔪᑦ ᓯᑉᑎᒻᐱᕆ 16-ᒥ ᐊᒻᒪᓗ ᐊᐅᓚᑦᓯᓂᓕᕆᓂᕐᒥ ᐊᑐᕐᑕᐅᒋᐊᓖᑦ ᑭᖑᓂᖓᒍᑦ, ᐱᖓᓱᑦ ᓄᑖᑦ ᑲᑎᖕᖓᔩᑦ ᐅᖃᕐᑕᐅᓚᐅᔪᑦ. ᓵᓐ ᒥᒃᑖᓄᓪ (ᑰᑦᔪᐊᖅ), ᓗᐃᓴ ᑯᐊᓐᓇᓈᖅ (ᐳᕕᕐᓂᑐᖅ) ᐊᒻᒪᓗ ᒪᓂ ᒫᓕ ᓯᓅᐹ (ᑲᖏᕐᓱᐊᓗᑦᔪᐊᖅ) ᒫᓐᓇ ᑲᑎᖕᖓᔨᐅᖃᑎᖃᓕᕐᑐᑦ ᐱᖓᓲᔪᕐᑐᓂᒃ ᑲᑎᖕᖓᔨᐅᒌᕐᑐᓂᒃ.

Newfoundland-ᒥᐅᑦᓴᔭᐅᑦᓱᓂ ᑰᑦᔪᐊᒥᐅᑐᖃᖅ ᐱᐊᕋᐅᓕᕐᓂᕋᒥᓂᑦ, ᒪᒃᑖᓄᓪ ᑲᒪᔨᒻᒪᕆᐅᓯᒪᓕᕐᑐᖅ ᑰᑦᔪᐊᒥ ᓯᓚᓐᓂᐊᕕᒻᒥ 23 ᐊᕐᕌᒍᐃᑦ ᐅᖓᑖᓄᑦ. ᐊᑦᔨᒌᖕᖏᑐᓂᒃ ᐱᓇᓱᒐᖃᕐᓯᒪᒻᒥᔪᖅ ᓄᓇᒃᑰᔫᓕᐅᕐᑎᐅᓱᓂ, ᐃᓕᓐᓂᐊᑎᑦᓯᔨᐅᑦᓱᓂ, ᐃᖃᓗᓐᓂᐊᑎᐅᑦᓱᓂ ᐊᒻᒪᓗ ᑲᒪᔨᒻᒪᕆᐅᑦᓱᓂ. ᑲᑦᓱᙰᑦᑑᑎᑕᖅ ᐃᓱᐊᕐᓯᕕᐅᑉ ᐱᓇᓱᐊᕐᑕᖓᓄᑦ ᐱᑦᔪᑎᒋᑦᓱᒍ “ᐊᒥᓱᓪᓗᑐᐊᓗᓐᓂᒃ ᓯᖁᑦᑎᓯᒪᔪᖃᓚᐅᕐᓯᒪᖕᖏᒪᑦ ᐃᓚᒌᓂᒃ ᖁᐊᕐᓵᓇᕐᑐᑰᕐᓯᒪᓂᕐᒥᓄᑦ ᐊᒻᒪᓗ ᐋᖓᔮᓐᓇᑐᕐᑐᓗᐊᖃᑦᑕᓂᕐᒧᑦ ᓄᓇᕕᒻᒥ ᐱᐊᕃᑦ ᐃᒻᒥᓂᐊᖃᑦᑕᓕᕋᑕᕐᑎᓗᒋᑦ ᐅᕝᕙᓘᓐᓃᑦ ᐃᓄᓕᕆᔨᒃᑯᓄᑦ ᓅᑕᐅᖃᑦᑕᓕᕋᑕᕐᑎᓗᒋᑦ. ᑕᒪᓐᓇ ᓄᕐᖃᓚᖓᖕᖏᑐᖅ ᒪᒥᖕᖏᓂᑦᑎᓂ,” ᐅᖃᕐᑐᕕᓂᖅ.

ᑯᐊᓐᓇᓈᖅ ᐃᓱᐊᕐᓯᕕᒻᒥ ᐃᓄᑑᓈᕐᑎᑐᑦ ᒪᒥᓴᕐᓂᖓᓂ ᐱᔭᕇᕐᑐᕕᓂᖅ 2011-ᒥ. ᐃᕐᖃᑐᐃᔨᐊᐱᓐᓂᒃ ᑐᑭᒧᐊᑦᑎᓯᔨᐅᑦᓱᓂ ᐳᕕᕐᓂᑐᒥ, ᖃᓄᐃᖕᖏᓯᐊᕐᓇᓂᕐᓴᒥᒃ ᐃᓅᓯᖃᕐᓯᒪᓕᕐᑐᖅ ᐃᓱᐊᕐᓯᕕᒻᒦᓚᐅᕐᓯᒪᒐᒥᓂᑦ. ᐊᑦᑐᑕᐅᓐᓇᑐᖅ ᐅᓐᓂᓯᐅᕈᑎᖓ ᐃᓱᐊᕐᓯᕕᐅᑉ ᐊᕐᕌᒍᑕᒫᕐᓯᐅᑎᒥᒃ ᑲᑎᖕᖓᓂᒻᒪᕆᖓᓂ 2017–2018-ᒥ ᐱᒍᒪᓕᕐᑎᓯᓯᒪᔪᖅ ᐊᒥᓱᓂᒃ. ᐃᑦᔭᕋᑦᓴᓯᐊᒻᒪᕆᒃ ᐊᔪᐃᓐᓇᓂᕐᒧᑦ ᓄᓇᕕᒻᒧᑦ ᐊᒻᒪᓗ ᐱᓗᐊᕐᑐᒥᒃ ᐱᐊᕋᕐᒥᓄᑦ.  ᑲᑎᖕᖓᔨᐅᓂᕐᒥᒍᑦ ᐃᓱᐊᕐᓯᕕᒻᒥ, ᐅᑎᕐᑎᓯᒍᒪᔪᖅ ᐱᓯᒪᔭᒥᓂᒃ ᑭᖕᖒᒪᑦᓯᔪᓄᑦ ᓄᐃᑕᑎᑦᓯᒐᒥ ᐊᔪᐃᓐᓇᓂᕐᒥᒃ, ᓴᐱᕐᑌᑑᓂᕐᒥᒃ ᐊᒻᒪᓗ ᐅᑉᐱᓂᖃᕐᓂᒥᒃ ᖁᐊᕐᓵᓇᕐᑐᑰᕐᓯᒪᒐᓗᐊᕋᒥ ᐊᑦᓱᕈᕐᓇᑐᒃᑯᓗ.

ᓯᓅᐹ ᐅᐱᒍᓱᑦᓱᓂ ᑭᒡᒐᑐᕐᑐᖅ ᐃᓄᑐᐃᓐᓇᓂᒃ ᓄᑲᕐᓯᓂᒃ ᑭᖑᕚᓂᒃ ᐃᓱᐊᕐᓯᕕᐅᑉ ᑲᑎᖕᖓᔨᖏᓐᓂ. ᑐᑭᒧᐊᑦᑎᓯᔨ ᖃᕐᒫᐱᒻᒥ ᓄᓇᓕᒻᒥᓂ. ᐳᕐᑐᓂᕐᓴᒥ ᐃᓕᓐᓂᐊᕇᕐᓯᒪᔪᖅ ᐅᓪᓗᕆᐊᖅ ᐃᓕᓐᓂᐊᕕᒻᒥ ᑲᖏᕐᓱᐊᓗᑦᔪᐊᒥ, ᓴᐳᑦᔨᓚᕆᑦᑐᖅ ᐱᓇᓱᐊᕐᑕᐅᓂᖏᓐᓂᒃ ᐊᑦᔨᒌᖕᖏᑐᑦ ᐅᑭᐅᕐᑕᑐᒥ ᐱᓀᓗᑌᑦ ᐊᒻᒪᓗ ᐱᒍᑦᔨᓯᒪᑦᓱᓂ ᓄᓇᕕᒻᒥᒃ ᐊᒥᓱᓂ ᑲᑎᖕᖓᓂᕐᓂ ᐊᒻᒪᓗ ᐱᓂᐊᕐᓂᓂ. Students on Ice-ᒧᑦ ᐃᓚᐅᓯᒪᑦᓱᓂ, United Nations Rio +20 ᑲᑎᖕᖓᓂᕐᒧᑦ ᐃᓚᐅᓯᒪᔪᖅ ᐱᑦᓴᖑᕆᐊᓪᓚᕈᓐᓇᑐᓂᒃ ᐱᕙᓪᓕᐊᑎᑦᓯᓂᖅ ᐱᑦᔪᑎᒋᑦᓱᒍ 2012-ᒥ ᐊᒻᒪᓗ ᑲᑎᓯᓯᒪᑦᓱᓂ ᑌᑦᓱᒪᓂ ᑯᐯᒃ ᐊᖓᔪᕐᖄᕆᓚᐅᕐᓯᒪᔭᖓᓂᒃ ᐅᖄᖃᑎᒋᑦᓱᒍ ᐃᓱᒪᒋᔭᒥᓂᒃ ᐅᑭᐅᕐᑕᑑᑉ ᐸᕐᓇᑕᐅᓂᖓᑕ ᒥᑦᓵᓄᑦ. ᐅᐱᒍᓱᑦᑐᖅ ᑲᑎᖕᖓᔨᕈᕆᐊᒥᒃ ᐃᓱᐊᕐᓯᕕᒻᒥ ᐅᑉᐱᕋᒥ ᓈᒻᒪᓯᓐᓇᕆᐊᖓ ᐊᒻᒪᓗ ᐱᔪᓐᓇᓂᕐᑖᓇᕆᐊᖓ ᐃᓚᐅᒋᐊᒥᒃ ᐊᑦᔨᒌᖕᖏᑐᓂ ᐱᓇᓱᐊᕐᓂᓂ ᑌᒫᑦᓭᓇᖅ ᐊᓯᒥᓂᒃ ᐃᑲᔪᕐᓂᑎᑐᑦ ᑭᖕᖒᒪᑦᓯᔪᓂᒃ. ᐃᓚᐅᓂᕐᒥᒍᑦ ᓄᓇᓕᒻᒥᓂ ᓄᓇᕕᒻᒥᓗ, ᑕᑯᑎᑦᓯᒍᒪᒻᒥᔪᖅ ᐃᑦᔭᕋᑦᓴᓯᐊᖑᓗᓂ ᐱᐊᕋᕐᒥᓄᑦ ᑲᑐᑦᔨᓗᑕ ᐃᑲᔪᕐᓯᒍᓐᓇᕋᑦᑕ.