November 09, 2020
By reception_isuarsivik

ᐱᓇᓱᐊᕐᓂᒪᕆᒃ ᐃᓪᓗᓕᐅᕐᓂᒥᒃ ᓄᑖᒥᒃ ᐃᓱᐊᕐᓯᕕᑦᓴᒥᒃ ᐸᕐᓇᓯᒪᔪᖅ ᐃᓪᓗᓕᐅᕆᐊᒥᒃ ᐱᖓᓱᓂᒃ ᓯᑕᒪᐅᓕᖓᔪᓂᒃ ᐃᓱᐊᕐᓯᕕᐅᑉ ᐱᓇᓱᑦᑎᖏᑦᑕ ᐃᓪᓗᓴᖏᓐᓂᒃ ᐱᔭᕇᕋᔭᕐᓱᑎᒃ 2020 ᐊᕐᕌᒍᖓᑕ ᐃᓱᐊᓂ. ᒪᕐᕉᒃ ᐃᓪᓗᔪᐊᑉ ᑐᖕᖓᕕᑦᓴᖏᒃ ᓴᓇᔭᐅᓚᐅᔪᑎᓪᓗᒋᒃ ᑕᒃᑲᓂ ᐅᐱᕐᖔᒥ ᐊᕐᕌᒎᓛᕐᑐᒧᑦ ᐃᓪᓗᓕᐅᕐᓂᒧᑦ, ᐱᖓᔪᐊᑦ ᓯᑕᒪᐅᓕᖓᔪᖅ ᐃᓪᓗᒃ ᓇᐸᓕᕇᕐᑐᖅ.

ᐃᓪᓗᓕᐅᕐᓂᖅ ᑖᑦᓱᒥᖓ ᓯᑕᒪᐅᓕᖓᔪᒥᒃ ᐱᒋᐊᓚᐅᔪᖅ ᐅᐱᕐᖔᖓᓂ 2018 ᑰᑦᔪᐊᒥ ᐱᒋᐊᕈᑎᖃᕐᓱᓂ ᑐᖕᖓᕕᖓᑕ ᐊᑐᐃᓐᓇᕈᕐᑎᑕᐅᓂᖓᓂᒃ. ᐅᒥᐊᕐᔪᐊᖅ ᓯᕗᓪᓕᐹᖅ ᑎᑭᑦᓴᑐᐊᕐᒪᑦ ᑕᒃᑲᓂ ᐊᕐᕌᒍᒥ, ᑲᐅᑕᖅ ᐃᓪᓗᓕᐅᕐᑎᑯᑦ ᐱᒋᐊᑦᓴᐅᑎᒋᓚᐅᔪᑦ ᐃᓪᓗᓕᐅᕐᓂᒥᒃ ᐱᓇᓱᑦᑏᑦ ᐃᓪᓗᓴᓪᓚᕆᑦᑕᖏᓐᓂᒃ. ᐅᓪᓗᖁᑎᖏᑦ ᐋᕐᕿᑕᐅᒋᐊᖕᖓᑐᕕᓃᑦ ᒪᓕᑦᑕᐅᓯᐊᕐᑐᕕᓃᑦ ᑌᒣᒻᒪᑦ ᓯᑕᒪᐅᓕᖓᔪᖅ ᐃᓪᓗᖅ ᐃᓗᐊᒍᑦ ᐱᔭᕇᕐᑕᐅᒐᓱᐊᓕᕐᑐᖅ. ᐃᓪᓗᔪᐊᖅ ᐊᑐᐃᓐᓇᐅᑎᑕᐅᒋᐊᓕᒃ ᐃᓱᐊᕐᓯᕕᒻᒧᑦ ᑏᓯᒻᐱᕆᐅᑉ ᐱᒋᐊᕐᓂᖓᓂ 2019-ᒥ, ᐃᓗᓪᓕᑐᐃᓐᓇᕆᐊᖃᓕᕐᓗᓂ ᐃᓪᓗᒥᐅᑕᒻᒪᕆᓐᓂᒃ ᑌᑲᓂᑦᓭᓇᖅ ᑕᕐᕿᒥ ᐊᒻᒪᓗ ᐊᑐᐃᓐᓇᐅᓕᕐᓗᓂ ᐱᓇᓱᑦᑎᓄᑦ ᕕᕈᐊᕆ 2020-ᒥ.

ᐃᓚᐅᓗᑎᒃ ᑖᒃᑯᓄᖓ ᓯᑕᒪᐅᓕᖓᔪᓄᑦ ᐃᓪᓗᓄᑦ ᓯᑕᒪᑦ ᐃᓪᓗᕈᓗᐃᑦ ᐃᓕᔭᐅᓛᕐᒥᔪᑦ ᓴᓂᕐᕓᒪᕕᑦᓴᐅᓗᑎᒃ ᐱᐅᒃᑯᑎᓂᒃ ᐱᖁᑎᓂᓪᓗ. ᒪᕐᕉᒃ ᐃᓪᓗᕈᓘᒃ ᓴᓇᔭᕕᓃᒃ ᓴᓇᔩᑦ ᐃᓕᓐᓂᐊᑎᑦᓯᓂᖏᓐᓂ ᕿᔪᓕᕆᓂᕐᒥᒃ ᐱᓇᓱᐊᖃᑎᖃᕐᓱᑎᒃ ᑲᐅᑕᒃᑯᓂᒃ ᐃᓪᓗᓕᐅᕐᑎᓂᒃ, ᑲᑎᕕᒃ ᐃᓕᓴᕐᓂᓕᕆᔨᒃᑯᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ.

Categories: ᑐᓴᕐᑎᓯᒍᑏᑦ