ᐃᓪᓗᓕᐅᕐᑎᐅᓛᕐᑐᑦ ᐱᓇᓱᐊᕐᑐᑦ ᐃᓱᐊᕐᓯᕕᒻᒧᑦ

ᐃᓚᒋᔭᐅᑦᓱᑎᒃ ᓴᓇᔩᑦ ᐱᓇᓱᐊᕐᓂᒧᑦ, ᖁᓕᑦ ᕿᔪᓕᕆᔨᐅᒋᐅᕐᓴᔪᑦ ᐊᑐᕐᑐᕕᓃᑦ ᓄᑖᓂᒃ ᐱᒍᓐᓇᓂᕐᒥᓂᒃ ᓴᓇᑦᓱᑎᒃ ᒪᕐᕉᓂᒃ ᐃᓪᓗᕈᓘᓐᓂᒃ ᐱᓇᓱᑦᑎᖏᓐᓄᑦ ᐃᓱᐊᕐᓯᕕᐅᑉ ᓄᓇᕕᒻᒥ ᒪᒥᓴᕐᕕᐅᑉ (ᐃᓱᐊᕐᓯᕕᒃ). ᑕᒪᖏᒃ ᐃᓪᓗᕈᓘᒃ ᐃᓕᔭᐅᓛᕐᑑᒃ ᐃᓕᔭᐅᖃᑎᖃᕐᓗᑎᒃ ᒪᕐᕉᓂᒃ ᐊᑦᔨᖏᓐᓂᒃ, ᓄᑖᒻᒪᕆᐅᑉ ᐃᓪᓗᔪᐊᑉ ᓯᑕᒪᐅᓕᖓᔫᑉ ᓴᓂᐊᓂ ᐃᓪᓗᒋᔭᐅᓛᕐᑑᑉ ᐱᓇᓱᕝᕕᐅᔫᑉ ᐱᓇᓱᑦᑎᖏᓐᓄᑦ ᕕᕈᐊᕆ 2020 ᐱᒋᐊᕐᓗᒍ.

ᐱᓇᓱᐊᖃᑎᖃᕐᓱᑎᒃ ᑲᐅᑕᖅ ᐃᓪᓗᓕᐅᕐᑎᑯᓐᓂᒃ, ᑲᑎᕕᒃ ᐃᓕᓴᕐᓂᓕᕆᓂᕐᒥᒃ, ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ, ᐃᓕᓐᓂᐊᑏᑦ ᐃᓚᐅᓚᐅᔪᑦ ᐳᕐᑐᓂᓕᒻᒥᒃ 1-ᒥᒃ—ᕿᔪᓕᕆᓂᕐᒥᒃ ᐃᓕᓐᓂᐊᓂᕐᒥ ᓯᑉᑎᒻᐱᕆ 17-ᒥᑦ 27-ᒧᑦ, 2019 ᐃᓕᓐᓂᐊᑎᑕᐅᑦᓱᑎᒃ ᐹᑦᕆᒃ ᐸᑭᐊᑦᒧᑦ. ᓴᓇᔩᑦ ᐱᓇᓱᐊᕐᓂᖓ ᑐᕌᕐᑕᓕᒃ ᐊᒥᓱᖕᖑᐃᒋᐊᕐᓂᒥᒃ ᐅᓄᕐᓂᖏᓐᓂᒃ ᐃᓄᑐᐃᓐᓀᑦ ᐱᓇᓱᑦᑏᑦ ᐃᓪᓗᓕᐅᕐᓂᒥ.

ᐃᓱᐊᕐᓯᕕᒃ ᐅᐱᒍᓱᑦᑐᖅ ᐱᓇᓱᐊᖃᑎᖃᕆᐊᒥᒃ ᑲᔪᖏᕐᓭᔪᓂᒃ ᐱᓇᓱᐊᕐᓂᓂᒃ ᑫᓪᓗᑐᐃᔪᓂᒃ ᓄᓇᓕᓐᓂ ᐱᓇᓱᑦᑎᖃᕐᓂᒥᒃ ᐊᒻᒪᓗ ᐃᓕᓐᓂᐊᑎᑦᓯᓂᕐᒥᒃ ᓯᕗᓂᑦᑎᓂ ᐱᓇᓱᑦᑎᐅᓛᕐᑐᓂᒃ.