ᐃᓱᐊᕐᓯᕕᒻᒦᓱᓂ ᒪᒥᓴᕐᓂᖅ

ᐃᓱᐊᕐᓯᕕᒃ ᓄᓇᕕᒻᒥ ᐅᐃᕆᒪᔪᑦ ᐃᑲᔪᕐᑕᐅᕕᖓ ᐱᓇᓱᐊᖃᑦᑕᓯᒪᓕᕐᑐᖅ ᐱᐅᔪᒥᒃ ᐃᓗᕐᖁᓯᕐᒥᒃ ᑐᖕᖓᕕᓕᒻᒥᒃ ᐃᓱᐊᕐᓯᕕᒻᒦᓱᓂ ᐅᐃᕆᒪᓂᕐᒧᑦ ᐃᑲᔪᕐᓂᑯᑦ ᐱᒍᑦᔨᓂᕐᓂᒃ ᐃᓄᑐᐃᓐᓇᓂᒃ 14-ᓂ ᓄᓇᕕᒻᒥ ᓄᓇᓕᓐᓂ 25-ᓂᒃ ᐊᕐᕌᒍᓂᒃ. ᐃᓱᐊᕐᓯᕕᒻᒦᓱᓂ ᒪᒥᓴᕐᓂᖅ ᑭᐅᑦᔪᑎᐅᔪᖅ ᓄᓇᕕᒻᒥ ᐱᓀᓗᑕᓪᓚᕆᐊᓗᒻᒧᑦ ᓴᐳᑦᔨᓂᒃᑯᑦ ᐃᓄᓐᓂᒃ ᐅᐃᕆᒪᔪᓂᒃ ᐃᒥᐊᓗᒻᒧᑦ ᐋᖓᔮᓐᓇᑐᒧᓪᓗ.

ᐱᓗᐊᕐᑐᒥᒃ, ᐃᓱᐊᕐᓯᕕᒻᒦᑎᓪᓗᒋᑦ ᒪᒥᓴᕐᓂᒥᒃ ᐱᓇᓱᐊᕐᓂᕗᑦ ᐱᓇᓱᐊᕈᓯᕐᓂᒃ 6-ᓂᒃ (42-ᓂᒃ ᐅᓪᓗᓂᒃ) ᑕᑭᓂᓕᒃ ᐃᓱᐊᕐᓯᕕᒻᒦᓱᑎᒃ ᑰᑦᔪᐊᒥ (ᓄᓇᕕᒻᒥ) ᐱᒍᑦᔨᔭᕗᑦ ᐃᓚᐅᖃᑦᑕᑎᓪᓗᒋᑦ ᒪᒥᓴᕐᓂᒧᑦ ᑲᑎᒪᓂᐊᕈᓯᕐᓂ ᐊᑦᔨᒌᖕᖏᑐᓂ ᐊᒻᒪᓗ ᓱᖃᑦᓯᓂᕐᓂ, ᓂᕿᑦᓯᐊᓂᒃ ᓂᕆᖃᑦᑕᓱᑎᒃ ᐊᒻᒪᓗ ᓯᓂᖃᑦᑕᓱᑎᒃ ᐊᑦᑕᓇᕐᑐᒦᓐᓇᖏᑦᑐᒥ ᐊᒥᓲᕕᒻᒥ.

ᐃᓕᑕᕆᔭᐅᒍᑎᓖᑦ ᐅᐃᕆᒪᓂᕐᒧᑦ ᐃᓱᐊᕐᓭᔨᕗᑦ ᐃᓕᓐᓂᐊᑎᑦᓯᓲᑦ ᐅᐃᕆᒪᓂᕐᒨᓕᖓᔪᓂᒃ ᐊᒻᒪᓗ ᐱᑐᑦᓯᒪᔪᓂᒃ ᐱᐅᓯᕐᓂᒃ, ᒪᒥᓴᕐᑎᓯᑦᓱᑎᒃ ᑲᒪᒋᔭᐅᓯᒪᖕᖏᑐᓂᒃ ᖁᐊᕐᓵᓇᕐᑐᑰᕐᓯᒪᓂᕐᓂᒃ ᐊᒻᒪᓗ ᑭᑦᓴᓂᕐᒥᒃ ᐊᒻᒪᓗ ᐊᓂᕐᓂᑯᑦ ᐃᓗᕐᖁᓯᒃᑯᓗ ᖃᐅᔨᒪᓂᕐᒥᒃ. ᑖᓐᓇ ᒪᒥᓴᕐᓂᖅ ᐃᓚᓕᒃ ᒪᖃᐃᖃᑦᑕᓂᕐᓂᒃ, ᐃᖃᓪᓕᐊᖃᑦᑕᓂᕐᓂᒃ ᐊᒻᒪᓗ ᓄᓂᕙᒋᐊᖃᑦᑕᓂᕐᓂᒃ ᐊᒻᒪᓗ ᐃᓗᕐᖁᓯᒃᑯᑦ ᓱᖃᑦᓯᓂᕐᓂᒃ ᐆᑦᑑᑎᒋᓗᒋᑦ ᒥᕐᓱᓂᖅ, ᓴᐸᖓᓕᕆᓂᖅ ᐊᒻᒪᓗ ᕿᔪᓕᕆᓂᖅ. ᐱᒍᑦᔨᔭᕗᑦ ᐃᓚᐅᓲᑦ ᐃᒥᐊᓗᒻᒥᒃ ᐅᐃᕆᓯᒪᔪᑦ ᑲᑎᖕᖓᓂᖏᓐᓄᑦ ᐱᖓᓱᕕᑦᓱᑎᒃ ᐱᓇᓱᐊᕈᓯᑕᒫᑦ ᐊᒻᒪᓗ ᑐᑦᓯᐊᕕᓕᐊᕈᒪᒍᑎᒃ ᐊᓪᓕᑐᓂ ᕈᓐᓇᓱᑎᒃ. ᐳᓛᕆᐊᓲᖑᒻᒥᔪᑦ ᐃᓄᑐᖃᕐᓄᑦ ᐊᒻᒪᓗ ᐅᖄᕕᐅᒋᐊᕐᑐᓲᖑᑦᓱᑎᒃ ᐊᑦᔨᒌᖕᖏᑐᓄᑦ ᓄᓇᕕᒻᒥ ᐱᓇᓱᐊᖃᑕᐅᔪᓄᑦ ᐃᓱᒫᓘᑎᖃᕐᒥᔪᓄᑦ ᑭᖕᖒᒪᒋᔭᖏᓐᓂᒃ ᐱᑕᖃᕐᑎᓯᒋᐊᒥᒃ ᐊᑦᓱᕉᑎᓕᓐᓂᒃ ᐊᑦᔨᒌᖕᖏᑐᓂᒃ ᐃᓅᓯᕐᒥ ᐱᓀᓗᑕᓂᒃ.

ᐃᓱᐊᕐᓯᕕᒻᒥ, ᐅᑉᐱᕆᔭᖃᕐᖁᒍᑦ ᐅᐃᕆᒪᒍᓐᓀᕋᓱᐊᕐᓂᖅ ᑐᑭᓯᒪᓂᕐᑕᖃᕆᐊᖃᕐᒪᑦ ᐊᑑᑎᓯᒪᔭᑦᑎᓂᒃ ᐊᒻᒪᓗ ᐱᐊᕋᐅᑦᓱᑕ ᖁᐊᕐᓵᓇᕐᑐᑰᕐᓯᒪᓂᑦᑎᓂᒃ ᐃᓚᖃᕐᓗᓂ ᓯᕗᓪᓕᑕ ᒪᑭᒋᐊᕈᓐᓇᓂᕕᓂᖏᓐᓂᒃ ᓱᔪᕕᓂᐅᒐᓗᐊᕋᒥᒃ. ᐃᓗᐃᑦᑐᒥᒃ ᑲᒪᓂᖅ ᓲᖑᓯᑎᑦᓯᓚᖓᔪᖅ ᐱᒍᑦᔨᔭᑦᑎᓂᒃ, ᐃᓱᐊᕐᓭᓂᒃᑯᑦ ᓴᐳᑦᔨᔪᒃᑯᑦ ᓲᖑᓰᒋᐊᕐᓂᒥᒃ ᐃᓗᕐᖁᓯᒃᑯᑦ ᑭᓇᐅᓂᑦᑎᓂᒃ. ᒪᒥᓴᕐᓂᒥᒃ ᐱᓇᓱᐊᕐᓂᖅ ᑐᕌᒐᖃᕐᑐᖅ ᖃᓄᐃᖕᖏᓯᐊᕐᐸᓕᐊᓂᕐᒥᒃ ᐱᑦᑌᓕᓂᒃᑯᑦ ᑭᓯᐊᓂ ᐋᕐᕿᒋᐊᕐᓯᒪᑦᓱᓂ ᐱᒍᑦᔨᔭᑦᑕ ᐊᑐᓂᑦ ᓇᒻᒥᓂᖅ ᑐᕌᒐᖏᓐᓄᑦ ᐊᒻᒪᓗ ᓲᓱᑦᓴᓱᓂ ᓲᖑᓂᖏᓐᓂᒃ ᐊᑑᑎᓯᒪᔭᖏᓐᓂᓗ. ᐱᓇᓱᑦᑎᕗᑦ ᐃᓪᓕᕈᓱᑦᑐᑦ ᓱᒃᑯᑎᕆᓂᕐᒥᒃ ᒥᑭᓕᒋᐊᕆᓂᒃᑯᑦ ᐱᓇᓱᐊᕐᓂᒥᒃ ᐃᕐᖃᑐᐃᓂᐅᖕᖏᑐᒃᑯᑦ ᓴᐳᑦᔨᓱᑎᒃ ᐱᒍᑦᔨᔭᕗᑦ ᒥᑭᓕᒋᐊᕆᒐᓱᑦᑎᓗᒋᑦ ᓱᕐᕃᓂᖏᓐᓂᒃ ᐃᒥᐊᓘᑉ ᐊᒻᒪᓗ ᐋᖓᔮᓐᓇᑐᑦ ᑎᒥᒥᓂ, ᐱᓇᓱᓐᓂᒥᓂ, ᐃᓚᖃᕐᓂᒥᓂ ᐊᒻᒪᓗ ᐃᓅᖃᑎᒌᓐᓂᒥᓂ.

 

ᐊᖏᕐᑕᐅᑲᓵᓕᕐᖀᑦ ᐃᓱᐊᕐᓯᕕᒻᒦᓗᓂ ᒪᒥᓴᕐᓂᒥᒃ ᐱᓇᓱᐊᕐᓂᑎᓐᓄᑦ?

ᐊᓪᓚᓂᐊᕆᐊᓪᓛᕆᑦ ᓱᓇᓂᒃ ᓇᑦᓴᓯᒋᐊᖃᕐᒪᖔᕐᐱᑦ ᐊᒻᒪᓗ ᖃᓄᖅ ᐊᑐᐃᓐᓇᕈᕐᑎᕆᐊᖃᕐᒪᖔᕐᐱᑦ ᐃᓚᐅᓂᕐᒧᑦ ᒪᒥᓴᕐᓂᒥᒃ ᐱᓇᓱᐊᕐᓂᕆᓛᓕᕐᒥᔭᑦᑎᓄᑦ.

 

ᐃᓚᐅᒍᒪᕖᑦ ᐃᓚᖓᓐᓂ ᒪᒥᓴᕐᓂᒥᒃ ᐱᓇᓱᐊᕐᓂᕆᓛᕐᑕᑕ?

ᖃᕆᑕᐅᔭᒃᑯᑦ ᐱᑖᕆᓗᒍ ᐊᒻᒪᓗ ᑕᑕᕐᓴᓗᒍ ᐃᓱᐊᕐᓯᕕᓕᐊᕋᓱᐊᕈᑎ ᑕᑕᕐᓴᒐᖁᑎᕗᑦ.

Our facility is closed and our services suspended until further notice - Read more
Nos installations sont fermées et nos services sont suspendus jusqu’à nouvel ordre - Tous les détails
ᐱᓇᓱᕝᕕᕗᑦ ᐅᒃᑯᐊᓯᒪᔪᖅ ᐊᒻᒪᓗ ᐱᒍᑦᔨᓂᕗᑦ ᓄᕐᖃᖓᑫᓐᓇᓱᑎᒃ ᖃᐅᔨᑎᑦᓯᒍᑎᐅᒋᐊᓪᓛᖏᓐᓂᒥᓂ - ᐊᓪᓚᓂᐊᕆᐊᓪᓚᕆ
+