ᐊᑐᐃᓐᓇᕈᕐᑎᓂᖅ ᐃᓱᐊᕐᓯᕕᒻᒦᓂᕆᓚᖓᔭᕐᓄᑦ

ᐊᖏᕐᑕᐅᓯᒪᓕᕐᖁᑎᑦ ᒪᒥᓴᕐᓂᒥᒃ ᐱᓇᓱᐊᕐᓂᕆᓚᖓᔭᑦᑕ ᐃᓚᖓᓄᑦ – ᐱᐅᔪᒻᒪᕆᒃ! ᐊᑏ, ᐃᕐᖃᐅᒪᒋᑦ ᐃᒥᐊᓗᒋᐊᖃᖕᖏᓇᕕᑦ ᐋᖓᔮᓐᓇᑐᕐᑐᕆᐊᖃᕐᓇᓗ ᐃᑭᓐᓂᐸᐅᑎᓪᓗᒋᑦ 72-ᓂᒃ ᑫᕙᓪᓚᒍᓯᕐᓂᒃ ᐃᓱᐊᕐᓯᕕᒻᒨᓚᐅᕐᓇᒃ. ᐸᕐᓇᓯᒪᒻᒥᔪᒍᑦ ᐃᓚᐅᔪᓕᒫᑦ ᐃᓱᒪᒃᑯᑦ ᑎᒥᒃᑯᓗ ᐃᓚᐅᒍᓐᓇᕆᐊᖃᕐᓂᖏᓐᓂᒃ, ᐃᓚᖃᕐᓱᓂ ᐃᙯᓕᓴᕐᓂᑯᑦ ᒪᙯᓐᓂᑯᓪᓗ ᓱᖃᑦᓯᓂᕐᓂ. ᓂᕆᐅᒃᑯᒍᑦ ᐃᓕᓐᓂᑦ ᐅᑯᓂᖓ:

• ᐃᓘᓐᓇᓕᒫᖏᓐᓄᑦ ᐃᓚᐅᖃᑦᑕᓗᑎᑦ ᓱᖃᑦᓯᓃᑦ ᒪᒥᓴᕐᓂᒥ;

• ᓇᑦᓴᓯᑦᑌᓕᖃᑦᑕᓗᑎᑦ ᐊᑐᕐᑌᓕᖃᑦᑕᓗᑎᓪᓗ ᐋᖓᔮᓐᓇᑐᓂᒃ ᐃᒥᐊᓗᒻᒥᓗ ᖃᖓᑐᐃᓐᓇᓕᒫᖅ ᒪᒥᓴᕐᓂᓂ;
• ᐱᐅᓯᖃᑦᓯᐊᖏᓐᓇᓕᒫᕐᓗᑎᑦ;
• ᐱᓇᓱᐊᕆᐊᓕᑎᓐᓂᒃ ᐱᓇᓱᐊᖃᑦᑕᓗᑎᑦ ᐅᓪᓗᑕᒫᑦ;
• ᒪᓕᑦᓯᐊᓗᑎᑦ ᐃᓱᐊᕐᓯᕕᐅᑉ ᒪᓕᒐᖏᓐᓂᒃ.

ᐊᒻᒪᓗ, ᐊᑏ, ᓇᓗᓀᕐᓯᖁᔨᕗᒍᑦ ᓄᓇᓕᑦᓯᓂ ᐱᓇᓱᑦᑎᒥᒃ ᐃᓱᐊᕐᓯᕕᒻᒦᓂᐅᑉ ᑭᖑᓂᖓᒍᑦ ᑲᒪᖃᑦᑕᓚᖓᔪᒥᒃ ᓴᐳᑦᔨᓗᓂᓗ ᐃᓕᓐᓂᒃ. ᐅᖄᓚᕕᒋᑎᒍᑦ ᐃᑲᔪᕐᑕᐅᒍᒪᒍᕕᑦ ᐅᕗᖓ 1-866-964-9994.

ᐱᔭᑦᓴᖃᕆᐊᖃᖕᖏᓚᑎᑦ ᐅᓚᐱᓚᖓᔪᓂᒃ ᐃᓗᐃᑦᑐᒥᒃ ᐃᓚᐅᓪᓚᕆᓐᓂᓂᒃ ᒪᒥᓴᕐᓂᒧᑦ (ᐋᓐᓂᐊᓯᐅᕐᑎᒪᕆᒻᒥᒃ ᑭᒍᑌᕐᓯᔨᒥᓪᓘᓃᑦ ᑕᑯᒋᐊᖃᕐᓂᖅ, ᐃᕐᖃᑐᕐᑕᐅᒋᐊᖃᕐᓃᑦ, ᐱᐊᕋᓕᕆᒋᐊᖃᕐᓂᖅ, ᐊᓯᖏᓪᓗ).

ᐅᑯᐊᑕᒐ ᓇᑦᓴᕆᐊᓕᑎᑦ ᐃᓕᓐᓅᓕᖓᔪᑦ:

• ᓴᓗᒪᒍᑏᑦ;
• ᐅᓯᖕᖓᓰᑦ;
• ᐃᓪᓗᒦᑦᓯᐅᑏᒃ ᐊᓃᕈᑏᓪᓗ ᑲᒥᐊᓘᒃ;
• ᐃᓪᓗᒦᑦᓯᐅᑎᑦᓯᐊᑦ ᐊᓐᓄᕌᑦ;
• ᐃᙯᓕᓴᕈᑏᑦ ᐊᓐᓄᕌᑦ;
• ᐊᓐᓄᕌᒋᐊᓪᓓᑦ ᖃᖓᐅᓂᖓ ᐊᕐᕌᒎᑉ ᐃᓗᐊᓂ ᒪᓕᓪᓗᒍ:
  • ᐅᐱᕐᖔᓯᐅᑏᑦ—ᐅᕐᖂᔫᖕᖏᑐᑦ ᐊᓐᓄᕌᑦ, ᐅᕕᓂᕈᐃᑦ, ᐳᐃᑦᔪᕋᐅᑏᑦ, ᑮᑦᑐᕇᔭᐅᑎ, ᓯᕿᓂᕐᒧᑦ ᐆᒌᒃᑯᑎ, ᓇᓭᑦ,
  • ᐅᑭᐅᕐᓯᐅᑏᑦ—ᖃᕐᓖᑦ, ᑲᒥᐊᓗᐃᑦ, ᐅᓕᑲᑦᑌᑦ, ᐳᐊᓗᐃᑦ, ᓇᓭᑦ;
• ᓈᒻᒪᑐᑦ ᐄᕐᖃᒉᑦ ᒪᒥᓴᕐᓂᓕᒫᒧᑦ (ᐊᑦᓱᖏᕐᓯᒪᔪᒦᒋᐊᓖᑦ);
• ᓈᒻᒪᑐᑦ ᑮᓇᐅᔦᑦ ᓴᓗᒪᒐᓱᐊᕈᑎᓄᑦ (ᐊᑦᓱᖏᕐᓯᒪᔪᒦᒋᐊᓖᑦ);

 

ᑐᑭᓯᔭᐅᒋᐊᓕᒃ, ᐃᒥᐊᓗᒃ, ᐋᖓᔮᓐᓇᑐᖅ ᐊᒻᒪᓗ ᖁᑭᐅᑏᑦ ᓴᕖᓪᓘᓃᑦ ᐱᑕᖃᕆᐊᖃᖕᖏᓚᕆᒻᒪᑕ ᐊᒻᒪᓗ ᓄᕐᖃᑎᑦᓯᒍᑎᐅᒍᓐᓇᓱᑎᒃ ᒪᒥᓴᕐᓂᒥᑦ.

ᖃᐅᔨᒪᒋᐊᖃᕐᖁᑎᑦ ᐅᖄᓚᐅᑎᒥᒃ ᐊᑐᕈᓐᓇᕋᕕᑦ ᐅᓪᓗᑕᒫᑦ ᑫᕙᓪᓚᒍᓰᑦ 6-ᖒᑉ ᐊᒻᒪᓗ 10-ᖒᑉ ᐅᓐᓄᐊᑯᑦ ᐊᑯᓐᓂᖓᓂ. ᐳᓛᕆᐊᕐᑕᐅᒍᓐᓇᑐᓯ ᐃᓱᐊᕐᓯᕕᒻᒧᑦ ᐊᓪᓕᖏᓱᖓᖏᓐᓂ ᐱᖓᔪᐊᑕ, ᓯᑕᒪᖓᑕ, ᑕᓪᓕᒪᖓᑕᓗ ᐱᓇᓱᐊᕈᓯᐅᑉ ᓄᖕᖑᐊᖏᑦ ᒪᒥᓴᕐᓂᐅᑉ 1-ᖑᒥᑦ 5-ᖑᒧᑦ. ᒪᒥᓴᕐᑐᑦ ᐊᓃᑫᓐᓇᕈᓐᓇᑐᑦ 9-ᖑᒥᑦ ᐅᓪᓛᑯᑦ 9-ᖑᒧᑦ ᐅᓐᓄᑯᑦ ᐊᓪᓕᑐᖃᖓᓂ ᑕᓪᓕᒪᖓᑕ ᐱᓇᓱᐊᕈᓰᑦ ᐊᒻᒪᓗ ᐊᓪᓕᖏᓱᖓᒥ ᐊᓪᓕᑐᓂᓗ ᐱᒐᓲᔪᕐᑐᖓᓂ ᐱᓇᓱᐊᕈᓰᑦ. ᐳᓛᕆᐊᕐᑕᐅᓃᑦ ᐊᓃᑫᓐᓇᓃᓪᓗ ᐊᖏᕐᑕᐅᒋᐊᓖᑦ ᐃᓱᐊᕐᓭᔨᒧᑦ ᐊᒻᒪᓗ ᐃᓘᓐᓇᖏᓐᓄᑦ ᐃᓚᐅᖃᑦᑕᑐᐊᕈᓂ ᒪᒥᓴᕐᓂᒥ ᑭᓯᐊᓂ ᕈᓐᓇᓱᓂ.