ᑭᓈ ᐃᓚᐅᒍᓐᓇᖃ ᐃᓱᐊᕐᓯᕕᒻᒦᓗᓂ ᒪᒥᓴᕐᓂᒧᑦ?

ᐃᓱᐊᕐᓯᕕᐅᑉ ᐱᓇᓱᐊᕐᓂᖓ ᐃᓚᐅᔪᓅᓕᖓᔪᖅ ᔦᒥᔅ ᐯ ᑯᐯᒃᓗ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ ᐁᑉᐸᖏᓐᓄᓗ ᐅᑭᐅᓕᓐᓄᑦ 18-ᓂᒃ ᐅᖓᑖᓄᓪᓗ ᐃᑲᔪᕐᑕᐅᒋᐊᓕᓐᓄᑦ ᐅᐃᕆᒪᓂᕐᒧᑦ ᐅᕝᕙᓘᓐᓃᑦ ᐋᖓᔮᓐᓇᑐᕐᑐᓗᐊᖃᑦᑕᓂᕐᒧᑦ ᐊᒻᒪᓗ ᑐᓂᒪᑦᓱᑎᒃ ᒪᒥᓴᕐᓂᒧᑦ.

ᖃᑦᓯᕌᕐᖄ ᐃᓚᐅᓗᓂ ᐃᓱᐊᕐᓯᕕᐅᑉ ᒪᒥᓴᕐᑎᓯᓂᖓᓄᑦ?

ᒪᒥᓴᕐᓂᖅ ᐊᑐᐃᓐᓇᐅᑎᑕᐅᔪᖅ ᐊᑭᖃᕋᓂ. ᓂᕆᓂᓕᒫᑦ ᐊᑭᖃᖕᖏᑐᑦ ᑐᔪᕐᒥᐅᕕᓪᓗ ᖃᖓᑕᓂᖓᓗ ᓄᓇᓕᒻᒥᓂᑦ ᐅᑎᒧᓪᓗ. ᐱᒍᑦᔭᐅᔪᑦ ᑮᓇᐅᔭᒃᑭᕆᐊᓖᑦ ᓇᒥᓂᖅ ᐊᑐᕋᑦᓴᒥᓂᒃ.

ᐃᓚᐅᒍᓐᓇᖁᖔ ᐃᓱᐊᕐᓯᕕᒻᒥ ᒪᒥᓴᕐᓂᒧᑦ ᐃᓚᐅᔫᖕᖏᑯᒪ ᔦᒥᔅ ᐯ ᑯᐯᒃᓗ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ?

ᐃᓚᐅᔫᑦᓴᓚᐅᕈᕕᑦ ᔦᒥᔅ ᐯ ᑯᐯᒃᓗ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ ᐅᕝᕙᓘᓐᓃᑦ ᐁᑉᐸᕆᔭᐅᒍᕕᒃ ᓄᓇᖃᕐᓗᑎᑦ 14-ᓂ ᓄᓇᓕᓐᓂ ᓇᓪᓕᐊᓂ ᓄᓇᕕᒻᒥ, ᐃᓚᐅᕗᑎᑦ ᐱᓇᓱᐊᕐᓂᑎᓐᓂ ᓯᕗᓕᐅᑎᔭᐅᔪᑦᓴᐅᔪᕆᒐᑦᑎᒋᑦ. ᐃᓚᐅᔫᒍᕕᑦ ᔦᒥᔅ ᐯ ᑯᐯᒃᓗ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ ᐅᕝᕙᓘᓐᓃᑦ ᐁᑉᐸᕆᔭᐅᒍᕕᑦ ᓄᓇᕕᐅᑉ ᓯᓚᑖᓂᒥᐅᖑᓗᑎᑦ, ᐅᖄᓚᕕᒋᑎᒍᑦ ᒫᓐᓇ ᖃᐅᔨᒐᓱᓪᓗᑎᑦ ᐃᓂᖃᕐᒪᖔᑦ ᐊᖑᑏᓐᓀᑦ ᐊᕐᓀᓀᓪᓘᓃᑦ ᒪᒥᓴᕐᓂᕆᓛᓕᕐᒥᔭᖓᓂ ᐅᖄᒍᑎᖃᕈᓐᓇᕋᑦᑕ ᖃᖓᑦᑕᐅᑎᓯᓐᓂᒃ.

ᓱᓇᐅᕚᑦ ᐊᑐᕈᓐᓇᑕᒃᑲ ᐃᓚᐅᒐᓱᐊᕈᒪᒍᒪ ᒪᒥᓴᕐᓂᒧᑦ ᑭᓯᐊᓂ ᕿᒣᒍᒪᓇᖓ ᐁᑉᐸᕋᓂᒃ ᐱᐊᕋᒃᑲᓂᓪᓗ?

ᓄᑕᐅᖕᖏᓕᕙᓪᓕᐊᔪᖅ ᐃᓪᓗᔪᐊᕗᑦ ᐃᓂᖃᖕᖏᑐᖅ ᐁᑉᐸᕆᔭᐅᔪᓄᑦ ᐱᐊᕋᕆᔭᐅᔪᓄᓪᓗ ᑭᓯᐊᓂ ᓄᑖᖅ ᐃᓱᐊᕐᓯᕕᒃ ᑭᐅᑦᔪᑎᖃᓛᕐᑐᖅ ᑕᒪᑦᓱᒧᖓ. 2021-ᖑᖕᖏᓂᖓᓂ, ᐃᓚᐅᑦᓯᐊᖁᔨᕗᒍᑦ ᐱᒍᓐᓇᕕᓕᒫᓯᓄᓪᓗ ᒪᒥᓴᕐᓂᑰᖁᔨᑦᓱᑕ ᐃᓕᑦᓯᓂᒃ ᐊᒻᒪᓗ ᐃᓚᐅᒐᓱᐊᕈᑎᒥᒃ ᑕᑕᕐᓭᓗᓯ ᐃᓱᐊᕐᓯᕕᒻᒦᓗᓂ ᒪᒥᓴᕐᓂᑎᓐᓄᑦ ᐯᔨᑦᓴᓯᐊᒥᒃ ᓇᕝᕚᕈᓐᓇᕈᕕᑦ. ᐅᖄᓚᕕᖃᕈᓐᓇᒥᔪᓯ ᓄᓇᓕᑦᓯᓂ ᐋᓐᓂᐊᕕᓯᓐᓂᒃ ᐃᑲᔪᕐᑕᐅᓴᐅᑎᒋᒍᒪᒍᑦᓯ ᖃᖓᑐᐃᓐᓇᖅ.

‘ᐋᖓᔮᓐᓇᑐᓂᒃ ᓄᕐᖃᓕᕆᑦ ᐃᓅᓯᓕᒫᕐᓂ ᐱᑦᓵᓛᕈᓐᓀᓗᒋᑦ’ ᑖᓐᓈ ᑐᕌᒐᕆᕙᐅᒃ ᐃᓱᐊᕐᓯᕕᒻᒦᓗᓂ ᒪᒥᓴᕐᑎᓯᓂᓯ?

ᒪᒥᓴᕐᑎᓯᓂᕗᑦ ᐋᕐᕿᒋᐊᕐᓯᒪᔪᖅ ᐊᑐᓂᑦ ᐱᒍᑦᔨᔭᑦᑕ ᓇᒻᒥᓂᖅ ᑐᕌᒐᖏᓐᓄᑦ ᐊᒻᒪᓗ ᓲᓱᑦᓴᓱᓂ ᓲᖑᓂᖏᓐᓂᒃ ᐊᑑᑎᓯᒪᔭᖏᓐᓂᓗ. ᐱᒍᑦᔨᔭᕗᑦ ᐃᓚᖏᑦ ᐃᓱᐊᕐᓯᕕᒻᒧᑦ ᐃᑎᓲᑦ ᑖᑦᓱᒥᖓ ᑐᕌᒐᕐᒥᒃ ᐃᓱᒪᒥᐅᑕᖃᕐᓱᑎᒃ, ᐊᒻᒪᓗ ᓴᐳᑦᔨᓲᕗᑦ ᒪᒥᓴᕐᓂᖏᓐᓂ ᐅᐃᕆᒪᓂᕐᑕᖃᖕᖏᑐᒥᒃ ᐃᓅᓯᕐᑖᕙᓪᓕᐊᓂᖏᓐᓂ. ᑭᓯᐊᓂ, ᐊᑐᐃᓐᓇᖃᕐᒥᔪᒍᑦ ᓴᓇᕐᕈᑎᓂᒃ ᐊᑐᕐᑕᐅᒋᐊᓕᓐᓂᒃ ᐱᒍᑦᔨᔭᕗᑦ ᑐᑭᓯᒋᐊᑦᓯᐊᕈᒪᑉᐸᑕ ᖁᐊᕐᓵᓇᕐᑐᑰᕈᑎᒋᖃᑦᑕᓯᒪᔭᒥᓂᒃ ᐃᓅᓯᕐᒥᓂ, ᒪᒥᓴᕐᓗᑎᒃ ᐊᑦᑕᓇᕐᑐᒦᓐᓇᖏᑦᑐᒥ ᐊᒻᒪᓗ ᐱᐅᓯᕐᑖᓗᑎᒃ ᐱᐅᔪᒥᒃ ᖃᓄᐃᖕᖏᓯᐊᕐᓇᑐᒥᒃ ᐃᓅᓯᕐᒥᒃ.

ᓱᓇᐅᕚ ᓱᒃᑯᐃᓂᖓᓂᒃ ᒥᑭᓕᒋᐊᕆᓂᖅ ᒪᒥᓴᕐᓂᒥ?

ᓱᒃᑯᐃᓂᖓᓂᒃ ᒥᑭᓕᒋᐊᕆᓂᖅ ᐃᕐᖃᑐᐃᒐᓂ ᓴᐳᑦᔨᓂᖅ ᐱᒍᑦᔨᔭᑦᑎᓂᒃ ᒥᑭᓕᒋᐊᕆᒐᓱᐊᕈᑎᐅᑦᓱᓂ ᓱᕐᕃᓂᖓᓂᒃ ᐃᒥᐊᓘᑉ ᐋᖓᔮᓐᓇᑐᐃᓪᓗ ᑎᒥᖏᓐᓂ, ᐱᓇᓱᑦᑎᐅᓂᖏᓐᓂ, ᐃᓚᒌᓐᓂᖏᓐᓂ ᐊᒻᒪᓗ ᐃᓅᖃᑎᒌᓐᓂᖏᓐᓂ. ᑫᓪᓗᑐᐃᔪᖅ ᐱᒍᑦᔨᔭᑦᑎᓂᒃ ᐱᒋᐊᕐᓂᒥᒃ ᒪᒥᓴᕐᓂᒥᒃ ᐃᓂᒋᔭᒥᓂᑦ ᐃᓅᓯᕐᒥ ᑐᖕᖓᕕᒋᓗᒋᑦ ᓇᒻᒥᓂᖅ ᑐᕌᒐᖏᑦ ᐊᑦᑕᓇᖕᖏᓂᕐᓴᒥᒃ ᐊᑐᕐᓂᒥᑦ, ᐊᐅᓚᑦᓯᓗᓂ ᐊᑐᕐᓂᒧᑦ ᐱᖕᖏᓚᕆᓐᓂᒧᑦ ᑎᑭᕋᑕᕐᓗᒍ.

ᓱᒨᑦ ᐃᓱᐊᕐᓯᕕᒃ ᐃᓚᒋᔭᐅᒋᐊᖃᑦᓴᕆᕙ ᐃᓕᑕᕐᓯᔩᑦ ᐱᒍᓐᓇᓂᖏᓐᓂᒃ ᑲᓇᑕᒥᒧᑦ?

ᐃᓕᑕᕐᓯᔩᑦ ᐱᒍᓐᓇᓂᖏᓐᓂᒃ ᑲᓇᑕᒥ ᐃᒻᒥᒎᕐᑐᖅ, ᖄᖏᕐᓂᑯᓕᐅᕐᑎᐅᖏᑦᑑᓱᓂ ᑎᒥᐅᔪᖅ ᐋᕐᖀᓲᖅ ᒪᓕᑦᑕᐅᒋᐊᓕᓐᓂᒃ ᐱᐅᔫᓂᖓᓄᑦ ᐊᒻᒪᓗ ᐊᑦᑕᓇᖕᖏᑐᒦᓐᓇᓂᖓᓄᑦ ᐃᓗᓯᓕᕆᓂᐅᑉ ᐊᒻᒪᓗ ᐃᓕᑕᕐᓯᓲᖑᑦᓱᓂ ᐱᒍᓐᓇᓂᖏᓐᓂᒃ ᐃᓗᓯᓕᕆᓂᕐᒧᑦ ᑎᒥᐅᔪᑦ ᑲᓇᑕᒥ ᓄᓇᕐᔪᐊᒥᓗ. ᐃᓕᑕᕆᔭᐅᒋᐊᖕᖓᓯᒪᔪᒍᑦ ᐱᒍᓐᓇᕆᐊᑦᑕ ᒪᐃ 2017-ᒥ ᐱᔭᕇᕐᑐᕕᓂᐅᑦᓱᑕ Primer ᐊᐱᕐᓱᓂᒃᑯᑦ ᖃᐅᔨᓴᐅᑎᖓᓂᒃ, ᑕᒪᓐᓇ ᓯᕗᓪᓕᐹᖑᓯᒪᔪᖅ ᐊᓪᓗᕆᐊᕐᓂᓂ ᐱᐅᓰᕙᓪᓕᐊᓂᑦᑎᓂ ᐱᓇᓱᖃᑎᒋᑦᓱᒍ ᐃᓕᑕᕐᓯᔩᑦ ᐱᒍᓐᓇᓂᖏᓐᓂᒃ ᑲᓇᑕᒥ. ᐱᓯᒪᓂᖅ ᑌᒣᑦᑐᒥᒃ ᐱᒻᒪᕆᒻᒥᒃ ᐃᓕᑕᕆᔭᐅᒍᑎᒥᒃ ᓄᐃᑕᑎᑦᓯᔪᖅ ᐃᓱᐊᕐᓯᕕᒃ ᓲᓱᑦᓴᕆᐊᖓ ᐳᕐᑐᓂᕐᐹᓂᒃ ᒪᓕᑦᑕᐅᒋᐊᓕᓐᓂᒃ ᐃᓗᓯᓕᕆᓂᕐᒥᒃ ᐱᒍᑦᔨᓂᕐᒥ ᐊᒻᒪᓗ ᑐᓴᕋᑦᓴᓯᐊᒻᒪᕆᐅᑦᓱᓂ ᓄᓇᕕᒻᒧᑦ ᐱᒍᑦᔨᔭᑦᑎᓄᓪᓗ.

ᖃᖔᒨᑦ ᓄᑖᖅ ᐃᓱᐊᕐᓯᕕᒃ ᐸᕐᓇᑕᐅᒪᕙ ᐅᒃᑯᐃᑕᐅᓛᕐᓱᓂ?

ᐊᕐᖁᑎᑦᓴᖓ ᐊᒻᒪᓗ ᓇᐸᔪᐊᓗᐃᑦ ᐱᔭᕇᕐᑕᐅᓛᕐᑐᑦ 2019 ᐃᓱᐊᓂ. ᓴᓇᔭᐅᓂᖓ ᓄᑖᑉ ᐃᓱᐊᕐᓯᕕᐅᑉ ᐱᒋᐊᕆᐊᓕᒃ ᐊᐳᑎ ᐊᐅᑦᓴᑐᐊᕐᐸᑦ 2020-ᒥ ᐊᒻᒪᓗ ᐊᕐᕌᒍᒧᑦ ᑭᖑᓪᓕᒧᑦ ᑲᔪᓯᓗᓂ. ᕿᓚᓈᕐᑐᐃᓇᐅᕗᒍᑦ ᐅᒃᑯᐃᑕᐅᓂᒻᒪᕆᖓᓂᒃ ᐃᓱᐊᕐᓯᕕᐅᑉ 2021 ᐅᑭᐊᖓᓂ.

ᖃᖔ ᓄᑖᑦ ᐱᒍᑦᔨᓃᑦ ᐆᑦᑑᑎᒋᓗᒍ ᐃᓱᐊᕐᓯᕕᒻᒦᓗᑎᒃ ᐃᓚᒌᑦ ᐃᑲᔪᕐᑕᐅᓂᖓ ᐊᑐᐃᓐᓇᐅᓛᕐᖃᑦ?

ᓄᑕᐅᓯᓕᕆᐊᕐᓂᖓ ᐱᓇᓱᐊᕐᓂᑕ ᐊᑐᐃᓐᓇᐅᓛᕐᑐᖅ ᓄᑖᖅ ᐃᓱᐊᕐᓯᕕᒃ ᐅᒃᑯᐃᓴᑐᐊᕐᐸᑦ. ᐱᐅᓯᒋᐊᕐᓂᖏᑦ ᐱᒍᑦᔨᓂᑦᑕ ᐃᓚᖃᓛᕐᑐᑦ ᑐᔪᕐᒥᐅᕕᑦᓴᒋᐊᓪᓚᓂᒃ, ᐱᐅᓂᕐᓴᒥᒃ ᐱᓇᓱᕝᕕᒥᒃ ᐊᒻᒪᓗ ᐱᐅᒃᑯᑎᒋᐊᓪᓚᓂᒃ. ᑌᒣᒻᒪᑦ, ᕿᓚᓈᕐᑐᐃᓇᐅᕗᒍᑦ ᐅᒃᑯᐃᓂᒻᒪᕆᒋᓛᕐᑕᖓᓂᒃ ᐃᓱᐊᕐᓯᕕᐅᑉ 2021 ᐃᓱᐊᓂ.

Our facility is closed and our services suspended until further notice - Read more
Nos installations sont fermées et nos services sont suspendus jusqu’à nouvel ordre - Tous les détails
ᐱᓇᓱᕝᕕᕗᑦ ᐅᒃᑯᐊᓯᒪᔪᖅ ᐊᒻᒪᓗ ᐱᒍᑦᔨᓂᕗᑦ ᓄᕐᖃᖓᑫᓐᓇᓱᑎᒃ ᖃᐅᔨᑎᑦᓯᒍᑎᐅᒋᐊᓪᓛᖏᓐᓂᒥᓂ - ᐊᓪᓚᓂᐊᕆᐊᓪᓚᕆ
+