ᐱᕙᓪᓕᐊᓂᕐᒧᑦ ᐸᕐᓇᓯᒪᐅᑎᕗᑦ

ᖃᐅᔨᓴᕐᓂᕕᓂᖓ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᖕᖓᔩᑦ 2015-ᒥ ᖃᐅᔨᔪᕕᓂᖅ ᐊᑭᖓ ᐃᒥᐊᓗᓗᐊᖃᑦᑕᓂᕐᒧᑦ ᐱᑐᑦᓯᒪᔪᖅ ᓄᓇᕕᒻᒥ ᖁᐊᕐᓵᓇᕐᑑᓱᓂ $72 ᒥᓕᐊᓐ ᑖᓚᐅᒋᐊᖓ ᐊᕐᕌᒍᑕᒫᑦ ᑎᒍᔭᐅᒪᓂᐅᑉ, ᐃᓗᓯᕐᓱᓯᐊᖕᖏᓂᐅᑉ, ᐳᓖᓯᓕᕆᓂᐅᑉ, ᐊᒻᒪᓗ ᐱᓇᓱᑦᑎᖃᖕᖏᓂᐅᑉ/ᓱᕙᓪᓕᐊᖏᓐᓂᐅᑉ ᐊᑭᖏᑦ ᐃᓚᐅᓕᕐᒪᑕ.

ᐊᐅᓚᑕᐅᓂᕐᓗᓯᒪᓂᖅ, ᐊᐅᓪᓚᑎᑕᐅᑦᓱᑎᒃ ᐃᓕᓐᓂᐊᕆᐊᕐᑎᑕᐅᖃᑦᑕᓂᕕᓂᖅ, ᖃᓪᓗᓈᕈᕐᑎᑕᐅᒐᓱᐊᕐᓂᕕᓂᖅ ᐊᒻᒪᓗ ᑭᖑᓂᖓᒍᑦ ᐊᓯᑦᔨᓂᕕᓃᑦ, ᓄᑖᓪᓚᕆᐅᑦᓱᑎᒃ ᐊᒻᒪᓗ ᓱᑲᑦᑐᒥᒃ, ᐊᑑᑎᔭᕕᓂᖏᑦ ᐃᓄᑐᐃᓐᓀᑦ ᓄᓇᕕᒻᒥᐅᑦ ᐱᐅᖕᖏᑐᓪᓚᕆᒻᒥᒃ ᓱᕐᕃᓂᖃᕐᓯᒪᔪᑦ ᐃᓚᒌᓂᒃ, ᓄᓇᓕᓐᓂᒃ ᐊᒻᒪᓗ ᓄᓇᕕᒻᒥ ᑎᒥᐅᔪᓂᒃ.

ᐋᖓᔮᓐᓇᑐᓂᒃ ᐱᓗᐊᖃᑦᑕᓂᕐᒧᑦ ᐱᓀᓗᑌᑦ ᐃᓚᖃᕐᑐᑦ ᐳᕐᑐᔪᒥᒃ ᐃᓅᒍᓐᓀᖃᑦᑕᓂᕐᒥ, ᐃᓱᒫᓗᓐᓇᑐᒥᒃ ᐱᑕᖃᓗᐊᕐᑐᖅ ᐱᐊᕋᑦᓴᐅᓱᑎᒃ ᐃᒥᐊᓗᒍᑕᐅᓕᓂᕐᓂᒃ, ᖁᐊᕐᓵᓇᕐᑐᒥᒃ ᐳᕐᑐᓂᓕᒻᒥᒃ ᐱᖁᔭᓂᒃ ᓯᖁᑦᑎᕆᖃᑦᑕᓂᕐᓂᒃ ᐊᒻᒪᓗ ᐃᒻᒥᓂᐊᕐᓂᓂᒃ, ᐃᓄᑐᐃᓐᓇᑕᖃᓗᐊᕐᑐᖅ ᑎᒍᔭᐅᒪᕕᓐᓂ ᐊᒻᒪᓗ ᐳᕐᑐᔪᒻᒪᕆᒻᒥᒃ ᐅᕕᒃᑫᑦ ᓴᐳᑦᔨᔭᐅᕕᖓᓄᑦ ᑐᓴᕐᑎᓯᒍᑎᐅᖃᑦᑕᑐᑦ ᐊᒻᒪᓗ ᐱᐊᕃᑦ ᓅᑕᐅᖃᑦᑕᓱᑎᒃ.

2016-ᒥ, ᑲᑎᖕᖓᔨᖁᑎᕗᑦ ᐊᓂᒎᑎᑎᑦᓯᓚᐅᕐᓯᒪᔪᑦ ᐱᕙᓪᓕᐊᓂᕐᒧᑦ ᐸᕐᓇᓯᒪᐅᑎᒥᒃ ᑭᐅᑦᔪᑎᐅᑎᓪᓗᒍ ᑭᖕᖒᒪᒋᔭᐅᔪᓄᑦ ᓯᕗᓪᓕᐅᔭᐅᖁᔭᐅᔪᓄᓪᓗ ᓇᓗᓀᕐᑕᐅᓯᒪᔪᓄᑦ ᐃᓄᑐᐃᓐᓇᓄᑦ ᓄᓇᕕᒻᒥᐅᓄᑦ. ᐸᕐᓇᓯᒪᐅᑎ ᓄᑖᒥᒃ ᐃᓱᐊᕐᓯᕕᓕᐅᖁᔨᔪᖅ ᐊᒻᒪᓗ ᓄᑖᒥᒃ ᐱᓇᓱᐊᕐᓂᒥᒃ ᐱᒍᑦᔨᓂᕐᒥᓗ ᐊᖏᓕᒋᐊᕆᖁᔨᑦᓱᓂ ᐃᓚᖃᕐᓱᓂ ᐅᑯᓂᖓ:

  • ᐊᓯᑦᔨᒋᐊᕆᓂᖅ ᒫᓐᓇ ᐃᓄᑑᓈᕐᑎᑎᓪᓗᒋᑦ ᐃᓄᒻᒪᕆᓐᓂᒃ ᐱᓇᓱᐊᕐᓂᐅᓲᒥᒃ ᖁᐊᕐᓵᓇᕐᑐᑰᕐᓯᒪᔪᓅᓕᖓᓂᕐᓴᕈᕐᑎᓗᒍ;
  • ᐱᕙᓪᓕᐊᑎᑦᓯᓂᖅ ᐃᓱᐊᕐᓯᕕᒻᒦᓗᑎᒃ ᐃᓚᒌᑦ ᐃᑲᔪᕐᑕᐅᓂᖓᓂᒃ ᐱᓇᓱᐊᕐᓂᒥᒃ ᑐᖕᖓᓱᑦᑎᓯᖃᑦᑕᓗᓂ ᐃᓚᒌᓕᒫᓂᒃ ᓴᐳᑦᔨᓗᒋᓪᓗ ᒪᒥᓴᕐᓂᖏᓐᓂ;
  • ᐱᕙᓪᓕᐊᑎᑦᓯᓂᖅ ᐱᐊᕋᑦᓴᓕᓐᓅᓕᖓᔪᓂᒃ ᐱᒍᑦᔨᓂᕐᓂᒃ ᐃᒥᐊᓗᒍᑕᐅᓯᒪᔪᓂᒃ ᐱᐊᕋᕐᑖᑎᑦᓯᑌᓕᒍᑎᑦᓴᒥᒃ;
  • ᐱᕙᓪᓕᐊᑎᑦᓯᓂᖅ ᐃᓄᑐᐃᓐᓇᓂᒃ ᐅᐃᕆᒪᓂᕐᒧᑦ ᐃᓱᐊᕐᓭᔨᓂᒃ ᐊᑐᐃᓐᓇᐅᒐᔭᕐᑐᓂᒃ ᐃᓱᐊᕐᓯᕕᐅᑉ ᓯᓚᑖᓂ ᐊᒻᒪᓗ ᐃᓱᐊᕐᓯᕕᒻᒦᓂᕕᓂᐅᑉ ᑭᖑᓂᖓᓂ ᐃᑲᔪᕐᑕᐅᓂᕐᒧᑦ ᐱᒍᑦᔨᓂᕐᓂᒃ;
  • ᐃᓪᓗᓕᐅᕐᓂᖅ 22-ᓂᒃ ᐃᓪᓕᓕᒻᒥᒃ ᐱᓇᓱᐊᕐᕕᒥᒃ ᐱᒍᓐᓇᓯᑎᑦᓯᒐᔭᕐᑐᒥᒃ ᐃᓱᐊᕐᓯᕕᒻᒥᒃ ᑐᖕᖓᓱᑦᑎᓯᓂᕐᒥᒃ 175-ᒧᑦ ᑎᑭᑦᑐᓂᒃ ᐱᒍᑦᔭᐅᔪᓂᒃ ᐊᕐᕌᒍᑕᒫᑦ;
  • ᐊᒥᓱᖕᖑᒋᐊᕆᓂᖅ ᐃᓱᐊᕐᓯᕕᐅᑉ ᐱᓇᓱᑦᑎᖏᓐᓂᒃ 20-ᒥᑦ 43-ᒧᑦ ᐱᓇᓱᑦᑎᓂᒃ;
  • ᐃᓪᓗᓕᐅᕐᓂᖅ 12-ᓂᒃ ᐱᓇᓱᑦᑏᑦ ᐃᓪᓗᓴᖏᓐᓂᒃ ᑐᖕᖓᓱᑦᑎᓯᓗᓂ ᐱᓇᓱᑦᑎᒋᐊᓪᓚᓂᒃ.
Our facility is closed and our services suspended until further notice - Read more
Nos installations sont fermées et nos services sont suspendus jusqu’à nouvel ordre - Tous les détails
ᐱᓇᓱᕝᕕᕗᑦ ᐅᒃᑯᐊᓯᒪᔪᖅ ᐊᒻᒪᓗ ᐱᒍᑦᔨᓂᕗᑦ ᓄᕐᖃᖓᑫᓐᓇᓱᑎᒃ ᖃᐅᔨᑎᑦᓯᒍᑎᐅᒋᐊᓪᓛᖏᓐᓂᒥᓂ - ᐊᓪᓚᓂᐊᕆᐊᓪᓚᕆ
+