ᖃᐅᔨᓗᒍ
36-ᓂᒃ ᐃᓪᓕᓕᒃ ᐃᓪᓗᖁᑎᕗᑦ

ᓴᓇᔭᐅᓯᒪᔪᖅ 2022-ᒥ, ᐃᓱᐊᕐᓯᕕᒃ ᐃᓪᓗᖁᑎᖓ ᑰᑦᔪᐊᒦᑦᑐᖅ (ᑯᐯᒻᒥ) ᐱᐅᔪᑐᐃᓐᓇᒥ ᖃᕐᖃᒦᑦᓱᓂ ᓄᕘᑉ ᐹᖓᓂ ᑕᑯᓐᓇᓱᓂ ᑰᒃᓱᐊᒃ ᑰᖓᓂᒃ. ᓴᓇᒪᓂᖓ ᐱᑦᓯᐊᓯᒪᔪᒻᒪᕆᐅᑦᓱᓂ ᐃᓪᓗᔪᐊᖅ, ᐃᓱᒪᒋᔭᐅᑦᓯᐊᓱᓂ ᐋᕐᕿᓱᕐᑕᐅᔪᕕᓂᖅ ᐊᒻᒪᓗ ᓲᓱᑦᓴᓯᐊᕐᑐᓱᑎᒃ ᐃᓄᐃᑦ ᐃᓗᕐᖁᓯᖓᓂᒃ, ᐱᑕᖃᕐᓱᓂᓗ ᒪᕐᕉᓂᒃ ᑲᑎᒪᖕᖏᑑᓐᓂᒃ, ᑐᔪᕐᒥᐅᕕᐅᒍᓐᓇᑐᓂᒃ ᐁᑉᐸᕇᓐᓄᑦ ᐊᒻᒪᓗ ᐱᐊᕋᖏᓐᓄᑦ, ᐃᓂᖃᕐᓱᓂ ᓈᒻᒪᓈᕐᑐᒥᒃ ᐃᒻᒥᒎᓈᕐᑎᑐᓄᑦ ᐅᕝᕙᓘᓐᓃᑦ ᐃᓚᒌᓄᑦ ᒪᒥᓴᕐᑎᑕᐅᔪᓄᑦ, ᐯᕆᑦᓯᕕᒃ ᐊᒻᒪᓗ ᐃᓕᓐᓂᐊᕕᒃ, ᒥᕐᓱᕕᒃ ᐊᒻᒪᓗ ᖃᓄᐃᓘᕐᕕᐅᒍᓐᓇᑐᖅ ᑌᑲᓃᑦᑐᓄᑦ, ᐊᒥᓱᒐᓓᑦ ᐊᓪᓚᕖᑦ ᐊᒻᒪᓗ ᑲᑎᒪᕖᑦ ᖃᕆᐊᑦ ᐱᓇᓱᑦᑎᓄᑦ.

ᑐᔪᕐᒥᐅᕕᒃ

ᐃᓱᐊᕐᓯᕕᒃ ᐃᓪᓗᐊᕈᓯᖃᕐᑐᖅ 6-ᓂᒃ ᐊᖏᔪᓂᒃ ᖃᕆᐊᓂᒃ ᐊᕕᑦᑐᓯᒪᑦᓱᑎᒃ ᒪᕐᕉᒃ ᐃᒻᒥᒎᕐᑑᒃ. ᐃᓚᒌᑦ ᐱᕕᖃᕈᓐᓇᑐᑦ ᑐᔪᕐᒥᐅᕕᒻᒥᓅᕐᓗᑎᒃ, ᐃᓄᑦᑐᐊᑦ ᐅᕝᕙᓘᓐᓃᑦ ᐁᑉᐸᕇᑦ ᑐᔪᕐᒥᐅᖃᑎᒌᒍᓐᓇᑐᐃᑦ ᐃᓂᖃᕐᓂᖏᑦ ᒪᓕᓪᓗᒋᑦ. ᐊᑐᓂᑦ ᖃᕆᐊᑦ ᐊᑕᐅᓯᕐᒥᒃ ᐊᓇᕐᕕᓖᑦ ᐊᒻᒪᓗ ᒪᕐᕉᓂᒃ ᖃᕆᐊᖃᕐᓱᑎᒃ ᐊᒻᒪᓗ ᑐᔪᕐᒥᐅᕕᐅᒍᓐᓇᓱᑎᒃ ᐱᐊᕌᕈᓕᓐᓄᑦ ᐊᒻᒪᓗ ᐱᐊᕋᓕᓐᓄᑦ, ᐱᐊᕃᑦ ᐃᓪᓕᖏᓐᓂᒃ ᖄᖏᓐᓂᓗ ᐱᑕᖃᕐᓱᑎᒃ. ᐃᓘᓐᓇᑎᒃ ᖃᕆᐊᑦ ᐃᒐᓕᐊᐱᑦᑕᖃᕐᓱᑎᒃ ᐊᒻᒪᓗ ᐳᓛᕐᕕᒥᒃ.

ᓂᕆᕕᒃ

ᐃᓱᐊᕐᓯᕕᐅᑉ ᓂᕆᖃᕐᑎᑕᐅᓂᕐᒧᑦ ᐱᒍᑦᔨᕕᖓ ᐱᐅᓂᕐᐹᓯᐊᒥᒃ ᑕᑯᓐᓇᐅᔮᕐᕕᓕᒃ. ᐃᓄᑦᑕᖃᕈᓐᓇᓱᓂ 45-ᓂᒃ ᓂᕆᕕᐅᒍᓐᓇᓱᑎᒃ ᐋᕐᕿᓱᕐᓯᒪᔪᓂᒃ.

ᐃᓅᖃᑎᒌᑦ ᑲᑎᕝᕕᖓ

ᖃᒃᑭᖃᓗᒃ ᐊᒻᒪᓗ ᒪᕐᕉᒃ ᖃᒃᑮᒃ ᐊᑦᔨᐅᖏᑦᑑᑎᑦᓯᔫᒃ ᐃᓱᐊᕐᓯᕕᒻᒥᒃ. ᐊᒻᒪᓗᑭᑕᐅᓕᖓᑦᓱᑎᒃ ᐊᒥᓱᒋᐊᕐᓂᒃ ᐃᓄᓐᓄᑦ ᑲᑎᕕᐅᒍᓐᓇᓱᑎᒃ ᐊᒻᒪᓗ ᓴᓇᔭᐅᒪᑦᓱᑎᒃ ᓱᖃᑦᓯᕕᐅᖃᑦᑕᓚᖓᑎᓪᓗᒋᒃ, ᑲᑎᒪᕕᐅᓗᑎᓪᓗ ᒪᒥᓴᕐᑐᓄᑦ, ᐊᓯᖏᓐᓄᓗ.

ᑕᙯᕐᓯᕕᒃ

ᖃᓂᒋᔭᖓᓂ ᑕᒪᖏᓐᓄᑦ ᒪᕐᕉᓄᒃ ᖃᒃᑮᓄᑦ ᑲᑎᕕᐅᒍᓐᓇᑐᖅ ᐳᓛᕐᕕᒃ ᑌᑲᓃᑦᑎᐊᓕᒫᕗᑦ ᑕᙯᕐᓯᕕᒋᒍᓐᓇᑕᖓ, ᐊᓪᓚᓂᐊᕐᕕᒋᓗᒍ ᐊᒻᒪᓗ ᑕᕐᕋᓕᔮᕐᕕᒋᓗᒍ ᐃᑦᓯᕙᐅᑕᖃᕐᓗᑎᒃ ᐃᓱᐊᕐᑐᓂᒃ ᐊᕿᓗᖃᓂᒃ.

ᐊᒥᓲᖕᖏᑐᑦ ᑲᑎᒪᕕᖓ ᐊᒻᒪᓗ ᐃᒻᒥᒎᓈᕐᑎᑐᑦ ᒪᒥᓴᕐᑕᐅᕕᖓ ᖃᕆᐊᖅ

ᐃᓱᐊᕐᓯᕕᐅᑉ ᐃᓪᓗᔪᐊᖓ ᓴᓇᔭᐅᒪᔪᖅ ᐱᐅᓂᕐᐹᒥᒃ ᑭᖕᖒᒪᒋᔭᖏᓐᓂᒃ ᓈᒻᒪᓈᖁᓪᓗᒍ ᐊᑐᕆᐊᖃᕐᓂᖏᓐᓄᑦ ᐱᓇᓱᐊᕈᓯᕐᓂ 8-ᓂ ᐃᓚᒌᓄᑦ ᒪᒥᓴᕐᑎᓯᕐᓂᒧᑦ ᐱᓇᓱᐊᕐᓂᓄᑦ ᑌᑲᓃᑦᑎᐊᑎᓐᓂᒃ ᑕᙯᕐᓯᓯᐊᕐᑎᓯᒍᓐᓇᓱᑎᒃ ᐊᒻᒪᓗ ᖃᕆᐊᖏᑦ ᐃᓱᐊᕐᑑᓱᑎᒃ ᐃᒻᒥᒎᓈᕐᑎᑐᓄᑦ ᐊᒻᒪᓗ ᐃᓚᒌᓄᑦ ᒪᒥᓴᕐᓂᒦᑦᑎᓗᒋᑦ.

ᐯᕆᑦᓯᕕᒃ ᐊᒻᒪᓗ ᐃᓕᓐᓂᐊᑕᖏᓐᓂᒃ ᐃᑲᔪᕐᑕᐅᕕᒃ

ᑕᒪᖏᒃ ᐯᕆᑦᓯᕖᒃ ᐊᒻᒪᓗ ᐃᓕᓐᓂᐊᕖᒃ ᖃᕆᐊᒃ ᐱᒍᓐᓇᑎᑦᓯᔫᒃ ᐱᐊᕋᕐᓂᒃ ᐊᒻᒪᓗ ᐅᕕᒐᕐᑐᓂᒃ ᐱᒐᓱᐊᕐᓂᒥᒃ ᐱᕈᕐᐸᓕᐊᓂᕐᒧᑦ ᑌᑲᓃᓐᓂᒥᓂ ᓴᓗᐊᕐᓴᕕᒻᒥ. ᐅᑭᐅᓕᓐᓂ 0-ᒥᑦ 17-ᒧᑦ, ᐱᐊᕌᕈᐃᑦ, ᐱᐊᕃᑦ ᐊᒻᒪᓗ ᐅᕕᒐᕐᑐᐃᑦ ᑐᖕᖓᓱᑦᑎᑕᐅᔪᑦ ᒪᓕᓪᓗᑎᒃ ᐊᖓᔪᕐᖄᒥᓂᒃ ᐊᒻᒪᓗ ᑲᒪᔨᒥᓂᒃ ᒪᒥᓴᕐᓂᒦᑦᑎᓗᒋᑦ. ᐃᓕᓐᓂᐊᑎᑦᓯᔨᕗᑦ ᐊᒻᒪᓗ ᐃᑲᔪᕐᑏᑦ ᐃᓕᓐᓂᐊᒐᕐᓂᒃ ᐊᑐᐃᓐᓇᐅᔪᑦ ᐱᓇᓱᐊᕈᓯᐅᑉ ᐃᓗᐊᓂ 9-ᖑᒥ 5-ᖕᖑᒧᑦ ᐊᒻᒪᓗ ᐅᐱᒍᓱᑦᓱᑎᒃ ᐱᑕᖃᕐᑎᓯᒋᐊᒥᒃ ᐊᑦᔨᒌᖕᖏᑐᓂᒃ ᐊᓕᐊᓇᕐᑐᓂᒃ ᐊᒻᒪᓗ ᐱᐅᔪᓂᒃ ᐃᓕᓐᓂᐊᑎᑦᓯᒍᑎᓂᒃ, ᐊᒻᒪᓗ ᐃᑉᐱᒋᔭᖃᕐᓱᑎᒃ ᐃᓕᓐᓂᐊᑎᓂᒃ ᑲᔪᓯᑎᓪᓗᒋᑦ ᐃᓕᓐᓂᐊᑕᖏᓐᓂᒃ ᐅᓪᓗᑯᑦ.