ᐊᑑᑎᓯᒪᔭᕗᑦ ᑭᖑᓂᑦᑎᓂ

ᐱᒋᐊᕐᑎᑕᕕᓂᖅ 1994-ᒥ, ᐃᓱᐊᕐᓯᕕᒃ ᓄᓇᕕᒻᒥ ᐅᐃᕆᒪᔪᑦ ᐃᑲᔪᕐᑕᐅᕕᖓ ᐱᒋᐊᓚᐅᕐᓯᒪᔪᖅ ᓯᕗᓕᕐᑕᐅᓱᓂ ᑰᑦᔪᐊᑉ ᑲᕙᒫᐱᖓᓄᑦ ᐊᒻᒪᓗ ᓴᐳᑦᔭᐅᓱᓂ ᒪᑭᕝᕕᒧᑦ. ᓯᕗᓪᓕᐹᒥ, ᐃᓱᐊᕐᓯᕕᒃ ᓄᓇᓕᒻᒥᒃ ᑐᖕᖓᕕᖃᕐᓱᓂ ᑎᒥᐅᔫᓚᐅᕐᓯᒪᔪᖅ ᑐᓂᒪᑦᓱᓂ ᐊᑐᐃᓐᓇᖃᕐᓂᒧᑦ ᐅᐃᕆᒪᔪᓕᕆᓂᕐᒥᒃ ᐱᒍᑦᔨᓂᕐᒥᒃ ᑰᑦᔪᐊᒥᐅᓄᑦ ᑭᓯᐊᓂ.

ᓯᕗᓪᓕᐹᑦ ᐊᕐᕌᒍᐃᑦ ᐊᓂᒍᕐᑎᓗᒋᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᖕᖓᔩᑦ ᐃᓕᑕᕐᓯᕙᓪᓕᐊᓕᓚᐅᕐᓯᒪᔪᑦ ᑭᖕᖒᒪᓇᕐᓂᖓᓂᒃ ᐊᑐᐃᓐᓇᖃᕆᐊᖃᕐᓂᐅᑉ ᐱᒍᑦᔨᓂᒋᐊᓪᓚᓂᒃ ᐃᓄᓐᓄᑦ ᐋᖓᔮᓐᓇᑐᕐᑐᓗᐊᖃᑦᑕᑐᓄᑦ ᓄᓇᕕᒻᒥ. 1998-ᒥ, ᐃᓱᐊᕐᓯᕕᒃ ᐊᖏᓚᐅᕐᓯᒪᔪᖅ ᐅᒃᑯᐃᓂᒋᐊᒥᒃ ᐃᓱᐊᕐᓯᕕᒻᒦᑎᑦᓯᓗᓂ ᐱᓇᓱᐊᕐᓂᒥᒃ ᐃᓘᓐᓇᖏᓐᓄᑦ ᔦᒥᔅ ᐯ ᑯᐯᒃᓗ ᑕᕐᕋᖓᑕ ᐊᖏᖃᑎᒌᓐᓂᖓᓄᑦ ᐃᓚᐅᔫᔪᓄᒃ.

2000-ᒥ, ᐃᓱᐊᕐᓯᕕᒃ ᑮᓇᐅᔦᓐᓂᐊᓚᐅᕐᓯᒪᔪᖅ ᐱᔭᕋᓕᑦᓱᓂᓗ. ᐊᒻᒪᓗ, ᐃᓱᐊᕐᓯᕕᒦᓗᑎᒃ ᒪᒥᓴᕐᓂᒥᒃ ᐱᓇᓱᐊᕐᓂᖅ ᐊᓯᑦᔨᑐᕐᓯᒪᒐᓚᑐᐃᓐᓇᓱᓂ ᒪᒥᓴᕈᑎᐅᓚᐅᕐᓯᒪᔪᖅ ᖃᓪᓗᓈᑦ ᓄᓇᖓᓐᓂ ᐊᑐᕐᑕᐅᓲᖑᑦᓱᓂ ᐃᓚᖓ ᐋᕐᕿᒋᐊᕐᓯᒪᑦᓱᓂ ᐃᓄᐃᑦ ᑕᑯᓐᓇᑕᖓᑎᒍᑦ. ᑭᓯᐊᓂ, ᑲᔪᓯᑦᓯᐊᓚᐅᕐᓯᒪᖕᖏᑐᖅ ᑌᒣᓘᕐᓱᓂ. ᐊᓱᐃᓛ, ᑲᑎᖕᖓᔩᑦ ᐊᓯᑦᔨᑐᐃᓪᓚᕆᒋᐊᖃᓕᓚᐅᕐᓯᒪᔪᑦ ᐱᓇᓱᑦᑎᓂᒃ ᐊᒻᒪᓗ ᐃᖏᕐᕋᑎᑦᓯᓂᕐᓂᒃ ᑐᑭᑖᓕᕐᓱᑎᒃ ᐅᒃᑯᐊᓂᑫᓐᓇᕆᐊᒥᒃ ᑎᒥᐅᔪᒥᒃ.

2002-ᒥ, ᓄᑖᑦᓯᐊᖅ ᐅᑭᐅᕐᑕᑐᒥᑦ ᐱᔪᖅ ᐊᓄᕆ ᓱᐴᓕᓚᐅᕐᓯᒪᔪᖅ ᐃᓱᐊᕐᓯᕕᒻᒧᑦ. ᐃᓱᐊᕐᓯᕕᒃ ᐅᒃᑯᐃᕆᐊᓪᓚᓚᐅᕐᓯᒪᔪᖅ ᐊᓪᓚᓯᒪᓪᓚᕆᓕᕐᓱᓂᓗ Registraire des Entreprises du Québec ᐊᑖᓂ. ᓄᑖᓂᒃ ᑲᑎᖕᖓᔨᓕᐅᓚᐅᕐᓯᒪᔪᖅ ᐊᒻᒪᓗ ᓯᕗᓪᓕᐸᐅᖃᑕᐅᓕᕐᓱᓂ ᑲᑎᖕᖓᕕᓐᓂ ᓄᓇᕕᒻᒥ ᑲᑎᖕᖓᔨᖃᕐᓱᓂ ᐊᑭᓕᕐᑐᑕᐅᖕᖏᑐᓂᒃ.

2006-ᒥ, ᓄᑖᑦ ᓯᕗᓕᕐᑏᑦ ᐋᒻᒪᑎᑦᓯᒋᐊᓪᓚᓚᐅᕐᓯᒪᔪᑦ ᐃᓱᐊᕐᓯᕕᐅᑉ ᑎᓕᔭᐅᒪᐅᑎᖓᓂᒃ ᐊᒻᒪᓗ ᑐᑭᑖᕐᓱᑎᒃ ᐱᓇᓱᐊᓚᖓᓂᕐᒥᒃ ᐱᕙᓪᓕᐊᑎᑦᓯᓂᕐᒥᒃ ᐊᑦᔨᐅᖏᑦᑐᒥᒃ ᐱᓇᓱᐊᕐᓂᒥᒃ ᐋᖓᔮᓐᓇᑐᕐᑐᓗᐊᖃᑦᑕᓂᕐᒧᑦ ᐃᑲᔪᕐᑕᐅᕕᒻᒥᒃ ᐃᓪᓗᔪᐊᒥᒃ ᐱᓇᓱᐊᕐᓯᒪᓂᖏᑎᒍᑦ ᐱᔪᓐᓇᐅᑎᓖᑦ ᐊᒻᒪᓗ ᓄᓇᓕᒻᒥ ᐱᓯᒪᔪᑦ ᑮᓇᐅᑦᔭᓴᕋᑎᒃ ᐱᓇᓱᐊᕐᑐᑦ ᓄᓇᕕᒻᒥᑦ ᐱᓯᒪᔪᑦ. ᑲᑐᑦᔨᓱᑎᒃ, ᐋᕐᕿᓱᐃᔪᕕᓃᑦ ᓇᒻᒥᓂᖅ ᓴᓇᑦᓱᒍ ᒪᒥᓴᕐᓂᒥᒃ ᐱᓇᓱᐊᕐᓂᒥᒃ ᓄᐃᑕᐅᓯᒪᔪᒥᒃ ᐃᓄᑐᐃᓐᓀᑦ ᐃᓪᓕᕆᔭᖏᓐᓂᒃ ᑐᖕᖓᕕᖃᕐᓱᓂ ᐊᒻᒪᓗ ᐱᐅᓯᒋᐊᕐᑕᐅᓱᓂ ᐱᐅᓂᕐᐹᓄᑦ ᐱᓇᓱᐊᕈᓯᕐᓄᑦ ᐅᐃᕆᒪᓂᓕᕆᓂᕐᒥ. ᐱᓇᓱᐊᕐᓂᖅ ᐊᑦᔨᐅᖏᑦᑐᕈᕐᓯᒪᔪᖅ ᐊᒻᒪᓗ ᐃᓄᑐᐃᓐᓇᓅᓕᖓᑦᓱᓂ ᖁᐊᕐᓵᓇᕐᑐᑰᕐᓯᒪᓂᕐᒥᒃ ᐱᓇᓱᐊᕐᓱᓂ ᐱᒍᑦᔨᓂᐅᑦᓱᓂ ᐋᖓᔮᓐᓇᑐᕐᑐᓗᐊᕐᓂᒨᓕᖓᑦᓱᓂ.

ᑌᒪᖕᖓᓂᓂᑦ, ᐃᓱᐊᕐᓯᕕᒃ ᒥᓇᐅᒥᑦᓯᖃᑦᑕᓯᒪᔪᖅ ᐊᒥᓱᑦ ᖃᐅᔨᒪᓂᖏᓐᓂᒃ, ᐱᓇᓱᐊᖃᑦᑕᓯᒪᔪᓂᒃ ᐊᒻᒪᓗ ᐱᒍᓐᓇᓯᐊᕐᓱᑎᒃ ᐱᓇᓱᑦᑎᓂᒃ ᐊᒻᒪᓗ ᐊᑦᔨᐅᖏᑦᑐᒥᒃ ᐃᓗᕐᖁᓯᒃᑯᑦ ᐱᓇᓱᐊᕐᓂᒥᒃ ᐃᑲᔪᕐᓂᒧᑦ ᐃᓄᑐᐃᓐᓇᓂᒃ ᓄᓇᕕᒻᒥᐅᓂᒃ ᐅᐃᕆᒪᓂᕐᑕᖃᖕᖏᑐᒥᒃ ᐃᓅᓯᕐᑖᕋᓱᐊᕐᑎᓗᒋᑦ. 42-ᓂᒃ ᐅᓪᓗᓂᒃ ᐃᓱᐊᕐᓯᕕᒻᒦᓗᑎᒃ ᒪᒥᓴᕐᓂᒥᒃ ᐱᓇᓱᐊᕐᓂᕗᑦ ᐃᓄᑦᑎᑑᕐᑐᓂᒃ ᐱᓇᓱᐊᕈᑎᖃᕐᓱᑎᒃ ᐊᒻᒪᓗ ᐃᓱᐊᕐᓭᔨᖃᕐᓱᑎᒃ ᖃᐅᔨᒪᔭᐅᓂᑦᑎᓂᒃ ᐱᕈᕐᑎᓯᓯᒪᔪᖅ.

ᑲᑎᖕᖓᔩᑦ ᑐᓂᒪᑦᓯᐊᓂᖓ ᐊᒻᒪᓗ ᐃᓚᐅᑦᓯᐊᓂᖓ ᐱᐅᔪᒥᒃ ᓱᕐᕃᓯᒪᓪᓚᕆᑐᖅ ᐃᓱᐊᕐᓯᕕᐅᑉ ᓯᕗᓂᖓᓄᑦ. ᐊᔪᐃᓐᓇᓃᑦ, ᐅᑉᐱᕈᓱᓐᓂᖅ ᐊᒻᒪᓗ ᓯᕗᓕᕐᑏᑦ ᑫᓪᓗᐊᓯᒪᓪᓚᕆᑦᑐᑦ ᑎᒥᐅᔪᒥᒃ ᐱᔭᕆᒐᓱᑦᑕᒥᓂᒃ ᐱᓇᓱᐊᕐᑎᓗᒍ ᐊᒻᒪᓗ ᓈᓓᓐᓇᓱᑎᒃ ᓄᓇᕕᒻᒥ ᑭᖕᖒᒪᒋᔭᑦᑎᓂᒃ ᑭᖑᕚᕇᑎᒍᑦ ᖁᐊᕐᓵᓇᕐᑐᑰᕐᓯᒪᓂᖅ ᐱᑦᔪᑎᒋᑦᓱᒍ ᐊᒻᒪᓗ ᐋᖓᔮᓐᓇᑐᕐᑐᓗᐊᖃᑦᑕᓂᕐᒧᑦ ᐃᑲᔪᕐᑕᐅᓂᖅ.

 

25-ᓂᒃ ᐊᕐᕌᒍᓂᒃ ᓇᓪᓕᐅᓂᕐᓯᐅᓂᕗᑦ

2019-ᒥ, ᐃᓱᐊᕐᓯᕕᒃ ᓄᓇᕕᒻᒥ ᐅᐃᕆᒪᔪᑦ ᐃᑲᔪᕐᑕᐅᕕᖓ ᓇᓪᓕᐅᓂᕐᓯᐅᑐᖅ 25-ᓂᒃ ᐊᕐᕌᒍᓂᒃ ᐱᐅᔪᒥᒃ ᐃᓗᕐᖁᓯᒃᑰᑐᒥᒃ ᐱᓇᓱᐊᕐᓯᒪᓕᕐᓂᒥᓂᒃ ᐃᓱᐊᕐᓯᕕᒻᒦᓱᑎᒃ ᐅᐃᕆᒪᔪᓕᕆᓂᕐᒥᒃ ᐱᒍᑦᔨᓂᕐᓂᒃ ᐃᓄᑐᐃᓐᓇᓄᑦ ᓄᓇᕕᒻᒥ. ᑖᒃᑯᓇᓂ 25-ᓂ ᐊᕐᕌᒍᓂ, ᑎᒥᐅᔪᖁᑎᕗᑦ ᐱᔭᕋᓕᖃᑦᑕᓯᒪᔪᖅ ᐊᑦᔨᒌᖕᖏᑐᑎᒍᑦ ᐃᖏᕐᕋᑎᑦᓯᓂᐅᑉ ᐳᕐᑐᓂᖏᑎᒍᑦ ᑭᓯᐊᓂ ᓇᑯᕐᒪᑕ ᑐᓂᒪᔪᑦ, ᐊᑭᓕᕐᑐᑕᐅᖕᖏᑐᑦ ᑲᑎᖕᖓᔨᕗᑦ, ᐃᓱᐊᕐᓯᕕᒃ ᑲᔪᓯᑦᓯᐊᑐᖅ ᐊᒥᓱᓂᒃ ᐊᓕᐊᓇᕐᑐᓂᒃ ᐱᓇᓱᐊᕐᓱᓂ.

ᑌᒣᑦᑐᒧᑦ ᑎᑭᐅᑎᓂᖅ ᓇᓪᓕᐅᓂᕐᓯᐅᑕᐅᑦᓯᐊᕆᐊᓕᒃ, ᐊᒻᒪᓗ ᐃᓱᐊᕐᓯᕕᒃ ᑖᑦᓱᒥᖓ ᐱᕕᑦᓴᒥᒃ ᐊᑐᕐᓱᓂ ᑕᒃᑲᓂ ᐊᕐᕌᒍᒥ ᓇᓪᓕᐅᓂᕐᓯᐅᓂᑦᑎᓂᒃ ᓇᓗᓀᒃᑯᑕᒥᓂᒃ ᐱᐅᓰᒋᐊᓚᖓᔪᖅ, ᓄᑕᐅᓯᓖᓗᓂ ᖃᕆᑕᐅᔭᒃᑰᕈᑎᒥᓂᒃ ᐊᒻᒪᓗ ᑐᓴᐅᒪᖃᑦᑕᐅᑎᒍᑎᒥᓂᒃ ᐊᒻᒪᓗ ᑕᕐᕋᓕᔮᒐᓕᐅᕐᓗᓂ ᑎᒥᐅᔪᒨᓕᖓᔪᒥᒃ. ᐱᕕᑦᓴᓯᐊᕌᓘᒻᒥᔪᖅ ᓇᑯᕐᒦᓂᕐᒧᑦ ᐊᑯᓃᕐᑐᒥᒃ ᐱᓇᓱᐊᖃᑎᑦᑎᓂᒃ ᓴᐳᑦᔨᓯᒪᔪᓂᒃ ᐱᔭᕆᒐᓱᑦᑕᑎᓐᓂᒃ ᐱᒋᐊᕐᓂᖓᓂᓂᑦ. ᓇᓪᓕᐅᓂᕐᓯᐅᓂᒃᑯᑦ 25-ᓂᒃ ᐊᕐᕌᒍᓂᒃ, ᐱᒋᐊᕈᒪᕗᒍᑦ ᑲᔪᓯᑦᓯᐊᑐᒥᒃ 25-ᓂᒃ ᐊᕐᕌᒎᓚᖓᓕᕐᒥᔪᓂᒃ ᐱᕙᓪᓕᖁᓗᒋᑦ ᐃᓄᑐᐃᓐᓇᓕᒫᑦ ᓄᓇᕕᒻᒥᐅᑦ ᑭᖕᖒᒪᑦᓯᔪᑦ ᐱᒍᑦᔨᓂᑦᑎᓂᒃ.